Jãng 12

1Hadơi nữn, Nãm harơi hlơu Adãt Pơjũm Bõc Nao Gãt, Yàc Je-su nao trôh pãq Be-tha-ni, anĩh La-sa-rơ dòq, nĩ la mơnuĩh sì Yàc Je-su song ngãq hadiuq wỡq mưng anĩh mơtai. 2Yơu nữn pơnõq nhũ song pồq kaya bõc mơnhũm pơyãq Pitrai pãq đỡn, sì Ma-the nữn duh vruãq, dòq La-sa-rơ la sa aràc dơlãp dơgrữq mơnuĩh dòq guh pãq ban sigỡuq sì Pitrai. 3Patui nữn, hadơi sì tũq mãq sa voh wal mơnhàq bơu vơlhũ ngãq mưng kayơu kamlai cam-tùng kuơ màc viãq, Ma-ri vruah di tơkai Yàc Je-su, sì mãq bồq nhũ uãq tơkai Pitrai. Tũq nữn, dơlãp sàc anĩh nữn vãq kaya bơu vơlhũ mơnhàq nữn. 4Nữn Ju-đa Is-ka-ri-ôt, sa aràc dơlãp dơgrữq mơnuĩh mơgrũ Pitrai, la mơnuĩh jẽq jơdrãq sì Pitrai, đơp làiq: 5“Kơyua hayơu vloh ôh va mơnhàq bơu vơlhũ nĩ pa-vlơi nữn sơdua mãq tlơu rơtôh đơ-ni-e, nữn pa-mơpha dõc dơgrữq mơnuĩh rơbah?” 6(Tũq nữn, nhũ đơp yơu nữn ôh iỡuq kơyua mưng kaya sơnơng trôh pơweh sì nhũ la mưng mơnuĩh rơbah, nữn kơyua nhũ la mơnuĩh tlẽq sơwah, sì dơlãp tũq apãt gơdũc jĩn, nhũ tlẽq mãq jĩn hũ padỡc dơlãp nữn.) 7Kơyua yơu nữn, Yàc Je-su đơp: “Luơi ga nhũ ngãq vẽq, tồq ga nhũ pơlih song rơmiãq pioh mơnhàq bơu vơlhũ nữn tãl trôh harơi dor pôgrũ. 8Kơyua adơi sơai gãm hũ mơnuĩh rơbah dòq sigỡuq sì drơi, nữn ôh iỡuq pơnõq sơai tũq halơi kung hũ pôgrũ.”

9Yơu nữn, sa tơpuôl lũ mưng dơgrữq mơnuĩh Ju-đa song thơu làiq Pitrai dòq pãq đỡn, nữn pơnõq nhũ va gỡuq mai trôh, ôh iỡuq mĩn kơyua mưng Yàc Je-su, nữn kung pioh ga pơnõq nhũ pơlih iãq bôh La-sa-rơ, la mơnuĩh nữn Yàc Je-su song ngãq hadiuq wỡq mưng anĩh mơtai. 10Nữn dơgrữq mơnuĩh gơnuar pioh kaya duh talơvãt prõng song ngãq gơnĩt sigỡuq làiq, ngãq hayơu ga pơnõq nhũ kung pơlih pa-mơtai gãm sì La-sa-rơ; 11kơyua mưng sơai, nữn hũ lũ mơnuĩh Ju-đa song tlàq luơi nữn pơnõq nhũ pãc-tui Yàc Je-su.

12Harơi hadơi, hũ sa tơpuôl vual vơla lũ viãq, la dơgrữq mơnuĩh nao trôh pioh pơjũm, tũq pơnõq nhũ hmỡq làiq Yàc Je-su ãn nao trôh pãq Je-ru-sa-lem, 13pơnõq nhũ song mãq dơgrữq hlàq guãl, vloh pơnõq nhũ tơviãq nao pioh tồq ròq Pitrai sì driãu prõc làiq: “Hô-sa-na! Sơ-uỗt mơyòp Pitao mãq angãn Yàc nữn trôh, la Pitao vual vơla Is-ra-el!” 14Tũq nữn, dơlãp tũq song duah hũ sa drơi anàq halang dãm, Yàc Je-su đìq pãq dlòc nhũ; yơu hũ pơnuaĩq wãq:

15“Nĩ, anàq kamơi Si-ôn, juơi huaĩq.

Dih, Pitao hã ròq trôh, đìq pãq dlòc halang anàq.”

