Tit 1

1Pol, halỗt mơnãq Yàc Pô Lơngĩq hũ sì mơnuĩh gơnuar pơđar Yàc Dõc Pơ-tlah Je-su hũ, kơyua mưng voh tui dơgrữq mơnuĩh hũ Yàc Pô Lơngĩq duỡt ruãh sì kaya thơu pãc pơnuaĩq tơpãq iỡuq pơkãp yơu hatai duh huaĩq Yàc, 2gãm sì kaya chơkhãq chàc gơnĩt viãq mưng kaya hadiuq gãm gãm nữn Yàc Pô Lơngĩq, Pitao ôh đơp vlữq, song hẽ grưh mưng halơu dơgrữq rài. 3Nữn iỡuq dơlãp sa tũq lơwah, Pitrai song pabôh tơviãq pơnuaĩq Pitrai mưng vruãq akhàt vrơi pa-thơu pơnuaĩq siàp nữn kơu song hũ pơjao tui yơu gơnuar pơđar Yàc Pô Lơngĩq hũ, Yàc Dõc pơnõq drơi. 4Pơyua ga Tit, viãq la anàq dơlãp voh tui sigỡuq sì pơnõq drơi. Lakơu kaya anĩt sì dadu lơngai mưng Yàc Pô Lơngĩq, la Ama, sì Yàc Dõc Pơ-tlah Je-su, Yàc Dõc pơnõq drơi hũ, trôh pãq dlòc anàq.

5Kơu song luơi anàq dòq wỡq pãq Kơ-ret kơyua sa kanõh nĩ, nữn la pioh anàq pơlih rơmiãq jàc dơgrữq vruãq dòq ka-ôh rơchãc wil tãl sì pồq padỡc dơgrữq mơnuĩh pô tơha dơlãp dơgrữq palơi yơu kơu song pơto pơđar anàq — 6mơnuĩh pô tơha nữn la mơnuĩh ôh ngãq kaya halơi sỗq suẽl, la vơsàc mĩn sa aràc sơdiuq, hũ anàq tơcho tui tơpãq, ôh kađòc yãq vãq mưng kaya ngãq nao ling lang hẽla ôh tui pơnuaĩq ngãq gơnĩt. 7Kơyua mơnuĩh dlãc tơpuôl gơnĩt viãq la ôh ngãq kaya halơi sỗq suẽl, yơu la mơnuĩh apãt akõq sàc Yàc Pô Lơngĩq hũ, ôh pa-prõc rùp, ôh sơmar tơgùq kaya ơnõc mơvai, ôh mơvũq alãc, ôh ngãq mơsãc mơja, sì ôh ham guãm, 8pa-vlữq wỡq la mơnuĩh nữn thơu tồq ròq thuãi, anĩt anar kaya siàp, thơu pơnuaĩq, tơpãq dãng, sơđah sơchih, thơu gơrhia rùp, 9rơmiãq gơjãp pơnuaĩq yàc đang mang chàc gơnang iỡuq sì pơnuaĩq song pơto akhàt, tồq ga mơnuĩh nữn thơu rgơi pioh gãm paluơ padờp mơnuĩh tơmo mưng kaya pơto pơđar prãn khãc, gãm sì gơrloh pơkhè mơnuĩh ngãq jơdrãq.

10Kơyua hũ lũ mơnuĩh ngãq jơdrãq salũng sơlãng, tơpuôl đơp dlài lơwah soh, sì gãm tơpuôl ngãq vlữq lor, halơu viãq la dơgrữq mơnuĩh pơweh sì tơpuôl mơnuĩh sìq kalìq. 11Vruãq iỡuq ngãq la pakỡuq pơnõq nhũ dòq suà. Pơnõq nhũ ãn ngãq sàq ga avih dơgrữq sàc anĩh aràc mưng pơnẽq pơto dơgrữq kaya ôh iỡuq pơto, kơyua mưng kaya hajũc hlàq đang mang mơlơu alah. 12Hũ tơkìq mơnuĩh dơlãp pơnõq nhũ, nữn la dơgrữq mơnuĩh gơnuar hwơr pơnõq nhũ hũ, song đơp làiq: “Mơnuĩh Kơ-ret la mơnuĩh đơp vlữq gãm, dơgrữq anàq asỡq mơsãc, dơgrữq tũc tiàt ham bõc ơlah atàq.” 13Pơnuaĩq ngãq chưng nĩ la viãq. Kơyua kanõh gơtha nữn, iỡuq gơrloh pơkhè pơnõq nhũ savĩq gơnĩt, pioh pơnõq nhũ hũ prãn khãc dơlãp voh tui, 14juơi chẽq hatai dơgrữq vruãq đơp pađĩc mơnuĩh Ju-đa hũ hẽla pơnuaĩq pơđar-va dơgrữq mơnuĩh gơlàiq pơweh sì pơnuaĩq tơpãq hũ. 15Dơgrữq kaya kung sơđah sơchih ga dơgrữq asơi sơđah sơchih. Nữn pơweh sì mơnuĩh ling lang sì ôh pãc-tui, nữn ôh hũ kaya hagĩq la sơđah sơchih, nữn gãm kaya sơnơng sì gãm tũc hatai pơnõq nhũ nữn kung song kađòc ngãq vrũq lơmuĩq. 16Pơnõq nhũ angãn drơi thơu Yàc Pô Lơngĩq, bôh làiq yơu nữn vloh, dơlãp vruãq ngãq pơnõq nhũ, pơnõq nhũ kơmlah luơi Pitrai, tơviãq jỡc đang mang lơmùq mơvai, ôh pãc sãp, sì ngãq ôh iỡuq yơu dơgrữq vruãq ngãq siàp halơi.