Mak 13

1Tũq Yàc Je-su ãn tơviãq mưng sàc talơvãt, hũ sa aràc dơlãp dơgrữq mơnuĩh mơgrũ đơp sì Pitrai: “Ơ pôgrũ, pôgrũ iãq dih! Dơgrữq patơu prong sì dơgrữq vruãq ngãq lơgeh yơu hayơu!” 2Pitrai hẽ wỡq: “Sơai bôh dơgrữq voh sàc prõc siàp lơgeh iỡuq ôh? Nĩ Ròq ôh dòq sa voh patơu halơi pãq đỡn dãq pãq dlòc voh patơu tơmo sì ôh kađòc jơlưh tơyah trỗt.”

3Tũq nũn, Pitrai ãn dòq guh pãq dlòc chỡq Ô-li-ve, pa-sơmu sàc talơvãt, nữn Pier, Ja-kơ, Jãng sì An-dre trôh tơnĩa krơi Pitrai: 4“Lakơu vrơi ga pơnõq hlãq thơu, tũq halơi dơgrữq kaya nữn ròq tơviãq trôh? Sì hũ khrung pahanh kaya hagĩq sì tũq dơgrữq vruãq nữn jẽq hũ tơviãq jỡc viãq?” 5Tũq nữn, Yàc Je-su pơdòq hũ pơnuaĩq đơp sì pơnõq nhũ: “Iỡuq gơrhia, juơi luơi asơi dui va adơi sơai nao dơlãp kaya sỗq kơ-prãh. 6Hũ lũ mơnuĩh ròq mãq angãn pôgrũ sì đơp: ‘Mĩn kơu nĩ,’ sì pơnõq nhũ ròq pa-gơla lũ mơnuĩh nao sỗq kơ-prãh. 7Tũq adơi sơai hmỡq mưng kalìt mơsôh sì hmỡq akhàt mưng kalìt mơsôh nữn juơi mơ-ôh ka-ồq huaĩq; dơgrữq vruãq nữn iỡuq tơviãq trôh, nữn ka-ôh la luôĩq hadơi. 8Kơyua vual vơla nĩ ròq tơgùq jơdrãq sì vual vơla tơmo, lơgar nĩ jơdrãq sì lơgar dih. Ròq hũ sơđô tơnãh lũ anĩh, kung ròq hũ kaya ờq lơ-pa. Dơgrữq vruãq nữn mĩn la pơdòq kaya pơđìq pơđua jẽq đeh.

9Vơnah tơmo, rùp phuỗt adơi sơai kung iỡuq iãq mững. Aràc ròq pơjao adơi sơai ga tơpuôl jơnũm sàc pơtõm, adơi sơai ròq kađòc poh pờc, ròq mãq dòq dỡc pãq anãq dơgrữq gơnuar prãn sì dơgrữq pô apãt akõq kơyua mưng pôgrũ, yơu sa kaya chưng tang ga pơnõq nhũ. 10Nữn halơu avih, Pơnuaĩq siàp iỡuq hũ akhàt tơviãq ga dơgrữq pơjẽh vual vơla. 11Tũq pơnõq nhũ dui pa-gơla mãq adơi sơai pơjao krỡq juơi sơnơng mưng pơnuaĩq drơi ròq đơp. Bôh làiq, mơyah làiq hũ pơnuaĩq halơi jỡc vrơi ga adơi sơai nữn đơp vẽq pơnuaĩq nữn; kơyua mưng tũq nữn ôh iỡuq adơi sơai la mơnuĩh ãn dòq đơp, nữn la Yàc Vơngãq Sơđah. 12Sơai ròq pơjao adơi pioh ãt pa-mơtai, ama nữn pơjao anàq. Nữn anàq tơcho ròq tơgùq jơdrãq sì ami ama sì ngãq ga pơnõq nhũ kađòc pa-mơtai. 13Adơi sơai ròq kađòc dơgrữq mơnuĩh lơmùq mơvai mưng angãn pôgrũ. Yơu nữn mơyah làiq asơi gơjãp hatai tãl trôh luôĩq hadơi, nữn mơnuĩh nữn ròq jỡc dõc pơ-tlah.

