Mak 14

1Tũq nữn la dua harơi halơu kaya Pơjũm Bõc Nao Gãt sì ãt bõc Bẽn ôh Voh Tapơi. Dơgrữq mơnuĩh gơnuar pioh kaya duh talơvãt prong sigỡuq sì dơgrữq mơnuĩh gơnuar pơto voh-va ãn đơp vơyai sigỡuq pơlih duah pơnẽq halơi pioh mãq Yàc Je-su vloh pa-mơtai Pitrai. 2Kơyua pơnõq nhũ đơp: “Ôh iỡuq ngãq vruãq nữn dơlãp harơi adãt, pioh tlah ôh hũ kaya nhũn sabôn dơlãp vual vơla.”

3Tũq Yàc Je-su dòq dơlãp Be-tha-ni, dơlãp sàc Si-môn ãt ruãq aphũng. Pitrai ãn dòq guh ban bõc, hũ sa aràc mơnuĩh kamơi tơma, va sa voh kalõq patơu màc, pađồq vãq mơnhàq bơu vơlhũ kuơ màc viãq, jãt pơchãh kalõq mơnhàq bơu vơlhũ nữn sì vuh pãq dlòc akõq Pitrai. 4Nữn tơkìq mơnuĩh hũ ơnõc, đơp sigỡuq: “Kơyua hagĩq vloh hũ vruãq ngãq pròc prẽh soh mơnhàq bơu vơlhũ yơu nĩ lơĩh? 5Kơyua mơnhàq nĩ pơlih pa-vlơi hũ rlao tlơu rơtôh đơ-ni-e vloh mãq jĩn pa-mơpha ga mơnuĩh rơbah la-ơi.” Vloh pơnõq nhũ đơp gơrloh pơkhè dì nai. 6Nữn Yàc Je-su đơp: “Luơi kađỡc vẽq ga nhũ. Hayơu adơi sơai ngãq kãn ga nhũ? Nhũ song ngãq sa vruãq siàp ga kơu. 7Kơyua adơi sơai gãm hũ mơnuĩh rơbah dòq sì drơi, sì tũq halơi adơi sơai ưng adơi sơai kung pơlih ngãq vruãq siàp ga pơnõq nhũ, nữn adơi sơai ròq ôh hũ kơu dòq gãm. 8Nai song ngãq vruãq pơlih nai ngãq jỡc. Nai song rơchãc pơkhrà hlơu mơnhàq pioh pa-vuh rùp ga kơu vloh nữn va nao dor. 9Kơu đơp viãq sì adơi sơai, anĩh halơi dơlãp dun kơyua nĩ Pơnuaĩq Siàp hũ akhàt tơviãq, nữn vruãq mơnuĩh kamơi nĩ song ngãq kung ròq jỡc pa-sơdor wỡq pioh kơnãl trôh nai.”

10Vloh Ju-đa Is-ka-ri-ôt, sa aràc dơlãp sa plôh dua aràc mơnuĩh gơnuar pơđar, nao pãp dơgrữq mơnuĩh gơnuar pioh kaya duh talơvãt prong, pioh pơjao Yàc Je-su ga pơnõq nhũ. 11Tũq dơgrữq mơnuĩh gơnuar pioh kaya duh talơvãt prong hmỡq yơu nữn, pơnõq nhũ sơh viãq sì grưh vrơi jĩn ga nhũ. Nhũ pơdòq duah pơnẽq hlơi hũ pioh pơjao Pitrai.

