Skip to content
BibleKenya

Roglai Bible Literal Text

Mak 10:45

Verse 45 is marked below, with the whole chapter around it. Read from the start

Yàc Je-su tơviãq mưng anĩh nữn nao trôh phũm Ju-đe sì gah dih kròc Jô-đãnh, vloh hũ tơpuôl vual vơla trôh pãp Pitrai wỡq. Pitrai pơto pơđar pơnõq nhũ yơu Pitrai song rơđãp ngãq. Hũ dơgrữq mơnuĩh Pha-ri-si trôh pioh lòc Pitrai làiq: “Kaya voh-va hũ vrơi gơnuar mơnuĩh lakơi tlàq luơi sơdiuq drơi hũ lơĩh?” Pitrai hẽ wỡq sì pơnõq nhũ làiq: “Môi-se song pơto pơđar pơnõq ung pơnuaĩq hagĩq?” Pơnõq nhũ drơ: “Môi-se vrơi gơnuar mơnuĩh lakơi wãq vơ-ar pa-chơlah gỡuq vloh tlàq luơi sơdiuq.” Yàc Je-su đơp sì pơnõq nhũ: “Môi-se wãq tơviãq voh-va nữn kơyua mưng kaya khãc hatai nữn pơnõq ung hũ. Vơnah tơmo, mưng tũq chơmrờp mưng vruãq chrơng pajỡc,

Yàc Pô Lơngĩq pajỡc pơnõq nhũ, ‘mơnuĩh lakơi sì mơnuĩh kamơi.’

‘Kơyua mưng gơtha nĩ, mơnuĩh lakơi ròq tơviãq mưng ami ama drơi,

sì dua aràc tơviãq jỡc sa rơlo.’

Yơu nữn, pơnõq nhũ ôh dòq la dua tơra, nữn la sa rơlo. Kơyua yơu nữn, kaya hagĩq Yàc Pô Lơngĩq song pơkuãq wỡq nữn anàq mơnuĩh juơi pa-chơlah krơi.” Tũq pơnõq nhũ dòq dơlãp sàc, dơgrữq mơnuĩh mơgrũ tơnĩa wỡq Pitrai mưng vruãq nữn. Yơu nữn Pitrai đơp sì pơnõq nhũ: “Mơnuĩh halơi tlàq luơi sơdiuq sì nao khiãng mơnuĩh kamơi tơmo, la sỗq dlàiq drì drõc pơweh sì sơdiuq drơi. Sì mơyah làiq mơnuĩh kamơi, tlàq luơi pơsàc vloh nao khiãng sì mơnuĩh lakơi tơmo, nữn kung sỗq dlàiq drì drõc.”

Tũq nữn, aràc va trôh ga Pitrai dơgrữq anàq tìt pioh Pitrai rơwỡq pơnõq nhũ, nữn dơgrữq mơnuĩh mơgrũ gơloh pơkhè pơnõq nhũ. Bôh làiq, tũq Yàc Je-su thơu vruãq nữn, Pitrai viãq ôh siàp hatai nữn đơp sì pơnõq nhũ: “Iỡuq luơi vẽq dơgrữq anàq tìt trôh sì Pôgrũ, sì juơi pakỡuq pơnõq nhũ, mưng lơgar Yàc Pô Lơngĩq pơweh sì dơgrữq mơnuĩh halơi drưh yơu pơnõq nhũ. Iỡuq viãq, Pôgrũ đơp sì adơi sơai, mơnuĩh halơi ôh tồq mãq lơgar Yàc Pô Lơngĩq yơu sa aràc anàq tìt, mơnuĩh nữn gơnĩt viãq ròq ôh hũ tơma pãq đỡn jỡc.” Vloh Pitrai pồq dơgrữq anàq tìt nữn dơlãp tơngãn, vloh chẽq tơngãn pioh vrơi lơngai pãq dlòc pơnõq nhũ.

Tũq Pitrai pơdòq nao jơlàt, hũ sa aràc mơnuĩh đuaĩq trôh, aguãl tơ-ồq pãq anãq Pitrai sì tơnĩa, “Pa-thơu Pôgrũ lơmuỡn siàp, hlãq iỡuq ngãq hagĩq pioh hũ tồq kaya hadiuq dòq gãm gãm?” Yàc Je-su hẽ đơp sì sơai: “Hayơu hã iơu Kơu la lơmuỡn siàp? Ôh hũ asơi la lơmuỡn siàp mĩn sa Yàc Pô Lơngĩq. Hã thơu dơgrữq kaya pơđar-va: ‘Juơi pa-mơtai mơnuĩh, juơi sỗq dlàiq drì drõc, juơi tlẽq sơwah, juơi ngãq chưng lor, juơi đơp pa-gơla, iỡuq duh huaĩq vẽq dì ami ama drơi.’” Mơnuĩh nĩ hẽ wỡq sì Pitrai: “Pa-thơu Pôgrũ, hlãq ròq rơmiãq avih dơgrữq kaya nữn mưng tũq dòq tìt.” Yàc Je-su iãq nhũ sì anĩt nhũ. Yơu nữn Pitrai đơp sì nhũ: “Hã dòq siỡuq sa kaya. Iỡuq nao pa-vlơi avih kaya mơnã drơi hũ, va pa-mơpha ga mơnuĩh rơbah, vloh hã ròq hũ kaya màc pãq dlòc lơngĩq. Hadơi nữn, iỡuq mai trôh sì tui kơu.” Nữn nhũ ka-ồq ka-ãn mưng pơnuaĩq nữn, nhũ tlàq nao dơlãp kaya pơđìq pơđua, kơyua nhũ la mơnuĩh hũ lũ viãq kaya mơnã.