14Vơnah tơmo, tũq adơi sơai iãq bôh kaya kir amir kơ-prãh gơprĩc tơviãq bôh pãq anĩh ôh hũ jỡc, (asơi pơpoh iỡuq thơu pãc), nữn dơgrữq mơnuĩh dòq pãp palơi Ju-đe iỡuq đuaĩq dỡuq đìq chỡq, 15asơi dòq pãq dlòc pơvũc sàc, juơi trỗt kung juơi tơma dơlãp pioh mãq dơgrữq kaya hagĩq tơviãq mưng sàc drơi, 16dòq asơi ãn dòq pãq blàc hamã juơi gơlàiq mai wỡq mãq ao lơniãu drơi hũ. 17Yơu nữn dleh dlàr viãq ga mơnuĩh kamơi ãn mơtiàt sì mơnuĩh kamơi hũ anàq tìt pa-mõm dơlãp dơgrữq harơi nữn! 18Iỡuq iơu lakơu ga vruãq nữn juơi tơviãq jỡc dơlãp vlàt mơrìt. 19Mưng dơlãp dơgrữq harơi nữn ròq hũ kaya rũc rài mưng tũq ka-ôh Yàc Pô Lơngĩq chrơng pajỡc lơngĩq tơnãh sì dơgrữq kaya anàq asỡq mưng chơmrờp tãl trôh tũq nĩ, sì kung ròq ôh tũq halơi hũ wỡq. 20Sì mơyah làiq Yàc ôh palơh katũt dơgrữq harơi nữn, nữn ôh hũ anàq mơnuĩh halơi ròq jỡc dõc pơ-tlah. Yơu nữn kơyua mưng mơnuĩh hũ Pitrai song duỡt ruãh, nữn Pitrai song palơh katũt katih harơi nữn. 21Tũq nữn, mơyah làiq asơi nữn đơp sì adơi sơai: ‘Nĩ, Yàc Dõc Pơ-tlah dòq pãq đĩ!’ ‘Hẽla, Pitrai ãn dòq pãq đỡn!’ nữn juơi pãc. 22Kơyua yàc dõc pơ-tlah lor sì gơnuar hwơr lor ròq pabôh mơta sì ròq ngãq dơgrữq nỡm krơi sì kaya krơi tơmo pioh pa-gơla dơgrữq mơnuĩh hũ duỡt ruãh, mơyah làiq pơlih jỡc. 23Nữn adơi sơai iỡuq iãq mững! Iỡuq iãq nĩ, pôgrũ song vrơi ga adơi sơai thơu halơu avih dơgrữq vruãq vloh.

24Bôh làiq, tơma dơlãp dơgrữq harơi nữn, hadơi sì kaya rũc rài,

ia harơi ròq sồp kơnãm,

ia vlàt ròq ôh dòq pơsàc sơdah wỡq;

25dơgrữq ia pitỗq ròq lẽq trỗt mưng dlòc lơngĩq,

sì avih gơnuar prãn dơgrữq tãl lơngĩq ròq sơđô mơgơi.

26Tũq nữn, aràc ròq bôh Anàq Mơnuĩh sì mãq gơnuar chơnuãq sì prong prõc trỗt trôh dơlãp dơgrữq pỗc huãl. 27Hadơi nữn, Pitrai ròq pơđar dơgrữq mơnuĩh gơnrơh sì Pitrai ròq pơtõm wỡq dơgrữq mơnuĩh hũ duỡt ruãh dòq pàq gah akiãc, mưng luôĩq voh tơnãh tãl trôh luôĩq tãl lơngĩq.

28Vơnah tơmo, iỡuq mơgrũ thơu pơnuaĩq pa-mơyơu nĩ mưng kayơu vãl. Tũq thàt nữn tơviãq jỡc lơmuỡn sì tơmuh tơviãq hlàq nữn adơi sơai thơu vlàt tluỡiq jẽq trôh. 29Kung yơu nữn, tũq adơi sơai bôh dơgrữq kaya nữn tơviãq trôh, nữn adơi sơai thơu làiq Pitrai sì dòq jẽq, dòq pãq anãq mơvah bãc vloh. 30Iỡuq viãq, Pôgrũ đơp sì adơi sơai làiq, pơjẽh pơtiàt rài nĩ ròq ôh nao tơpa trôh tãl tũq dơgrữq vruãq nữn tơviãq jỡc. 31Lơngĩq sì tơnãh ròq nao tơpa, nữn dơgrữq pơnuaĩq pôgrũ đơp ròq ôh tũq halơi tơpa. 32Dơlãp harơi jơ nữn, lơniãu sì Ama, nữn ôh hũ asơi thơu, dơgrữq mơnuĩh gơnrơh dlòc lơngĩq, hẽla Anàq Mơnuĩh kung ôh thơu, vloh mĩn Ama thơu.

33Iỡuq gơrhia vẽq! Iỡuq mơ-uãh chơkhãq sì iơu lakơu, kơyua adơi sơai ôh thơu tũq nĩ la hadùp jơ halơi. 34Vruãq drưh yơu sa aràc mơnuĩh dih nao atah — ung tơviãq nao sì pơjao ga dơgrữq mơnuĩh halỗt mơnãq gơnuar apãt vruãq sàc drơi hũ, ung kung hakơi mơnuĩh iãq jàc bãc iỡuq mơ-uãh chơkhãq. 35Kơyua yơu nữn, iỡuq mơ-uãh chơkhãq, kơyua adơi sơai ôh thơu tũq halơi pô sàc trôh — pơlih la dơlãp tũq sồp tlãp, tũq mơtơh mơlãp, tũq mơnũq kơ-iòc, hẽla tũq sơdah mư-ờp — 36huaĩq, mơyah làiq tũq pô mai trôh dơvruh dơvrah, pô pơlih pãp bôh adơi sơai ãn dòq pìq. 37Vruãq pôgrũ đơp sì adơi sơai, nữn pôgrũ kung đơp ga dơgrữq mơnuĩh: ‘Iỡuq mơ-uãh chơkhãq!’”