16Tũq chơmrờp, dơgrữq mơnuĩh mơgrũ Pitrai hũ ôh thơu pãc dơgrữq vruãq nữn; nữn tũq Yàc Je-su song hũ gơhluh, nữn pơnõq nhũ sơdor wỡq làiq dơgrữq pơnuaĩq nữn song hũ wãq mưng Pitrai, anàq mơnuĩh kung song ngãq yơu nữn ga Pitrai. 17Hadơi nữn, tơpuôl vual vơla kung ngãq chưng mưng Pitrai, pơnõq nhũ la dơgrữq mơnuĩh bôh mơta sigỡuq sì Pitrai tũq Pitrai iơu La-sa-rơ tơviãq mưng vơnẽq sì ngãq ga nhũ hadiuq wỡq mưng anĩh mơtai. 18Kơyua kanõh gơtha nữn, vual vơla kung tơviãq nao tồq ròq Pitrai, kơyua pơnõq nhũ hmỡq làiq Pitrai song ngãq kaya nỡm krơi tơmo yơu nữn. 19Kơyua mưng nữn, mơnuĩh Pha-ri-si đơp sì gỡuq: “Pơnõq ung bôh la pơnõq ung ôh rgơi ngãq hagĩq jỡc lơĩh? Iãq dih, vãq avih dun kơyua song nao tui nhũ.”

20Tũq nữn, hũ hadùp aràc mơnuĩh Gơ-rec dih dơlãp katih dơgrữq mơnuĩh tơgùq nao pioh pơnõq nhũ pơlih duh talơvãt dơlãp harơi pơjũm prõng. 21Yơu nữn, dơgrữq mơnuĩh nĩ trôh pãp Phi-lip, la mơnuĩh dòq pãq palơi Bet-sai-đa, pơweh sì phũm Ga-li-le, sì pơnõq nhũ lakơu ung đơp, làiq: “Ơ ung, pơnõq hlãq ưng pãp pôgrũ Je-su.” 22Phi-lip nao nữn đơp sì An-dre; An-dre sigỡuq sì Phi-lip trôh vloh drơ sì Yàc Je-su. 23Tũq nữn, Yàc Je-su hẽ wỡq sì pơnõq nhũ, làiq: “Tũq jơ song trôh tồq ga Anàq Mơnuĩh hũ sơ-uỗt mơyòp. 24Iỡuq viãq, iỡuq viãq, pôgrũ đơp sì adơi sơai, mơyah làiq asar pơjẽh vơdai mi hadơi sì tũq hũ dơràq tơma hlùq, ôh mơtai, nữn nhũ mĩn gãm dòq sa asar pơjẽh; nữn mơyah làiq nhũ mơtai, nữn nhũ ròq tơviãq lũ voh chơtai. 25Mơnuĩh halơi anĩt duman kaya hadiuq drơi nữn ròq lơhiãq nhũ; nữn asơi mơvai kaya hadiuq drơi dơlãp rài nĩ ròq rơmiãq pioh nhũ ga kaya hadiuq dòq gãm gãm. 26Mơyah làiq mơnuĩh halơi duh vruãq pôgrũ nữn iỡuq nao tui pôgrũ; sì pôgrũ dòq pãq halơi, nữn mơnuĩh duh vruãq pôgrũ kung ròq dòq pãq đỡn. Mơyah làiq mơnuĩh halơi duh vruãq pôgrũ, nữn Ama ròq iãq mơ-àc mơyàc mơnuĩh nữn. 27Tũq nĩ, vơngãq yua pôgrũ ãn dòq jơdỡl, sì pôgrũ ròq đơp hagĩq nĩ? ‘Ơ Ama, lakơu dõc anàq tlah mưng tũq jơ nĩ?’ Bôh làiq yơu nữn, kơyua mưng vruãq nữn, nữn pôgrũ song trôh dơlãp tũq jơ nĩ. 28Ơ Ama, lakơu sơ-uỗt mơyòp angãn Ama.” Yơu nữn, vloh hũ sãp đơp trôh mưng dlòc lơngĩq: “Kơu song hũ sơ-uỗt mơyòp sì Kơu ròq hũ sơ-uỗt mơyòp wỡq.” 29Patui nữn, kơyua song dòq dỡc jẽq đỡn sì hmỡq vloh, tơpuôl vual vơla đơp làiq sãp grĩm vơhrơu dơnãi tơviãq. Mơnuĩh tơmo đơp: “Sa aràc mơnuĩh gơnrơh song đơp sì ung nữn.” 30Yàc Je-su hẽ wỡq sì Pitrai đơp: “Sãp đơp nĩ dơnãi tơviãq ôh iỡuq kơyua mưng kơu, nữn la kơyua mưng pơnõq ung. 31Tũq nĩ la kaya chahrơna dun kơyua nĩ hũ: Tũq nĩ, mơnuĩh apãt akõq dun kơyua nĩ ròq kađòc prah tơviãq pãq lơniãu. 32Dòq kơu, tũq kơu kadòc ơteh tơgùq tlah mưng hlùq, kơu ròq katũc va avih dơgrữq mơnuĩh trôh pãq kơu.” 33Tũq nữn, Pitrai ãn đơp pơnuaĩq nĩ pioh akhàt mưng kaya mơtai yơu halơi nữn Pitrai jẽq ãt. 34Nữn vloh tơpuôl vual vơla tơnĩa Pitrai: “Pơnõq hlãq kung hmỡq mưng voh-va làiq Yàc Dõc Pơ-tlah ròq dòq tãl trôh gãm gãm. Hayơu ung đơp làiq: ‘Kaya iỡuq ngãq pơweh sì Anàq Mơnuĩh la kađòc ơteh tơgùq pãq dlòc’? Asơi la Anàq Mơnuĩh nữn?” 35Yơu nữn, Yàc Je-su đơp sì pơnõq nhũ: “Kaya sơdah dòq sigỡuq sì pơnõq ung sa lơwah asĩt tơra. Iỡuq yàp nao dơlãp tũq pơnõq ung hũ kaya sơdah, tồq ga kaya sồp kơnãm ôh apãt mãq pơnõq ung. Mơnuĩh yàp nao dơlãp kaya sồq kơnãm ôh thơu nhũ nao pãq halơi. 36Dơlãp tũq pơnõq ung hũ kaya sơđah, iỡuq pãc-tui kaya sơđah pioh pơnõq ung hũ ngãq jỡc anàq kaya sơđah.”

