Jãng 11

1Tũq nữn, hũ sa aràc mơnuĩh dih kađòc ruãq, angãn La-sa-rơ mơnuĩh Be-tha-ni, la palơi Ma-ri hũ sì sơai nai la Ma-the. 2Nữn Ma-ri la mơnuĩh vuh mơnhàq vơlhũ ga Yàc vloh uãq tơkai Pitrai mưng bồq nhũ hũ, nữn adơi lakơi nhũ hũ la La-sa-rơ ãn kađòc ruãq. 3Yơu nữn, dua aràc adơi sơai yòc pơđar aràc pơyua sãp trôh Pitrai làiq: “Ơ Yàc, iãq dih, mơnuĩh nữn Pitrai anĩt duman ãn kađòc ruãq.” 4Nữn hadơi sì tũq hmỡq yơu nữn, Yàc Je-su đơp làiq: “Ruãq nĩ ôh trôh tãl mơtai ôh, bôh làiq yơu nữn, kơyua kaya gơhluh Yàc Pô Lơngĩq hũ, pioh ga Anàq Yàc Pô Lơngĩq hũ sơ-uỗt mơyòp gơnang mưng vruãq nữn.” 5(Yàc Je-su khiãng anĩt Ma-the, adơi kamơi nhũ hũ, sì La-sa-rơ.) 6Kơyua nữn, tũq Pitrai hmỡq làiq La-sa-rơ ãn kađòc ruãq, bôh làiq tũq nữn, Pitrai dòq wỡq dua harơi pãq anĩh sì Pitrai ãn dòq. 7Patui nữn, hadơi vruãq dòq kađòc tơwãq nữn, Pitrai đơp sì dơgrữq mơnuĩh mơgrũ: “Pơnõq drơi nao wỡq pãq palơi Ju-đe sa bãc tơra.” 8Dơgrữq mơnuĩh mơgrũ drơ sì Pitrai: “Ra-bi, tũq nĩ mơnuĩh Ju-đa ãn duah pơnẽq prah patơu Pôgrũ, nữn hayơu Pôgrũ dòq nao wỡq pãq đỡn sa bãc tơra?” 9Yàc Je-su hẽ làiq: “Iỡuq mĩn dơlãp sa harơi hũ sa plôh dua tũq jơ yơh? Mơyah làiq mơnuĩh halơi nao dơlãp tũq harơi nữn mơnuĩh nữn ôh sơnẽq lơvuh, Kơyua nhũ iãq bôh kaya sơđah dun kơyua nĩ hũ. 10Nữn mơyah làiq mơnuĩh halơi nao dơlãp dlài mơlãp, nữn mơnuĩh nữn sơnẽq lơvuh, kơyua kaya sơdah ôh dòq dơlãp nhũ.” 11Pitrai song đơp yơu nữn, vloh hadơi nữn, Pitrai pơđar pơnõq nhũ: “La-sa-rơ, mơyơu pơnõq drơi hũ, song tơma lơngãp dơlãp kaya pìq, nữn pôgrũ mai trôh la pioh pôgrũ pơlih pa-mơdưh nhũ.” 12Yơu nữn, dơgrữq mơnuĩh mơgrũ đơp sì Pitrai làiq: “Ơ Yàc, mơyah làiq nhũ song tơma dơlãp kaya pìq, nữn nhũ ròq hũ pơdòq khơĩh wỡq.” 13(Tũq nữn, Yàc Je-su gãm đơp mưng kaya mơtai La-sa-rơ hũ, nữn dơgrữq mơnuĩh nữn sơnơng làiq Pitrai ãn đơp mưng kaya padơi dleh dơlãp kaya pìq hũ.) 14Yơu nữn, tũq nữn Yàc Je-su đơp nĩq nũn ga pơnõq nhũ: “La-sa-rơ mơtai vloh. 15Pôgrũ uỗt sơh kơyua mưng kaya kuơ màc adơi sơai hũ kơyua pôgrũ song ôh bôh mơta pãq đỡn, pioh adơi sơai pơlih pãc-tui. Ôh mĩn yơu nữn, pơnõq drơi kung iỡuq nao trôh sì nhũ.” 16Nữn vloh, Thô-ma, hũ angãn la Đi-đim, đơp sì dơgrữq mơnuĩh mơgrũ nao sigỡuq tui Pitrai: “Pơnõq drơi kung iỡuq nao pioh pơnõq drơi pơlih mơtai sigỡuq sì Pitrai.” 17Yơu nữn, dơlãp tũq trôh dì anĩh, Yàc Je-su kơnãl bôh La-sa-rơ nhũ song dòq dơlãp vơnẽq pàq harơi vloh.

