Skip to content
BibleKenya

Roglai Bible Literal Text

Jãng 4

Patui nữn, dơlãp tũq Yàc Je-su thơu vruãq mơnuĩh Pha-ri-si song hmỡq Pitrai làiq Pitrai padỡc tơgùq sì ngãq Bãp-tem ga lũ mơnuĩh mơgrũ rlao sì Jãng (bôh làiq ôh iỡuq rùp phuỗt Yàc Je-su ngãq bãp-tem, nữn la dơgrữq mơnuĩh mơgrũ Pitrai hũ), nữn Pitrai tơviãq mưng lơgar Ju-đe sì mai wỡq pãq lơgar Ga-li-le. Yơu nữn Pitrai iỡuq chàc nao gãt Sa-ma-ri. Yơu nữn Pitrai nao trôh pãq sa palơi pơweh sì phũm Sa-ma-ri angãn la Si-kha, jẽq gah rơnuãi tơnãh nữn Ja-kôp song pa-mơpha ga Jô-sep, anàq lakơi nhũ. Pãq đỡn hũ vơngũn ia Ja-kôp. Dơlãp tũq nữn, kơyua Yàc Je-su nao jơlàt dlàr dleh, nữn Pitrai dòq guh pãq gah vơngũn ia. Tũq nữn pơgãp tũq jơ bãc nãm. Hũ Sa aràc mơnuĩh kamơi pơweh mưng lơgar Sa-ma-ri trôh pioh sõq ia, Yàc Je-su đơp sì nai làiq: “Lakơu nai vrơi ga Kơu mơnhũm ia yơh.” Kơyua dơgrữq mơnuĩh mơgrũ Pitrai hũ song nao tơma dơlãp palơi pioh pơnõq nhũ pơlih vlơi kaya bõc. Yơu nữn vloh mơnuĩh kamơi Sa-ma-ri đơp sì Pitrai: “Ngãq hayơu ung, la sa aràc mơnuĩh Ju-đa, ưng lakơu mơnhũm ia mưng hlãq, la sa aràc mơnuĩh kamơi Sa-ma-ri?” (Kơyua mơnuĩh Ju-đa ôh salơnuãq sigỡuq sì mơnuĩh Sa-ma-ri.) Yàc Je-su hẽ pơnuaĩq, nữn Pitrai đơp sì nai: “Mơyah làiq nai song kơnãl thơu kaya vrơi soh Yàc Pô Lơngĩq hũ, sì asơi la mơnuĩh ãn đơp sì nai: ‘Lakơu vrơi ga kơu mơnhũm ia,’ nữn nai viãq ròq yòc lakơu sì mơnuĩh nữn, sì mơnuĩh nữn viãq ròq vrơi ga nai ia hadiuq.” Mơnuĩh kamơi đơp sì Pitrai: “Pa-thơu ung, ung ôh hũ vlõq sõq ia, sì vơngũn ia nữn dơlãp. Yơu nữn, mưng halơi nữn ung hũ ia hadiuq nữn? Ôh tũq halơi ung prõc rơlao sì Ja-kôp, ung kõq pơnõq hlãq, la mơnuĩh song pioh wỡq ga pơnõq hlãq vơngũn ia nĩ, nữn mưng vơngũn nĩ, nhũ song mơnhũm sigỡuq sì anàq tơcho drơi gãm sì tơpuôl avo vơve pơnõq nhũ hũ?” Yàc Je-su đơp sì nai nữn Pitrai pơđar nai: “Avih dơgrữq aràc halơi mơnhũm mưng ia vơngũn nĩ ròq dòq mơhao wỡq, nữn mơnuĩh halơi mơnhũm ia Kơu ròq vrơi nữn ôh mơhao wỡq tơra. Ala mưng nữn, ia sì kơu vrơi ròq tơviãq jỡc ia chãq dơlãp mơnuĩh nữn vãq sơrè trôh pãq kaya hadiuq dòq gãm gãm.” Mơnuĩh kamơi đơp sì Pitrai: “Ơ ung, lakơu vrơi ga hlãq ia nữn, pioh ga hlãq ôh mơhao, sì ôh trôh pãq đĩ sõq ia tơra.” Yàc Je-su đơp sì nai: “Iỡuq Nao vẽq, iơu vơsàc nai sì mai wỡq pãq đĩ.” Mơnuĩh kamơi tồq pơnuaĩq, nữn nai drơ sì Pitrai: “Hlãq ôh hũ vơsàc.” Yàc Je-su đơp wỡq làiq: “Nai đơp: viãq iỡuq làiq: ‘Hlãq ôh hũ vơsàc,’ kơyua nai ròq hũ lơmã aràc vơsàc, sì mơnuĩh vơsàc ãn dòq sì nai nữn la ôh iỡuq la vơsàc nai! Pơnuaĩq nai đơp iỡuq viãq!” Mơnuĩh kamơi đơp sì Pitrai: “Ơ ung, hlãq bôh ung la mơnuĩh la sa aràc mơnuĩh gơnuar hwơr. Ung kõq pơnõq hlãq duh talơvãt pãq dlòc chỡq nĩ, dòq pơnõq ung song đơp làiq anĩh nữn aràc iỡuq duh talơvãt la pãq Je-ru-sa-lem.” Yàc Je-su hẽ wỡq sì nai: “Nĩ Ơ nai, iỡuq tui kơu vẽq, làiq tũq jơ jẽq trôh, tũq pơnõq adơi sơai ròq duh talơvãt Ama ôh iỡuq pãq dlòc chỡq nĩ, kung ôh iỡuq pãq palơi Je-ru-sa-lem. Dơgrữq pơnõq adơi sơai duh talơvãt kaya pơnõq adơi sơai ôh thơu. Dòq pơnõq hlãq nữn duh talơvãt kaya pơnõq hlãq thơu, kơyua mưng kaya dõc pơ-tlah la trôh mưng mơnuĩh Ju-đa. Bôh làiq yơu nữn, jơ jẽq trôh, sì tũq nĩ ròq trôh vloh, tũq dơgrữq mơnuĩh duh talơvãt pơnuaĩq tơpãq sì duh talơvãt Ama mưng vơngãq yua sì pơnuaĩq tơpãq, kơyua Ama kung duah dơgrữq mơnuĩh duh talơvãt Pitrai yơu nữn. Yàc Pô Lơngĩq la Vơngãq, yơu nữn asơi kakôh talơvãt Pitrai nữn iỡuq talơvãt mãq vẽq mưng vơngãq yua sì pơnuaĩq tơpãq.” Mơnuĩh kamơi đơp sì Pitrai làiq: “Hlãq thơu Pitao Hũ Pavuh Mơnhàq (Pitao hũ angãn la Yàc Dõc Pơ-tlah) ròq trôh. Tũq Pitrai trôh, Pitrai ròq akhàt pa-tơviãq avih dơgrữq vruãq ga pơnõq drơi.” Yàc Je-su đơp sì nai: “Kơu, la mơnuĩh ãn đơp sì nai nĩ, viãq la Pitao nữn.”

