Jãng 5

1Hadơi sì vruãq nữn, hũ sa tũq adãt pơjũm bõc mơnuĩh Ju-đa hũ, nữn Yàc Je-su tơgùq nao pãq palơi Je-ru-sa-lem. 2Tũq nữn, pãq Je-ru-sa-lem, jẽq Bãc Avo, hũ sa dơnao angãn la Bet-tet-đa la pơnuaĩq Hy-ba-lai, hũ lơmã voh gỡc sơvòq bãc rơjàp. 3Hũ sa tơpuôl dơgrữq mơnuĩh ruãq sơkìq, mơnuĩh vùp, mơnuĩh kuẽ kuẽt, sì mơnuĩh kao ãn dòq đĩh pãq anĩh tlam. 4(Kơyua hũ sa aràc mơnuĩh gơnrơh Yàc hũ, dơlãp sa tũq lơwah ngãq gơnĩt, nữn trỗt pãq dơnao sì suơr mơgơi ia, yơu nữn mơnuĩh halơi yàp tơma halơu avih tũq nữn wah ia mơgơi nữn hũ khơĩh, bôh làiq kaya ruãq sơkìq yơu halơi tũq nữn) 5Pãq đỡn hũ sa aràc mơnuĩh lakơi dih, nao gãt tlơu plôh talơpãn thũt hadiuq dơlãp kaya ruãq sơkìq drơi hũ. 6Tũq Yàc Je-su bôh mơnuĩh nĩ ãn dòq đĩh pãq đỡn, sì thơu làiq nhũ tlàq luơi sa tũq lơwah suơi harơi vloh, Pitrai đơp sì nhũ: “Hã ưng hũ khơĩh lơĩh?” 7Mơnuĩh ruãq drơ sì Pitrai: “Ơ Pitrai, hlãq ôh hũ asơi tồq tũq wah ia mơgơi nữn mơnuĩh nữn pơlih gròc va hlãq trỗt tơma dơnao. Vơnah tơmo, dơlãp tũq hlãq ãn trỗt tơma dơnao, nữn hũ mơnuĩh tơmo trỗt tơma hlơu hlãq.” 8Yàc Je-su pơđar nhũ: “Iỡuq tơgùq dỡc vẽq, gơlãp chơnang hã tơgùq sì yàp nao.” 9Tũq nữn mư, nhũ nữn tơviãq jỡc prãn khãc, nhũ gơlãp chơnang nhũ tơgùq, sì yàp nao.

Harơi nữn la harơi Sa-bat. 10Yơu nữn la mơnuĩh Ju-đa đơp sì mơnuĩh song hũ pasồq pakhơĩh: “Harơi nĩ la harơi Sa-bat, nữn hã ôh hũ gơnuar gơlãp va chơnang drơi.” 11Nữn nhũ drơ wỡq sì tơpuôl nữn: “Mơnuĩh song ngãq ga kơu prãn khãc, viãq mơnuĩh nữn pơđar kơu: ‘Iỡuq gơlãp chơnang drơi tơgùq sì yàp nao.’” 12Tơpuôl nữn tơnĩa nhũ: “Mơnuĩh halơi la mơnuĩh song pơđar hã ‘Iỡuq gơlãp chơnang tơgùq sì yàp nao’?” 13Bôh làiq, mơnuĩh song hũ pakhơĩh ôh thơu nữn la asơi, kơyua Yàc Je-su song tơviãq nao suà lìt tơma dơlãp tơpuôl vual vơla lũ ãn bôh mơta pãq anĩh nữn. 14Hadơi dơgrữq vruãq nữn, Yàc Je-su duah pãp nhũ dơlãp sàc talơvãt nữn Pitrai đơp sì nhũ: “Nĩ, hã song khơĩh jỡc prãn khãc vloh! Juơi sỗq dlàiq tơra, tồq ga kaya halơi dleh dlàr rlao ôh tơviãq trôh ga hã.” 15Mơnuĩh nĩ tơviãq nao nữn pa-thơu sì mơnuĩh Ju-đa làiq nữn la Yàc Je-su, mơnuĩh song pasồq pakhơĩh ga drơi jỡc prãn khãc. 16Kơyua dơgrữq vruãq nữn, mơnuĩh Ju-đa mãq pakỡuq Yàc Je-su, kơyua Pitrai song ngãq dơgrữq vruãq nữn dơlãp harơi Sa-bat. 17Nữn Pitrai hẽ wỡq sì pơnõq nhũ: “Ama Kơu kung ãn ngãq vruãq tãl trôh tũq nĩ, nữn Kơu kung ngãq vruãq yơu nữn mĩn.” 18Kơyua mưng pơnuaĩq nĩ, yơu nữn mơnuĩh Ju-đa vloh brõq duah pơnẽq pa-mơtai Pitrai kơyua Pitrai ôh mĩn ngãq sỗq dơlãp harơi Sa-bat, nữn vloh iơu angãn Yàc Pô Lơngĩq la Ama drơi, ngãq krơi ga rùp drơi jỡc rĩng sì Yàc Pô Lơngĩq.