18Tũq nữn, Be-tha-ni dòq jẽq Je-ru-sa-lem, dòq ơtah mưng nĩ pãq đỡn pơgãp mĩn sa plôh lơmã ech-ta-đơ. 19Lũ mơnuĩh dơlãp katih dơlãp katih dơgrữq mơnuĩh Ju-đa song trôh chuãq rơwãc Ma-the sì Ma-ri pioh pơnõq nhũ pơlih paluơ padờp dua aràc nai mưng sơai lakơi pơnõq nhũ. 20Tũq Ma-the hmỡq Yàc Je-su trôh, nai nao tồq ròq Pitrai, nữn Ma-ri dòq guh pãq sàc. 21Ma-the đơp sì Yàc Je-su: “Ơ Yàc, mơyah làiq hũ Pitrai dòq pãq đĩ, nữn sơai hlãq ôh mơtai. 22Nữn tơviãq jỡc tũq nĩ, hlãq kung thơu làiq kaya hagĩq Pitrai lakơu Yàc Pô Lơngĩq, nữn Yàc Pô lơngĩq ròq vrơi ga Pitrai.” 23Yàc Je-su đơp sì nai: “Sơai lakơi hã hũ ròq hadiuq wỡq.” 24Ma-the drơ sì Pitrai: “Hlãq thơu làiq sơai nữn song hadiuq wỡq dơlãp kaya hadiuq wỡq tơma harơi luôĩq hadơi.” 25Yàc Je-su đơp sì nai: “Pôgrũ la kaya hadiuq wỡq sì kaya hadiuq; mơnuĩh halơi pãc-tui dì Pôgrũ ròq hadiuq, bôh làiq song mơtai vloh; 26dòq mơnuĩh halơi hadiuq sì pãc-tui dì Pôgrũ nữn viãq ròq ôh tũq halơi mơtai tãl trôh gam gam. Sơai kamơi hũ pãc-tui pơnuaĩq nĩ mĩn?” 27Nai drơ sì Pitrai: “Viãq, ơ Yàc, hlãq pãc-tui Pitrai la Yàc dõc pơ-tlah, Anàq Yàc Pô Lơngĩq, la Pitao iỡuq trỗt dơlãp dun kơyua.” 28Đơp yơu nữn vloh, nai nao sì iơu krơi Ma-ri adơi nhũ, nữn đơp: “Pôgrũ dòq pãq đĩ sì ãn iơu adơi.” 29Tũq Ma-ri hmỡq yơu nữn, nai phuah tơgùq dỡc mư sì nao trôh pãp Yàc. 30Tũq nữn, Yàc Je-su ka-ôh tơmã dơlãp palơi nữn ãn dòq pãq anĩh nữn Ma-the song pãp Pitrai. 31Tũq nữn, hũ mơnuĩh Ju-đa, la dơgrữq mơnuĩh ãn dòq sigỡuq sì nai dơlãp sàc sì paluơ padờp nai, dơlãp tũq bôh làiq Ma-ri chơmãq chơmao tơgùq dỡc sì tơviãq blàc, nữn pơnõq nhũ nao tui nai, sơnơng la nai tơviãq nao trôh pãq vơnẽq dòq sia pãq đỡn. 32Nữn vloh, tũq nữn mư Ma-ri trôh anĩh Yàc Je-su dòq padơi tơkai, tũq iãq bôh Pitrai, nai pa-lơvuh trỗt di anĩh tơkai Pitrai, đơp sì Pitrai: “Ơ Yàc, mơyah làiq hũ Pitrai dòq pãq đĩ, nữn viãq la adơi lakơi hlãq ôh mơtai.” 