Roglai Bible Literal Text
Jãng 3:17
Verse 17 is marked below, with the whole chapter around it. Read from the start
Yơu nữn, hũ sa aràc mơnuĩh gah pơjẽh Pha-ri-si, la sa aràc mơnuĩh apãt akõq vual vơla Ju-đa, angãn ung la Ni-kô-đem. Ung nĩ trôh pãp Yàc Je-su dơlãp dlài mơlãp, nữn đơp sì Pitrai: “Ơ Pôgrũ, pơnõq hlãq thơu làiq Pôgrũ la mơnuĩh pô jãc rgơi trôh mưng Yàc Pô Lơngĩq, kơyua ôh hũ mơnuĩh halơi pơlih ngãq dơgrữq khrung krơi tơmo nĩ, la dơgrữq kaya Pôgrũ song ngãq tơviãq, mơyah làiq ôh hũ Yàc Pô Lơngĩq dòq sigỡuq sì mơnuĩh nữn.” Yàc Je-su hẽ nữn đơp sì ung wỡq: “Iỡuq viãq, iỡuq viãq, hlãq đơp sì ung, mơyah làiq mơnuĩh halơi ôh đeh wỡq vơhrơu, nữn mơnuĩh nữn ôh tũq halơi bôh jỡc palơi lơgar Yàc Pô Lơngĩq hũ.” Ni-kô-đem tơnĩa wỡq Pitrai: “Ngãq yơu hayơu sa aràc mơnuĩh, dơlãp tũq tơha vloh, nữn pơlih hũ đeh tơviãq jỡc wỡq? Pơlih mơnuĩh nữn tơma wỡq dơlãp tũc ami drơi sa bãc tơra pioh hũ đeh tơviãq wỡq yơh?” Yàc Je-su đơp: “Iỡuq viãq, iỡuq viãq, hlãq đơp sì ung, mơyah làiq mơnuĩh halơi ôh đeh tơviãq mưng ia sì Vơngãq Sơđah, nữn mơnuĩh nữn ôh tũq halơi tơma dơlãp palơi lơgar Yàc Pô Lơngĩq hũ. Kaya halơi đeh tơviãq mưng rơlo rùp la rơlo rùp, sì kaya halơi đeh tơviãq mưng Vơngãq Sơđah la vơngãq. Juơi mãq ngãq krơi mưng pơnuaĩq Kơu song đơp sì ung; ‘Kaya iỡuq viãq ga ung la hũ đeh wỡq.’ Angĩn vluh pãq halơi nhũ ưng vluh, sì ung hmỡq yua nhũ vluh, nữn ung ôh thơu angĩn trôh mưng halơi hẽla angĩn ròq nao pãq hlơi. Nữn pơweh sì mơnuĩh halơi hũ đeh tơviãq wỡq mưng Vơngãq Sơđah kung yơu nữn mĩn.” Ni-kô-đem drơ pơnuaĩq sì tơnĩa Pitrai: “Ngãq hayơu vruãq nữn vloh tơviãq yơu nữn jỡc?” Yàc Je-su hẽ nữn đơp sì ung: “Ung la mơnuĩh pô jãc rgơi vual vơla Is-ra-el hũ, nữn hayơu yơh ung ôh thơu pãc dơgrữq kaya nữn? Iỡuq viãq, iỡuq viãq, hlãq đơp sì ung làiq pơnõq hlãq đơp mưng kaya pơnõq hlãq thơu, sì pơnõq hlãq ngãq chưng mưng kaya pơnõq hlãq song bôh, dòq pơnõq ung ôh tồq mãq pơnuaĩq ngãq chưng pơnõq hlãq hũ. Mơyah làiq hlãq song đơp ga pơnõq ung mưng dơgrữq vruãq pãq ala hlùq nữn pơnõq ung dòq ôh pãc, nữn ngãq hayơu pơnõq ung ròq pãc mơyah làiq hlãq đơp ga pơnõq ung mưng dơgrữq vruãq pãq dlòc lơngĩq? Ôh-ka hũ asơi song đìq tơgùq pãq dlòc lơngĩq vloh, lơniãu Pitao song trỗt mưng dlòc lơngĩq — nữn la Anàq Mơnuĩh. Môi-se song ơteh anàq ala tơgùq dơlãp blàc choah yơu halơi, nữn Anàq Mơnuĩh kung iỡuq kađòc ơteh yơu nữn, pioh ga dơgrữq mơnuĩh halơi pãc-tui dơlãp Pitrai nữn hũ kaya hadiuq gãm gãm.
