Jãng 19

1Yơu nữn, mư hadơi nữn, Phi-lat pơđar mãq Yàc Je-su sì atòc poh Pitrai. 2Tơpuôl ling mơnham sa gơwàc chrang mưng druơi. Tơpuôl nhũ pa-tơruãq pãq dlòc akõq Pitrai, sì pa-chồq ga Pitrai sa vlah ao ơtah ia lơngãt. 3Tơpuôl nhũ trôh pãq anãq Pitrai sì đơp: “Talơvãt, Pitao vual vơla Ju-đa!” vloh pah Pitrai hadùp blẽq. 4Sa bãc tơra wỡq, Phi-lat nao tơviãq nữn đơp sì pơnõq nhũ: “Iãq nĩ, kơu va mơnuĩh nĩ tơviãq ga pơnõq ung tồq pơnõq ung thơu làiq kơu ôh duah bôh dlàiq dơnũh halơi dơlãp nhũ nĩ.” 5Vloh Yàc Je-su nao tơviãq, tơruãq chrang druơi sì chồq ao lơngãt. Phi-lat đơp sì pơnõq nhũ: “Iỡuq iãq mơnuĩh nĩ vẽq!” 6Yơu nữn la, dơlãp tũq dơgrữq mơnuĩh gơnuar apãt akõq pioh kaya duh talơvãt prõng sì mơnuĩh ling iãq khiãq bôh Pitrai, pơnõq nhũ priãu pròc làiq: “Pỡc đĩn nhũ vẽq pãq dlòc kayơu pỡc! Pỡc đĩn nhũ vẽq pãq dlòc kayơu pỡc!” Phi-lat đơp sì pơnõq nhũ: “Pơnõq ung iỡuq mãq krơi sì pỡc đĩn nhũ, kơyua kơu ôh duah bôh dlàiq dơnũh halơi dơlãp nhũ.” 7Mơnuĩh Ju-đa hẽ sì ung: “Pơnõq hlãq hũ voh-va sì tui yơu voh-va nữn, nữn nhũ iỡuq mơtai kơyua nhũ song mãq angãn krơi nhũ la Anàq Yàc Pô Lơngĩq.” 8Kơyua nữn, tũq Phi-lat hmỡq pơnuaĩq nĩ, ung brõq pơtãl kaya duh huaĩq, 9ung nữn vloh nao tơmã pãq anĩh chahrơna sì tơnĩa Yàc Je-su làiq: “Ung trôh mưng anĩh halơi?” Nữn Yàc Je-su ôh hẽ sa pơnuaĩq halơi ga ung nữn. 10Kơyua yơu nữn, Phi-lat đơp sì Pitrai: “Ung ôh hẽ pơnuaĩq sì kơu yơh? Ung ôh thơu làiq kơu hũ gơnuar pơrlao hã, sì kung hũ gơnuar pỡc đĩn hã pãq dlòc kayơu pỡc yơh?” 11Yàc Je-su hẽ wỡq sì ung nữn: “Ung ôh hũ dơgrữq gơnuar hagĩq pơweh sì Kơu, mơyah làiq gơnuar nữn song ôh hũ vrơi ga ung mưng dlòc lơngĩq. Kơyua mưng kanõh gơtha nữn, mơnuĩh mãq kơu pơjao ga ung hũ dlàiq tơrãq rlao.” 12Kơyua mưng pơnuaĩq nữn, Phi-lat duah pơnẽq pơrlao Pitrai, nữn mơnuĩh Ju-đa priãu prõng, làiq: “Mơyah làiq pô apãt akõq pơrlao nhũ nữn pô apãt akõq ôh iỡuq la ban mơyơu sì Se-sa. Asơi pa-tơgùq krơi drơi ngãq pitao la jơdrãq sì Se-sa.” 13Kơyua nữn, hadơi sì tũq hmỡq dơgrữq pơnuaĩq nữn, Phi-lat pơđar-va Yàc Je-su tơviãq pãq lơniãu vloh ung dòq guh dơlãp gìq chahrơna pãq anĩh angãn la “Làt Dãq Patơu”; nữn pơnuaĩq Hy-ba-lai angãn la “Ga-ba-tha”. 14(Tũq nữn la harơi rơchãc pơkhrà ga Adãt Pơjũm Bõc Nao Gãt. Dơlãp tũq nữn la pơgãp tũq jơ bãc nãm.) Ung đơp sì mơnuĩh Ju-đa: “Iãq vẽq, pitao pơnõq ung nĩ!” 15Nữn pơnõq nhũ priãu prõc: “Pa-mơtai nhũ vẽq! Pa-mơtai nhũ vẽq! Pỡc đĩn nhũ pãq dlòc kayơu pỡc!” Phi-lat tơnĩa pơnõq nhũ: “Kơu ròq pỡc đĩn pitao pơnõq ung yơh?” Dơgrữq mơnuĩh gơnuar apãt akõq pioh kaya duh talơvãt drơ làiq: “Lơniãu Se-sa, tơpuôl hlãq ôh hũ pitao halơi.” 16Yơu nữn la, dơlãp tũq nữn, ung nữn pơjao Pitrai ga pơnõq nhũ pioh ãt pỡc đĩn pãq dlòc kayơu pỡc, vloh pơnõq nhũ mãq Pitrai sì va nao.