12Dơlãp harơi chơmrờp adãt bõc adãt Bẽn ôh hũ Voh Tapơi, la harơi aràc padỡc avo anàq pơjũm Bõc Nao Gãt, dơgrữq mơnuĩh mơgrũ tơnĩa Pitrai: “Pôgrũ ưng pơnõq hlãq nao pồq dãq ga pôgrũ Bõc Adãt Nao Gãt pãq anĩh halơi?” 13Yơu nữn, Pitrai pơđar dua aràc dơlãp dơgrữq mơnuĩh mơgrũ, làiq: “Iỡuq nao tơma dơlãp palơi, ròq hũ sa aràc mơnuĩh va kadoh ia pãp adơi sơai. Mĩn nao tui nhũ. 14Mơyah làiq nhũ tơma sàc halơi, nữn iỡuq đơp sì pô sàc làiq: ‘Pôgrũ đơp: “Pãq halơi adũq thuãi anĩh kơu pơlih bõc adãt nao Gãt sigỡuq sì dơgrữq mơnuĩh mơgrũ dòq pãq hlơi?”’ 15Pô sàc ròq pơto ga adơi sơai sa voh adũq prong pãq dlòc song hũ kaya rơchãc lơĩh vloh, iỡuq pồq kaya bõc pãq đỡn ga pơnõq drơi.” 16Yơu nữn, dơgrữq mơnuĩh mơgrũ tơviãq sì nao tơma palơi prong, vloh pơnõq nhũ bôh dơgrữq vruãq drưh yơu pơnuaĩq Pitrai song đơp ga pơnõq nhũ thơu, sì pơnõq nhũ rơchãc lơĩh kaya pơjũm bõc Nao Gãt.

17Tũq song trôh tlãp sồp, Pitrai trôh sigỡuq sì sa plôh dua aràc mơnuĩh mơgrũ. 18Dơlãp tũq pơnõq nhũ ãn dòq guh pãq ban dòq bõc, Yàc Je-su đơp: “Iỡuq viãq, pôgrũ đơp sì adơi sơai, sa aràc dơlãp adơi sơai, la mơnuĩh ãn bõc sigỡuq sì pôgrũ, ròq jơdrãq sì pôgrũ.” 19Pơnõq nhũ pơdòq ka-ồq ka-iãp sì mơnuĩh nĩ trôh mơnuĩh dih đơp sì Pitrai: “Viãq ôh iỡuq la hlãq yơh?” 20Nữn Yàc Je-su đơp sì pơnõq nhũ: “Nữn la sa aràc dơlãp sa plôh dua aràc adơi sơai, la mơnuĩh ãn irũq bẽn tơma chơwàt sigỡuq sì pôgrũ. 21Kơyua Anàq Mơnuĩh ròq nao drưh yơu pơnuaĩq song wãq mưng Pitrai. Nữn dleh dlàr viãq ga mơnuĩh jơdrãq sì Anàq Mơnuĩh! Viãq mơnuĩh nữn juơi đeh tơviãq nữn siàp rlao.”

22Ãn tũq pơnõq nhũ bõc, Yàc Je-su mãq bẽn, ỡn ngai, vloh pẽq tơviãq. Pitrai vrơi ga pơnõq nhũ sì đơp: “Iỡuq mãq vẽq. Nĩ la rùp phàp pôgrũ hũ.” 23Pitrai kung apãt chơwàt, ỡn ngai vloh vrơi ga pơnõq nhũ, sì avih tãl aràc pơnõq nhũ mơnhũm chơwàt nữn. 24Pitrai đơp sì pơnõq nhũ: “Nĩ la dơrah hẽ grưh pôgrũ hũ, la dơrah tôh tơviãq ga lũ mơnuĩh. 25Pôgrũ đơp viãq ga adơi sơai, pôgrũ ròq ôh mơnhũm voh nho nĩ tơra mưng nĩ tãl trôh harơi pôgrũ ròq mơnhũm voh nho vơhrơu dơlãp lơgar Yàc Pô Lơngĩq.”

26Hadơi sì tũq đơp adoh sa rơgãm sơrãq đơp adoh, pơnõq nhũ tơviãq nao trôh chỡq Ô-li-ve. 27Yàc Je-su đơp sì pơnõq nhũ: “Avih dơgrữq tãl aràc dơlãp adơi sơai ròq sơnẽq sỗq kơyua mưng pôgrũ, yơu hũ wãq làiq:

‘Kơu ròq poh mơnuĩh dlãc,

nữn avo ròq chơlah chơluỡn.’

