E-phe-sô 6

1Ơ mơnuĩh ngãq anàq, iỡuq pãc sãp ami ama drơi dơlãp Yàc, kơyua nữn la kaya iỡuq viãq. 2“Iỡuq duh huaĩq di ami ama anàq” (nữn la pơnuaĩq pơđar-va bãc chơmrờp patui gãm pơnuaĩq hẽ grữh), 3“pioh hũ lơngai siàp trôh sì anàq nữn anàq pơlih hũ hadiuq suơi pãq dlòc voh hlùq.” 4Mơnuĩh ngãq ama, nữn juơi ngãq ga anàq tơcho drơi ơnõc mơvai. Pa-vlữq wỡq, iỡuq chiẽp ròc pơnõq nhũ dơlãp kaya gơrloh pơkhè nhũ sì pơto pơđar nhũ mưng pơnuaĩq Yàc hũ.

5Ơ mơnuĩh ngãq halỗt mơnãq, iỡuq duh huaĩq di mơnuĩh pô tui vơnah gah rơlo rùp drơi mưng kaya ki ngãm sì huaĩq tơtơh mãq mưng hatai tui tơpãq drơi hũ, drưh yơu pơweh sì Yàc Dõc Pơ-tlah, 6ôh iỡuq mĩn mưng kaya ngãq vruãq dơlãp tũq bôh mơta pô iãq nữn yơu dơdrữq mơnuĩh ưng mãq hatai siàp, nữn yơu halỗt mơnãq Yàc Dõc Pơ-tlah, ngãq tơviãq tui hatai ưng Yàc Pô Lơngĩq hũ sì gãm vơngãq yua, 7duh vruãq mưng hatai tluỡiq gơhual, yơu ngãq ga Yàc nữn ôh iỡuq ngãq ga anàq mơnuĩh, 8kơyua thơu làiq avih tãl aràc, bôh làiq mơnuĩh ngãq halỗt hẽla lơnang lơnai, bôh làiq ngãq vruãq siàp halơi, nữn mơnuĩh nữn ròq tồq mãq kaya alĩn patui yơu nữn mưng Yàc.

9Sì, ơ mơnuĩh ngãq pô, iỡuq ngãq đơp siàp savĩq yơu nữn sì dơgrữq mơnuĩh halỗt mơnãq, tũq juơi gơrloh pahi pơhuaĩq, kơyua thơu làiq Mơnuĩh Pô pơnõq nhũ gãm sì pơnõq adơi sơai hũ ãn dòq pãq dlòc lơngĩq, sì ôh hũ kaya dòq gah vơnah halơi dơlãp Pitrai.

10Luôĩq hadơi, iỡuq hũ ngãq ga prãn khãc dơlãp Yàc, sì dơlãp kaya prãn khãc gơnuar chơnuãq Pitrai hũ. 11Iỡuq chồq tơma avih dơgrữq kaya mơsôh Yàc Pô Lơngĩq hũ, pioh ngãq ga pơnõq adơi sơai pơlih dòq gơjãp kađữc, jơdrãq sì dơgrữq pơnẽq vơyai kamlai hũ. 12Kơyua kaya kalìt mơsôh pơnõq drơi hũ ôh iỡuq la jơdrãq sì dơrãh sì rơlo rùp, nữn la jơdrãq wỡq sì dơgrữq mơnuĩh apãt akõq, jơdrãq wỡq sì dơgrữq gơnuar chơnuãq, jơdrãq wỡq sì dơgrữq mơnuĩh apãt akõq dun kơyua sồp kơnãm nĩ, jơdrãq wỡq sì dơgrữq vơngãq iãh mơsãc dòq dơgrữq anĩh pãq dlòc lơngĩq. 13Kơyua yơu nữn, iỡuq chồq mãq vẽq avih kaya mơsôh Yàc Pô Lơngĩq hũ, pioh pơnõq adơi sơai pơlih jơdrãq jỡc dơlãp harơi rũc rài, sì dòq dữc gơjãp kađữc hadơi sì tũq wil tãl avih dơgrữq kaya. 14Yơu nữn, iỡuq dòq dữc gơjãp, tũq akãq talơi kơ-iãng pơnõq adơi sơai mưng pơnuaĩq tơpãq, chồq mãq vẽq ao pasơi mưng kaya tơpãq dãng, 15chồq tơma tơkai kaya rơchãc lơĩh Pơnuaĩq Siàp dadu lơngai hũ, 16yữc tơgùq dloòng khel voh tui dơlãp dơgrữq kaya, kơyua yơu nữn nữn pơnõq adơi sơai ròq pơlih ngãq vơdãp dơgrữq gai brãp mơnuĩh mơsãc hũ. 17Iỡuq angui ka-lơmô pasơi dõc pơ-tlah sì apãt đao Vơngãq Sơđah, nữn la pơnuaĩq Yàc Pô Lơngĩq hũ, 18dơlãp tũq iơu lakơu dơgrữq tũq dơlãp Yàc Vơngãq Sơđah pa-thơu mưng dơgrữq pơnuaĩq iơu lakơu sì rãn lakơu, sì pơweh trôh voh chơtai dơlãp kaya mơ-uãh chơkhãq mưng avih kaya gơjãp gơnĩt sì kaya iơu lakơu ala pioh ga avih dơgrữq mơnuĩh gơnuar pơđar prõng, 19kung iỡuq iơu lakơu ga hlãq, pioh pơnuaĩq Yàc pơlih hũ vrơi ga hlãq, tũq ga hlãq pơh mơvah đơp tơviãq gãm sì chãc khĩn pioh akhàt vrơi pa-thơu kaya dơlãp dơđỡuq Pơnuaĩq Siàp hũ 20(kơyua Pơnuaĩq Siàp nữn nữn hlãq tơviãq jỡc mơnuĩh ãt pơđar kađòc akãq srẽng), tồq ga dơlãp kaya mãq krỡq nữn, hlãq pơlih chãc khĩn pơto akhàt tui yơu vruãq hlãq iỡuq đơp.

21Nữn pioh ga pơnõq adơi sơai kung pơlih thơu dơgrữq vruãq ròq tơbàq trôh di hlãq, hlãq ãn ngãq hagĩq, nữn Ty-chi-kơ, mơnuĩh adơi sơai anĩt anar sì halỗt mơnãq tui tơpãq dơlãp Yàc, ròq vrơi ga pơnõq adơi sơai thơu dơgrữq vruãq, 22nhũ nữn la mơnuĩh nữn kơu ròq pơđar nao trôh sì pơnõq adơi sơai kơyua sa kanõh nĩ, pioh pơnõq adơi sơai pơlih thơu dơgrữq kaya mưng pơnõq hlãq sì hatai pơnõq adơi sơai hũ paluơ padờp.

23Lakơu kaya dadu lơngai vrơi ga pơnõq adơi sơai, sigỡuq sì kaya khiãng duman sì voh tui mưng Yàc Pô Lơngĩq la Ama sì Yàc, la Yàc Dõc Pơ-tlah Je-su. 24Lakơu kaya anĩt dòq sigỡuq sì avih dơgrữq mơnuĩh anĩt duman Yàc Dõc Pơ-tlah Je-su, Yàc pơnõq drơi, mưng kaya khiãng duman dòq gãm gãm ôh padưh.