Ma-thi-ơ 13

1Dơlãp harơi nữn, Yàc Je-su tơviãq mưng sàc, sì dòq guh pãq gah ia tơsìq. 2Sa tơpuôl vual vơla lũ viãq pơtõm tòp dar Pitrai, nữn jỡc Pitrai tơmã dơlãp ahòq sì dòq guh pãq đỡn, dòq dơgrữq vual vơla nữn dòq dỡc pãq gah tơsìq. 3Vloh Yàc Je-su pơto pơnõq nhũ lũ kaya mưng pơnuaĩq pa-mơyơu, Pitrai đơp làiq: “Dih, hũ sa aràc mơnuĩh nao dràq pơjẽh. 4Tũq mơnuĩh nữn dràq, hũ asar pơjẽh hõq rah gah jơlàt, nữn chĩp trôh sì bõc avih. 5Dơgrữq asar pơjẽh tơmo hõq pãq anĩh hũ lũ patơu, anĩh ôh hũ lũ hlùq siàp. Nữn mư, nhũ tơmuh, kơyua tãl hlùq ôh hũ dơlãp. 6Nữn tũq ia harơi tơgùq, nhũ kađòc thô khiãq kơyua ôh hũ akhà, nữn jỡc nhũ tơhiu avih. 7Asar pơjẽh tơmo wỡq hõq pãq khrãh bôr druơi, nữn dơgrữq bôr kayơu druơi tơmuh tơgùq sì ngãq ga nhũ gãl kađòc. 8Sa vơnah tơmo wỡq hõq pãq hlùq siàp nữn tơviãq voh, asar tơviãq jỡc sa rơtôh, asar tơmo nãm plôh, asar tơmo wỡq tlơu plôh. 9Asơi hũ tơnĩa, hmỡq vẽq.”

10Vloh dơgrữq mơnuĩh mơgrũ, trôh drơ sì Yàc Je-su: “Kơyua kanõh hagĩq vloh pôgrũ angui mưng pơnuaĩq pa-mơyơu đơp sì vual vơla?” 11Nữn la, tũq Yàc Je-su hẽ pơnuaĩq sì đơp sì pơnõq nhũ làiq: “Pơweh Adơi sơai song hũ vrơi kaya thơu pãc dơgrữq kaya dơlãp dơđỡuq mưng lơgar lơngĩq, dòq pơnõq nhũ nữn ôh hũ vrơi. 12Kơyua asơi hũ vloh, mơnuĩh nữn ròq hũ vrơi pơtãl wỡq, sì mơnuĩh nữn ròq hũ dơlah dơlai. Nữn asơi ôh hũ, nữn tơviãq jỡc kaya mơnuĩh nữn hũ kung ròq kađòc suãq mãq avih kaya nhũ hũ. 13Kơyua kanõh gơtha nĩ, pôgrũ đơp sì pơnõq nhũ mưng pơnuaĩq pa-mơyơu; mơyah làiq pơnõq nhũ iãq kung ôh bôh; sì mơyah làiq pơnõq nhũ pađĩc tơnĩa nhũ kung ôh hmỡq, sì ôh thơu pãc. 14Nữn pơnuaĩq gơnuar hwơr E-sai hũ luơi ga pơnõq nhũ song hũ tơviãq jỡc iỡuq viãq, làiq:

‘Tơnĩa pơnõq hã ròq pa-hmỡq, nữn gơnĩt viãq ròq ôh thơu pãc;

dòq mơta pơnõq hã ròq mững iãq, nữn ròq gơnĩt viãq ôh bôh hagĩq jỡc.

15Kơyua hatai vual vơla nĩ tơviãq jỡc khãc krẽc;

pơnõq nhũ tơrãq tơnĩa,

pơnõq nhũ kapìq mơta,

pioh mơta ôh bôh,

pioh tơnĩa ôh hmỡq,

pioh hatai ôh thơu pãc sì ôh gơlàiq mai wỡq,

pioh hũ Kơu pasồq pakhơĩh.’

