Roglai Bible Literal Text
He-bơ-rơ 13:5
Verse 5 is marked below, with the whole chapter around it. Read from the start
Kaya khiãng duman pơnõq adơi sơai miẽt hũ dòq gãm. Juơi wơr mãq hatai thơu tồq ròq mơnuĩh thuãi, kơyua tũq ngãq yơu nữn, hũ tơkìq mơnuĩh song tồq ròq mơnuĩh gơnrơh vloh drơi ôh thơu. Iỡuq sơdor trôh dơgrữq mơnuĩh ãt krỡq jam, nữn yơu adơi sơai song ãn kađòc kũm gơsàc sigỡuq sì pơnõq nhũ, sì dơgrữq mơnuĩh kađòc mãq pakỡuq, ngãq yơu rùp phuỗt pơnõq adơi sơai kung ãn dòq dơlãp sa rùp phàp. Kaya pơhuãq pavuh la kaya iỡuq iãq ki ngãm di khrãh dơgrữq mơnuĩh, sì adũq pơhuãq pavuh nữn juơi hũ kaya tasỡuq nrãc, kơyua Yàc Pô Lơngĩq ròq chahrơna dơgrữq mơnuĩh drì drõc sì tơpuôl ngãq arĩh athãm. Juơi pioh hatai drơi ham guãm jĩn priãq, iỡuq siàp hatai sì dơgrữq kaya drơi ãn hũ, kơyua mĩn Pitrai song đơp: “Kơu ròq ôh tũq halơi dòq atah di anàq, Kơu kung ròq ôh tũq halơi prah luơi anàq,” Yơu nữn, kơyua mãq mưng hatai chãc khĩn, pơnõq drơi đơp:
“Yàc la Pitao Dõc Iãq hlãq sì hlãq ròq ôh huaĩq tơtơh.
Aràc halơi ôh rgơi ngãq hagĩq jỡc hlãq?”
Iỡuq sơnơng trôh dơgrữq mơnuĩh dui-va drơi, la dơgrữq mơnuĩh pơto Pơnuaĩq Yàc Pô Lơngĩq vrơi ga pơnõq adơi sơai, tũq iãq pơweh voh chơtai vruãq ngãq pơnõq nhũ hũ, iỡuq ngãq tui yơu voh tui pơnõq nhũ hũ. Yàc Dõc Pơ-tlah Je-su harơi ka-vruơi, harơi nĩ sì tãl trôh gãm gãm nữn mĩn yơu sơđãq. Juơi kađòc pa-gơla kơyua mưng tãl dơgrữq kaya pơto pơđar krơi tơmo. Kơyua kaya tơpãq siàp ga tũc hatai la hũ gơjãp kađữc kơyua mưng kaya anĩt, ôh iỡuq kơyua mưng dơgrữq kaya bõc, nữn pơweh sì dơgrữq kaya nữn, dơgrữq mơnuĩh hadiuq mưng nhũ ôh hũ kaya kuơ màc hagĩq. Pơnõq drơi hũ sa voh ban duh talơvãt, nữn mưng tũq nĩ, dơgrữq mơnuĩh duh vruãq dơlãp sàc duh talơvãt ôh hũ gơnuar bõc. Kơyua dơrãh kaya dơvuh sơlih, la vơnah tơviãq mưng dơgrữq anàq asỡq pioh padỡc, hũ va tơma dơlãp dơgrữq anĩh sơđah mưng pô gơnuar pioh kaya duh talơvãt prõng, vơnah rơlo nhũ nữn kađòc chôh pơhual pãq lơniãu tlam tơpuôl lĩng. Kơyua yơu nữn, Yàc Je-su kung song ãt dleh dlàr pơđìq pơđua gah lơniãu sơvòq bãc palơi, pioh Pitrai mãq mưng dơrãh rùp phuỗt drơi pơlih ngãq ga vual vơla tơviãq jỡc sơđah sơchih. Yơu nữn, pơnõq drơi iỡuq