Ma-thi-ơ 5:14

1Nữn, hadơi tũq Yàc Je-su bôh tơpuôl vual vơla lũ, Pitrai đìq pãq dlòc chỡq, sì tũq Pitrai song dòq guh vloh, dơgrữq mơnuĩh mơgrũ Pitrai nao trôh pãq Pitrai. 2Pitrai pơh chơbuai sì pơto pơnõq nhũ, làiq:

3“Lơngai ga dơgrữq mơnuĩh rơbah la-ơi dơlãp gah vơngãq yua,

kơyua lơgar dlòc lơngĩq la pơweh sì pơnõq nhũ.

4Lơngai ga dơgrữq mơnuĩh sia chõq,

kơyua pơnõq nhũ ròq hũ paluơ padờp.

5Lơngai ga dơgrữq mơnuĩh lơmuỡn siàp,

kơyua pơnõq nhũ ròq tồq mãq hũ hlùq.

6Lơngai ga dơgrữq mơnuĩh lơ-pa mơhao kaya tơpãq dãng,

kơyua pơnõq nhũ ròq hũ tarơi wil tãl.

7Lơngai ga dơgrữq mơnuĩh hũ hatai anĩt anar,

kơyua pơnõq nhũ ròq hũ anĩt anar.

8Lơngai ga dơgrữq mơnuĩh hũ hatai sơchih,

kơyua pơnõq nhũ ròq bôh Yàc Pô Lơngĩq.

9Lơngai ga dơgrữq mơnuĩh ngãq salơnuãq,

kơyua pơnõq nhũ ròq hũ angãn la anàq Yàc Pô Lơngĩq.

10Lơngai ga dơgrữq mơnuĩh kađòc mãq pakỡuq kơyua kaya tơpãq dãng,

kơyua lơgar dlòc lơngĩq la pơweh sì pơnõq nhũ.

11Lơngai ga adơi sơai dơlãp tũq aràc siẽq siẽl sì mãq pakỡuq adơi sơai, sigỡuq sì avih kaya mơsãc akhàt vlữq jơdrãq sì adơi sơai kơyua mưng pôgrũ.

12Iỡuq uỗt sơh sì sơh sơr, kơyua kaya ban adơi sơai hũ pãq dlòc lơngĩq prong viãq. Kơyua aràc kung mãq pakỡuq dơgrữq mơnuĩh gơnuar hwơr hlơu adơi sơai drơh yơu nữn.

13Adơi sơai la sơrã hlùq hũ. Nữn mơyah làiq sơrã lơhiãq thĩt kaya bãq, nữn pơlih hũ mãq kaya hagĩq ngãq ga nhũ bãq wỡq? Nhũ ôh hũ kuơ ga vruãq hagĩq jỡc, nữn iỡuq prah tơviãq blàc sì kađòc aràc juãq ala tơkai. 14Adơi sơai la kaya sơdah dun kơyua hũ. Sa palơi prong dòq pãq dlòc chỡq nữn ôh tũq halơi padỡuq dơđỡuq jỡc. 15Kung ôh asơi tuỗiq đeng vloh chẽq pãq ala thũng, sì ròq chẽq pãq dlòc tơkai đeng, nữn nhũ pơsàc sơdah ga avih dơgrữq mơnuĩh dòq dơlãp sàc. 16Kung yơu nữn, kaya sơdah adơi sơai pơsàc sơdah di anãq anàq mơnuĩh, ngãq ga pơnõq nhũ iãq bôh dơgrữq vruãq siàp adơi sơai hũ sì sơ-uỗt mơyòp Ama adơi sơai hũ dòq pãq dlòc lơngĩq.

17Juơi sơnơng làiq pôgrũ trôh pioh pa-lơhiãq pơnuaĩq voh-va hẽla pơnuaĩq gơnuar hwơr. Pôgrũ song trôh ôh iỡuq pioh pa-lơhiãq, nữn pioh ngãq ga wil tãl. 18Kơyua iỡuq viãq, pôgrũ đơp sì adơi sơai, tãl trôh tũq lơngĩq sì tơnãh ôh ka lơhiãq, nữn ôh sa tơteh hẽla sa vlar halơi dơlãp kaya voh-va viãq ôh lơhiãq tãl trôh tũq avih dơgrữq kaya tơviãq jỡc wil tãl. 19Kơyua yơu nữn, mơyah làiq asơi ngãq sỗq suẽl sa kaya tìt rlao avih dơlãp dơgrữq kaya pơđar-va nĩ sì pơto anàq mơnuĩh ngãq yơu nữn ròq hũ angãn la tìt rlao avih dơlãp lơgar dlòc lơngĩq. Nữn mơnuĩh halơi rơmiãq jàc pơnuaĩq nữn sì pơto mơnuĩh tơmo, nữn mơnuĩh nữn ròq hũ angãn la prõc dơlãp lơgar dlòc lơngĩq. 20Kơyua pôgrũ đơp sì adơi sơai thơu làiq mơyah làiq kaya tơpãq dãng adơi sơai hũ ôh siàp rlao kaya tơpãq dãng dơgrữq mơnuĩh gơnuar pơto voh-va hũ sì mơnuĩh Pha-ri-si, nữn adơi sơai viãq ròq ôh hũ tơma dơlãp lơgar dlòc lơngĩq.

