Roglai Bible Literal Text
He-bơ-rơ 12:1
Verse 1 is marked below, with the whole chapter around it. Read from the start
Yơu nữn, kơyua pơnõq drơi hũ lũ mơnuĩh ngãq chưng kơ-rơwàc tòp dar drơi yơu sa pỗc huãl prõng, nữn pơnõq drơi, hadơi sì tũq prah tlàq dơgrữq kaya gui tơrãq sì dlàiq dơnũh ngãq ga pơnõq drơi kađòc tơwãq, kung iỡuq mãq hatai ãt ỡl pagui tui kaya đuaĩq kơchah song ràc tơviãq di anãq pơnõq drơi, iỡuq iãq tơpãq di Yàc Je-su, la Pitao Pơdòq Ngãq sì Pitao Ngãq Wil Tãl voh tui, la Pitao kơyua mưng kaya uỗt sơh pioh di anãq drơi song ãt anòng kayơu pỡc, iãq ôh srãp kaya siẽq siẽl, patui nữn Pitrai kung song dòq guh gah hơnuãq sơvan Yàc Pô Lơngĩq. Iỡuq sơnơng trôh Pitao song ãt anòng kaya jơdrãq yơu nữn kơyua mưng dơgrữq mơnuĩh dlàiq dơnũh pơweh pa pơnõq nhũ, tồq ga pơnõq adơi sơai ôh dleh dlàr dơlãp hatai drơi, va trôh kaya dơvlữq hatai.
Pơnõq adơi sơai song ôh-ka trôh kaya jơdrãq va trôh kaya hõq dơrãh dơlãp tũq mơsôh jơdrãq sì dlàiq dơnũh, nữn pơnõq adơi sơai song wơr avih pơnuaĩq pơto pa-sơdor, la pơnuaĩq pơto pơđar pơnõq adơi sơai yơu anàq, làiq:
“Ơ anàq Kơu, juơi iãq ôh srãp kaya ngãq dlàiq Yàc hũ,
kung juơi dơvlữq hatai dơlãp tũq kađòc Pitrai gơrloh pơkhè;
Kơyua Yàc ngãq dlàiq mơnuĩh Pitrai khiãng anĩt,
sì Pitrai poh sơyuãq mơnuĩh halơi nữn Pitrai tồq mãq ngãq jỡc anàq.”
Pơnõq adơi sơai ãn ãt ỡl dơlãp kaya ngãq dlàiq; nữn la Yàc Pô Lơngĩq ãn ngãq pơyãq sì pơnõq adơi sơai yơu anàq. Kơyua mơnuĩh halơi ngãq anàq nữn vloh ama ôh ngãq dlàiq? Nữn mơyah làiq pơnõq adơi sơai ôh ãt kaya ngãq dlàiq yơu dơgrữq mơnuĩh ngãq anàq iỡuq ãt, yơu nữn pơnõq adơi sơai la dơgrữq anàq rah, nữn ôh iỡuq la dơgrữq anàq viãq. Rlao nữn, pơnõq drơi hũ dơgrữq mơnuĩh ama gah vơnah rơlo rùp drơi, ngãq yơu dơgrữq mơnuĩh pơto pơđar, sì pơnõq drơi mĩn ki ngãm; dòq pơweh sì Ama gah vơngãq, ôh iỡuq vloh pơnõq drơi ròq duh huaĩq rlao nữn wỡq, sì pơnõq drơi ròq hadiuq ôh yơh? Kơyua bôh làiq ama gah rơlo rùp pơto pơđar pơnõq drơi dơlãp tơkìq harơi tui kaya ngãq yơu la siàp rlao avih pơweh sì pơnõq nhũ, nữn Ama gah vơngãq pơto pơđar kơyua mưng kaya va trôh kuơ màc ga drơi, tồq hũ vơnah tơmã dơlãp kaya sơđah sơchih Pitrai hũ. Bôh làiq dơgrữq kaya gơrloh pơkhè dơlãp tũq tơviãq trôh ôh ngãq yơu la kaya uỗt sơh, pa-vlữq wỡq la kaya pơđìq pơđua, nữn wỡq sì hadơi, kaya nữn pajỡc tơviãq voh chơtai dadu lơngai kaya tơpãq dãng hũ ga dơgrữq mơnuĩh halơi song thơu mơgrũ ngãq mưng nhũ. Kơyua yơu nữn, iỡuq wơh dơgrữq plàq tơngãn ta-rluơi tơgùq sì dơgrữq voh ta-ồq kađòc lơduh lơmuỡn adơi sơai hũ, sì iỡuq ngãq pa-tơpãq vẽq jơlàt nao ga tơkai pơnõq adơi sơai, pioh ga dơgrữq mơnuĩh kuẽ kuẽt ôh kađòc dơ-vlẽt tơkai, nữn pa-vlữq wỡq la hũ pasồq pakhơĩh.
