Akhàt Tơviãq Pơnuaĩq Dơđỡuq 3:20

1Iỡuq wãq ga mơnuĩh gơnrơh sàc pơjũm sơđah pãq Sat-đe làiq:

‘Pitao hũ tơjuh Vơngãq Yàc Pô Lơngĩq hũ sì tơjuh voh ia pitỗq đơp yơu nĩ: “Kơu thơu dơgrữq vruãq ngãq anàq hũ. Anàq hũ tiẽng dơnai la hadiuq, dòq anàq nữn mơtai. 2Iỡuq mơ-uãh chơkhãq sì ngãq ga gơjãp dơgrữq kaya hagĩq dòq wỡq, nữn la dơgrữq kaya jẽq sì mơtai, kơyua Kơu ka-ôh bôh dơgrữq vruãq ngãq anàq hũ song wil tãl di anãq Yàc Pô Lơngĩq Kơu hũ. 3Yơu nữn, iỡuq sơdor wỡq dơgrữq pơnuaĩq anàq song tồq mãq sì song hmỡq. Iỡuq ngãq tui kaya nữn sì mơvai tlàq dlàiq vẽq. Dòq mơyah làiq anàq ôh mơ-uãh chơkhãq, Kơu ròq trôh yơu mơnuĩh tlẽq, sì anàq viãq ròq ôh thơu tũq jơ halơi Kơu trôh jơdrãq sì anàq. 4Bôh làiq yơu nữn, anàq hũ tơkìq mơnuĩh pãq Sat-đe, la dơgrữq mơnuĩh song ôh ngãq pa-tơsỡuq ao charơpha drơi, sì pơnõq nhũ ròq nao sigỡuq sì Kơu mưng ao charơpha kòq, kơyua pơnõq nhũ đang mang. 5Mơnuĩh halơi pha rlao ròq hũ chồq ao charơpha ơtah kòq drưh yơu nữn, Kơu ròq ôh tũq halơi sapỡq angãn mơnuĩh nữn tơviãq mưng Sơrãq Kaya Hadiuq, nữn Kơu ròq akhàt tơviãq angãn mơnuĩh nữn pãq anãq Ama Kơu sì pãq anãq dơgrữq mơnuĩh gơnrơh Pitrai. 6Asơi hũ tanĩa, iỡuq hmỡq vẽq pơnuaĩq Yàc Vơngãq Sơđah đơp sì dơgrữq sàc pơjũm sơđah.”’

7Iỡuq wãq ga mơnuĩh gơnrơh sàc pơjũm sơđah pãq Phi-la-đen-phi làiq:

‘Pitao Sơđah, Pitao Tơpãq Viãq,

Pitao hũ angui anàq tlir Đa-vit hũ,

Pitao pơh nữn ôh asơi krỡq,

sì krỡq nữn ôh asơi pơh,

đơp yơu nĩ:

8“Kơu thơu dơgrữq vruãq ngãq anàq hũ (Iãq dih, Kơu song chẽq pãq anãq anàq sa voh bãc lanơng pơh nữn ôh asơi rgơi krỡq jỡc nhũ), kơyua anàq hũ tơkìq kaya prãn khãc, nữn anàq song rơmiãq pioh pơnuaĩq Kơu, sì ôh kơmlah tlàq angãn Kơu. 9Iãq nĩ, Kơu ròq ngãq dơgrữq mơnuĩh pơweh sì tơpuôl Sa-tan hũ, la dơgrữq mơnuĩh tồq angãn krơi nhũ la mơnuĩh Ju-đa sì ôh iỡuq yơu nữn, pa-vlữq wỡq, pơnõq nhũ mĩn la ãn đơp lor — Iãq dih, Kơu ròq ngãq ga pơnõq nhũ hayơu ga pơnõq nhũ ròq trôh sì vơviar rùp trỗt pãq gah hlơu tơkai anàq, sì pơnõq nhũ ròq pơlih thơu làiq Kơu anĩt duman anàq. 10Kơyua anàq song rơmiãq pioh pơnuaĩq ngãq gơnĩt Kơu hũ, nữn Kơu kung ròq iãq jàc anàq tlah mưng tũq jơ kaya lòc jẽq trôh pãq dlòc vãq avih dun kơyua, pioh lòc dơgrữq aràc halơi ãn dòq hadiuq pãq dlòc voh hlùq. 11Kơu ròq trôh savĩq sơmar viãq. Iỡuq rơmiãq pioh gơjãp dơgrữq kaya hagĩq anàq hũ pioh ôh asơi pơlih suãq mãq chrang mữh anàq hũ. 12Mơnuĩh halơi pha rlao, Kơu ròq ngãq ga mơnuĩh nữn tơviãq jỡc jơmững dơlãp sàc talơvãt Yàc Pô Lơngĩq Kơu hũ. Mơnuĩh nữn ròq ôh tũq halơi tơviãq tlah mưng anĩh nữn tơra, sì Kơu ròq wãq pãq dlòc nhũ hũ angãn pãq anĩh Yàc Pô Lơngĩq Kơu hũ, angãn jơnãng palơi Yàc Pô Lơngĩq Kơu hũ (nữn la Je-ru-sa-lem vơhrơu trỗt mưng lơngĩq, mưng anĩh Yàc Pô lơngĩq Kơu hũ) sì angãn vơhrơu Kơu hũ. 13Asơi hũ tanĩa, iỡuq hmỡq vẽq pơnuaĩq Yàc Vơngãq Sơđah đơp sì dơgrữq sàc pơjũm sơđah.”’