16Nữn lơngai ga mơta adơi sơai, kơyua hũ bôh jỡc, sì lơngai ga tơnĩa adơi sơai, song hmỡq jỡc. 17Iỡuq viãq, pôgrũ đơp viãq sì adơi sơai, lũ mơnuĩh gơnuar hwơr sì mơnuĩh tơpãq dãng ưng bôh dơgrữq vruãq adơi sơai bôh, nữn ôh bôh jỡc, sì ưng hmỡq kaya adơi sơai hmỡq, nữn pơnõq nhũ ôh hmỡq jỡc. 18Yơu nữn, adơi sơai hmỡq vẽq pơnuaĩq pa-mơyơu mưng mơnuĩh dràq pơjẽh. 19Dơgrữq aràc mơnuĩh halơi hmỡq pơnuaĩq siàp mưng lơgar lơngĩq nữn ôh thơu pãc, nữn kamlai trôh sì tlẽq dơgrữq kaya song hũ dràq dơlãp hatai mơnuĩh nữn. Nữn la asar pơjẽh hũ dràq pãq gah jơlàt. 20Hũ sar pơjẽh dràq pãq anĩh hlùq lũ patơu rơđeh, nữn la mơnuĩh hmỡq pơnuaĩq siàp nữn mư sơh sơr tồq mãq. 21Nữn mơnuĩh nữn ôh hũ akhà dơlãp hatai drơi, nữn mĩn dòq padơh sa asĩt soh. Tũq kaya dleh dlàr hẽla kaya mãq pakỡuq trôh kơyua mưng pơnuaĩq siàp, nữn pơnõq nhũ sơnẽq sỗq mư. 22Hũ asar pơjẽh dràq dơlãp dơgrữq bôr druơi, nữn la mơnuĩh hmỡq pơnuaĩq siàp, nữn dơgrữq kaya sơnơng rơchãc mưng rài nĩ sì kaya ham ưng mưng jĩn priãq ngãq ga pơnuaĩq siàp kađòc gãl sì ôh tơviãq voh jỡc. 23Nữn asar pơjẽh hũ dràq pãq hlùq siàp, nữn la mơnuĩh hmỡq pơnuaĩq siàp sì thơu pãc, mơnuĩh nữn ròq tơviãq voh sa asar tơviãq sa rơtôh, sa asar jỡc nãm plôh, sa asar jỡc wỡq tlơu plôh.”

24Yàc Je-su đơp pãq anãq pơnõq nhũ sa pơnuaĩq pa-mơyơu tơmo, làiq: “Lơgar lơngĩq drưh yơu sa aràc mơnuĩh dràq pơjẽh siàp dơlãp hama drơi. 25Nữn dơlãp tũq dơgrữq mơnuĩh dòq pìq, mơnuĩh lơmùq mơvai nữn nhũ trôh sì dràq pơjẽh rỡq nhẽq tơmã dơlãp vơdai mi vloh nao. 26Tũq vơdai mi tơmuh tơgùq sì tơviãq vơngà, nữn rỡq nhẽq kung tơviãq yơu nữn. 27Tũq nữn, dơgrữq mơnuĩh halỗt mơnãq pô sàc nữn, trôh đơp sì ung: ‘Ơ pô, ôh iỡuq ung song dràq asar pơjẽh siàp dơlãp hama drơi yơh? Yơu nữn hayơu tũq nĩ tơviãq rỡq nhẽq?’ 28Pô hẽ wỡq sì pơnõq nhũ: ‘Mơnuĩh sòq jơdrãq kơu song ngãq vruãq nĩ.’ Dơgrữq mơnuĩh halỗt mơnãq tơnĩa pô: ‘Yơu nữn, ung ưng pơnõq hlãq tơviãq nao vuĩq avih rỡq nhẽq nữn lơĩh?’ 29Nữn pô hẽ: ‘Juơi vuĩq, kơyua dơlãp tũq vuĩq rỡq nhẽq, pơnõq hã pơlih vuĩq sỗq vơdai mi sigỡuq sì rỡq nhẽq. 30Iỡuq luơi avih dua kaya tơmuh tơgùq sigỡuq tãl trôh vlàt yuãq. Tũq yuãq, kơu ròq hakơi mơnuĩh yuãq: Hlơu avih, iỡuq vuĩq rỡq nhẽq vloh akãq nhũ jỡc pòq vloh chôh dơlãp apôi, dòq vơdai mi nữn pơtõm tơma dơlãp adũq pioh kơu hũ.’”