trôh sì Pitrai gah lơniãu tlam tơpuôl lĩng, gui ãt kaya đơp siẽq siẽl sigỡuq sì Pitrai. Kơyua pơnõq drơi ôh hũ sa vlơi halơi dòq miẽt pãq đì, pa-vlữq wỡq, pơnõq drơi ãn duah iãq sa vlơi ròq trôh. Gơnang di Pitrai, pơnõq drơi pơlih pioh kaya pioh padỡc sơuỗt mơyòp tơgùq ga Yàc Pô Lơngĩq dơlãp avih dơgrữq kaya, nữn la voh chơtai mưng mơvah chơbuai akhàt tơviãq angãn Pitrai. Nữn pơnõq drơi Juơi wơr vruãq ngãq siàp sì kaya pa-mơpha dõc iãq, kơyua Yàc Pô Lơngĩq siàp hatai mưng dơgrữq kaya pioh padỡc yơu nữn. Iỡuq pãc sãp sì duh huaĩq dơgrữq mơnuĩh dui-va pơnõq adơi sơai, kơyua pơnõq nhũ mơ-uãh chơkhãq pơweh sì vơngãq yua pơnõq adơi sơai ngãq yơu ròq akhàt tơviãq pơnuaĩq vrơi pa-thơu, tồq ga pơnõq adơi sơai pơlih ngãq vruãq nữn mưng hatai sơh sơr nữn ôh suãq yua, kơyua kaya nĩ ôh kuơ màc ga pơnõq adơi sơai.
Iỡuq iơu lakơu ga pơnõq hlãq, kơyua pơnõq hlãq thơu làiq viãq drơi hũ tũc hatai siàp, dơlãp tũq chơkhãq khiãng ưng hadiuq savĩq tơpãq viãq dơlãp dơgrữq vruãq. Nữn hlãq brõq pơto pơđar pơnõq adơi sơai ngãq yơu nữn lũ rlao wỡq, tồq ga hlãq sơmar hũ trôh wỡq sì pơnõq adơi sơai rlao tơra.
Lakơu Yàc Pô Lơngĩq dadu lơngai, Pitao gơnang di dơrãh hẽ grưh gãm gãm song va Pitao Dlãc Avo Prõng, nữn la Yàc Je-su pơnõq drơi, tơviãq tlah mưng kaya mơtai, lakơu Pitrai rơchãc pơkhrà ga pơnõq adơi sơai dơgrữq kaya siàp mơkrờ pioh ngãq tui hatai ưng Pitrai hũ, dơlãp tũq ngãq siàp hatai di anãq Pitrai dơlãp pơnõq drơi, gơnang di Yàc Dõc Pơ-tlah Je-su, la Pitao nữn kaya gơhluh pơweh pa Pitrai tãl trôh gãm gãm ôh luôĩq. A-men.
Ơ pơnõq adơi sơai, hlãq lakơu pơto pa-sơdor pơnõq adơi sơai ãt ỡl mưng pơnuaĩq paluơ padờp nĩ, kơyua hlãq song wãq ga pơnõq adơi sơai mĩn hũ tơkìq pơnuaĩq nĩ soh. Pơnõq adơi sơai thơu làiq mơnuĩh adơi sơai drơi Ti-mô-the pơnõq drơi song hũ pơrlao lơnang lơnai, mơyah làiq nhũ trôh sơmar, nữn hlãq sigỡuq sì nhũ ròq trôh pãp pơnõq adơi sơai.
Lakơu chuãq rơwãc avih tãl aràc mơnuĩh dui-va pơnõq adơi sơai sigỡuq avih tãl dơgrữq mơnuĩh mơgrũ sơđah. Dơgrữq mơnuĩh mơgrũ sơđah dòq pãq Y-ta-li chuãq rơwãc adơi sơai.
Lakơu kaya anĩt dòq sigỡuq sì avih dơgrữq tãl aràc pơnõq adơi sơai!
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.