33Yơu nữn, tũq Yàc Je-su bôh nai sia, sì dơgrữq mơnuĩh Ju-đa nao sigỡuq sì nai kung sia, Pitrai iãq druãi dơlãp hatai sì rùp phuỗt Pitrai mãq ngãq lơhẽ lơhuãi. 34Pitrai tơnĩa: “Pơnõq adơi sơai va dor nhũ pãq hlơi?” Pơnõq nhũ drơ wỡq sì Pitrai: “Ơ Yàc, iỡuq nao trôh sì iãq.” 35Yàc Je-su sia. 36Yơu nữn, hũ dơgrữq mơnuĩh Ju-đa đơp sì gỡuq: “Iãq dih, ung nữn khiãng anĩt La-sa-rơ ôh thơu hadùp!” 37Nữn hũ tơkìq mơnuĩh dơlãp pơnõq nhũ đơp: “Ung nĩ, la mơnuĩh song pơh mơta mơnuĩh vùp jỡc sơdah, nữn vloh ôh tũq halơi ngãq ga mơnuĩh nĩ tlah mưng kaya mơtai jỡc?” 38Kơyua yơu nữn, dơlãp tũq vloh iãq ngãq druãi dơlãp hatai drơi, Yàc Je-su nao trôh pãq vơnẽq. Tũq nữn, nữn la sa voh gùq patơu, sì sa voh patơu prõng krỡq chãc chơkhãq gùq nữn. 39Yàc Je-su đơp làiq: “Iỡuq vlữc patơu nĩ tơviãq vẽq.” Ma-the, la adơi kamơi mơnuĩh song mơtai, đơp sì Pitrai: “Ơ Yàc, rùp nhũ nữn song bơu vrũq vloh, kơyua nhũ dor pàq harơi nĩ.” 40Yàc Je-su đơp sì nai: “Ôh iỡuq pôgrũ song đơp sì nai la mơyah làiq pãc-tui, nữn nai ròq bôh kaya gơhluh Yàc Pô Lơngĩq yơh?” 41Yơu nữn, la pơnõq nhũ vlữc patơu nữn tơviãq. Vloh Yàc Je-su angơìq mơta tơgùq pa-dlòc lơngĩq sì đơp làiq: “Ơ Ama, anàq ỡn ngai Ama kơyua Ama song tồq hmỡq pơnuaĩq anàq. 42Nữn anàq song thơu làiq Ama gãm gãm pa-hmỡq anàq, nữn anàq đơp tơviãq kơyua mưng lũ tơpuôl ãn dòq dỡc tòp dar pãq đĩ, tồq pơnõq nhũ pơlih pãc-tui làiq Ama pơđar anàq trôh.” 43Vloh hadơi sì tũq đơp yơu nữn, Pitrai iơu prong sãp làiq: “La-sa-rơ, iỡuq tơviãq mai pãq blàc!” 44Mơnuĩh song mơtai tơviãq mai, tơkai sì tơngãn dòq pơpòq khãt pơcha, dòq bòq mơtai nhũ kung pơpòq pơcha yơu nữn. Yàc Je-su đơp sì pơnõq nhũ: “Iỡuq tơleh suãq tơviãq dõc nhũ sì luơi ga nhũ nao.”

45Kơyua nữn, lũ mơnuĩh dơlãp tơpuôl mơnuĩh Ju-đa, la dơgrữq mơnuĩh song trôh rơwãc Ma-ri nữn hadơi sì tũq iãq bôh tõm mơta vruãq Pitrai ngãq, nữn pơnõq nhũ hũ hatai pãc-tui dơlãp Pitrai. 46Nữn hũ tơkìq mơnuĩh tơmo dơlãp tơpuôl nhũ nao pãp mơnuĩh Pha-ri-si sì akhàt wỡq ga tơpuôl nữn dơgrữq vruãq nữn Yàc Je-su song ngãq.

