Skip to content
BibleKenya

Roglai Bible Literal Text

Jãng 20

Jrang mư-ờp harơi chơmrờp dơlãp sa tơjuh, tũq lơngĩq dòq kơnãm, Ma-ri Ma-đơ-len nao trôh vơnẽq sì bôh patơu vơvãc bãc vơnẽq song kađòc vlữc tơviãq. Yơu nữn, nai đuaĩq nao sì trôh pãp Si-môn Pier sigỡuq sì mơnuĩh mơgrũ dih, la mơnuĩh Yàc Je-su khiãng anĩt, sì nai pa-thơu ga pơnõq nhũ: “Aràc song va rùp atơu Yàc tơviãq thĩt pãq vơnẽq, sì pơnõq hlãq ôh thơu pơnõq nhũ chẽq Pitrai pãq halơi.” Yơu nữn la Pier sì mơnuĩh mơgrũ dih tơviãq pãq lơniãu sì nao trôh vơnẽq. Avih dua aràc đuaĩq nao sigỡuq, nữn mơnuĩh mơgrũ dih đuaĩq sơmar rlao Pier sì trôh pãq vơnẽq hlơu. Hadơi sì tũq nhũ kồq trỗt iãq pơwih, nhũ iãq bôh dơgrữq tleh pơchà lơmuỡn dòq pãq đỡn, nữn nhũ ôh tơmã gah dơlãp. Patui nữn, Si-môn Pier kung trôh hadơi nhũ, kung trôh anĩh, nữn ung nao tơmã dơlãp vơnẽq. Ung bôh pơchà lơmuỡn dòq pãq đỡn, dòq vlah charơnãq pơpòq pãq dlòc akõq Pitrai nữn ôh dòq sa anĩh sigỡuq sì pơchà lơmuỡn, nữn jỡc vơlìq chẽq krơi sa anĩh. Vloh, tũq nữn, mơnuĩh mơgrũ dih, la mơnuĩh nữn nhũ song trôh pãq vơnẽq hlơu, kung tơmã, nhũ bôh sì pãc. Kơyua pơnõq nhũ ka-ôh thơu pãc pơnuaĩq Sơrãq Sơđah pơto làiq Pitrai iỡuq hadiuq wỡq mưng anĩh mơtai. Hadơi nữn, dua aràc mơnuĩh mơgrũ vloh mai wỡq pãq anĩh nhũ hũ.

Nữn Ma-ri dòq dỡc sia pãq gah lơniãu vơnẽq. Vloh nai gãm sì sia, gãm sì kồq trỗt tơlàq iãq dơlãp vơnẽq. Nai bôh dua aràc mơnuĩh gơnrơh chồq ao kòq sơdah ãn dòq guh pãq anĩh chẽq rùp atơu Yàc Je-su, sì sa aràc dòq gah akõq, sa aràc dòq gah tơkai. Mơnuĩh gơnrơh tơnĩa nai: “Ơ nai, hayơu nai sia?” Nai drơ sì pơnõq nhũ làiq: “Kơyua aràc ròq va Yàc hlãq nao thĩt, nữn hlãq ôh thơu pơnõq nhũ chẽq Pitrai pãq halơi.” Đơp hadùp pơnuaĩq nữn vloh, nai vơdar rùp sì hadơi nữn bôh Yàc Je-su song dòq dỡc pãq đỡn, nữn nai ôh thơu làiq nữn la Yàc Je-su. Yàc Je-su đơp sì nai: “Ơ nai, kơyua hagĩq nai sia? Nai duah asơi?” Kơyua nai sơnơng làiq nữn la mơnuĩh ngãq vỡn, yơu nữn nai drơ làiq: “Ơ ung, mơyah làiq ung song pađuỡt va Pitrai nao, lakơu vrơi ga hlãq thơu ung ròq chẽq Pitrai pãq halơi, vloh hlãq ròq va Pitrai nao wỡq.” Yàc Je-su iơu nai: “Ơ Ma-ri.” Dơlãp tũq weh vơdar sì hadơi, nai drơ sì Pitrai mưng sãp Hy-ba-lai làiq: “Ra-bu-ni” (pơnuaĩq nữn hũ gơtha la: “Pôgrũ”). Yàc Je-su đơp sì nai: “Juơi rơwỡq tèc pôgrũ, kơyua pôgrũ ka-ôh đìq tơgùq pãq Ama; nữn iỡuq nao pãp pơnõq adơi sơai pôgrũ hũ nữn đơp sì pơnõq nhũ làiq ‘pôgrũ song ròq đìq tơgùq nao pãq Ama pôgrũ, sì kung la Ama pơnõq adơi sơai, la Yàc Pô Lơngĩq pôgrũ hũ, sì kung la Yàc Pô Lơngĩq pơnõq adơi sơai’”. Ma-ri Ma-đơ-len nao, akhàt wỡq ga dơgrữq mơnuĩh mơgrũ làiq: “Hlãq ròq bôh Yàc,” sì dơgrữq pơnuaĩq Pitrai song vrơi pa-thơu ga nai.

