Skip to content
BibleKenya

Roglai Bible Literal Text

Jãng 13:34

Verse 34 is marked below, with the whole chapter around it. Read from the start

Tũq nữn, hlơu harơi Adãt Pơjũm Bõc Nao Gãt, Yàc Je-su thơu làiq tũq jơ Pitrai jẽq trôh, tồq ga Pitrai tlàq luơi dun kơyua nĩ nao wỡq pãq Ama. Dơlãp tũq song anĩt duman dơgrữq mơnuĩh pơweh sì drơi dơlãp dun kơyua, nữn Pitrai khiãng anĩt pơnõq nhũ tãl trôh luôĩq hadơi. Ãn tũq bõc tlãp, hadơi sì tũq kamlai song tơma dơlãp tũc hatai Ju-đa Is-ka-ri-ôt, anàq lakơi Si-môn hũ, tồq ga nhũ ngãq gơnĩt jơdrãq sì Pitrai, kơyua thơu làiq Ama song pơjao avih dơgrữq kaya dơlãp tơngãn Pitrai, sì thơu làiq Pitrai mai trôh mưng Yàc Pô Lơngĩq sì jẽq nao wỡq pãq Yàc Pô Lơngĩq, yơu nữn Pitrai tơgùq dỡc tlah mưng bõc war, wàq ao lơniãu tơviãq. Sì hadơi sì tũq mãq charơnãq, Pitrai bar tòp dar rùp nhũ. Patui nữn, Pitrai tôh ia tơma dơlãp ka-thao sì pơdòq rao tơkai ga dơgrữq mơnuĩh mơgrũ sì uãq thô mưng charơnãq nữn nhũ song hũ bar tòp dar rùp nhũ. Yơu nữn vloh, Pitrai nao trôh pãq anĩh Si-môn Pier. Ung đơp sì Pitrai: “Ơ Yàc, Pitrai ngãq gơnĩt rao tơkai ga hlãq yơh?” Yàc Je-su hẽ wỡq nữn đơp sì nhũ: “Vruãq Pôgrũ ãn dòq ngãq, tũq nĩ sơai ka ôh thơu pãc, nữn hadơi dơgrữq vruãq nĩ, sơai ròq thơu pãc.” Pier drơ sì Pitrai: “Gơnĩt viãq la ôh tũq halơi hũ vruãq la Pitrai rao tơkai ga hlãq ôh.” Yàc Je-su đơp wỡq sì ung: “Mơyah làiq Pôgrũ ôh rao tơkai ga sơai, nữn sơai ôh hũ vơnah hagĩq sì Pôgrũ ôh.” Si-môn Pier drơ sì Pitrai: “Ơ Yàc, lakơu juơi ôh mĩn rao tơkai hlãq soh, nữn kung rao tơngãn gãm sì akõq hlãq wỡq.” Yàc Je-su đơp sì ung: “Mơnuĩh halơi song manơi vloh nữn ôh chàc ngãq yơu nữn tơra, lơniãu kaya rao tơkai, dòq mơnuĩh nữn hũ sơchih avih, sì adơi sơai nữn hũ sơchih nữn ôh iỡuq avih tãl aràc adơi sơai.” (Kơyua Pitrai thơu asơi ròq jơdrãq sì Pitrai, kơyua yơu nữn Pitrai đơp làiq: “Ôh iỡuq avih tãl aràc hũ sơchih.”)

Yơu nữn, hadơi sì tũq Pitrai rao tơkai pơnõq nhũ vloh sì chồq ao lơniãu tơma rùp, nữn Pitrai dòq guh vloh, đơp sì pơnõq nhũ: “Adơi sơai thơu pôgrũ vơhrơu ngãq hagĩq ga adơi sơai lơĩh? Adơi sơai iơu Pôgrũ la ‘Pôgrũ’, sì la ‘Yàc’; adơi sơai đơp iỡuq kơyua Pôgrũ viãq la yơu nữn. Yơu nữn, mơyah làiq pôgrũ, la Yàc, sì la pôgrũ, song rao tơkai ga adơi sơai, nữn adơi sơai kung iỡuq rao tơkai ga gỡuq. Kơyua pôgrũ ròq ngãq krơh ga adơi sơai pioh adơi sơai kung ngãq drưh yơu pôgrũ song ngãq ga adơi sơai. Iỡuq viãq, iỡuq viãq, pôgrũ đơp sì adơi sơai, mơnuĩh halỗt nữn ôh pròc rlao sì mơnuĩh pô drơi; mơnuĩh ãt pơđar kung ôh pròc rlao sì mơnuĩh pơđar drơi. Mơyah làiq adơi sơai thơu dơgrữq vruãq nĩ, nữn adơi sơai hũ lơngai, mơyah làiq la adơi sơai ngãq dơgrữq kaya nữn. Pôgrũ ôh đơp mưng avih dơgrữq pơnõq adơi sơai; pôgrũ thơu mơnuĩh nữn pôgrũ song duỡt ruãh — nữn pioh tơviãq jỡc iỡuq viãq yơu pơnuaĩq Sơrãq Sơđah wãq làiq: ‘Mơnuĩh bõc bẽn sigỡuq sì kơu wơh kơđuãl tơkai nhũ jơdrãq wỡq kơu.’ Mưng tũq nĩ, pôgrũ đơp pơnuaĩq nĩ ga adơi sơai hlơu sì tũq dơgrữq vruãq ròq tơviãq trôh, pioh dơlãp tũq vruãq nữn tơviãq trôh, nữn adơi sơai pãc làiq pôgrũ la YÀC HADIUQ GÃM GÃM. Iỡuq viãq, iỡuq viãq, pôgrũ đơp sì adơi sơai, mơnuĩh halơi tồq ròq mơnuĩh nữn pôgrũ pơđar nao la tồq ròq pôgrũ, sì mơnuĩh halơi tồq ròq pôgrũ la tồq ròq Pitao song pơđar pôgrũ.”

