Ma-thi-ơ 12

1Tũq iỡuq dì harơi nữn, Yàc Je-su nao gãt dơgrữq blàc hama vơdai dơlãp harơi Sa-bat, sì dơgrữq mơnuĩh mơgrũ Pitrai hũ lơ-pa nữn pơnõq nhũ sơpuãq vơngà vơdai sì bõc. 2Nữn hadơi sì tũq iãq bôh kaya nữn, dơgrữq mơnuĩh pha-ri-si đơp sì Yàc Je-su: “Iãq dih, dơgrữq mơnuĩh mơgrũ pôgrũ hũ ngãq vruãq ôh iỡuq ngãq dơlãp harơi Sa-bat.” 3Bôh làiq, Yàc Je-su hẽ wỡq sì pơnõq nhũ: “Pơnõq ung ka-ôh tũq halơi pơpoh mưng vruãq Da-vĩt song ngãq dơlãp tũq pitao sì dơgrữq mơnuĩh nao sigỡuq drơi kađòc lơ-pa yơh? 4Hayơu pitao song tơma dơlãp sàc Yàc Pô Lơngĩq hũ sì bõc bẽn pioh talơvãt, la bẽn nữn gãm ôh hũ gơnuar pitao dơgrữq mơnuĩh nao tui sì gỡuq sì pitao sì bõc, mĩn luơi ga mơnuĩh gơnuar pioh kaya talơvãt. 5Hẽla pơnõq ung ka-ôh pơpoh dơlãp sơrãq voh-va làiq dơlãp harơi Sa-bat, dơgrữq mơnuĩh pioh kaya talơvãt dơlãp sàc talơvãt ngãq sỗq kaya voh-va harơi Sa-bat nữn pơnõq nhũ ôh sỗq dlàiq yơh? 6Nữn kơu đơp pioh pơnõq ung thơu hũ sa Pitao prong rlao sàc talơvãt ãn dòq pãq nĩ. 7Nữn mơyah làiq pơnõq ung thơu pãc pơnuaĩq gơtha nĩ: ‘Kơu ưng hatai anĩt duman nữn ôh iỡuq ưng kaya talơvãt’ hũ gơtha gĩq, nữn pơnõq ung song ôh ngãq dlàiq ga mơnuĩh ôh hũ dlàiq. 8Kơyua Anàq Mơnuĩh la Yàc harơi Sa-bat.”

9Vloh Yàc Je-su tơviãq mưng anĩh nữn sì tơma dơlãp sàc pơtõm pơnõq nhũ hũ. 10Iãq dih, hũ sa aràc mơnuĩh kađòc krao plàq tơngãn, sì pơnõq nhũ tơnĩa Yàc Je-su làiq: “Hũ gơnuar pakhơĩh ruãq dơlãp harơi Sa-bat lơĩh?” Nữn pơnõq nhũ pơlih yãq dlàiq Pitrai. 11Nữn Yàc Je-su đơp wỡq sì pơnõq nhũ: “Hũ mơnuĩh halơi dơlãp pơnõq ung, mơyah làiq, mĩn hũ sa drơi avo sì anàq avo, nữn lẽq tơma thòc dơlãp harơi Sa-bat, yơu nữn ôh apãt mãq sì katũc nhũ tơgùq ôh yơh? 12Nữn vloh mơnuĩh nĩ hũ kuơ rlao anàq avo la ôh thơu hadùp! Yơu nữn, anàq mơnuĩh hũ gơnuar ngãq vruãq siàp dơlãp harơi Sa-bat.” 13Hadơi nữn, Yàc Je-su đơp sì mơnuĩh nữn: “Iỡuq yơr tơngãn hã tơviãq.” Mơnuĩh nữn yơr tơngãn tơviãq sì tơngãn hũ pasồq jỡc prãn khãc, drưh yơu plàq tơngãn dih. 14Nữn hadơi sì tũq nao tơviãq, dơgrữq mơnuĩh Pha-ri-si pơdòq vơyai gỡuq pioh jơdrãq Pitrai, duah pơnẽq hayơu sì pa-mơtai Pitrai.

15Tũq Yàc Je-su thơu kaya nữn, Pitrai tơviãq tlah mưng anĩh nữn. Hũ lũ mơnuĩh nao tui Pitrai, sì Pitrai pasồq pakhơĩh ga avih tãl aràc pơnõq nhũ. 16Pitrai hakơi pơnõq nhũ juơi vrơi ga asơi thơu Pitrai, 17Tồq ga pơnuaĩq hũ akhàt tơviãq jỡc mưng mơnuĩh gơnuar hwơr E-sai, làiq:

18“Dih, mơnuĩh halỗt mơnãq Kơu, Mơnuĩh nữn Kơu duỡt ruãh;

mơnuĩh khiãng duman Kơu hũ, Mơnuĩh nữn vơngãq yua Kơu siàp hatai dơlãp dơgrữq kaya.

