Dejla 17

O Pavle hem o Sila propovedinena ko Solun

1Koga nakhle o Pavle hem o Sila maškar o gradija Amfipol hem Apolonija, resle ko Solun, kote so sine Evrejsko sinagoga.

2Hem sar so kerela sine sekat, o Pavle khugja ki sinagoga hem trin kurke ki sekoja sabota kerela sine lencar lafi taro Sveto Lil. 3Objasninela sine hem dokažinela sine lenge deka o Hristos mora sine te cidel muke hem te uštel taro mule. Ov phengja: “Me vakerava tumenge bašo Isus, deka ov tano o Hristos.”

4Nesave lendar ule vernikija hem počminge te oven zaedno e Pavleja hem e Silaja. A isto agjar poverujnge but pobožna Grkija da hem but ugledna džuvla ko adava gradi. 5Ama nesave Evreja sine ljubomorna, i khedinge nesave lošno manušen taro pazari hem barabar lencar vazdinge buna ko gradi. I ale anglo e Jasoneskoro kher hem rodinge lestar te ikalel e Pavle hem e Sila anglo narodo te sudinel pe lenge.

6Koga na arakhle len, ola vlečinge e Jasone hem panda nesave vernikon anglo e gradeskere sudije vikindor: “Akala manuša so segde kerge buna, akana ale akate da, 7a o Jason primingja len ko po kher. Sarine ola tane protiv e Cezareskere naredbe, adaleja so vakerena deka isi javer caro, o Isus!”

8Koga o narodo hem o sudije e gradeskere šunge akava, voznemiringe pe. 9Ama koga lele pare taro Jason hem taro javera sar kaucija, mukhle len.

O Pavle hem o Sila propovedinena ki Verija

10Samo so peli i rat, o vernikija bičhalge e Pavle hem e Sila ki Verija. Koga resle adathe, ola gele ki Evrejsko sinagoga. 11Adathe o Evreja sine po spremna nego okola taro Solun, adaleske so šukar priminge o lafi e Devleskoro hem sekova dive rodena sine ko Sveta Lila te dikhen dali čače tano adava so o Pavle phenela. 12Hem agjar but džene lendar verujnge, hem but dostojna Grkinke hem Grkija.

13Ama koga o Evreja taro Solun šunge deka o Pavle ki Verija propovedinela o lafi e Devleskoro, gele adathe te voznemirinen e narodo hem te vazden buna. 14Togaš o vernikija odma bičhalge e Pavle te džal uza ko more, a o Sila hem o Timotej ačhile ki Verija. 15A okola so gele e Pavleja legarge le dži ki Atina. Palo adava irange pe ki Verija primindor i naredba e Pavleskiri bašo o Sila hem o Timotej te džan ki leste so šaj posigate.

O Pavle vakerela e Devlestar ki Atina

16Dži kote o Pavle adžikerela sine e Sila hem e Timoteje ki Atina, nerviringja pe ko duho koga dikhla deka o gradi pherdo idolencar. 17Ov počmingja te debatirinel ki sinagoga e Evrejencar hem e javere manušencar so darana sine taro Devel, a sekova dive ko ploštad da debatirinela sine okolencar so sine adathe. 18A nesave taro epikurejska hem stoička filozofija počminge te debatirinen e Pavleja.

Nesave lendar pučle: “So brborinela akava manuš?”

A javera vakerena sine: “Izgleda vakerela amenge bašo javera devejla.” Adaleske so o Pavle propovedinela sine lenge o evangelije bašo Isus hem o bašo uštiba taro mule.

19Togaš astarge le hem ange le ko Areopagot hem phenge leske: “Šaj li te džana savo tano adava nevo učibe so tu propovedineja le? 20Šunaja so vakereja amenge nesave bukja čudna. I mangaja te džana soj adava.”

21A sa o manuša tari Atina hem o jabandžije so živinena maškar lende nakhavena sine po vreme kerindor lafi hem šunindor nešto nevo.

22Togaš o Pavle terdilo ko maškar taro Areopagot hem phengja: “Manušalen tari Atina, dikhava deka sijen but religiozna ko sa. 23Dži kote nakhava sine ko gradi hem šukar dikhava sine tumare bukja so tumen slavinena, dikhlum jekh žrtveniko, so leste sine pišimo: ‘E Devleske so na pendžaraja le.’ Akje me vakerava tumenge bašo adava Devel so slavinena le, ama na pendžarena le.

24O Devel so kergja o sveto hem sa soj ki leste, tano Gospodari e neboskoro hem e phuvjakoro, hem ov na živinela ko hramija soj kerde taro manušikane vasta, 25hem na trebela leske ništo taro manuša so kerena leske. Adaleske so ov tano adava so dela sarinenge o životo, o dišibe hem sa javer. 26Ov taro jekh manuš kergja sa e narodon te živinen ki celo phuv. Angleder odredingja o vreme hem o thana kote o manuša ka živinen. 27O Devel kergja adava te šaj o manuša te roden le, hem te šaj nesar te trudinen pe te arakhen le, iako ov nane dur nikastar amendar. 28‘Soske ki leste živinaja, mrdinaja hem postojnaja.’ Sar so vakerge nesave taro tumare poetija: ‘Amen sijem leskoro seme.’

29I adaleske so sijem taro seme e Devleskoro, na trebno te mislina deka o Devel tano sar zlato, srebro ili bar – deka tano nešto so o manuš zamislingja hem kergja le pe vastencar. 30Angleder koga o manuša na džange e Devleske, ov na dikhla ko adava, ama akana zapovedinela sa e manušenge ko sekova than te pokajnen pe. 31Adaleske so o Devel odredingja o dive koga pravedno ka sudinel e svetoske preku o manuš kas so odredingja hem so lestar sarinenge dengja dokaz agjar so vazdingja le taro mule.”

32Koga ola šunge bašo uštiba taro mule, nesave lendar počminge te asan, a javera vakerge: “Bašo akava ka šuna tut javer puti.”

33Palo adava o Pavle gelo peske adathar. 34Ama nesave manuša gele leja hem ule vernikija. Maškar lende sine o Dionisija – jekh taro sudija taro Areopagot hem jekh romni so vikinela pe sine Damara hem javera.