Hadơi sì tũq đơp dơgrữq kaya nữn, Yàc Je-su ka-ồq ka-ãn dơlãp vơngãq hatai, vloh Pitrai ngãq gơnĩt sì đơp: “Iỡuq viãq, iỡuq viãq, pôgrũ đơp sì adơi sơai, sa aràc dơlãp pơnõq adơi sơai ròq jơdrãq sì pôgrũ.” Dơgrữq mơnuĩh mơgrũ iãq gỡuq, ôh thơu Pitrai ãn đơp ga mơnuĩh halơi. Tũq nữn, hũ sa aràc dơlãp dơgrữq mơnuĩh mơgrũ Pitrai, mơnuĩh nữn Yàc Je-su anĩt, ãn dòq guh pãq ban bõc, gơnỡng pãq rùp Yàc Je-su. Kơyua yơu nữn, Si-môn Pier ngãq nỡm ga mơnuĩh mơgrũ nĩ tơnĩa iãq, “Mơnuĩh nữn Pôgrũ ãn đơp trôh la mơnuĩh halơi?” Kơyua yơu nữn, hadơi sì tũq mơnuĩh mơgrũ nữn gơnỡng pãq rùp Yàc Je-su, mơnuĩh nữn tơnĩa Pitrai: “Ơ Yàc, mơnuĩh nữn la asơi?” Yàc Je-su hẽ: “Nữn la mơnuĩh hadơi sì tũq ròq irũq bẽn nĩ, pôgrũ ròq luơi nhũ sì va vrơi ga mơnuĩh nữn.” Yơu nữn, irũq bẽn nữn vloh, Pitrai vrơi ga Ju-đa, anàq lakơi Si-môn Is-ka-ri-ôt hũ. Hadơi sì tũq nhũ tồq mãq bẽn nữn, sì mư tũq nữn Sa-tan tơmã dơlãp hatai nhũ. Yơu nữn, Yàc Je-su đơp sì nhũ: “Kaya sơai jẽq ngãq, iỡuq sơmar ngãq vẽq.” (Tũq nữn, ôh mơnuĩh halơi ãn dòq guh pãq ban thơu kơyua hayơu Pitrai đơp sì nhũ yơu nữn. Kơyua hũ hadùp aràc mơnuĩh mơgrũ sơnơng, kơyua Ju-đa la mơnuĩh pioh jĩn, nữn jỡc Yàc Je-su đơp sì nhũ: “Iỡuq nao vlơi dơgrữq kaya pioh angui dơlãp harơi adãt,” hẽla pioh pa-mơpha kaya hagĩq nữn pioh vrơi ga mơnuĩh rơbah.) Yơu nữn, hadơi sì tũq Ju-đa tồq mãq bẽn, nhũ tơviãq mư pãq lơniãu. Tũq nữn, lơngĩq song mơlãp vloh.

Yơu nữn, tũq nhũ song tơviãq nao vloh, Yàc Je-su đơp: “Tũq nĩ, Anàq Mơnuĩh song hũ sơuỗt mơyòp, sì Yàc Pô Lơngĩq kung song hũ sơ-uỗt mơyòp dơlãp Pitrai. Vloh Yàc Pô Lơngĩq ròq sơ-uỗt mơyòp Anàq Mơnuĩh dơlãp rùp phuỗt Pitrai, sì Pitrai ròq sơ-uỗt mơyòp Anàq Mơnuĩh mư tũq nữn. Ơ dơgrữq anàq tìt, pôgrũ dòq sigỡuq sì adơi sơai mĩn ôh suơi tơra. Adơi sơai ròq duah pôgrũ, sì yơu pôgrũ song đơp sì dơgrữq mơnuĩh Ju-đa làiq, ‘Anĩh Kơu nao, pơnõq ung ôh tũq halơi nao trôh jỡc.’ Tũq nĩ, pôgrũ kung đơp yơu nữn sì adơi sơai. Pôgrũ vrơi ga adơi sơai sa kaya pơđar-va vơhrơu, tồq ga adơi sơai iỡuq khiãng duman gỡuq; yơu pôgrũ song khiãng duman adơi sơai yơu halơi, pioh adơi sơai kung iỡuq khiãng duman di gỡuq yơu nữn. Mơyah làiq adơi sơai hũ kaya khiãng duman pioh ga gỡuq, nữn kơyua nữn, dơgrữq mơnuĩh ròq thơu làiq adơi sơai la mơnuĩh mơgrũ pôgrũ hũ.”

Si-môn Pier tơnĩa Pitrai: “Ơ Yàc, Pitrai ròq nao pãq hlơi?” Yàc Je-su hẽ sì ung: “Anĩh pôgrũ ròq nao, tũq nĩ adơi sơai ka ôh nao tui pôgrũ jỡc, nữn hadơi nĩ, adơi sơai ròq nao tui.” Pier đơp sì Pitrai: “Ơ Yàc, kơyua hayơu tũq nĩ vloh hlãq ôh tũq halơi nao tui Pitrai jỡc? Hlãq ròq tlàq kaya hadiuq hlãq kơyua mưng Pitrai.” Yàc Je-su hẽ: “Sơai ròq tlàq kaya hadiuq sơai kơyua mưng pôgrũ yơh? Iỡuq viãq, iỡuq viãq, pôgrũ đơp sì sơai, gơnĩt viãq mơnũq ka ôh kơ-iòc tãl trôh tũq sơai kơmlah tlàq pôgrũ tlơu bãc.”

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.