Tit 2

1Nữn anàq, iỡuq đơp dơgrữq kaya hagĩq la iỡuq tơpãq sì kaya pơto pơđar tơpãq siàp. 2Iỡuq paluơ padờp tơpuôl ung prõng thũt thơu iẽt amiẽt, khuẽn siàp, tơpãq siàp, gơjãp kađữc dơlãp voh tui, dơlãp kaya khiãng duman, sì dơlãp kaya ãt-ỡl. 3Kung yơu nữn, iỡuq pơto tơpuôl mòq prõng thũt ngãq tơviãq kaya đang mang ki ngãm dơlãp vruãq ngãq nao, pơnuaĩq đơp, ôh đơp iãh hẽla kađòc ngãq mơvũq mơvẽl ga alãc, nữn iỡuq ngãq la mơnuĩh pơto pơđar kaya siàp, 4tồq ga pơnõq nhũ pơlih pơto pơđar dơgrữq mơnuĩh kamơi dơra tơviãq jỡc dơgrữq mơnuĩh thơu anĩt duman vơsàc, thơu anĩt anàq, 5thơu hơnuãq thơu iãu, sơđah sơchih, rgơi iãq jàc vruãq sàc anĩh sì duh huaĩq vơsàc drơi, pioh Pơnuaĩq Yàc Pô Lơngĩq ôh kađòc đơp sơvĩl. 6Kung yơu nữn, anàq iỡuq pơto pa-sơdor dơgrữq mơnuĩh dãm iỡuq thơu hơnuãq thơu iãu. 7Tũq ràc pa-tơviãq rùp phuỗt anàq iỡuq ngãq krơh mưng vruãq siàp dơlãp dơgrữq vơnãh, sì kaya tơpãq siàp, ngãq gơnĩt dơlãp kaya pơto pơđar, 8gãm sì pơnuaĩq đơp iỡuq viãq ôh tũq halơi mãq pơnuaĩq jỡc, pioh ga avih dơgrữq mơnuĩh halơi mưng tơpuôl ngãq jơdrãq sì anàq iỡuq mơlơu ơlah kơyua ôh hũ pơnuaĩq đơp iãh halơi pioh đơp iãh mưng pơnõq drơi jỡc. 9Iỡuq pơto dơgrữq mơnuĩh ngãq halỗt thơu duh huaĩq pô drơi dơlãp dơgrữq vruãq, ngãq siàp hatai pô juơi ôh đơp jơdrãq pơnuaĩq sì pô, 10ôh tlẽq sơwah, nữn pa-vlữq wỡq iỡuq ràc pa-tơviãq kaya tơpãq siàp wil tãl, pioh dơlãp dơgrữq vruãq, pơnõq nhũ pơlih va wỡq tiẽng dơnai siàp ga vruãq pơto pơđar mưng Yàc Pô Lơngĩq, Yàc Dõc pơnõq drơi. 11Kơyua kaya anĩt Yàc Pô Lơngĩq hũ song ràc tơviãq pioh dõc pơ-tlah dơgrữq mơnuĩh, 12kaya anĩt nữn tũq nĩ ãn pơto pơnõq drơi, pioh dơlãp tũq pơnõq drơi tlàq vẽq kaya ôh pãc pơnuaĩq yàc sigỡuq sì dơgrữq kaya ham ưng dun kơyua hũ, pioh pơnõq drơi pơlih hadiuq sa vĩq thơu gơrhia rùp, tơpãq dãng sì duh huaĩq dơlãp rài nĩ, 13dơlãp tũq pơnõq drơi ãn chơkhãq khiãng tồq mãq hũ kaya chơkhãq chàc dadu lơngai drơi hũ sì kaya pabôh tơviãq dơlãp kaya gơhluh Yàc Pô Lơngĩq dlòc dloòng hũ sì Yàc Dõc pơnõq drơi la Yàc Dõc Pơ-tlah Je-su, 14Pitao song tlàq rùp phuỗt Pitrai kơyua mưng pơnõq drơi pioh dõc sơdua pơnõq drơi tlah mưng dơgrữq kaya iãh mơsãc sì pioh ngãq sơchih ga Pitrai sa vual vơla siàp viãq, la vual vơla tluỡiq gơhual dơlãp vruãq ngãq siàp.

15Iỡuq pơto dơgrữq kaya nữn, paluơ padờp sì pơto pơđar pơnõq nhũ mưng avih dơgrữq gơnuar chơnuãq. Juơi luơi pơnõq nhũ iãq anàq ôh srãp.