Dơlãp tũq nữn, dơgrữq mơnuĩh mơgrũ Pitrai mai wỡq, Pơnõq nhũ bôh ngãq krơi kơyua Pitrai ãn đơp dlài sì sa aràc kamơi. Bôh làiq, ôh aràc asơi tơnĩa: “Pôgrũ iỡuq chàc kaya hagĩq?” hẽla: “Hayơu Pôgrũ vloh đơp dlài sì mơnuĩh kamơi nữn?” Yơu nữn, mơnuĩh kamơi nữn tlàq luơi cheh ia, sì wỡq tơma dơlãp palơi prong, đơp sì dơgrữq mơnuĩh: “Iỡuq trôh, pãp sa aràc mơnuĩh, sì mơnuĩh nữn song akhàt ga hlãq dơgrữq pơnuaĩq hlãq song ngãq. Nữn ôh iỡuq la Yàc Dõc Pơ-tlah yơh?” Yơu nữn pơnõq nhũ tơviãq mưng palơi sì nao trôh pãp Pitrai. Dơlãp tũq lơwah nữn, dơgrữq mơnuĩh mơgrũ rãn lakơu Pitrai, làiq: “Ơ Pôgrũ, lakơu bõc vẽq.” Nữn Pitrai đơp wỡq sì pơnõq nhũ: “Kơu hũ kaya bõc nữn adơi sơai ôh thơu.” Yơu nữn, dơgrữq mơnuĩh mơgrũ tơnĩa gỡuq: “Ôh hũ asơi nữn song va ga Pôgrũ kaya bõc iỡuq lơĩh?” Yàc Je-su đơp sì pơnõq nhũ: “Kaya bõc Kơu hũ nữn la Kơu ngãq tui hatai ưng Pitao pơđar Kơu trôh sì ngãq wil tãl vruãq Pitrai hũ. Ôh iỡuq adơi sơai đơp làiq: ‘Dòq pàq vlàt tơra, vloh nữn trôh vlàt yuãq’ yơh? Nĩ, Kơu đơp sì pơnõq adơi sơai, iỡuq angơìq mơta drơi sì iãq dơgrữq blàc hamã song tơsãq, kơyua nhũ song trôh vlàt yuãq vloh. Mơnuĩh yuãq tồq jĩn harơi sì yuãq pơtõm voh chơtai ga kaya hadiuq dòq gãm gãm, pioh ga mơnuĩh dràq pơjẽh sì mơnuĩh yuãq sơh sơr sigỡuq. Kơyua mưng pơnuaĩq hadơi nĩ iỡuq viãq, làiq: ‘Mơnuĩh nĩ la dràq, sì mơnuĩh tơmo la yuãq.’ Kơu song pơđar adơi sơai yuãq anĩh sì adơi sơai ôh ãt dleh dlàr ngãq vruãq pioh hũ. Dơgrữq mơnuĩh tơmo song ãt dleh dlàr ngãq vruãq, dòq adơi sơai nữn song tồq mãq hajũc hlàq vruãq pơnõq nhũ hũ.”