Yàc Je-su đơp dơgrữq pơnuaĩq nữn vloh nữn Pitrai tơviãq nao, Pitrai pa-dơđỡuq rùp tlah mưng pơnõq nhũ. 37Bôh làiq Pitrai song ngãq lũ viãq kaya krơi tơmo pãq anãq pơnõq nhũ, nữn pơnõq nhũ kung ôh pãc-tui dơlãp Pitrai, 38pioh pơnuaĩq mơnuĩh gơnuar hwơr E-sai hũ tơviãq jỡc iỡuq viãq, nữn ung song đơp:

“Talơvãt Yàc, mơnuĩh halơi pãc pơnuaĩq akhàt payơr pơnõq hlãq hũ,

sì tơngãn Yàc song akhàt pa-tơviãq ga asơi?”

39Kơyua mưng gơtha nữn, pơnõq nhũ pơlih ôh pãc jỡc, kơyua E-sai vloh đơp wỡq:

40“Pitrai song ngãq ga mơta pơnõq nhũ vùp, sì Pitrai song ngãq ga hatai pơnõq nhũ khãc krẽc;

tồq huaĩq làiq pơnõq nhũ pơlih ôh bôh jỡc mưng mơta, sì thơu pãc dơlãp hatai,

vloh gơlàiq mai wỡq,

nữn kơu ròq pasồq pakhơĩh ga pơnõq nhũ.”

41E-sai song đơp dơgrữq pơnuaĩq nữn kơyua ung song iãq bôh kaya gơhluh Pitrai hũ sì đơp mưng Pitrai. 42Yơu nữn, bôh làiq kung hũ lũ mơnuĩh dơlãp dơgrữq mơnuĩh apãt akõq pãc-tui Pitrai, nữn kơyua huaĩq mưng dơgrữq mơnuĩh Pha-ri-si, yơu nữn pơnõq nhũ ôh akhàt tơviãq tồq ga pơnõq nhũ tlah ôh kađòc pơtiãuq tơviãq sàc pơtõm. 43Kơyua pơnõq nhũ sơh pơnuaĩq sơuỗt mơyòp mưng anàq mơnuĩh rlao sì kaya sơ-uỗt mơyòp trôh mưng Yàc Pô Lơngĩq.

44Tũq nữn, Yàc Je-su prõng sãp đơp làiq: “Asơi pãc-tui kơu nữn ôh mĩn la pãc-tui dơlãp kơu, nữn la pãc-tui trôh Pitao song pơđar kơu, 45sì mơnuĩh halơi bôh kơu nữn kung bôh Pitao song pơđar kơu. 46Kơu song trôh ngãq kaya sơdah dơlãp dun kơyua, pioh ga mơnuĩh halơi pãc-tui kơu nữn ôh dòq dơlãp kaya sồp kơnãm. 47Sì mơyah làiq mơnuĩh halơi hmỡq pơnuaĩq kơu nữn ôh pioh rơmiãq, nữn kơu kung ôh chahrơna mơnuĩh nữn; kơyua kơu song trôh ôh iỡuq pioh chahrơna dun kơyua, nữn pioh kơu dõc pơ-tlah dun kơyua. 48Mơnuĩh halơi kơmlah tlàq kơu sì ôh tồq mãq pơnuaĩq kơu nữn song hũ Pitao chahrơna mơnuĩh nữn. Mưng pơnuaĩq nữn kơu song đơp nĩ ròq charơna mơnuĩh nữn dơlãp harơi luôĩq hadơi. 49Kơyua kơu ôh kơyua mưng rùp phuỗt kơu nữn đơp, nữn mưng Pitao pơđar kơu, nữn la Ama song vrơi gơnuar ga kơu, pơnuaĩq halơi kơu khiãng akhàt payơr sì kaya halơi kơu khiãng đơp. 50Sì kơu thơu làiq gơnuar pơđar Pitrai hũ la kaya hadiuq dòq gãm gãm. Yơu nữn, dơgrữq pơnuaĩq kơu đơp, yơu Ama song akhàt payơr ga kơu yơu halơi, nữn kơu akhàt tơviãq yơu nữn.”