Dejla 23

1O Pavle dikhla ko manuša taro Sovet hem phengja lenge: “Phrajlalen, me sa dži ko akava dive živingjum anglo Devel ki čisto sovest.”

2Ko adava o baro svešteniko o Ananija naredingja okolenge so tergjona sine uza leste te khuven e Pavle ko muj.

3A o Pavle vakergja leske: “Tut o Devel ka khuvel tut, dujmujaleja – zido makhlo ko parno! Tu bešeja akate te sudine mange spored o Zakoni, a o isto adava Zakoni tu phageja le adaleja so naredineja te khuven man!”

4A okola so tergjona sine uza leste phenge: “Sar šaj te uvredžine e Devleskere bare svešteniko!”

5A o Pavle odgovoringja lenge: “Na džangjum, phrajlalen, deka ov tano o baro svešteniko, soske pišimo i ko Sveto Lil: ‘Ma vaker lošno te narodoskere vodačeske.’”1

6Togaš o Pavle džandor deka nesave lendar tane sadukeja, a javera fariseja, vikingja ko Sovet: “Phrajlalen, me sijum farisejco, čhavo e farisejeskoro hem sudinena man adaleske so isi man nada ko uštiba taro mule!”

7Koga phengja adava, ulo akošiba maškar o fariseja hem o sadukeja, i agjar o khedime delinge pe. 8(Adaleske so, o sadukeja vakerena deka nane uštiba taro mule, ni angejla, ni duhija, a o fariseja vakerena sine deka sa adava isi.)

9I agjar uli bari galama, a nesave učitejla e Zakoneskere uštile tari strana e farisejengiri, i počminge silno te protivinen pe, vakerindor: “Na arakhlem ništo lošno so kergja akava manuš. So ako o duho ili o angeli vakergja leske?”

10O akošiba ulo doborom baro so o naredniko darandilo te na keren e Pavle ko kotora, i naredingja e vojnikonge te hulen maškar o manuša, te ikaven e Pavle hem te legaren le ki kasarna.

11A ki adaja rat o Gospodari terdilo anglo o Pavle hem phengja leske: “Ma dara! Sar so svedočingja mange ko Erusalim, agjar mora te svedočine ko Rim da.”

O Evreja dogovorinena pe sar te mudaren e Pavle

12A koga phravdilo o sabaj, nesave taro Evreja dogovoringe pe hem hale sovli deka nane te han hem te pijen dži kote na mudarena e Pavle. 13A bašo adava sine poviše taro saranda džene.

14Ola gele ko prvosveštenikija hem ko starešine hem vakerge lenge: “Dengjem amen sovli deka nane te ha ništo dži kote na mudaraja e Pavle. 15Adaleske akana tumen hem o Evrejsko Sovet roden taro naredniko te anel e Pavle angla tumende, vakerindor deka mangena po šukar te ispitinen bašo leskoro slučaj, a amen sijem spremna te mudara le angleder te avel akate.”

16Ama koga e Pavleskere phenjakoro čhavo šungja baši akaja zamka, gelo ki kasarna hem vakergja adava e Pavleske.

17A o Pavle vikingja jekhe kapetane hem phengja leske: “Legar akale terne čhave ko naredniko, soske isi le nešto te vakerel leske.”

18O kapetani lela le peja hem legargja le ko naredniko hem phengja: “O Pavle soj phandlo, vikingja man ki peste hem zamolingja man te anav tuke akale terne čhave, soske isi le nešto te vakerel tuke.”

19O naredniko astargja e terne čhave taro vas, cidingja le ki strana hem pučlja le: “So isi tut te vakere mange?”

20A ov vakergja leske: “O Evreja dogovoringe pe te zamolinen tut tajsa te ane e Pavle ko Sovet, demek pošukar te ispitinen le bašo leskoro slučaj. 21Ama tu ma ker adava! Soske poviše taro saranda manuša adžikerena le ki zamka, so hale sovli deka nane te han hem te pijen sa dži kote na mudarena e Pavle. Ola više i spremna hem samo adžikerena tu te dozvoline.”

22Togaš o naredniko mukhla e terne čhave te džal peske hem naredingja leske: “Nikaske ma vaker deka phengja mange akava.”

E Pavle bičhavena ki Cezarija

23Togaš o naredniko vikingja pe duje kapetanen hem phengja lenge: “Spreminen dujšel vojnikija, eftavardeš džene grastencar hem dujšel džene kopijencar te džan ko enja o sati erat ki Cezarija. 24Spreminen e grasten so ka vozinel len o Pavle hem legaren le sasto vesto dži ko upravniko o Feliks.”

25Ov palo adava pišingja akava lil:

26“Me, o Klavdija Lisija, pozdravinava e cenime upravniko e Felikse.

27Akale manuše astarge le o Evreja hem mangle te mudaren le, ama me alum me vojnikoncar hem spasingjum le, adaleske so doznangjum deka tano Rimsko manuš. 28Manglum te džanav baši so tužinena le, i legargjum le ko lengoro Sovet. 29I doznangjum deka tužinena le bašo nesave bukja taro lengoro zakoni hem deka nane krivo bašo ništo so zaslužinela meriba ili zatvor. 30A koga šungjum deka spreminena leske zamka te mudaren le, odma bičhalgjum le ki tute, a okola so tužinena le phengjum te vakeren tuke soske tužinena le.”

31Agjar o vojnikija pali naredba, lele e Pavle hem preku i rat legarge le ko gradi Antipatrida. 32Tajsutno dive mukhla e vojnikon e grastencar te džan leja podur, a ola irange pe ki kasarna. 33Koga resle ki Cezarija, denge e upravniko o lil hem ange e Pavle angli leste. 34A o upravniko čitingja o lil, i pučlja e Pavle taro kova than sijan.

Koga šungja deka tari Kilikija, 35vakergja: “Ka šunav to slučaj koga ka aven okola so tužinena tut.” Palo adava naredingja te arakhen le ki palata e Irodeskiri.