17Tũq gơlãp krơi kayơu pỡc, Pitrai nao trôh anĩh angãn la “Anĩh Tơlàc Akõq”, anĩh nữn dơlãp pơnuaĩq Hy-ba-lai angãn la “Gô-gô-tha.” 18Pơnõq nhũ pỡc đĩn Pitrai pãq đỡn, sigỡuq sì Pitrai la dua aràc mơnuĩh tơmo, dòq gah nĩ sì dòq gah dih, dòq Yàc Je-su di khrãh. 19Tũq nữn, Phi-lat kung pơđar wãq sa dơdiãng ơkhar vloh ơteh pãq dlòc kayơu pỡc. Dơdiãng ơkhar hũ wãq: JE-SU MƠNUĨH NA-SA-RET, PITAO VUAL VƠLA JU-ĐA. 20Kơyua nữn, hũ lũ mơnuĩh Ju-đa song pơpoh jỡc dơdiãng ơkhar nĩ kơyua anĩh nữn Yàc Je-su ãt pỡc đĩn la dòq jẽq palơi prõng. Dơdiãng ơkhar hũ wãq mưng pơnuaĩq Hy-ba-lai, pơnuaĩq La-tinh sì pơnuaĩq Gơ-rec. 21Kơyua yơu nữn, dơgrữq mơnuĩh pioh kaya duh talơvãt prõng mơnuĩh Ju-đa đơp sì Phi-lat: “Lakơu juơi wãq la ‘Pitao vual vơla Ju-đa,’ nữn iỡuq wãq la ‘Mơnuĩh đơp làiq “Kơu la Pitao vual vơla Ju-đa.”’” 22Phi-lat hẽ làiq: “Pơnuaĩq kơu song wãq nữn kơu song wãq vloh.”

23Hadơi nữn, dơlãp tũq dơgrữq mơnuĩh lĩng pỡc đĩn Yàc Je-su dơlãp kayơu pỡc, pơnõq nhũ mãq ao chồq Pitrai hũ vloh hẽt pa-mơpha ngãq pàq vơnah — sa aràc mơnuĩh lĩng mãq sa vơnah — sì gãm ao ơtah. Ao nữn ôh hũ jơlàt mơrai pơsìq, la sa vlah pơcha siàp mưng dlòc trỗt. 24Kơyua yơu nữn, pơnõq nhũ đơp sigỡuq làiq: “Juơi hẽt ao tơviãq, nữn iỡuq suãq katih nhũ, iãq nhũ ròq la kaya asơi.” Nữn la tồq ga pơnuaĩq Sơrãq Sơđah hũ pa-sơmũ làiq:

“Pơnõq nhũ pa-mơpha gỡuq vlah ao kơu,

suãq katih mãq ao kơu.”

Nữn la, tơpuôl lĩng song ngãq yơu nữn.

25Tũq nữn, dơgrữq mơnuĩh ãn dòq dỡc jẽq kayơu pỡc Yàc Je-su hũ la ami Pitrai gãm sì adơi sơai kamơi ami Pitrai hũ, nữn la Ma-ri sơdiuq Kơ-le-o-ba, sigỡuq sì Ma-ri Ma-đơ-len. 26Yơu nữn la, tũq Yàc Je-su bôh ami nhũ sì mơnuĩh mơgrũ nữn Pitrai khiãng anĩt dỡc jẽq đỡn, nữn Pitrai đơp sì ami: “Ơ ami, iãq dih, anàq lakơi ami nữn!” 27Vloh Pitrai đơp sì mơnuĩh mơgrũ “Iãq dih, ami sơai nữn!” Mưng jơ nữn, mơnuĩh mơgrũ nữn va mòq wỡq sàc nhũ.

