Dejla 10

O Kornelij bičhavela te vikinen e Petare

1A ki Cezareja sine jekh manuš so vikinela pe sine Kornelij, so sine Rimsko kapetani upro šel vojnikija tari grupa vikimi e Italijakiri. 2Ov hem sa leskere kherutne sine pobožna hem darana sine e Devlestar. Pomožinela sine e čorole Evrejengere hem sekat molinela pe sine e Devleske.

3Jekh dive, paše trin o sati paloručko, ov jasno dikhla ki vizija e Devleskere angele sar alo ki leste hem phengja leske: “Kornelij!”

4A o Kornelij dikhla ki leste daraja hem phengja: “Vaker, Gospode!”

A o angeli odgovoringja leske: “O Devel na bistergja tut, soske prifatingja te molitve hem to dejba e čorolenge sar žrtva. 5Akana bičhal te manušen ki Jopa te anen e Simone soj vikimo Petar. 6Ov tano gosti ko Simon o kožari, kaskoro kher tano uza ko more.”

7Koga gelo peske o angeli so vakerela leske sine, o Kornelij vikingja pe duje slugjen hem jekhe pobožno vojniko so poštojnela le sine, 8i vakergja lenge sa so ulo hem bičhalgja len ki Jopa.

E Petareskiri vizija

9Tajsutno dive dži kote e Kornelijeskere sluge džana sine e drumoja hem sine paše uza ko gradi Jopa, o Petar uklilo upro ramno krovi te molinel pe, koga sine o sati paše dešuduj paloručko. 10O Petar bokhalilo hem mangla te hal, ama dži kote kerena leske sine hajbaske, ov dikhla vizija. 11Dikhla pravdo nebo hem sar nešto baro čaršafi so pe štare krajoncar mukhela pe ki phuv. 12Ki leste sine taro sa o vrsta životne so isi len štar pre, okola so lazinena ki phuv hem o čirikla.

13Togaš nesavo glaso vakergja leske: “Ušti, Petar, čhin hem ha!”

14A o Petar odgovoringja leske: “Našti Gospode! Adaleske so na halum nikat nešto soj prema amaro Zakoni nečisto ili melalo.”

15A o glaso palem phengja leske: “Ma vaker adava tano nečisto te hal pe koga o Devel kergja le čisto!”

16I agjar ulo trin puti, i togaš o čaršafi irasalilo ko nebo.

E Kornelijeskere manuša ko Petar

17Dži kote o Petar pučela pe sine so značinela adaja vizija, o manuša so o Kornelij bičhalgja pučindor arakhle o kher e Simoneskoro hem ačhile angli porta, 18vikinge hem pučle dali adathe bešela o Simon soj vikimo Petar.

19Dži kote o Petar panda razmislinela sine baši vizija, o Sveti Duh phengja leske: “Akje, trin manuša rodena tut. 20Ušti, huli hem dža lencar bizo te razmisline, adaleske so me bičhalgjum len.”

21Togaš o Petar hulilo ko manuša hem phengja lenge: “Akje, me sijum adava so rodena le. Soske alen?”

22A ola odgovoringe leske: “Bičhalgja amen o Rimsko kapetani o Kornelij, o pravedno manuš so darala e Devlestar, so poštojnena le sa o Evreja. O sveto angeli vakergja leske te vikinel tut peste ko kher hem te šunel so isi te phene leske.”

23Togaš o Petar vikingja len andre hem ugostingja len.

O Petar propovedinela ko kher e Kornelijeskoro

Tajsutno dive o Petar gelo lencar, a leja gele nesave phrajla da tari Jopa. 24O tajsutno dive resla ki Cezarija. A o Kornelij adžikergja le, i vikingja pe familija hem pe paše amalen. 25Koga o Petar khugja ko kher, o Kornelij iklilo anglo leste hem pelo anglo leskere pre taro poštovanje.

26A o Petar vazdingja le vakerindor: “Ušti! Me da sijum samo manuš.”

27Dži kote kerela sine leja lafi, o Petar khugja andre hem arakhla bute khedime manušen.

28I phengja lenge: “Tumen but šukar džanena deka nane dozvolimo e Evrejcoske te družinel pe nekasaja tari javer nacija ili te khuvel leske ko kher. Ama o Devel phengja mange deka nijekhe manuše na trebela te dikhav sar nečisto ili melalo. 29Adaleske, koga sijum sine vikimo, alum bizo te razmislinav. A akana pučava tumen, soske vikingjen man?”

30A o Kornelij odgovoringja leske: “Angleder štar dive ko isto vreme, ko trin o sati paloručko molingjum man ko mo kher, i taro jekh puti pojavingja pe angla mande nesavo manuš ko parne šeja 31hem vakergja mange: ‘Kornelij, o Devel šungja ti molitva hem dikhla so pomožingjan e čorolenge. 32Adaleske bičhal nekas ki Jopa hem vikin e Simone soj vikimo Petar. Ov tano gosti e Simoneske ko kher o kožari, kaskoro kher tano uza ko more.’ 33Adaleske odma bičhalgjum len pala tute, a tu šukar kergjan so alan. Akana sarinen amen sijem akate anglo Devel te šuna sa so zapovedingja tuke o Gospodari te vakere amenge.”

34Togaš o Petar počmingja te kerel lafi: “Akana čače dikhava deka o Devel na kerela nisavi razlika maškar o manuša, 35nego tari sekoja nacija prifatinela adalen so darana lestar hem okola so kerena adava soj pravedno. 36Tumen džanena deka o Devel bičhalgja o Lafi e Izraelconge, agjar so sikavgja o evangelije bašo mir preku o Isus Hristos, soj tano Gospodari sarinenge.

37Tumen džanena so ulo ki celo Judeja, počmindor tari Galileja, palo krstiba so o Jovan propovedingja. 38Džanena bašo o Isus taro Nazaret, so o Devel pomazingja le e Sveti Duhoja hem e silaja. Ov gelo taro than ko than hem kergja šukaripe, sasljarindor sa okolen so sine teli vlast e Bengeskiri, soske o Devel sine leja.

39Amen sijem svedokija bašo sa adava so kergja ko Erusalim hem ki celo phuv e Evrejengiri. A ola mudarge le adaleja so čhige le ko krsto, 40ama o Devel ko trito dive vazdingja le taro mule hem kergja te pojavinel pe amenge, 41ama na dikhle le sa o narodo, nego samo e svedokonge so o Devel angleder biringja len. Adala sijem amen so halem hem pilem leja palo leskoro uštiba taro mule. 42Ov zapovedingja amenge te propovedina e narodoske hem te svedočina deka ov tano adava so o Devel čhigja le te ovel sudija e dživdenge hem e mulenge. 43Sa o prorokija svedočinena baši leske deka sekoj so verujnela ki leste ka dobinel oprostiba bašo o grevija preku leskoro anav.”

O Sveti Duh hulela upro manuša so nane Evreja

44Dži kote o Petar vakerela sine adala lafija, o Sveti Duh hulilo upro sarinende so šunge adava so vakergja. 45A o Evrejska vernikija so ale e Petareja, sine but iznenadime so o Devel e manušenge da taro javera nacije dengja sar daro e Sveti Duho, 46adaleske so šunge len sar kerena lafi ko javera čhibja hem falinena e Devle.

Togaš o Petar vakergja: 47“Šaj li nekoj te čhinavel akalen te na oven krstime ko pani? Ola da priminge e Sveti Duho isto sar amen.”

48Togaš naredingja te oven krstime ko anav Isuse Hristoske. Palo adava ola zamolinge e Petare te ačhol lencar panda nekozom dive.