Kơu ròq vrơi Vơngãq Kơu dòq pãq dlòc Nhũ,

sì Nhũ ròq akhàt vrơi pa-thơu kaya tơpãq dãng ga Vual Vơla Lơniãu.

19Nhũ ròq ôh kơmlah hẽla papơ priãu;

kung ôh asơi hmỡq sãp Nhũ rãh gah jơlàt.

20Nhũ ròq ôh gỡq kayơu tơràc song kađòc jõh;

Nhũ ròq ôh pơdãp dah apôi jẽq mơtai,

tãl trôh tũq Nhũ ngãq kaya tơpãq dãng hũ pha rlao,

21sì dơgrữq Vual Vơla gah Lơniãu ròq hũ kaya chàc gơnang gơjãp gơnĩt dơlãp angãn nhũ.”

22Tũq nữn, hũ mơnuĩh va trôh ga Yàc Je-su sa aràc mơnuĩh vùp mơta sì kamlo kađòc kamlai ãp. Pitrai pasồq pakhơĩh ga nhũ, nữn mơnuĩh kamlo nĩ đơp jỡc sì iãq bôh. 23Avih tơpuôl vual vơla song mãq ngãq krơi sì đơp làiq: “Mơnuĩh nĩ ôh iỡuq la anàq tơcho Đa-vit yơh?” 24Nữn tũq mơnuĩh Pha-ri-si hmỡq mững kaya krơi tơmo nĩ, pơnõq nhũ đơp: “Mơnuĩh nĩ ôh tũq halơi pơtiãuq kamlai jỡc mơyah làiq ôh gơnang mưng Be-el-se-bul nữn la parôh pơtiãuq yàc kamlai.” 25Nữn Yàc Je-su thơu kaya sơnơng pơnõq nhũ, nữn Pitrai đơp sì pơnõq nhũ: “Lơgar halơi pa-chơlah jơdrãq sigỡuq nữn ròq lơhiãq gơprah, dòq palơi prong hẽla sàc halơi pa-chơlah jơdrãq sì sigỡuq nữn ròq ôh dòq gơjãp kađữc jỡc. 26Mơyah làiq kamlai Satan pơtiãuq kamlai Satan, nữn nhũ pa-chơlah krơi nhũ. Yơu nữn ngãq hayơu lơgar nhũ dòq gơjãp kađỡc jỡc? 27Sì mơyah làiq kơu gơnang Be-el-se-bul pioh pơtiãuq kamlai, nữn anàq pơnõq ung gơnang asơi pioh pơtiãuq pơnõq nhũ? Kơyua mưng kanõh nĩ, pơnõq nhũ ròq la mơnuĩh chahrơna pơnõq ung. 28Nữn mơyah làiq kơu pơtiãuq kamlai mưng Vơngãq Sơđah Yàc Pô Lơngĩq hũ, nữn lơgar Yàc Pô Lơngĩq song trôh pãq dlòc pơnõq ung. 29Hẽla ngãq yơu halơi hũ asơi tơma dơlãp sàc sa aràc mơnuĩh prãn khãc pioh tlẽq mãq kaya mơnuĩh nữn hũ sì hlơu avih ôh chãq mơnuĩh prãn khãc nữn lơĩh, vloh nữn ka mãq kaya dơlãp sàc mơnuĩh nữn jỡc? 30Mơnuĩh halơi ôh dòq dỡc sigỡuq sì kơu la jơdrãq sì kơu, sì mơnuĩh halơi ôh salơnuãq sì kơu nữn ròq gơprah gơprĩc. 31Kơyua kanõh yơu nĩ, kơu đơp pioh pơnõq ung thơu, dơgrữq dlàiq dơnũh sì pơnuaĩq đơp sơvĩl ròq hũ tơleh ga anàq mơnuĩh, nữn pơnuaĩq đơp sơvĩl trôh Yàc Vơngãq Sơđah ròq ôh hũ tơleh jỡc. 32Mơyah làiq asơi đơp pơnuaĩq jơdrãq sì Anàq Mơnuĩh, nữn ròq hũ tơleh. Nữn mơyah làiq asơi đơp jơdrãq sì Yàc Vơngãq Sơđah, nữn ròq ôh hũ tơleh, bôh làiq dơlãp rài nĩ hẽla dơlãp rài hadơi. 33Pơla kayơu siàp, nữn tơviãq voh siàp, pơla kayơu iãh nữn tơviãq voh iãh, kơyua iãq voh nữn thơu kayơu. 34Ơ pơjẽh pơtiàt ala mơsãc dih, pơnõq ung la iãh ngãq hayơu pơlih đơp kaya siàp? Kơyua mưng kaya vãq sơrè dơlãp hatai chơbuai đơp tơviãq. 35Mơnuĩh siàp kơyua mưng hatai rơmiãq pioh kaya siàp nữn tơviãq kaya siàp, dòq mơnuĩh iãh mơsãc kơyua mưng hatai rơmiãq pioh kaya mơsãc drơi hũ nữn tơviãq kaya mơsãc. 36Nữn Kơu đơp sì pơnõq ung thơu làiq dơgrữq pơnuaĩq ôh hũ kuơ sì anàq mơnuĩh song đơp, pơnõq nhũ va pơnuaĩq akhàt pa-thơu mưng nhũ dơlãp harơi chahrơna. 37Kơyua mưng dơgrữq pơnuaĩq đơp drơi hũ, pơnõq ung ròq hũ angãn la tơpãq dãng, sì kung mưng pơnuaĩq đơp, pơnõq ung ròq kađòc ngãq dlàiq.”