28Hadơi vruãq nữn, kơyua Yàc Je-su thơu làiq dơgrữq vruãq song hũ wil tãl vloh, sì yơu nữn tồq ga pơnuaĩq Sơrãq Sơđah hũ pa-sơmũ, nữn Pitrai đơp: “Kơu mơhao ia.” 29Sa voh kadoh vuh vãq ia mơsãp hũ chẽq pãq đỡn, kơyua yơu nữn, sì akãq mưng kayơu rỡq grẽh sa asĩt jơrnũ ia vãq ia mơsãp, aràc vrơi payơr tơgùq pãq mơvah Pitrai. 30Yơu nữn, tũq Yàc Je-su tơwơr ia mơsãp nữn, nữn Pitrai đơp: “Dơgrữq vruãq song ngãq wil tãl vloh!” Nữn tarơngũt akõq trỗt, Pitrai suãq vơngãq yuà.

31Patui nữn, kơyua tlãp nữn la harơi rơchãc pơkhrà, yơu nữn tồq ga rùp atơu mơnuĩh ôh miẽt dòq pãq dlòc kayơu pỡc tãl avih harơi Sa-bat (kơyua harơi Sa-bat nữn la sa harơi prõng màc viãq), mơnuĩh Ju-đa lakơu Phi-lat tồq ưng ngãq jõh tơlàc bẽq tơkai dơgrữq mơnuĩh nữn vloh nữn dơgrữq rùp atơu pơlih hũ va nao jỡc. 32Kơyua yơu nữn, dơgrữq mơnuĩh lĩng trôh sì poh jõh bẽq tơkai mơnuĩh bãc sa hũ, vloh mơnuĩh bãc dua, nữn la dơgrữq mơnuĩh ãt pỡc đĩn sigỡuq sì Pitrai. 33Nữn tũq trôh anĩh Yàc Je-su, pơnõq nhũ bôh Pitrai song mơtai vloh, nữn ôh poh jõh tơkai Pitrai. 34Bôh làiq yơu nữn, sa aràc dơlãp mơnuĩh lĩng mãq tơrĩng jơrãq pãq gah tơlàc wẽq Pitrai, nữn mư dơrãh sì ia hõq tơviãq. 35Mơnuĩh song iãq bôh vruãq nữn song ngãq chưng wỡq, sì pơnuaĩq ngãq chưng mơnuĩh nĩ la tơpãq viãq. Mơnuĩh nữn thơu làiq drơi đơp pơnuaĩq tơpãq viãq, tồq pơnõq adơi sơai kung pãc-tui. 36Kơyua dơgrữq vruãq nữn song tơviãq jỡc pioh ngãq pa-sơmũ yơu pơnuaĩq Sơrãq Sơđah: “Ôh hũ sa bẽq tơlàc halơi Pitrai ròq kađòc jõh.” 37Vloh hũ pơnuaĩq dơlãp Sơrãq Sơđah nĩ đơp wỡq: “Pơnõq nhũ ròq iãq tơgùq bôh Pitao nữn drơi song jơrãq”.

38Hadơi dơgrữq vruãq nữn, Jô-sep mơnuĩh palơi A-ri-ma-the, la sa aràc mơnuĩh mơgrũ Yàc Je-su hũ (nữn padỡuq dơđỡuq kơyua huaĩq mơnuĩh Ju-đa), ung lakơu Phi-lat vrơi mãq va rùp atơu Yàc Je-su nao. Phi-lat vrơi gơnuar. Yơu nữn, ung trôh sì mãq va rùp atơu Pitrai nao. 39Ni-kô-đem kung trôh — ung la mơnuĩh mưng tũq chơmrờp trôh pãp Yàc Je-su dơlãp dlài mơlãp — va pơgãm mơlỗq chai bơu vơlhũ sì khãq hlỡq kayơu gơhlơu, pơgãp sa rơtôh sơkãq wal Rô-ma. 40Yơu nữn pơnõq nhũ mãq va rùp atơu Yàc Je-su nao sì pơpòq atơu mưng pơchà lơmuỡn sigỡuq sì jrão vơlhũ, nữn la tui yơu adãt adia mơnuĩh Ju-đa hũ tồq ngãq adãt. 41Vơnãh tơmo, pãq anĩh nữn Pitrai ãt pỡc đĩn hũ sa anĩh vỡn, sì dơlãp vỡn hũ sa vơnẽq vơhrơu, nữn dơlãp đỡn ka-ôh hũ atơu halơi dor dơlãp đỡn. 42Yơu nữn, kơyua harơi rơchãc pơkhrà mơnuĩh Ju-đa hũ sì kơyua vơnẽq nữn dòq jẽq, yơu nữn pơnõq nhũ ngãq adãt Yàc Je-su pãq đỡn.