19Yơu nữn, Yàc Je-su song drơ đơp sì pơnõq nhũ: “Iỡuq viãq, iỡuq viãq, kơu đơp sì pơnõq ung, Anàq ôh tũq halơi kơyua mưng rùp phuỗt drơi pioh ngãq avih dơgrữq vruãq halơi, lơniãu kaya halơi nữn Anàq bôh Ama ngãq, kơyua avih dơgrữq vruãq halơi Ama ngãq nữn dơgrữq vruãq nữn Anàq kung ngãq yơu nữn. 20Kơyua Ama khiãng anĩt Anàq sì ràc tơviãq ga Anàq avih dơgrữq kaya nữn mĩn Ama ngãq, yơu nữn Pitrai ròq ràc tơviãq ga Anàq dơgrữq vruãq prong rlao nĩ wỡq pioh ga pơnõq ung iỡuq mãq ngãq krơi. 21Kơyua Ama ngãq ga mơnuĩh mơtai hadiuq wỡq sì vrơi wỡq ga pơnõq nhũ yơu halơi, nữn Anàq kung vrơi kaya hadiuq ga mơnuĩh halơi Anàq ưng yơu nữn. 22Kơyua vloh Ama kung ôh chahrơna asơi, nữn Pitrai song pơjao avih gơnuar chahrơna ga Anàq, 23pioh avih tãl aràc iãq mơ-àc mơyàc Anàq yơu pơnõq nhũ iãq mơ-àc mơyàc Ama. Mơnuĩh halơi ôh iãq mơ-àc mơyàc Anàq nữn kung ôh iãq mơ-àc mơyàc Ama, la Pitao song pơđar Anàq. 24Iỡuq viãq, iỡuq viãq Kơu đơp sì pơnõq ung, nữn la mơnuĩh halơi hmỡq pơnuaĩq Kơu sì pãc-tui Pitao song pơđar Kơu nữn hũ kaya hadiuq dòq gãm gãm, sì mơnuĩh nữn ròq ôh ãt kaya chahrơna, nữn song gãt tơpa tlah mưng kaya mơtai pioh trôh pãq kaya hadiuq. 25Iỡuq viãq, iỡuq viãq, Kơu đơp sì pơnõq ung làiq tũq jơ jẽq trôh, sì tũq nữn la tũq nữn mơnuĩh mơtai ròq hmỡq sãp Anàq Yàc Pô Lơngĩq hũ, sì dơgrữq mơnuĩh halơi hmỡq ròq hadiuq. 26Kơyua Ama hũ kaya hadiuq dơlãp Pitrai yơu halơi, nữn Ama kung vrơi ga Anàq pioh hũ kaya hadiuq dơlãp Anàq yơu nữn, 27sì Ama song vrơi ga Anàq gơnuar tồq ngãq kaya chahrơna kơyua Anàq la Anàq Mơnuĩh. 28Juơi mãq ngãq krơi mưng kaya nĩ, kơyua ròq trôh tũq jơ nữn dơlãp tũq nữn, dơgrữq mơnuĩh dòq dơlãp vơnẽq ròq hmỡq sãp đơp Pitrai hũ 29sì pơnõq nhũ ròq nao tơviãq blàc — dơgrữq mơnuĩh halơi song ngãq kaya siàp nữn pơweh pãq kaya hadiuq wỡq ga kaya hadiuq, dòq dơgrữq mơnuĩh halơi song ngãq kaya mơsãc nữn pơweh pãq kaya hadiuq wỡq pioh ga kaya chahrơna.