28Nữn hadơi sì tũq pôgrũ hadiuq wỡq, pôgrũ ròq nao trôh halơu adơi sơai pãq palơi Ga-li-le.” 29Nữn Pier drơ sì Pitrai: “Mơyah làiq avih dơgrữq tãl aràc kung sơnẽq sỗq, nữn kơu kung ôh iỡuq yơu nữn.” 30Yàc Je-su đơp sì Pier: “Iỡuq viãq, Pôgrũ đơp sì sơai, harơi nĩ — dơlãp mơlãp nĩ — halơu sì tũq mơnũq kơ-iòc dua bãc, sơai ròq tlơu bãc kơmlah tlàq pôgrũ.” 31Nữn Pier hẽ savĩq gơnĩt: “Mơyah làiq hlãq iỡuq mơtai sigỡuq sì pôgrũ, nữn hlãq kung ròq ôh kơmlah tlàq pôgrũ ôh.” Sì avih dơgrữq pơnõq nhũ kung grưh yơu nữn.

32Vloh pơnõq nhũ trôh anĩh angãn la Get-se-ma-ne, sì Yàc Je-su đơp sì mơnuĩh mơgrũ: “Iỡuq dòq guh pãq đì dơlãp tũq pôgrũ iơu lakơu.” 33Pitrai va Pier, Ja-kơ sì Jãng nao sì Pitrai, Pitrai pơdòq kaya ka-ồq dlò sì sawĩ sawỡn viãq. 34Pitrai đơp sì pơnõq nhũ: “Vơngãq yuà pôgrũ ka-ồq ka-iãp viãq, tãl trôh mơtai. Iỡuq dòq pãq đì, sì mơ-uãh chơkhãq.” 35Vloh Pitrai nao atah sa asĩt tơra, Yàc Je-su vơviar rùp trỗt pãq ala hlùq sì iơu lakơu pơlih yơu halơi tũq jơ nữn gãt tơpa tlah mưng Pitrai. 36Pitrai drơ: “A-ba, Ama, Ama ngãq jỡc dơgrữq vruãq. Lakơu suãq chơwàt nĩ tlah mưng anàq. Nữn ôh iỡuq la vruãq anàq ưng, nữn la tui vruãq Ama ưng.” 37Vloh Pitrai gơlàiq mai wỡq sì bôh pơnõq nhũ dòq pìq, nữn Pitrai iơu Pier: “Si-môn, hã pìq yơh? Hã ôh mơ-uãh jỡc sa tũq jơ halơi yơh? 38Iỡuq mơ-uãh chơkhãq sì iơu lakơu, pioh adơi sơai tlah tơma dơlãp kaya ơniãi. Vơngãq yuà nữn ưng viãq, nữn rùp phàp vloh lơduh lơmuỡn.” 39Pitrai nao sì iơu lakơu wỡq drưh yơu pơnuaĩq halơu nữn. 40Tũq Pitrai mai wỡq, Pitrai bôh pơnõq nhũ ãn dòq pìq, kơyua mơta pơnõq nhũ tơnòq, pơnõq nhũ ôh thơu đơp pơnuaĩq hagĩq sì Pitrai. 41Tũq Pitrai trôh wỡq bãc tlơu sì đơp sì pơnõq nhũ: “Adơi sơai miẽt dòq pìq sì padơi dleh yơh? Tãl vloh! Tũq jơ song trôh vloh. Dih! Anàq Mơnuĩh jẽq ãt jơdrãq sì pơjao tơma dơlãp tơngãn mơnuĩh hũ dlàiq. 42Tơgùq dỡc vẽq, nao nĩ. Dih, mơnuĩh jơdrãq pôgrũ song jẽq trôh.” 43Tũq nữn mư, tũq Pitrai ãn dòq đơp, Ju-đa, la sa aràc mơnuĩh dơlãp sa plôh dua aràc mơnuĩh gơnuar pơđar mai trôh, sigỡuq sì tơpuôl apãt đao sì gai mơjrà, la kayơu dơgrữq mơnuĩh gơnuar pioh kaya duh talơvãt prong, dơgrữq mơnuĩh gơnuar pơto voh-va sì dơgrữq pô tơha. 44Mơnuĩh jơdrãq Pitrai song vrơi ga pơnõq nhũ sa khrung, làiq: “Mơnuĩh halơi kơu chũm, nữn la ung nữn. Iỡuq mãq ung nữn sì va nao iãq gơjãp.” 45Kơyua yơu nữn, tũq Ju-đa ròq trôh tãl anĩh, nữn mư, nhũ nao tơpãq anãq Yàc Je-su sì đơp: “Ra-bi,” vloh nhũ chũm Pitrai. 46Tũq nữn, pơnõq nhũ yơr tơngãn sì mãq Pitrai. 47Nữn sa aràc dơlãp dơgrữq mơnuĩh dỡc jẽq đỡn suãq đao tơviãq poh sa aràc mơnuĩh halỗt mơnãq mơnuĩh gơnuar pioh kaya duh talơvãt prong, sì koh tloh tanĩa mơnuĩh halỗt mơnãq nữn. 48Tũq nữn Yàc Je-su đơp sì pơnõq nhũ: “Dơgrữq pơnõq ung trôh apãt đao sì gai mơjrà trôh mãq kơu yơu mãq mơnuĩh tlẽq sơwah yơh? 49Dơgrữq harơi kơu dòq sì pơnõq ung sì pơto akhàt dơlãp sàc talơvãt, nữn pơnõq ung ôh mãq kơu. Bôh làiq yơu nữn, vruãq nĩ tơviãq trôh pioh pơnuaĩq Sơrãq sơđah hũ tơviãq iỡuq viãq.” 50Hadơi tũq nữn, avih tãl aràc pơnõq nhũ tlàq luơi Pitrai sì đuaĩq dỡuq avih.