47Yơu nữn, dơgrữq mơnuĩh gơnuar apãt akõq pioh kaya duh talơvãt sigỡuq sì mơnuĩh Pha-ri-si pơjũm pơtõm Tơpuôl Mơnuĩh Ju-đa sì vơyai vruãq: “Pơnõq drơi iỡuq ngãq hagĩq nĩ, kơyua mơnuĩh nĩ ngãq lũ kaya nỡm krơi tơmo viãq? 48Mơyah làiq pơnõq drơi luơi ung nữn ngãq yơu nữn, nữn avih dơgrữq aràc ròq pãc-tui ung nữn, vloh mơnuĩh Rô-ma ròq trôh sì mơvlah mãq anĩh nĩ gãm sì palơi lơgar vual vơla pơnõq drơi.” 49Bôh làiq yơu nữn, Kai-phe, sa aràc mơnuĩh dơlãp pơnõq nhũ, la mơnuĩh gơnuar pioh kaya duh talơvãt prong dơlãp thũt nữn, đơp sì pơnõq nhũ: “Pơnõq ung ôh thơu hagĩq ôh. 50Pơnõq ung ôh sơnơng pơwih làiq nữn la kaya siàp rlao ga pơnõq ung dơlãp tũq pioh sa aràc mơtai ala ga vual vơla nữn avih pơjẽh pơtiàt vual vơla pơnõq drơi ôh kađòc lơhiãq thĩt yơh?” 51Tũq nữn, nhũ song đơp kaya nữn ôh trôh mưng rùp phàp nhũ, nữn kơyua la mưng mơnuĩh gơnuar pioh kaya duh talơvãt prong thũt nữn, yơu nữn ung song đơp hwơr làiq Yàc Je-su jẽq ãt mơtai kơyua mưng vual vơla, 52sì ôh mĩn kơyua vual vơla nĩ soh, nữn la dòq pioh ga anàq tơcho Yàc Pô Lơngĩq hũ kađòc dòq chơlah chơluỡn dơgrữq anĩh pơlih hũ pơtõm sigỡuq wỡq tơviãq jỡc sa. 53Yơu nữn, mưng harơi nữn, pơnõq nhũ padỡc pơnẽq vơyai pioh pơnõq nhũ pơlih va Pitrai tơma anĩh mơtai.

54Kơyua nữn, Yàc Je-su ôh dòq ngãq dơgrữq kaya savĩq lanơng lơnai di khrãh mơnuĩh Ju-đa tơra, nữn Pitrai tơviãq mưng anĩh nữn nao trôh pãq anĩh jẽq blàc choah, dơlãp sa palơi angãn la Ep-ra-im. Pitrai dòq pãq đỡn sigỡuq sì mơnuĩh mơgrũ. 55Tũq nữn, Adãt Pơjũm Bõc Nao Gãt vual vơla Ju-đa jẽq trôh, lũ mơnuĩh mưng phũm Palơi tìt tơgùq nao trôh pãq Je-ru-sa-lem tơma hlơu harơi Adãt Pơjũm Bõc Nao Gãt tồq pơnõq nhũ pơlih ngãq sơchih drơi. 56Yơu nữn la, pơnõq nhũ duah Yàc Je-su, nữn đơp sì gỡuq dơlãp tũq dòq dỡc dơlãp sàc duh talơvãt, làiq: “Pơweh sì pơnõq ung, vruãq nữn iãq ngãq yơu halơi? Làiq ung nữn viãq ròq ôh mai trôh pioh pơjũm adãt?” 57Tũq nữn, dơgrữq mơnuĩh gơnuar apãt akõq pioh kaya duh talơvãt gãm sì mơnuĩh Pha-ri-si song vrơi gơnuar pơđar làiq, tồq ga mơyah làiq mơnuĩh halơi thơu Pitrai dòq pãq halơi, nữn iỡuq akhàt pa-thơu wỡq tồq ga pơnõq nhũ pơlih mãq Pitrai.