38Hadơi nữn hũ sa kìq, mơnuĩh gơnuar pơto voh-va sì mơnuĩh Pha-ri-si đơp sì Yàc Je-su làiq: “Talơvãt pôgrũ, pơnõq hlãq ưng bôh pôgrũ ngãq sa nỡm krơi.” 39Nữn Yàc Je-su đơp wỡq sì pơnõq nhũ làiq: “Sa pơjẽh pơtiàt iãh mơsãc sì drì drõc nĩ duah sa nỡm krơi. Nữn ôh hũ sa nỡm krơi halơi hũ vrơi lơniãu sì nỡm krơi mưng mơnuĩh gơnuar hwơr Jô-na. 40Kơyua yơu Jô-na song tlơu harơi tlơu mơlãp dòq dơlãp tũc akàt prong, nữn kung yơu nữn, Anàq Mơnuĩh ròq dòq dơlãp tơnãh ala tlơu harơi sì tlơu mơlãp. 41Dơlãp harơi chahrơna, vual vơla palơi Ni-ni-ve ròq tơgùq dỡc sigỡuq sì pơjẽh pơtiàt nĩ sì ngãq gơnĩt dlàiq nhũ. Kơyua pơnõq nhũ song mơvai tlàq dlàiq tũq hmỡq Jô-na pơto, sì iãq dih, pãq nĩ hũ Pitao prong rlao Jô-na. 42Dơlãp harơi chahrơna, pitao kamơi gah Prĩq ròq tơgùq dỡc sigỡuq sì pơjẽh pơtiàt nĩ sì ngãq gơnĩt dlàiq nhũ. Mưng anĩh ơtah viãq dơlãp voh tơnãh nhũ song trôh pioh hmỡq kaya jãc rgơi Pitao Sa-lô-môn, sì iãq dih, pãq nĩ hũ Pitao prong rlao Sa-lô-môn. 43Tũq kamlai satan tơviãq tlah mưng sa aràc mơnuĩh vloh, nhũ nao tơpa dơgrữq anĩh thô thiãq, pioh duah anĩh padơi nữn ôh duah bôh. 44Vloh nhũ đơp: ‘Kơu ròq mai wỡq pãq sàc kơu la anĩh sì kơu vơhrơu tơviãq mưng anĩh nữn.’ Tũq mai wỡq, nhũ bôh sàc lơwah, hũ vah vơhồc sơchih sì pơkhrà siàp. 45Vloh yơu nữn, nhũ nao sì va mai sigỡuq sì nhũ tơjuh kamlai tơmo mơsãc rlao nhũ wỡq tơra, sì pơnõq nhũ tơma sigỡuq sì hadiuq pãq đỡn. Yơu nữn, wãc rơsi hadơi wỡq mơnuĩh nữn tơviãq jỡc iãh rlao tũq hlơu. Pơjẽh pơtiàt mơsãc nĩ kung ròq yơu nữn.”

46Dơlãp tũq Yàc Je-su gãm dòq đơp sì vual vơla, nữn dih, ami sì pơnõq adơi Pitrai trôh dòq dỡc pãq gah lơniãu, duah kaya đơp dlài sì Pitrai. 47Tũq nữn, hũ mơnuĩh trôh đơp sì Pitrai: “Iãq dih, ami sì pơnõq adơi pôgrũ dòq dỡc gah lơniãu, ưng đơp dlài sì pôgrũ.” 48Nữn Yàc Je-su hẽ wỡq sì mơnuĩh song đơp sì Pitrai, làiq: “Asơi la ami pôgrũ? Sì asơi la pơnõq adơi pôgrũ?” 49Vloh Pitrai yơr tơngãn mưng gah dơgrữq mơnuĩh mơgrũ drơi sì đơp: “Iãq dih, nĩ la ami pôgrũ sì adơi sơai pôgrũ hũ! 50Kơyua mưng mơnuĩh halơi ngãq tui hatai ưng Ama pôgrũ dòq pãq dlòc lơngĩq hũ, nữn mơnuĩh nữn la adơi sơai, gỡuq kamơi sì ami pôgrũ hũ.”