31Vloh Pitrai akhàt wỡq ga pơnõq nhũ sa pơnuaĩq pa-mơyơu tơmo wỡq, Pitrai đơp: “Lơgar lơngĩq nữn drưh yơu asar savĩl nữn sa aràc mơnuĩh mãq dràq dơlãp hama nhũ. 32Viãq la asar pơjẽh nữn bôh làiq la tìt rlao dơlãp avih dơgrữq asar pơjẽh, Nữn tũq tơmuh tơgùq, nữn nhũ prong rlao avih dơgrữq kayơu dơlãp vỡn nhũ tơviãq jỡc kayơu, nữn jỡc chĩp lơngĩq trôh ngãq srôh pãq dlòc dơgrữq thàt nhũ.” 33Vloh Pitrai akhàt wỡq ga pơnõq nhũ sa pơnuaĩq pa-mơyơu tơmo wỡq tơra: “Lơgar lơngĩq drưh yơu voh tapơi sì sa aràc mơnuĩh kamơi mãq jrơu sì tlơu wal tơpỗc hlỡq tãl trôh tũq hlỡq vrùq tơgùq.”

34Yàc Je-su đơp avih dơgrữq kaya nữn ga vual vơla mưng pơnuaĩq pa-mơyơu, Pitrai ôh đơp kaya hagĩq ga pơnõq nhũ nữn ôh angui pơnuaĩq pa-mơyơu. 35Nữn la pơnuaĩq song đơp tơviãq iỡuq viãq yơu mơnuĩh gơnuar hwơr đơp làiq:

“Kơu ròq pơh mơvah Kơu đơp mưng pơnuaĩq pa-mơyơu.

Kơu ròq đơp dơgrữq kaya dơđỡuq mưng tũq chrơng pajỡc lơngĩq tơnãh.”

36Vloh Yàc Je-su tơviãq tlah tơpuôl vual vơla lũ nao tơma sàc. Dơgrữq mơnuĩh mơgrũ Pitrai trôh đơp sì Pitrai: “Lakơu pôgrũ ràc tơviãq pơnuaĩq gơtha ga pơnõq hlãq pơnuaĩq pa-mơyơu mưng rỡq nhẽq dơlãp blàc hama.” 37Yàc Je-su đơp làiq: “Mơnuĩh dràq pơjẽh siàp la Anàq Mơnuĩh, 38blàc hama nữn la dun kơyua, dòq gar pơjẽh siàp — nĩ la anàq tơcho lơgar lơngĩq hũ. Vlữq wỡq la, rỡq nhẽq la anàq tơcho kamlai mơsãc hũ, 39sì mơnuĩh jơdrãq, song dràq rỡq nhẽq nữn la kamlai mơsãc. Vlàt yuãq la harơi luôĩq hadơi, sì mơnuĩh yuãq la dơgrữq mơnuĩh gơnrơh. 40Nữn, kơyua hayơu rỡq nhẽq hũ pơtõm sì chôh tơma dơlãp apôi, nữn dơlãp harơi luôĩq hadơi kung ròq yơu nữn. 41Anàq Mơnuĩh ròq pơđar dơgrữq mơnuĩh gơnrơh Pitrai, sì pơnõq nhũ ròq pơtõm tơviãq tlah mưng lơgar Pitrai avih dơgrữq kaya ngãq sỗq dlàiq sigỡuq sì dơgrữq mơnuĩh sỗq dlàiq. 42Nữn mơnuĩh gơnrơh ròq prah pơnõq nhũ tơma dơlãp apôi, anĩh hũ sia chõq sì kẽq tagơi. 43Tũq nữn, mơnuĩh tơpãq dãng ròq sơdah gơchràq yơu ia harơi dơlãp lơgar Ama drơi hũ. Asơi hũ tơnĩa, hmỡq vẽq.”