14Iỡuq wãq ga mơnuĩh gơnrơh sàc pơjũm sơđah pãq Lao-đi-xe làiq:

‘Pitao A-men, Mơnuĩh Ngãq Chưng đang mang pãc-tui sì tơpãq viãq, Pơdòq kaya chrơng pajỡc Yàc Pô Lơngĩq hũ đơp yơu nĩ: 15“Kơu thơu dơgrữq vruãq ngãq anàq hũ, vloh anàq ôh lơ-ãt, kung ôh tluỡiq. Chơkhãq khiãng anàq lơ-ãt trôh lơ-ãt hẽla tluỡiq trôh tluỡiq! 16Yơu nữn, kơyua anàq ngãq gơhuar gơhuar, ôh tluỡiq kung ôh lơ-ãt, yơu nữn Kơu jẽq sì õq anàq tơviãq mưng mơvah Kơu. 17Kơyua mưng anàq đơp làiq: ‘Kơu mơda vloh, kơu song hũ lơveh lơvai sì kơu ôh lakơu chàc kaya hagĩq tơra,’ nữn vloh anàq ôh thơu làiq anàq viãq dleh dlàr, iãq anĩt viãq, ka-sõt rơbah, sồp vùp sì dòq kalôh. 18Kơu pơto anàq iỡuq vlơi mưng anĩh Kơu mữh hũ song tôh rơyiãq dơlãp apôi pioh ga anàq tơviãq jỡc mơda gơnãp, vlơi ao charơpha ơtah kòq blãc pioh anàq chồq tơma nữn tồq ôh blè tơviãq kaya mơlơu ơlah kơyua wãc rơsì dòq kalôh drơi hũ, sì vlơi jrão tôh mơta anàq pioh ga anàq iãq bôh jỡc. 19Mơyah làiq dơgrữq aràc halơi nữn Kơu khiãng duman, nữn Kơu gơrloh pơkhè sì ngãq dlàiq. Nữn yơh, iỡuq tluỡiq gơhuar sì mơvai tlàq dlàiq vẽq. 20Nĩ, Kơu dữc pãq di bãc sì tơtoh. Mơyah làiq asơi hmỡq sãp Kơu sì pơh bãc, nữn Kơu ròq tơmã sigỡuq sì mơnuĩh nữn, angui bõc war sigỡuq sì mơnuĩh nữn, sì mơnuĩh nữn sigỡuq sì Kơu. 21Mơnuĩh halơi pha rlao, Kơu ròq vrơi ga mơnuĩh nữn dòq guh sigỡuq sì Kơu pãq dlòc sơvan Kơu, kung yơu Kơu song pha rlao sì dòq guh sigỡuq sì Ama Kơu pãq dlòc sơvan Pitrai. 22Asơi hũ tanĩa, iỡuq hmỡq vẽq pơnuaĩq Yàc Vơngãq Sơđah đơp sigỡuq sì dơgrữq sàc pơjũm sơđah.”’”