Patui nữn, ãn tũq tlãp sồp dơlãp harơi nữn, la harơi bãc chơmrờp dơlãp sa tơjuh, sì dơgrữq mơvah bãc pãq anĩh nữn mơnuĩh mơgrũ dòq kung kađòc krỡq wỡq kơyua huaĩq mơnuĩh Ju-đa, nữn Yàc Je-su trôh sì dỡc pãq khrãh pơnõq nhũ nữn Pitrai đơp sì pơnõq nhũ: “Dadu lơngai ga pơnõq adơi sơai.” Đơp dơgrữq pơnuaĩq nữn vloh, Pitrai vrơi ga pơnõq nhũ iãq dua bẽq tơngãn sì tơlàc wẽq drơi hũ. Tũq nữn, dơgrữq mơnuĩh mơgrũ kung hũ kaya uỗt sơh tũq pơnõq nhũ bôh Yàc. Hadơi nữn, Pitrai đơp wỡq sì pơnõq nhũ: “Dadu lơngai ga adơi sơai. Ama song pơđar pôgrũ yơu halơi, nữn pôgrũ kung pơđar adơi sơai yơu nữn mĩn.” Hadơi sì tũq đơp pơnuaĩq nữn, Pitrai vluh yuà pãq dlòc pơnõq nhũ sì pơđar pơnõq nhũ: “Iỡuq tồq mãq Yàc Vơngãq Sơđah. Mơyah dơgrữq mơnuĩh halơi nữn adơi sơai tơleh dlàiq, nữn dlàiq pơnõq nhũ hũ wàq tơleh; mơyah làiq dơgrữq mơnuĩh halơi nữn adơi sơai rơmiãq pioh wỡq, nữn dlàiq pơnõq nhũ kađòc rơmiãq pioh wỡq.”

Nữn Thô-ma, sa aràc mơnuĩh mơgrũ dơlãp sa plôh dua aràc mơnuĩh mơgrũ, mơnuĩh angãn la Đi-đim, ôh bôh mơta sigỡuq sì pơnõq nhũ tũq Yàc Je-su trôh. Yơu nữn, dơgrữq mơnuĩh mơgrũ tơmo đơp sì ung: “Pơnõq hlãq song bôh Yàc.” Nữn ung đơp wỡq sì pơnõq nhũ: “Mơyah làiq hlãq ôh bôh nỡm đĩn di tơngãn Pitrai, sì chẽq tơđiãc tơngãn hlãq tơmã nỡm đĩn, kung yơu chẽq tơngãn hlãq tơmã pãq gah tơlàc wẽq Pitrai, nữn hlãq viãq ròq ôh pãc.”

Talơpãn harơi hadơi, dơgrữq mơnuĩh mơgrũ Pitrai vloh dòq dơlãp sàc, sì hũ Thô-ma dòq sigỡuq sì pơnõq nhũ. Dơlãp tũq dơgrữq bãc kung ròq krỡq avih vloh, Yàc Je-su trôh sì dòq dỡc pãq khrãh pơnõq nhũ, Pitrai đơp làiq: “Dadu lơngai ga pơnõq adơi sơai.” Patui wỡq, Pitrai pơđar Thô-ma: “Iỡuq chẽq tơđiãc tơngãn sơai pãq đĩ nữn iãq plàq tơngãn pôgrũ. Sì iỡuq mãq tơngãn sơai chẽq tơmã gah tơlàc wẽq pôgrũ. Juơi tơviãq jỡc dỡq dỡng, nữn iỡuq tui vẽq.” Thô-ma drơ wỡq sì pa-thơu sì Pitrai: “Talơvãt Yàc hlãq, sì Yàc Pô Lơngĩq hlãq.” Yàc Je-su đơp sì ung: “Kơyua mưnq hã song bôh pôgrũ, yơu nữn hã pãc-tui. Lơngai ga dơgrữq mơnuĩh halơi ka-ôh bôh nữn pãc-tui.”

Hadơi nữn, Yàc Je-su kung ngãq lũ nỡm krơi tơmo di anãq mơta dơgrữq mơnuĩh mơgrũ Pitrai, sì dơgrữq vruãq nữn, nữn ôh hũ wãq dơlãp sơrãq nĩ; dòq dơgrữq vruãq nĩ hũ wãq wỡq la tồq ga pơnõq adơi sơai pãc làiq Yàc Je-su la Yàc Dõc Pơ-tlah, la Anàq Yàc Pô Lơngĩq, nữn tồq ga pơnõq adơi sơai hũ kaya hadiuq dơlãp tũq pãc-tui dơlãp angãn Pitrai.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.