21Adơi sơai hũ hmỡq yơu nĩ, pơnuaĩq mơnuĩh rài sơđãq pơto làiq: ‘Hã Juơi pa-mơtai mơnuĩh,’ sì ‘Mơyah làiq mơnuĩh halơi pa-mơtai mơnuĩh nữn iỡuq ãt chahrơna.’ 22Nữn pôgrũ đơp sì adơi sơai thơu làiq mơyah làiq mơnuĩh halơi lơmùq mơvai adơi sơai drơi ròq iỡuq ãt chahrơna. Sì mơnuĩh halơi đơp adơi sơai drơi làiq: ‘Hã gơla!’ nữn ròq iỡuq kađòc tơpuôl gơnuar chahrơna. Dòq mơnuĩh halơi đơp làiq: ‘Mơnuĩh gơla pơtòq!’ nữn ròq iỡuq kađòc ngãq dlàiq dơlãp apôi tơnãh ala. 23Kơyua yơu nữn, mơyah làiq adơi sơai ãn pioh kaya talơvãt drơi pãq dlòc ban talơvãt pãq nữn, adơi sơai sơdor wỡq làiq sa aràc adơi sơai hũ kaya hagĩq ôh salơvãq sì drơi, 24nữn iỡuq luơi kaya talơvãt drơi pãq anãq ban talơvãt. Halơu avih iỡuq nao ngãq salơvãq sì adơi sơai nữn, sì vloh, nao trôh sì pioh kaya talơvãt drơi. 25Iỡuq sơmar salơnuãq sì mơnuĩh yãq drơi sa vĩq sơmar vẽq tũq adơi sơai nao sigỡuq sì mơnuĩh nữn, huaĩq mơnuĩh yãq adơi sơai pơlih hũ pơjao adơi sơai ga pô chahrơna, sì pô chahrơna pơjao ga mơnuĩh apãt sàc jam, vloh adơi sơai pơlih hũ kađòc mãq krỡq tơma sàc jam. 26Pôgrũ đơp viãq sì adơi sơai, adơi sơai gơnĩt viãq ròq ôh tơviãq tlah anĩh nữn tãl trôh tũq song vơyar avih jĩn kađòc srẽ gãm dòq.

27Adơi sơai hũ hmỡq yơu nữn, pơnuaĩq pơto làiq: ‘Juơi sỗq dlàiq drì drõc.’ 28Yơu nữn pôgrũ đơp sì adơi sơai thơu làiq asơi nữn iãq sa aràc anàq kamơi sì mãq hatai ham ưng nhũ, mơnuĩh nữn song sỗq dlàiq drì drõc sigỡuq sì mơnuĩh nữn dơlãp hatai drơi vloh. 29Vơnah tơmo, mơyah làiq mơta gah hơnuãq ngãq ga adơi sơai drơi sỗq dlàiq, iỡuq alẽc nhũ tơviãq sì prah ơtah adơi sơai. Kơyua yơu nữn la siàp rlao vrơi ga adơi sơai sa vơnah rùp phàp adơi sơai hũ kađòc lơhiãq, sì avih rùp phàp adơi sơai hũ ôh kađòc prah tơma tơnãh ala. 30Mơyah làiq tơngãn hơnuãq ngãq ga adơi sơai sỗq dlàiq, iỡuq koh nhũ vẽq sì prah ơtah adơi sơai. Kơyua yơu nữn la siàp rlao vrơi ga adơi sơai sa vơnah rùp phàp adơi sơai hũ kađòc lơhiãq, sì avih rùp phàp drơi ôh nao tơma tơnãh ala. 31Kung hũ pơnuaĩq pơto làiq: ‘Asơi tlàq luơi sơdiuq drơi, mơnuĩh nữn iỡuq vrơi ga nai sa vlah vơ-ar patloh luơi.’ 32Yơu nữn, kơu vrơi adơi sơai thơu làiq aràc asơi patloh luơi sơdiuq drơi, — sì ôh hũ lơniãu mưng dlàiq arĩh athãm, — la ngãq ga nai tơviãq jỡc mơnuĩh arĩh athãm. Sì aràc asơi khiãng nai hadơi sì tũq nai kađòc patloh luơi kung sỗq dlàiq drĩ drõc.