44“Lơgar lơngĩq drưh yơu sa kaya màc dor padỡuq dơlãp blàc hama dih, Hũ mơnuĩh duah bôh nhũ vloh nữn nao padỡuq wỡq. Kơyua sơh sơr mưng kaya nữn, nhũ nao pa-vlơi avih kaya drơi hũ pioh vlơi blàc hama nữn. 45Pơtãl wỡq, lơgar lơngĩq drưh yơu sa aràc mơnuĩh dih la mơnuĩh kãq pa-vlơi, duah patơu kràc siàp mơkrơ. 46Vloh nữn, tũq duah song bôh sa voh patơu kràc hũ kuơ màc prong viãq, hadơi nhũ nao pa-vlơi avih dơgrữq kaya drơi hũ pioh vlơi patơu kràc màc nữn.

47Vloh wỡq, lơgar lơngĩq drưh yơu sơnhuãl hũ pơlẽq pa-trỗt dơlãp ia tơsìq sì mãq hũ tãl dơgrữq anàq akàt, 48tũq nữn sơnhuãl vãq akàt vloh, mơnuĩh dãc akàt katũc nhũ đìq pãq dlòc chỡq, Vloh pơnõq nhũ dòq guh mãq pơtõm avih akàt siàp tơma dơlãp vai, dòq dơgrữq akàt iãh ôh hũ kuơ nữn pơnõq nhũ prah. 49Vruãq kung ròq yơu nữn dơlãp harơi luôĩq hadơi: Dơgrữq mơnuĩh gơnrơh ròq trôh pa-chơlah mơnuĩh mơsãc tơviãq tlah dì khrãh dơgrữq mơnuĩh tơpãq dãng. 50Vloh pơnõq nhũ ròq prah tơpuôl nữn tơma dơlãp apôi, la anĩh hũ sia chõq sì kẽq tagơi. 51Adơi sơai song thơu pãc avih dơgrữq kaya nĩ vloh?” Dơgrữq mơnuĩh mơgrũ drơ sì Pitrai: “Talơvãt, song thơu vloh.”

52Vloh Pitrai đơp sì pơnõq nhũ: “Kơyua yơu nữn, mơnuĩh gơnuar pơto voh-va halơi tơviãq jỡc mơnuĩh mơgrũ lơgar lơngĩq hũ nữn drưh yơu mơnuĩh pô sàc dih, va tơviãq kaya tlãq sigỡuq sì kaya vơhrơu mưng dơlãp adũq pioh kaya màc drơi hũ.” 53Vruãq ròq tơviãq jỡc tũq Yàc Je-su pơto vloh dơgrữq pơnuaĩq pa-mơyơu nĩ, nữn Pitrai tơviãq nao tlah anĩh nữn.

54Hadơi nữn Yàc Je-su mai wỡq pãq palơi phuỗt drơi, nữn pơto pơđar vual vơla dơlãp sàc pơtõm pơnõq nhũ, tơviãq jỡc la pơnõq nhũ mãq ngãq krơi sì đơp sigỡuq: “Gơnang mưng halơi sì mơnuĩh nĩ hũ kaya jãc rgơi sì dơgrữq khrung krơi yơu nữn? 55Ôh iỡuq mơnuĩh nữn la anàq lakơi ung khưh rgơi thơu ngãq kayơu yơh? Ôh iỡuq ami nhũ la Ma-ri nữn yơh? Ôh iỡuq pơnõq adơi nhũ la Ja-kơ, Jô-sep, Si-môn sì Ju-đe yơh? 56Ôh iỡuq avih dơgrữq adơi kamơi nhũ hũ song dòq pãq khrãh sì pơnõq drơi nữn yơh? Yơu nữn, gơnang mưng halơi nhũ hũ dơgrữq kaya nĩ?” 57Pơnõq nhũ ngãq sỗq sì Pitrai. Nữn Yàc Je-su đơp sì pơnõq nhũ: “Mơnuĩh gơnuar hwơr ôh tũq halơi kađòc iãq ôh srãp, lơniãu pãq palơi phuỗt drơi sì dơlãp sàc anĩh drơi.” 58Pitrai ôh ngãq lũ khrung krơi pãq đỡn kơyua hatai ôh pãc tui pơnõq nhũ hũ.