Tũq nữn, Yàc Je-su iãq tòp dar vloh đơp sì dơgrữq mơnuĩh mơgrũ drơi: “Mơnuĩh mơda tơma Lơgar Yàc Pô Lơngĩq kãn dơmãn viãq!” Dơgrữq mơnuĩh mơgrũ mãq ngãq krơi viãq tũq hmỡq pơnuaĩq nữn mưng Pitrai. Nữn Yàc Je-su đơp wỡq sì pơnõq nhũ: “Ơ pơnõq anàq, pioh hũ tơma Lơgar Yàc Pô Lơngĩq kãn dơmãn viãq! Anàq lac-đa luãq gãt lơvàc jrũp dòq buôt rlao mơnuĩh mơda tơma hũ Lơgar Yàc Pô Lơngĩq.” Pơnõq nhũ viãq mãq ngãq krơi, tơnĩa gỡuq: “Yơu nữn asơi pơlih hũ dõc pơ-tlah nĩ?” Yàc Je-su iãq pơnõq nhũ sì đơp làiq: “Kaya nữn pơjẽh anàq mơnuĩh ôh ngãq jỡc, nữn dòq pơweh sì Yàc Pô Lơngĩq nữn krơi. Kơyua mưng Yàc Pô lơngĩq, dơgrữq vruãq rgơi ngãq jỡc.” Pier pơh sãp pa-thơu sì Pitrai: “Pôgrũ mững nĩ, pơnõq hlãq song prah tlàq avih dơgrữq kaya nữn nao tui pôgrũ.” Yàc Je-su hẽ: “Iỡuq viãq, Pôgrũ đơp sì adơi sơai, ôh hũ mơnuĩh halơi prah tlàq sàc anĩh, adơi sơai, gỡuq kamơi, ami ama, anàq tơcho, tơnãh rơyàq kơyua mưng pôgrũ sì kơyua mưng Pơnuaĩq Siàp, sì mơnuĩh nữn, ôh tồq mãq hũ lũ rlao sa rơtôh bãc mưng tũq rài nĩ: Mưng sì sàc anĩh, adơi sơai, gỡuq kamơi, ami, anàq tơcho, tơnãh rơyàq, sigỡuq sì kaya mãq pakỡuq sì kaya hadiuq gãm gãm dơlãp rài hadơi. Nữn hũ lũ mơnuĩh dòq halơu ròq tơviãq jỡc luôĩq hadơi, sì dòq luôĩq hadơi ròq tơviãq jỡc tơgùq halơu.”

Tũq nữn pơnõq nhũ ãn nao jơlàt trôh pãq Je-ru-sa-lem, sì Yàc Je-su nao hlơu pơnõq nhũ. Dơgrữq mơnuĩh mơgrũ mãq ngãq krơi, dòq dơgrữq mơnuĩh nao tui hadơi nữn huaĩq tơtơh. Tũq nữn, Yàc Je-su va krơi sa plôh dua aràc mơnuĩh mơgrũ, Pitrai ròq pơdòq đơp sì pơnõq nhũ thơu dơgrữq vruãq ròq tơviãq trôh ga Pitrai, “Nĩ mững vẽq, pơnõq drơi ãn nao tơgùq pãq Je-ru-sa-lem, sì Anàq Mơnuĩh ròq ãt pơjao ga dơgrữq mơnuĩh gơnuar pioh kaya duh talơvãt prong sì dơgrữq mơnuĩh gơnuar pơto kaya voh-va, vloh pơnõq nhũ ròq ngãq gơnĩt dlàiq iỡuq pa-mơtai Pitrai sì pơjao Pitrai ga vual vơla lơniãu. Pơnõq nhũ ròq siẽq siẽl Pitrai, ka-chôh ia mơvah Pitrai, mãq hơwai poh Pitrai, sì pa-mơtai Pitrai, hadơi nữn tlơu harơi Pitrai ròq hadiuq wỡq.”

