Dejla 18

O Pavle ko Korint

1Palo adava o Pavle gelo tari Atina ko Korint. 2Adathe arakhla jekhe Evrejco so leskoro anav sine Akila, so sine taro Pont. Ov na nakhla but vreme sar alo pe romnaja e Priskilaja tari Italija, adaleske so o Rimsko caro o Klavdija naredingja sa o Evreja te džan peske taro Rim. O Pavle gelo ki lende te dikhel len, 3a adaleske so kerena sine isto buti – kerena sine šatojra – ačhilo ki lende te kerel buti lencar. 4A sekoja sabota debatirinela sine ki sinagoga, dikhindor te ubedinel e Evrejen hem e Grkon.

5Koga o Sila hem o Timotej ale tari Makedonija, o Pavle posvetingja pe samo ko propovediba o lafi e Devleskoro, svedočindor e Evrejenge deka o Isus tano o Hristos.

6Ama koga ola protivinge pe e Pavleske hem počminge te uvredžinen le, ov tresingja i prašina pe šejendar sar znako deka nane len ništo lencar hem vakergja lenge: “Tumaro rat neka perel upro tumare šerende! Me sijum čisto. Taro akava dive ka džav ko manuša so nane Evreja.”

7Togaš o Pavle iklilo tari sinagoga i odma khugja ko kher jekhe manušeskoro so o anav leskoro sine Titij Just, so na sine Evrejco, a slavinela sine e Devle, kaskoro kher sine uza ki sinagoga. 8A o Krisp, o vodači e sinagogakoro, poverujngja ko Gospodari sa pe kherutnencar hem but manuša da taro Korint so šunge e Pavle poverujnge hem krstinge pe.

9Jekh rat o Gospodari vakergja e Pavleske ki vizija: “Ma dara, nego ker lafi hem ma kjutin! 10Soske me sijum tuja hem nikoj našti te napadinel tut hem te kerel tuke lošnipe, soske isi man but manuša ko akava gradi.”

11Agjar o Pavle adathe ačhilo berš tekvaš, sikavindor e manušen e Devleskoro lafi.

12A koga o Galion sine upravniko ki Ahaja, sa o Evreja taro Korint počminge te džan protiv o Pavle, i ikalge le anglo sudo, 13vakerindor: “Akava manuš pherela e manušen te slavinen e Devle adaleja so nane dozvolimo taro Zakoni.”

14A koga o Pavle mangla te vakerel nešto, o Galion phengja lenge: “O Evrejalen, te ovel sine nesavi nepravda ili lošno buti, ka ovel man sine soske te šunav tumen. 15Ama adaleske so akava akošibe tano bašo lafi, bašo anava hem bašo tumaro zakoni, rešinen adava korkori. Me na mangava te ovav sudija ko akava.”

16I brkingja len tari sudnica.

17Togaš ola sarinen astarge e Sostene, e vodače tari sinagoga, i počminge te maren le anglo sudo. A o Galion ništo na phengja ko adava.

O Pavle iranela pe ki Sirisko Antiohija

18O Pavle ačhilo ko Korint panda nesave dive, a palo adava pozdravingja pe e phralencar, i e Priskilaja hem e Akileja plovingja ki Sirija. Ki Kenhreja šišingja pe, adaleske so kergja zavet. 19Koga resle ko Efes, ov mukhla len hem korkori khugja ki sinagoga hem počmingja te debatirinel e Evrejencar. 20Ola zamolinge le te ačhol panda nesavo vreme lencar, ama ov na mangla, 21nego pozdravingja pe lencar vakerindor: “Ka iranav man tumende, ako e Devleskiri vojla.”

Palo adava plovingja taro Efes. 22Koga resla ki Cezarija gelo upre ko Erusalim hem pozdravingja e crkva, i gelo ki Antiohija.

23Ačhilo nesavo vreme adathe hem palo adava gelo adathar hem džala sine taro than ko than maškar ki Galatija hem ki Frigija hem kerela sine silno e učenikon.

24A ko Efes alo nesavo Evrejco so o anav leskoro sine Apolos, soj tano tari Aleksandrija. Ov sine manuš so but šukar kerela sine lafi hem šukar džanela sine o Sveta Lila. 25Ov sine sikavdo taro drumo e Gospodareskoro hem bare jagaja vakerela sine hem čače sikavela sine bašo Isus, iako džanela sine samo bašo e Jovaneskoro krstiba. 26Ov počmingja bizo dar te vakerela ki sinagoga. Koga šunge le i Priskila hem o Akila, vikinge le ki peste hem pošukar objasninge leske e Devleskoro drumo.

27Koga o Apolos mangla te džal ki Ahaja, o phrajla ohrabringe le hem pišinge e učenikonge te priminen le. Koga resla adathe, but sine ko pomoš okolenge so poverujnge preku i blagodat, 28adaleske so silno pobedinela sine e Evrejen ko javna debate, dokažindor lenge preku o Sveta Lila deka o Isus tano o Hristos.