Kơyua Yàc Pô Lơngĩq anĩt duman dun kơyua, tơviãq jỡc Pitrai song vrơi Anàq Sa Pitrai hũ, tồq ga avih dơgrữq mơnuĩh halơi pãc-tui Anàq nữn ròq ôh kađòc lơhiãq thĩt, nữn hũ kaya hadiuq dòq gãm gãm. Kơyua Yàc Pô Lơngĩq ôh pơđar Anàq trôh dơlãp dun kơyua, pioh chahrơna dun kơyua, nữn pioh dõc suãq dun kơyua mưng Anàq nữn. Mơnuĩh halơi pãc-tui Anàq nữn, nữn ôh kađòc ngãq dlàiq, dòq mơnuĩh halơi ôh pãc-tui nữn song kađòc ngãq dlàiq vloh, kơyua ôh pãc-tui trôh angãn Anàq Sa Yàc Pô Lơngĩq hũ. Vơnãh tơmo, nĩ la kaya ngãq dlàiq, nữn la: kaya sơdah song tơma dơlãp dun kơyua, nữn anàq mơnuĩh sơh iãq kaya sồp kơnãm rlao sì kaya sơdah kơyua dơgrữq vruãq ngãq pơnõq nhũ la iãh mơsãc. Kơyua dơgrữq mơnuĩh ngãq mơsãc nữn mơvai kaya sơdah, sì ôh trôh pãq kaya sơdah, tồq ga dơgrữq vruãq ngãq drơi hũ ôh kađòc ràc pa-tơviãq. Bôh làiq yơu nữn, mơnuĩh ngãq tui pơnuaĩq tơpãq nữn trôh pãq kaya sơdah, pioh dơgrữq vruãq drơi hũ song ràc pa-tơviãq làiq, hũ ngãq tơviãq dơlãp Yàc Pô Lơngĩq.”
Hadơi dơgrữq vruãq nữn, Yàc Je-su sì dơgrữq mơnuĩh mơgrũ Pitrai nao pãq palơi Ju-đe. Pitrai pioh tũq jơ dòq wỡq pãq đỡn sigỡuq sì pơnõq nhũ sì ngãq Bãp-tem. Dơlãp tũq nữn, Jãng kung ãn ngãq bãp-tem pãq At-nôn jẽq Sa-lim, kơyua pãq đỡn hũ lũ ia, vual vơla trôh anĩh ung sì ãt ngãq bãp-tem — kơyua tũq nữn, Jãng ka-ôh kađòc mãq jam. Yơu nữn, hũ sa kaya prơjai gỡuq dơlãp dơgrữq mơnuĩh mơgrũ Jãng hũ sigỡuq sì sa aràc mơnuĩh Ju-đa mưng kaya adãt ngãq sơchih. Vloh pơnõq nhũ trôh pãp Jãng nữn đơp sì ung: “Ra-bi, la mơnuĩh song gãm dòq sì Pôgrũ pãq gah dih kròc Jô-đãnh, nữn Pôgrũ song ngãq chưng mưng mơnuĩh nữn, dih, ung nữn ãn ngãq adãt Bãp-tem, sì avih dơgrữq vual vơla va gỡuq nao trôh pa ung nữn.” Jãng hẽ sì drơ wỡq: “Anàq mơnuĩh ôh tũq halơi tồq mãq hũ hagĩq, sa kaya kung ôh hũ, mơyah làiq ôh iỡuq nữn la kaya song hũ vrơi ga mơnuĩh nữn mưng dlòc lơngĩq. Mĩn rùp phuỗt adơi sơai pơlih ngãq chưng viãq ga hlãq làiq hlãq song đơp: ‘Hlãq ôh iỡuq la Yàc Dõc Pơ-tlah,’ nữn la ‘hlãq mĩn la mơnuĩh ãt pơđar nao trôh hlơu Pitao nữn.’ Asơi vơhrơu khiãng mơtơu kamơi nữn la mơnuĩh mơtơu lakơi. Dòq ban mơyơu mơtơu lakơi hũ, la mơnuĩh dòq dỡc sì hmỡq mơtơu lakơi, nữn tồq mãq kaya uỗt sơh kơyua sãp đơp mơtơu lakơi. Yơu nữn, kaya uỗt sơh hlãq nữn song hũ wil tãl. Kaya iỡuq ngãq pơweh sì Pitao nữn la pồq pa-tơgùq, dòq pơweh sì kơu la iỡuq vơviar trỗt.
Pitao trôh mưng dlòc nữn dòq pãq dlòc rlao avih dơgrữq kaya. Mơnuĩh tơviãq mưng hlùq nữn pơweh pa hlùq sì đơp dơgrữq vruãq pơweh mưng hlùq. Pitao trôh mưng lơngĩq dlòc nữn dòq pãq dlòc rlao avih dơgrữq kaya. Pitrai ngãq chưng mưng dơgrữq vruãq nữn Pitrai song bôh sì hmỡq, nữn ôh asơi tồq mãq pơnuaĩq ngãq chưng Pitrai hũ. Mơnuĩh halơi song tồq mãq pơnuaĩq ngãq chưng Pitrai hũ, nữn ròq thơu làiq Yàc Pô Lơngĩq la tơpãq viãq. Kơyua Pitao nữn Yàc Pô Lơngĩq song pơđar trôh nữn akhàt tơviãq pơnuaĩq Yàc Pô Lơngĩq hũ. Kơyua Pitrai vrơi Yàc Vơngãq Sơđah tui yơu savĩq ôh pơgãp jỡc. Ama anĩt duman Anàq sì song pơjao avih dơgrữq kaya dơlãp tơngãn Anàq. Asơi pãc-tui Anàq nữn hũ kaya hadiuq dòq gãm gãm, dòq asơi ôh duh huaĩq Anàq nữn ròq ôh bôh kaya hadiuq, nữn kaya anõc mơvai Yàc Pô Lơngĩq miẽt dòq pãq dlòc mơnuĩh nữn.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.