51Hũ sa aràc mơnuĩh dãm dih nao tui Yàc Je-su, dơlãp rùp nhũ mĩn hũ sa vlah ao pơcha lơmuỡn. Pơnõq nữn mãq nhũ, 52nữn nhũ wàq prah luơi ao pơcha lơmuỡn sì dòq kalôh đuaĩq tlah.

53Pơnõq nhũ va Yàc Je-su trôh anĩh mơnuĩh gơnuar pioh kaya duh talơvãt prong, anĩh avih dơgrữq mơnuĩh gơnuar pioh kaya duh talơvãt, sì dơgrữq pô tơha, sì dơgrữq mơnuĩh gơnuar pơto voh-va pơtõm gỡuq anĩh nữn. 54Pier nao tui hadơi Pitrai mưng atah, tơma trôh dơlãp blàc làt mơnuĩh gơnuar pioh kaya duh talơvãt prong. Nhũ dòq guh pãq khrãh tơpuôl lĩng iãq jàc ãn pơkhàc jẽq apôi. 55Tũq nữn, dơgrữq mơnuĩh gơnuar pioh kaya duh talơvãt, sì avih tơpuôl Jơnũm Ju-đa duah chưng tang jơdrãq sì Yàc Je-su pioh chahrơna Pitrai dlàiq mơtai, Nữn pơnõq nhũ ôh duah bôh hagĩq. 56Kơyua hũ lũ mơnuĩh ngãq chưng lor jơdrãq sì Pitrai, nữn pơnuaĩq ngãq chưng pơnõq nhũ kung ôh iỡuq iỡuq gỡuq. 57Tơkìq aràc, hadơi nữn tơgùq dỡc ngãq chưng lor jơdrãq sì Pitrai, đơp làiq: 58“Pơnõq hlãq hmỡq ung nữn đơp: ‘Kơu ròq yah sàc talơvãt mưng tơngãn anàq mơnuĩh padỡc tơgùq, vloh dơlãp tlơu harơi kơu ròq padỡc sa voh sàc talơvãt tơmo ôh ngãq tơviãq mưng tơngãn mơnuĩh.’” 59Yơu nữn mưng avih vruãq nĩ, pơnuaĩq ngãq chưng pơnõq nhũ kung ôh iỡuq yơu gỡuq. 60Vloh mơnuĩh gơnuar pioh kaya duh talơvãt prong tơgùq dỡc dơlãp dơgrữq aràc tơnĩa Yàc Je-su làiq: “Sơai ôh hẽ pơnuaĩq hagĩq yơh? Dơgrữq mơnuĩh nĩ ngãq chưng jơdrãq sì sơai kaya hagĩq?” 61Nữn Pitrai miẽt dòq suà lìt sì ôh hẽ pơnuaĩq hagĩq ôh. Mơnuĩh gơnuar pioh kaya duh talơvãt prong tơnĩa wỡq sì Pitrai, làiq: “Ung iỡuq yơh la Yàc Dõc Pơ-tlah, Anàq Yàc Pô Lơngĩq hũ iỡuq sơ-uỗt mơyòp, lơĩh?” 62Tũq nữn, Yàc Je-su hẽ: “Iỡuq yơu nữn. Vloh pơnõq ung ròq bôh

