Phi-lip 2:3

1Yơu nữn, mơyah làiq dơlãp Yàc Dõc Pơ-tlah hũ kaya paluơ padờp halơi, mơyah làiq hũ kaya paluơ padờp halơi kơyua mưng kaya khiãng duman, mơyah làiq hũ kaya salơnuãq halơi dơlãp Vơngãq Sơđah, mơyah làiq hũ hatai anĩt anar sì kaya anĩt duman halơi, 2nữn iỡuq ngãq wil tãl kaya uỗt sơh hlãq hũ, nữn la pơnõq adơi sơai salơnuãq sigỡuq dơlãp kaya sơnơng, tũq hũ salơnuãq sigỡuq dơlãp kaya khiãng duman, hũ sa hatai sigỡuq, salơnuãq dơlãp kaya sơnơng. 3Ôh ngãq vruãq halơi kơyua mưng hatai kalĩh hẽla kơyua mưng kaya yeh drơi ôh kuơ, pa-vlữq wỡq, gãm sì hatai pơviar rùp, iãq mơnuĩh tơmo ki ngãm rlao di drơi, 4dơgrữq tãl aràc mĩn ôh sơnơng trôh vruãq hũ kuơ ga drơi, nữn iỡuq sơnơng trôh vruãq kuơ ga dơgrữq mơnuĩh tơmo wỡq. 5Iỡuq hũ dlò sơnơng yơu nữn dơlãp pơnõq adơi sơai, kung la dlò sơnơng dơlãp Yàc Dõc Pơ-tlah Je-su,

6la Pitao pa-tơviãq rùp dơlãp sẽq rùp Yàc Pô Lơngĩq,

song ôh iãq kaya iỡuq rơmiãq pioh

la kaya salơvãq sì Yàc Pô Lơngĩq.

7Pa-vlữq wỡq, Pitrai song ngãq krơi ga drơi tơviãq jỡc ôh kuơ hagĩq

tũq chồq mãq rùp phuỗt mơnuĩh halỗt mơnãq,

sì hũ đeh tơviãq dơlãp sẽq vơlai drưh yơu anàq mơnuĩh,

sì jỡc iãq bôh dơlãp rùp phàp yơu sa aràc anàq mơnuĩh,

8Pitrai song pơviar rùp drơi trỗt sì ãt duh huaĩq tãl trôh mơtai,

vloh nữn mơtai pãq dlòc kayơu pỡc.

9Kơyua yơu nữn, Yàc Pô Lơngĩq kung song pa-pồq Pitrai tơgùq dlòc dloòng

sì song vrơi ga Pitrai angãn pãq dlòc dơgrữq angãn,

10tồq ga hmỡq trôh angãn Yàc Je-su,

dơgrữq ta-ồq pãq dlòc lơngĩq, pãq ala voh hlùq, gah ala voh hlùq, iỡuq aguãl ta-ồq trỗt,

11sì avih dơgrữq dơlãh kung akhàt tơviãq làiq Yàc Dõc Pơ-tlah Je-su la Yàc,

padỡc kaya gơhluh ga Yàc Pô Lơngĩq, la Ama.

12Yơu nữn, ơ dơgrữq adơi sơai khiãng anĩt hlãq hũ, tui yơu kaya pơnõq adơi sơai song gãm pãc sãp, tũq ôh mĩn dòq dơlãp kaya hlãq bôh mơta, nữn tũq nĩ vloh brõq rlao dơlãp kaya hlãq lakồq mơta, pơnõq adơi sơai iỡuq ngãq miẽt kaya dõc pơ-tlah drơi hũ gãm sì kaya duh huaĩq sì kaya tơtơh huaĩq. 13Kơyua Yàc Pô Lơngĩq la Pitao ãn dòq ngãq vruãq dơlãp pơnõq adơi sơai tồq gãm kaya ưng ngãq gãm sì kaya ngãq tui hatai siàp Pitrai hũ. 14Iỡuq ngãq avih dơgrữq vruãq nữn ôh buah kar hẽla gơrlah pơnuaĩq, 15tồq ga pơnõq adơi sơai hũ tơviãq jỡc dơgrữq anàq tơcho ôh hũ kaya gơrloh pơkhè sì sơđah sơchih ga Yàc Pô Lơngĩq, ôh halôh nỡm di khrãh pơjẽh pơtiàt vlữq lor sì iãh mơsãc, nữn pãq đỡn pơnõq adơi sơai pơsàc sơdah yơu dơgrữq sanuh apôi dơlãp dun kơyua, 16tũq rơmiãq jàc pơnuaĩq kaya hadiuq, kơyua kaya pa-prõc rùp hlãq hũ dơlãp harơi Yàc Dõc Pơ-tlah nữn la drơi song ôh đuaĩq dơlãp kaya ôh kuơ, kung ôh dleh dlàr savĩq lơhiãq soh. 17Vloh nữn bôh làiq hlãq kađòc hõq dơrãh tơviãq pioh sơrãh pãq dlòc kaya pioh padỡc sì kaya padỡc voh tui pơnõq adơi sơai hũ, nữn hlãq mĩn sơh sơr, sì uỗt sơh sigỡuq sì avih tãl aràc pơnõq adơi sơai. 18Pơnõq adơi sơai kung yơu nữn, iỡuq sơh sơr sì uỗt sơh sigỡuq sì hlãq.

