Dejla 25

O Pavle anglo Fest

1Trin dive sar o Fest ulo upraviteli ki Judeja, gelo tari Cezarija upre ko Erusalim. 2Adathe o prvosveštenikija hem o Evrejska vodačija vakerge leske baši so tužinena e Pavle hem zamolinge e Feste 3te kerel lenge usluga te naredinel te anen e Pavle ko Erusalim, adaleske so ola spreminge leske zamka ko ekvaš o drumo te mudaren le.

4Ama o Fest odgovoringja lenge: “O Pavle tano ko zatvor ki Cezarija, hem me da ka džav panda hari adathe. 5Neka aven mancar nekoj taro tumare vodačija hem neka tužinen e manuše ako tano nešto krivo.”

6Palo adava so sine lencar ofto dži ko deš dive, o Fest irangja pe ki Cezarija. O tajsutno dive bešla ki stolica e sudoskiri hem naredingja te anen e Pavle. 7Koga o Pavle khugja, o Evrejska vodačija so ale taro Erusalim opkružinge le hem počminge te vakeren but phare bukja protiv leste, ama našti sine te dokažinen len.

8Togaš o Pavle braningja pe vakerindor: “Na kergjum ništo lošno soj tano protiv o Zakoni e Evrejengoro, ni protiv o Hrami, ni protiv o caro.”

9Ama o Fest, mangindor te kerel usluga e Evrejenge, pučlja e Pavle: “Mangeja li te dža ko Erusalim hem adathe te sudinel pe tuke, angli mande bašo akava?”

10A o Pavle odgovoringja leske: “Me akana tergjovava anglo e Rimsko careskoro sudo, kote so trebno te ovav sudimo. Na kergjum ništo lošno e Evrejenge, sar so tu korkori džaneja adava. 11Ako sijum krivo hem te kergjum nešto so zaslužinava meriba, na našava taro meriba. Ama, ako akala manuša bizo ništo kerena man krivo, nikas nane pravo te del man lenge ko vasta. Me mangava te sudinel pe mange anglo o Rimsko caro, o Cezar.”

12Togaš o Fest sovetingja pe ple manušencar hem phengja e Pavleske: “Mangeja te dža anglo e Rimeskoro caro, anglo leste ka dža da.”

O Pavle anglo caro Agripa

13Palo nekozom dive, ki Cezarija alo o caro Agripa hem i Verenika te dikhen e Feste.

14Adaleske so adathe bešle but dive, o Fest vakergja e caroske o slučaj e Pavleskoro: “Akate isi jekh manuš so o Feliks mukhla le ko zatvor. 15Koga sijum sine ko Erusalim, o prvosveštenikija hem o starešine e Evrejengere tužinge le hem rodinge te ovel osudimo.

16Me phengjum lenge deka ko Rimjajna nane adeti te sudinen nekas sa dži kote angleder na tergjola anglo adala so tužinena le, hem sa dži kote na dobinela šanca te braninel pe. 17Adaleske, koga ale mancar akate, me odma o tajsutno dive, bizo te odložinav, bešlum ki stolica e sudoskiri hem naredingjum te anen adale manuše. 18O manuša so tužinena le sine opkružinge le, ama na tužinge le bašo ni jekh lošnipe so me očekujngjum. 19Nego ola leja akošena pe sine baši lengiri vera hem bašo nesavo Isus, so mulo, kaske so o Pavle vakerela sine deka tano dživdo. 20Me našti sine te svatinav adava akošiba maškar lende, i pučljum e Pavle dali mangela te džal ko Erusalim hem adathe te sudinel pe leske bašo adava. 21Ama, adaleske so o Pavle rodingja te arakha le dži ko vreme koga o baro caro e Rimeskoro ka sudinel leske, naredingjum te ačhol ko zatvor dži kote na bičhavava le ki leste.”

22Togaš o Agripa phengja e Festeske: “Me da mangava te šunav akale manuše.”

A o Fest odgovoringja leske: “Ka šune le tajsa.”

23O tajsutno dive o Agripa hem i Verenika ale so svečano ceremonija e narednikoncar hem e poznata manušencar taro gradi hem khuge ki sala, a o Fest naredingja te anen e Pavle.

24Togaš o Fest vakergja leske: “Care Agripa, hem sarine tumen so sijen akate amencar, dikhena li akale manuše! Baši leske molinge man sa o manuša taro Erusalim hem akatar tari Cezarija, vakerindor deka na trebela te živinel. 25Ama me na arakhlum deka ov kergja nešto so zaslužinela meriba, ama adaleske so ov korkori mangla te sudinel leske o baro caro e Rimeskoro, odlučingjum te bičhavav le ki leste. 26Adaleske so nane man ništo odredimo so te pišinav baši lestar me gospodareske, angjum le angli tumende, a posebno angla tute care Agripa, te šaj palo akava ispitibe te ovel man nešto te pišinav. 27Soske nane smisla te bičhavav e zatvoreniko ko Rimsko caro bizo te na pišinav soske akava manuš tano tužimo.”