Dejla 26

O Pavle braninela pe anglo Agripa

1Togaš o Agripa phengja e Pavleske: “Akana šaj kereja lafi te branine tut.”

O Pavle vazdingja po vas hem počmingja te vakerel: 2“Care Agripa, radosno sijum soske avdive angla tute ka braninav man taro sa so tužinena man o Evreja, 3a najviše adaleske so tu but šukar džaneja sa o adetija e Evrejengere hem i vera ko so ola na složinena pe. Adaleske molinava tut te šune man trpelivo.

4Sa o Evreja džanena mo životo sar živingjum le taro tiknipe maškar mo narodo hem ko Erusalim. 5Džanena man angleder hem šaj, te mangena, te svedočinen deka me živingjum sar farisejco spored o pravila tari najstrogo grupa amare verakiri. 6A akana sudinela pe mange bašo mi nada ko vetuvanje so o Devel dengja le amare parapaponge. 7Akava tano o vetuvanje so amare dešuduj plemija nadinena pe deka ka ovel pherdo, dži kote iskreno služinena e Devleske dive rat. Baši akaja nada, care, o Evreja tužinena man. 8Soske mislinena deka o Devel našti te vazdel e mulen?

9Hem me da mislingjum deka trebela te kerav sa so šaj te džav protiv o anav e Isuseskoro taro Nazaret. 10Adava da kergjum ko Erusalim: bute sveto manušen phandlum ko zatvor koga o prvosveštenikija denge man vlast. A koga mudarge len, me složingjum man adaleja. 11But puti gelum tari jekh sinagoga ki javer te kazninav len, hem čhivava len sine te hulinen upro Isus. Doborom sijum sine holamo upro lende so progoningjum len dži ko javerengere gradija da.”

O Pavle vakerela sar obratingja pe

12“Agjar me koga dobingjum vlast hem koga mukhle man o prvosveštenikija, počmingjum te džav ko Damask. 13I paše dešuduj o sati paloručko, care, sar džava sine ko drumo, dikhlum svetlina taro nebo, soj tani posilno taro kham, svetingja upra mande hem upro okolende so sine mancar. 14Sarinen pelem ki phuv, a me šungjum glaso so ki Evrejsko čhib vakergja mange: ‘Savle, Savle, soske progonineja man? Pharo tano te borine tut protiv mi vojla!’

15Togaš pučljum le: ‘Koj sijan tu, Gospode?’

O Gospodari odgovoringja mange: ‘Me sijum o Isus, kas so tu progonineja. 16A akana ušti hem tergjov ko pre. Pojavingjum man tuke te čhivav tut te ove mo sluga hem svedoko taro adava so dikhlan hem so ka dikhe mandar. 17Me ka spasinav tut te narodostar hem e manušendar taro javera nacije, kaste so ka bičhavav tut 18te phrave lengere jakha hem te irane len tari temnina ki svetlina, tari vlast e Bengeskiri ko Devel, te šaj te priminen oprostiba e grevonge hem than maškar okolende soj posvetime veraja ki mande.’

19Adaleske care Agripa, na sijum sine neposlušno e neboskere vizijake. 20Prvo propovedingjum e manušenge ko Damask, palo adava okolenge ko Erusalim hem ki celo Judejsko phuv, a palo adava e manušenge taro javera nacije – te pokajnen pe hem te iranen pe ko Devel hem te keren šukar dejla so lencar ka sikaven deka pokajnge pe.

21Adaleske astarge man nesave Evreja ko Hrami hem mangle te mudaren man. 22Ama o Devel arakhla man sa dži ko akava dive, hem adaleske akana tergjovava akate hem svedočinava e čorolenge hem e barvalenge. Me na vakerava ništo javer osven okova so o prorokija hem o Mojsej phengja deka ka ovel: 23deka o Hristos ka cidel hem sar prvo ka uštel taro mule, hem agjar ka propovedinel o evangelije e svetlinakoro e Evrejenge hem e javere nacijenge.”

24Dži kote o Pavle braninela pe sine akale lafencar, o Fest silno vikingja: “Pavle, tu na sijan sasto! Taro but so džaneja dilindilan.”

25A o Pavle odgovoringja leske: “Me na sijum dilino, cenimeja Fest, nego vakerava čačutne hem svesna lafija. 26O caro o Agripa džanela sa akava hem adaleske me slobodno kerava lafi. Džanava deka džanela sa akala bukja, adaleske so sa adava na ulo ko nesavo garavdo than. 27Care Agripa, verujneja li e prorokon? Džanava deka verujneja.”

28Togaš o Agripa odgovoringja e Pavleske: “Tu mislineja deka panda hari ka ubedine man te ovav Hristijani!”

29A o Pavle odgovoringja leske: “Panda hari ili but, me molinava e Devle na samo tu, nego sarinen da so avdive šunena man te oven sar me, ama bizo akala lancija.”

30Togaš uštile o caro, o upravniko, i Verenika hem okola so bešena sine lencar, 31i koga iklile počminge te keren lafi maškar peste: “Akava manuš na kerela ništo so zaslužinela meriba ili zatvor.”

32A o Agripa vakergja e Festeske: “Akava manuš te na rodel sine e Rimeskoro caro te sudinel leske, ka šaj sine te ovel oslobodimo.”