Skip to content
BibleKenya

Roglai Bible Literal Text

Phi-lip 1:6

Verse 6 is marked below, with the whole chapter around it. Read from the start

Pol sì Ti-mô-the, halỗt mơnãq Yàc Dõc Pơ-tlah Je-su, pơyua ga avih dơgrữq mơnuĩh gơnuar pơđar prõng dơlãp Yàc Dõc Pơ-tlah Je-su, la dơgrữq mơnuĩh pãc-tui yàc dòq pãq palơi Phi-lip, sigỡuq sì dơgrữq mơnuĩh gơnuar pơto gãm sì mơnuĩh gơnuar vruãq. Lakơu kaya anĩt sì kaya dadu lơngai mưng Yàc Pô Lơngĩq, la Ama, sì Yàc pơnõq drơi, la Yàc Dõc Pơ-tlah Je-su, dòq pãq dlòc pơnõq adơi sơai.

Hlãq ỡn ngai Yàc Pô Lơngĩq hlãq hũ dơlãp dơgrữq tũq sơdor trôh mưng pơnõq adơi sơai, dơlãp dơgrữq pơnuaĩq iơu lakơu hlãq hũ ga avih dơgrữq pơnõq adơi sơai, hlãq padỡc gãm pơnuaĩq iơu lakơu gãm sì hatai sơh-sơr kơyua mưng kaya ngãq vruãq sigỡuq pơnõq adơi sơai hũ dơlãp vruãq akhàt tơviãq Pơnuaĩq Siàp mưng harơi chơmrờp tãl trôh tũq nĩ; kơyua hlãq pãc gơnĩt mưng pơnuaĩq ngãq gơnĩt nĩ, làiq Pitao song pơdòq ngãq tơviãq vruãq ngãq siàp dơlãp pơnõq adơi sơai ròq ngãq wil tãl, tãl trôh harơi Yàc Dõc Pơ-tlah Je-su hũ; pơweh sì hlãq, viãq la pơnuaĩq ngãq gơnĩt nĩ đang mang pioh sơnơng yơu nữn mưng avih dơgrữq pơnõq adơi sơai, kơyua hlãq apãt rơmiãq pơnõq adơi sơai dơlãp hatai drơi, avih tãl aràc pơnõq adơi sơai kung la dơgrữq mơnuĩh ngãq vruãq sigỡuq sì hlãq kơyua mưng kaya anĩt, gãm dơlãp sàc jam hlãq hũ, gãm sì dơlãp kaya dõc jơga sì pơnuaĩq ngãq chưng gơnĩt ga Pơnuaĩq Siàp. Kơyua Yàc Pô Lơngĩq la Pitao ngãq chưng tơpãq tơviãq hlãq hũ, yơu halơi hlãq lơhẽ lơhuãi chơkhãq chàc avih dơgrữq pơnõq adơi sơai mưng hatai khiãng anĩt Yàc Dõc Pơ-tlah Je-su hũ. Sì pơnuaĩq hlãq iơu lakơu nữn la kaya khiãng duman pơnõq adơi sơai hũ vãq sơrè dơlãh dơlai, miẽt pơtãl tơgùq brõq rlao dơlãp dlò sơnơng jãc sigỡuq sì dơgrữq kaya pãc thơu, tồq ga pơnõq adơi sơai pơlih iãq gơnĩt kaya halơi la siàp rlao, tồq pioh ga pơnõq adơi sơai hũ sơđah sơchih sì ôh hũ kaya gơrloh pơkhè tãl trôh harơi Yàc Dõc Pơ-tlah hũ, hũ vãq sơrè voh chơtai dơlãp kaya tơpãq rĩng gơnang mưng Yàc Dõc Pơ-tlah Je-su, iãq trôh kaya gơhluh sì kaya sơ-uỗt mơyòp Yàc Pô Lơngĩq.