Tũq nữn, lũ mơnuĩh Sa-ma-ri dòq dơlãp palơi nữn hũ hatai pãc-tui dì Pitrai kơyua mưng pơnuaĩq mơnuĩh kamơi ngãq chưng, làiq: “Pitrai đơp sì hlãq thơu dơgrữq vruãq hlãq song ngãq.” Yơu nữn tũq dơgrữq mơnuĩh Sa-ma-ri trôh pãp Pitrai, pơnõq nhũ lakơu Pitrai dòq wỡq sì drơi, nữn Pitrai dòq wỡq pãq đỡn dua harơi. Hũ pơtãl lũ mơnuĩh wỡq hmỡq pãc-tui mưng pơnuaĩq Pitrai. Pơnõq nhũ đơp sì mơnuĩh kamơi: “Tũq nĩ Pơnõq hlãq ôh pãc-tui pơnuaĩq nai đơp, kơyua mĩn pơnõq hlãq song hmỡq, sì pơnõq hlãq thơu làiq mơnuĩh nĩ viãq la Yàc Dõc Pơ-tlah dun kơyua.”

Hadơi sì dua harơi dòq pãq đỡn, Pitrai tơviãq nao pãq Ga-li-le. Mưng rùp phuỗt Yàc Je-su pơto akhàt làiq mơnuĩh gơnuar hwơr ôh hũ mơnuĩh iãq ki ngãm dơlãp palơi lơgar phuỗt nhũ. Kơyua yơu nữn, tũq Pitrai trôh pãq Ga-li-le, vual vơla Ga-li-le tồq ròq Pitrai. Pơnõq nhũ song bôh avih dơgrữq vruãq Pitrai ngãq pãq Je-ru-sa-lem dơlãp harơi adãt, nữn pơnõq nhũ kung nao pơjũm bõc.

Hadơi nữn, Pitrai mai wỡq pãq Ka-na dơlãp phũm Ga-li-le, anĩh sì Pitrai song ngãq ia tơviãq jỡc alãc. Hũ sa aràc pô pitao prong palơi nữn, hũ sa aràc anàq lakơi ung hũ ãn dòq kađòc ruãq pãq Ka-be-na-um. Tũq hmỡq làiq Yàc Je-su mưng Ju-đe mai wỡq trôh Ga-li-le, ung nữn trôh pãp Yàc Je-su sì òt lakơu hayơu pơlih Pitrai trôh sì pasồq pakhơĩh ga anàq nhũ, kơyua anàq nữn jẽq mơtai. Vloh nữn, Yàc Je-su đơp sì ung: “Mơyah làiq pơnõq ung ôh bôh dơgrữq nỡm krơi sì dơgrữq vruãq krơi tơmo, nữn pơnõq ung ôh pãc-tui.” Mơnuĩh pô gơnuar drơ sì Pitrai: “Ơ Pôgrũ, lakơu trôh vẽq hlơu sì tũq anàq hlãq ka-ôh mơtai.” Yàc Je-su đơp sì ung: “Iỡuq nao wỡq vẽq, anàq lakơi ung hadiuq vloh.” Ung nĩ pãc pơnuaĩq Yàc Je-su song đơp sì nhũ, nữn ung nao wỡq. Dơlãp tũq ung ãn nao jơlàt, dơgrữq mơnuĩh halỗt pãp ung sì đơp làiq, anàq lakơi ung dòq hadiuq. Yơu nữn, ung tơnĩa pơnõq nhũ tũq jơ halơi anàq lakơi nhũ jỡc khơĩh hũ prãn. Nữn pơnõq nhũ drơ sì ung làiq: “harơi ka-vruơi, dơlãp tũq jơ tơjuh, ajur tlah mưng dì nhũ.” Yơu nữn, mơnuĩh Ama thơu kơnãl làiq nữn la tơma tũq lơwah nữn Yàc Je-su đơp sì ung: “Anàq ung hadiuq vloh.” Yơu nữn, rùp phuỗt ung gãm sigỡuq sì avih sàc anĩh nhũ pãc-tui. Dòq Yàc Je-su song vloh ngãq kaya nỡm krơi tơmo bãc dua nữn, hadơi sì tũq Pitrai mưng Ju-đe mai wỡq Ga-li-le.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.