30Kơu ôh tũq halơi gơnang krơi mưng rùp phuỗt drơi pioh ngãq avih dơgrữq vruãq. Kơu chahrơna tui yơu kơu hmỡq, sì kaya chahrơna kơu hũ la tơpãq dãng kơyua kơu ôh duah kaya ưng tui yơu hatai drơi hũ, nữn la tui yơu hatai ưng Pitao pơđar-va kơu. 31Mơyah làiq mĩn Kơu ngãq chưng krơi mưng Kơu, nữn pơnuaĩq ngãq chưng Kơu la ôh đang mang pãc-tui. 32Hũ sa aràc mơnuĩh tơmo, la mơnuĩh ngãq chưng mưng Kơu, sì Kơu thơu làiq pơnuaĩq ngãq chưng nữn mơnuĩh nữn đơp mưng Kơu la iỡuq la đang mang pãc-tui. 33Pơnõq ung song pơđar mơnuĩh nao trôh pãp Jãng, sì Jãng song ngãq chưng pơnuaĩq tơpãq. 34Bôh làiq kơu ôh tồq mãq mưng pơnuaĩq ngãq anàq mơnuĩh, nữn kơu đơp dơgrữq kaya nĩ la pioh ga dơgrữq pơnõq ung pơlih hũ dõc pơ-tlah. 35Jãng mĩn gãm la apôi đeng ãn khũ sì pơsàc sơdah, dòq pơnõq ung song ưng uỗt sơh dơlãp kaya sơdah ung nữn hũ dơlãp sa tũq lơwah. 36Nữn kơu hũ pơnuaĩq ngãq chưng prong rlao sì pơnuaĩq ngãq chưng Jãng hũ: nữn la dơgrữq vruãq nữn Ama song pơjao ga kơu pioh ga kơu ngãq wil tãl — nữn la dơgrữq vruãq nữn kơu ngãq tơviãq — ngãq chưng mưng kơu làiq Ama song pơđar kơu. 37Rùp phuỗt Ama, la Pitao pơđar kơu song ngãq chưng mưng kơu. Pơnõq ung ka-ôh hmỡq sãp Pitrai sa bãc halơi, kung ka-ôh tũq halơi iãq bôh rùp phuỗt Pitrai. 38Pơnõq ung ôh hũ pơnuaĩq Pitrai dòq gãm dơlãp hatai drơi, kơyua Pitao nữn Pitrai song pơđar nao trôh, nữn pơnõq ung ôh hũ hatai pãc-tui dơlãp Pitao nữn. 39Pơnõq ung iãq pơwih Srãq Sơđah kơyua pơnõq ung sơnơng làiq gơnang mưng nữn drơi hũ kaya hadiuq dòq gãm gãm, nữn dơgrữq pơnuaĩq nữn la dơgrữq pơnuaĩq ngãq chưng mưng kơu, 40sì pơnõq ung ôh ưng trôh pãq Kơu tồq pioh hũ kaya hadiuq. 41Kơu ôh tồq mãq kaya gơhluh mưng anàq mơnuĩh vrơi, 42bôh làiq yơu nữn, kơu thơu pơnõq ung làiq hatai anĩt anar Yàc Pô Lơngĩq ôh hũ dơlãp pơnõq ung. 43Kơu song trôh dơlãp angãn Ama kơu, nữn pơnõq ung ôh tồq ròq kơu. Nữn mơyah làiq hũ mơnuĩh tơmo trôh mãq angãn krơi drơi hũ, nữn pơnõq ung song tồq ròq mơnuĩh nữn. 44Ngãq hayơu pơnõq ung pơlih pãc, dơlãp tũq ãn apãt mãq kaya gơhluh mưng mơnuĩh tơmo sì ôh duah iãq kaya gơhluh trôh mưng Yàc Pô Lơngĩq hlơu avih? 45Juơi sơnơng làiq nữn la kơu ròq yãq pơnõq ung pãq anãq Ama. Mơnuĩh ròq yãq pơnõq ung la Môi-se, mơnuĩh nữn pơnõq ung pioh hatai chơkhãq chàc. 46Kơyua mơyah làiq pơnõq ung pãc-tui Môi-se, nữn pơnõq ung viãq la pãc-tui kơu, nữn la kơyua ung nữn song wãq đơp mưng kơu. 47Nữn mơyah làiq pơnõq ung ôh pãc-tui dơgrữq pơnuaĩq ung nữn wãq jỡc dơdiãng, nữn ngãq hayơu vloh pơnõq ung ròq pãc-tui pơnuaĩq kơu jỡc?”