19Dơlãp Yàc, la Yàc Je-su, hlãq chơkhãq khiãng ròq sơmar pơđar Ti-mô-the trôh rơwãc pơnõq adơi sơai, pioh hlãq kung hũ paluơ padờp tũq hmỡq thơu dơgrữq kaya mưng pơnõq adơi sơai. 20Kơyua hlãq ôh hũ mơnuĩh halơi tơmo hũ sa hatai yơu nhũ nữn, la mơnuĩh avih hatai sơnơng mơwan mưng dơgrữq kaya kuơ màc pơweh sì pơnõq adơi sơai, 21kơyua dơgrữq mơnuĩh tơmo kung duah dơgrữq kaya hũ kuơ ga drơi, ôh iỡuq dơgrữq kaya pơweh sì Yàc Dõc Pơ-tlah Je-su. 22Nữn pơnõq adơi sơai thơu vruãq ngãq nhũ, kơyua nhũ drưh yơu anàq sì ama, nhũ song duh vruãq ga Pơnuaĩq Siàp sigỡuq sì hlãq. 23Kơyua yơu nữn hlãq chơkhãq khiãng ròq pơđar nhũ nao mư tũq hlãq thơu jỡc vruãq ngãq drơi hũ ròq yơu halơi. 24Nữn hlãq hũ hatai pãc gơnĩt dơlãp Yàc làiq mĩn rùp phuỗt hlãq kung ròq ôh suơi nao trôh rơwãc adơi sơai. 25Vơnãh tơmo, hlãq sơnơng iỡuq pơđar Ep-ba-phô-đĩt nao wỡq sì pơnõq adơi sơai, nhũ la adơi sơai sì mơnuĩh ngãq vruãq sigỡuq kung la mơnuĩh nao mơsôh sigỡuq hlãq hũ, la mơnuĩh ãt pơđar mưng pơnõq adơi sơai sì kung la mơnuĩh duh vruãq ga kaya halơi hlãq siẽuq, 26kơyua kơnãl thơu làiq nhũ avih prãn chơkhãq khiãng ưng dòq sì dơgrữq pơnõq adơi sơai, sì kung iãq ka-ồq ka-iãp kơyua pơnõq adơi sơai song hmỡq làiq nhũ kađòc ruãq. 27Kơyua viãq la nhũ song ruãq tơrãq jẽq mơtai, nữn Yàc Pô Lơngĩq song anĩt duman nhũ, nữn ôh mĩn dũ nhũ, nữn gãm sì hlãq wỡq, tồq ga hlãq ôh ãt kaya ka-ồq ka-iãp brõq pơtãl kaya ka-ồq ka-iãp. 28Yơu nữn, hatai hlãq mơ-ôh pơđar nhũ nao mư, tồq tũq halơi pãp wỡq nhũ, pơnõq adơi sơai pơlih uỗt sơh, sì hlãq kung ôh dòq ka-ồq ka-ãn tơra. 29Kơyua nữn, iỡuq tồq ròq nhũ dơlãp Yàc mưng dơgrữq kaya sơh sơr, patui wỡq iỡuq hũ hatai ki ngãm dơgrữq mơnuĩh halơi yơu nữn, 30kơyua mưng vruãq ngãq Yàc Dõc Pơ-tlah hũ, nữn nhũ vloh jẽq mơtai, tũq tlàq kaya hadiuq drơi pioh pơlih ngãq pơtãl dơlãp kaya duh vruãq pơnõq adơi sơai hũ pioh ga hlãq.