Anàq Mơnuĩh tũq Pitao dòq guh gah tơngãn hơnuãq gơnuar chơnuãq

sì trôh dơlãp dơgrữq pỗc huãl lơngĩq.”

63Mơnuĩh gơnuar pioh kaya duh talơvãt prong hẽt ao drơi, đơp: “Pơnõq drơi ôh chàc duah kaya chưng tang ngãq hagĩq tơra? 64Pơnõq ung song hmỡq pơnuaĩq đơp sơvĩl nữn vloh. Pơnõq ung sơnơng hayơu nĩ?” Pơnõq nhũ asơi kung ngãq dlàiq Pitrai iỡuq mơtai. 65Hũ tơkìq mơnuĩh pơdòq ka-chôh ia mơvah di Pitrai, kapỡp mơta Pitrai sì poh pờc Pitrai, vloh đơp sì Pitrai: “Iỡuq đơp hwơr vẽq!” Dơgrữq mơnuĩh lĩng iãq jàc mãq Pitrai sì pah Pitrai.

66Dơlãp tũq Pier ãn dòq pãq anĩh làt, hũ sa aràc dơlãp dơgrữq mơnuĩh halỗt kamơi mơnuĩh gơnuar pioh kaya duh talơvãt prong nao trôh tơpãq anĩh ung dòq. 67Bôh Pier ãn pơkhàc apôi, kamơi halỗt iãq nĩq nũn mơta ung, vloh đơp: “Ung kung ban sigỡuq sì Je-su, mơnuĩh Na-sa-ret.” 68Nữn ung kơmlah, làiq: “Kơu ôh thơu, kung ôh thơu pãc nai đơp kaya hagĩq.” Vloh ung tơviãq nao mưng làt. 69Nữn halỗt kamơi bôh ung dòq pãq đỡn, sì pơdòq đơp sì dơgrữq mơnuĩh dòq dỡc pãq đỡn: “Ung nĩ kung la sa aràc mơnuĩh dơlãp tơpuôl nhũ!” 70Nữn ung kơmlah wỡq sa bãc tơra. Hadơi tũq nữn mư, dơgrữq mơnuĩh dòq dỡc pãq đỡn đơp sì Pier: “Viãq ung kung la sa aràc mơnuĩh dơlãp pơnõq nhũ, kơyua ung kung la mơnuĩh Ga-li-le.” 71Nữn ung pơdòq sơtãp lơmah sì grưh: “Kơu ôh thơu mơnuĩh nữn pơnõq ung ãn đơp nữn ôh.” 72Vloh tũq nữn mư mơnũq kơ-iòc bãc dua. Tũq nữn, Pier sơdor wỡq pơnuaĩq Yàc Je-su đơp sì ung: “Halơu sì tũq mơnũq kơ-iòc dua bãc nữn sơai ròq tlơu bãc kơmlah tlàq pôgrũ,” sì ung sia prong viãq.