33Vloh adơi sơai kung hũ hmỡq pơnuaĩq pơto mơnuĩh mưng rài sơđãq làiq: ‘Juơi grưh lor, sì iỡuq rơmiãq pơnuaĩq grưh drơi hũ sì Yàc.’ 34Yơu nữn, kơu vrơi adơi sơai thơu, juơi sơtãp rùp hẽ grưh kaya hagĩq, kung juơi tơchơi lơngĩq sì sơtãp rùp, kơyua nữn la sơvan Yàc Pô Lơngĩq hũ; 35juơi tachơi hlùq sì sơtãp rùp, kơyua nữn la gơnãq juãq tơkai Pitrai; juơi tachơi palơi Je-ru-sa-lem sì sơtãp rùp, kơyua nữn la palơi Pitao prõng hũ. 36Kung juơi tachơi akõq drơi sì sơtãp rùp, kơyua adơi sơai ôh pơlih hũ ngãq ga sa dãc bồq jỡc kòq hẽla jùq jỡc. 37Yơu nữn adơi sơai iỡuq đơp ‘Iỡuq, hũ’ hẽla ‘Ôh, ôh hũ.’ Dơgrữq pơnuaĩq halơi tơmo pơtãl tơma nữn la mưng kamlai.

38Adơi sơai hũ hmỡq yơu nữn, pơnuaĩq pơto akhàt làiq: ‘Mơta vơyar mơta, tagơi vơyar sì tagơi.’ 39Yơu nữn, pôgrũ đơp pioh adơi sơai thơu, juơi jơdrãq sì mơnuĩh mơsãc. Pa-vlữq wỡq, asơi pah adơi sơai miãng gah hơnuãq, nữn iỡuq vrơi miãng gah dih ga mơnuĩh nữn. 40Mơyah làiq asơi ưng yãq adơi sơai pãq va anĩh chahrơna sì mãq vẽq ao dơlãp adơi sơai hũ, iỡuq luơi mơnuĩh nữn mãq wỡq ao lơniãu drơi. 41Nữn asơi pơgùq pơ-èp adơi sơai nao sa dũq jơlàt, iỡuq nao dua dũq jơlàt sigỡuq sì mơnuĩh nữn. 42Iỡuq vrơi ga mơnuĩh tơnĩa lakơu adơi sơai, sì juơi kơmlah mơnuĩh ưng anham kaya adơi sơai hũ.

43Adơi sơai hũ hmỡq đơp yơu nữn, pơnuaĩq song hũ đơp: ‘Iỡuq khiãng anĩt mơnuĩh gỡuq palơi drơi, sì mơvai mơnuĩh jơdrãq sì drơi.’ 44Yơu nữn kơu đơp sì adơi sơai, iỡuq khiãng duman mơnuĩh jơdrãq drơi sì iơu lakơu ga mơnuĩh mãq pakỡuq drơi. 45Pioh ga adơi sơai hũ ngãq anàq Ama drơi hũ dòq pãq dlòc lơngĩq. Nữn la kơyua Pitrai ngãq ia harơi Pitrai hũ tơgùq pơsàc ga mơnuĩh mơsãc sì mơnuĩh siàp, sì vrơi hajàt ga mơnuĩh tơpãq dãng sì mơnuĩh ôh tơpãq. 46Kơyua mơyah làiq adơi sơai khiãng duman mơnuĩh khiãng duman drơi, nữn adơi sơai tồq mãq hũ kaya ban hagĩq? Ôh iỡuq la mĩn dơgrữq mơnuĩh mãq jia kung ngãq yơu nữn yơh? 47Sì mơyah làiq adơi sơai mĩn tồq ròq adơi sơai drơi soh, nữn adơi sơai hũ hagĩq rlao sì mơnuĩh tơmo? Ôh iỡuq mĩn mơnuĩh lơniãu kung ngãq yơu nữn yơh? 48Kơyua yơu nữn, adơi sơai iỡuq wil tãl, drưh yơu Ama pãq dlòc lơngĩq adơi sơai hũ la wil tãl.