Pa-thơu pơnõq adơi sơai, hlãq ưng pơnõq adơi sơai thơu làiq dơgrữq kaya halơi tơviãq trôh ga hlãq viãq la song ngãq tơviãq kơyua kaya padỡc tơgùq Pơnuaĩq Siàp hũ. Tơviãq jỡc, dơlãp kaya krỡq jam hlãq hũ dơlãp Yàc Dõc Pơ-tlah song tơviãq jỡc nĩq nũn dòq di khrãh avih dơgrữq mơnuĩh lĩng iãq khiãq gơlãng pitao sigỡuq sì dơgrữq mơnuĩh tơmo, sì vơnah lũ pơnõq adơi sơai, gơnang mưng kaya krỡq jam hlãq hũ, song gơjãp gơnĩt dơlãp Yàc, vloh brõq chãc khĩn pioh akhàt tơviãq pơnuaĩq Yàc savĩq ôh tơtơh huaĩq. Bôh làiq vloh mĩn kung hũ tơkìq mơnuĩh pơto akhàt pơnuaĩq Yàc Dõc Pơ-tlah kơyua mưng kaya lơmùq mơvai sì kaya mơvlah kơchah, nữn kung hũ mơnuĩh pơto akhàt mưng hatai siàp, la dơgrữq mơnuĩh kơyua mưng kaya khiãng duman, thơu làiq hlãq hũ va tơma pioh dõc jơga Pơnuaĩq Siàp, nữn dơgrữq mơnuĩh kơyua mưng kaya ham guãm kalĩh, pơnõq nhũ pơto akhàt Yàc Dõc Pơ-tlah savĩq ôh tơpãq, sơnơng ưng ngãq pơtãl ga hlãq kaya pơđìq pơđua dơlãp kaya krỡq jam hlãq hũ. Yơu nữn vloh hayơu? Bôh làiq la mưng pơnẽq halơi — hẽla ngãq vlữq hẽla ngãq tơpãq — nữn Yàc Dõc Pơ-tlah hũ pơto akhàt, sì hlãq uỗt sơh mưng kaya nữn. Vơnah tơmo, hlãq kung ròq hũ ngãq ga uỗt sơh, kơyua hlãq thơu làiq kaya nĩ ròq va wỡq kaya dõc suãq trôh ga hlãq, gơnang mưng pơnuaĩq iơu lakơu pơnõq adơi sơai hũ sì kaya dõc iãq mưng Vơngãq Sơđah Yàc Dõc Pơ-tlah Je-su hũ, tui yơu hatai sơh sơr chơkhãq chàc sì kaya chàc gơnang hlãq hũ, nữn la hlãq ròq ôh kađòc ngãq ga mơlơu ơlah dơlãp avih dơgrữq vruãq halơi, nữn chãc khĩn dơlãp dơgrữq kaya, pioh tũq nĩ kung yơu avih dơgrữq tũq halơi, Yàc Dõc Pơ-tlah ròq hũ sơ-uỗt mơyòp dơlãp rùp phuỗt hlãq, bôh làiq hadiuq hẽla mơtai. Kơyua pơweh sì hlãq, Yàc Dõc Pơ-tlah la kaya hadiuq hlãq hũ, sì kaya mơtai la hũ kuơ ga hlãq yơu nữn. Nữn mơyah làiq hlãq mĩn hadiuq dơlãp rơlo rùp, nữn pơweh sì hlãq nữn la vruãq hũ voh chơtai sì hũ kuơ ga vruãq ngãq, yơu nữn hlãq ôh thơu drơi ròq duỡt ruãh gah halơi. Hlãq kađòc pagùq pơ-èp duah gah, dơlãp tũq hlãq ưng tồq tơviãq nao nữn hũ dòq sì Yàc Dõc Pơ-tlah, kơyua nữn la kaya siàp rlao avih lũ viãq, nữn hlãq miẽt dòq dơlãp rơlo rùp nữn la kaya iỡuq chàc rlao ga pơnõq adơi sơai. Tũq song pãc gơnĩt kaya nữn, hlãq thơu làiq drơi ròq dòq wỡq sì dòq miẽt sì avih dơgrữq pơnõq adơi sơai, kơyua kaya prãn tơgùq sì kaya uỗt sơh dơlãp voh tui pơnõq adơi sơai hũ, tồq kaya pa-prõc rùp pơnõq adơi sơai hũ dơlãp Yàc Dõc Pơ-tlah Je-su mưng hlãq ròq vãq sơrè mưng vruãq hlãq nao trôh pãp pơnõq adơi sơai sa bãc tơra. Mĩn hũ sa kaya pơnõq adơi sơai iỡuq hadiuq hayơu savĩq đang mang sì Pơnuaĩq Siàp Yàc Dõc Pơ-tlah hũ, tồq bôh làiq dơlãp tũq hlãq trôh sì iãq rơwãc pơnõq adơi sơai hẽla tũq lakồq mơta, nữn hlãq pơlih hmỡq mưng pơnõq adơi sơai làiq pơnõq adơi sơai sa hatai dòq dỡc gơjãp, sì sa kaya sơnơng mơsôh ơtòc sigỡuq kơyua voh tui Pơnuaĩq Siàp hũ, sì ôh kađòc dơgrữq mơnuĩh jơdrãq ngãq ga tơtơh huaĩq dơlãp avih dơgrữq kaya halơi. Nĩ la nỡm mưng kaya lơhiãq thĩt pioh ga pơnõq nhũ, nữn la nỡm mưng kaya dõc pơ-tlah pơnõq adơi sơai hũ — sì kaya nĩ mưng Yàc Pô Lơngĩq. Kơyua mưng Yàc Dõc Pơ-tlah, kaya anĩt song vrơi ga pơnõq adơi sơai ôh mĩn pioh pãc-tui dơlãp Pitrai, nữn kung pioh ãt dleh dlàr kơyua mưng Pitrai, tũq hũ sigỡuq sì kaya mơvlah mơsôh nữn pơnõq adơi sơai song iãq bôh dơlãp hlãq, sì tũq nĩ ãn hmỡq dơlãp hlãq.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.