Tũq nữn, Ja-kơ sì Jãng, dua anàq lakơi Se-be-đe, trôh pãp Pitrai, pa-thơu: “Ơ pôgrũ, pơnõq hlãq ưng pôgrũ ngãq ga pơnõq hlãq vruãq pơnõq hlãq lakơu.” Pitrai tơnĩa pơnõq nhũ: “Adơi sơai ưng pôgrũ ngãq hagĩq ga adơi sơai?” Pơnõq nhũ drơ sì Pitrai: “Lakơu vrơi ga pơnõq hlãq hũ gơnuar dòq guh dơlãp kaya gơhluh pôgrũ hũ, sa aràc dòq gah hơnuãq sì sa aràc dòq gah iãu pôgrũ.” Nữn Yàc Je-su đơp wỡq sì pơnõq nhũ: “Adơi sơai ôh thơu hagĩq mưng kaya drơi ãn lakơu. Adơi sơai pơlih mơnhũm jỡc chơwàt nữn pôgrũ ròq mơnhũm, hẽla ãt bãp-tem nữn yơu adãt sì pôgrũ ròq ãt, lơĩh?” Pơnõq nhũ “Pa-thơu sì Pitrai: pơnõq hlãq pơlih ngãq jỡc.” Yàc Je-su đơp sì pơnõq nhũ: “Chơwàt sì pôgrũ ròq mơnhũm, adơi sơai ròq mơnhũm, sì adãt bãp-tem nữn pôgrũ ròq ãt adơi sơai ròq ãt. Nữn pioh dòq guh gah hơnuãq hẽla gah iãu pôgrũ hũ nữn ôh iỡuq pôgrũ rơchãc rơdãp, anĩh nữn la anĩh pioh ga mơnuĩh song hũ rơchãc lơĩh.” Tũq hmỡq vruãq nữn, sa plôh aràc mơnuĩh mơgrũ dih pơnõq nhũ pơdòq ơnõc mơvai dì Ja-kơ sì Jãng. Yàc Je-su iơu pơnõq nhũ trôh đơp sì pơnõq nhũ: “Adơi sơai thơu dơgrữq mơnuĩh hũ angãn la mơnuĩh apãt akõq dơlãp dơgrữq vual vơla lơniãu nữn juãq pơgùq jơlì vual vơla, sì dơgrữq mơnuĩh gơnuar apãt akõq prong nữn angui gơnuar prãn apãt akõq pãq dlòc pơnõq nhũ. Nữn dơlãp adơi sơai ôh iỡuq yơu nữn pãq khrãh adơi sơai. Pa-vlữq wỡq, mơnuĩh halơi ưng ngãq prong dơlãp pơnõq adơi sơai nữn iỡuq ngãq mơnuĩh duh vruãq ga adơi sơai, sì mơnuĩh halơi ưng dòq akõq dơlãp pơnõq adơi sơai nữn iỡuq ngãq halỗt ga dơgrữq tãl aràc. Kơyua mưng Anàq Mơnuĩh song trôh kung ôh iỡuq pioh aràc duh vruãq, nữn la pioh duh vruãq, sì tlàq kaya hadiuq drơi ngãq jỡc kaya dơvuh sơlih ga lũ mơnuĩh.”

Hadơi nữn, pơnõq nhũ nao trôh palơi Je-ri-kô, sì dơlãp tũq Pitrai tơviãq mưng Je-ri-kô sigỡuq sì dơgrữq mơnuĩh mơgrũ sì tơpuôl vual vơla lũ, nữn la Ba-ti-me, anàq lakơi Ti-me hũ, la sa aràc mơnuĩh vùp dòq guh yòc lakơu pãq gah jơlàt. Tũq nhũ hmỡq đơp làiq nữn la Yàc Je-su mơnuĩh Na-sa-ret, nhũ pơdòq priãu prong sì đơp làiq: “Ơ Je-su, Anàq pitao Da-vĩt, lakơu anĩt duman hlãq!” Lũ mơnuĩh gơloh pơkhè mơnuĩh vùp nĩ pioh nhũ dòq suà, nữn nhũ brõq priãu prong rlao wỡq tơra: “Ơ anàq pitao Da-vĩt, lakơu anĩt duman hlãq!” Yàc Je-su dòq dơh sì pơđar iơu nhũ nữn trôh. Yơu nữn pơnõq nhũ iơu mơnuĩh vùp, đơp: “Iỡuq gơjãp hatai! Tơgùq dỡc vẽq nao! Pôgrũ iơu sơai.” Nhũ prah ao atah dòq sơgah, phuah tơgùq dỡc, sì nao trôh pãq Yàc Je-su. Yàc Je-su đơp sì nhũ, làiq: “Sơai ưng kơu ngãq hagĩq ga sơai?” Yơu nữn mơnuĩh vùp drơ: “Ơ pôgrũ, hlãq ưng iãq bôh.” Yơu nữn Yàc Je-su đơp sì nhũ: “Nao vẽq. Voh-tui sơai song pasồq pakhơĩh ga sơai.” Nữn mư, nhũ hũ iãq bôh sì nao tui Pitrai pãq jơlàt Pitrai nao.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.