Iỡuq pagui tui kaya dadu lơngai sigỡuq sì dơgrữq mơnuĩh, gãm sì kaya tơviãq jỡc sơđah sơchih, nữn ôh hũ kaya sơđah sơchih nữn ôh mơnuĩh halơi ròq hũ iãq bôh Yàc, iỡuq gơrhia iãq, huaĩq mơnuĩh halơi nữn ôh hũ tồq mãq kaya anĩt Yàc Pô Lơngĩq hũ, huaĩq làiq akhà phìq halơi nữn tơmuh tơgùq ngãq salũng sơlãng, sì lũ mơnuĩh pơlih kađòc tasỡuq nrãc mưng nhũ, juơi ngãq drì drõc hẽla iãq ôh srãp ngãq yơu E-sau, la mơnuĩh kơyua sơdua mãq sa kaya bõc song pa-vlơi gơnuar anàq kơchoa drơi hũ. Kơyua pơnõq adơi sơai thơu làiq vloh hadơi nữn, tũq ưng hũ tồq mãq kaya lơngai siàp, nữn ung song kađòc pa-trơh tơviãq, kơyua ung ôh duah hũ tũq lơwah pioh mơvai tlàq dlàiq, bôh làiq duah mưng sia chõq rãn lakơu.
Kơyua pơnõq adơi sơai song ôh trôh jẽq gãm sì kaya hagĩq nữn pơlih rơwỡq tèc jỡc, la anĩh apôi khũ hũl, sì sồp kơnãm, sì dlài kơnãm jùq, gãm sì lơvùq prõng, sigỡuq sì sãp dơnãi sỡm wàc gơdèt hũ, gãm sì sãp mơnhĩ mưng dơgrữq pơnuaĩq nữn dơgrữq mơnuĩh hmỡq song rãn lakơu pioh pơnõq nhũ ôh chàc tồq mãq pơtãl sa pơnuaĩq halơi tơra. Kơyua pơnõq nhũ ôh ãt jỡc gơnuar song hũ pơđar, làiq: “Mơyah làiq anàq asỡq halơi vloh mĩn rơwỡq tèc goq chỡq, nhũ ròq kađòc prah patơu.” Sì kaya nữn hũ ràc tơviãq nữn mãq ngãq krơi viãq jỡc Môi-se song đơp: “Hlãq huaĩq tơtơh sì tơtơh drơi viãq.” Bôh làiq yơu nữn, pơnõq adơi sơai song trôh jẽq Chỡq Si-ôn sì palơi Yàc Pô Lơngĩq gãm hadiuq hũ, gãm sì Je-ru-sa-lem dlòc lơngĩq, gãm sì rơvơu mơnuĩh gơnrơh pơjũm pơtõm gỡuq wỡq, jẽq Sàc Pơjũm Sơđah dơgrữq anàq kơchoa song hũ wãq angãn pãq dlòc dơgrữq tãl lơngĩq, trôh jẽq sì Yàc Pô Lơngĩq la Pitao Charơna dơgrữq anàq mơnuĩh, gãm sì vơngãq dơgrữq mơnuĩh tơpãq dãng hũ song ngãq ga wil tãl, trôh jẽq sì Yàc Je-su, la Pitao Khrãh Lơwah kaya hẽ grữh vơhrơu hũ, sì dòq jẽq dơrãh hũ sơrãh tơviãq mãq đơp siàp rlao sì dơrãh A-bel. Iỡuq gơrhia iãq, huaĩq pơnõq adơi sơai kơmlah luơi Pitao ãn đơp. Kơyua mơyah làiq dơgrữq mơnuĩh dih song ôh tlah jỡc hadơi sì tũq kơmlah luơi mơnuĩh gơrhia pa-thơu halơu drơi pãq ala voh hlùq, nữn pơnõq drơi brõq uãn rlao nữn wỡq, tũq nhũ la mơnuĩh tlàq luơi Pitao tơviãq mưng dlòc lơngĩq, nữn sãp Pitao nữn song ngãq voh hlùq sơđô mơgơi dơlãp tũq lơwah nữn, dòq tũq nĩ Pitrai song hẽ làiq: “Sa bãc tơra rùp phuỗt Kơu ròq ngãq sơđô mơgơi, ôh mĩn la voh hlùq soh, nữn la gãm pãq dlòc lơngĩq.” Nữn pơnuaĩq ơkhar “Sa bãc tơra” ãn vrơi pa-thơu vruãq suãq tlàq dơgrữq kaya kađòc sơđô mơgơi, nữn yơu dơgrữq kaya song hũ chrơng pajỡc, tồq ga dơgrữq kaya ôh kađòc sơđô mơgơi pơlih ôh dòq. Kơyua nữn, pơnõq drơi iỡuq hũ hatai thơu ỡn ngai dơlãp tũq tồq mãq sa palơi lơgar ôh sơđô mơgơi, nữn gơnang di kaya nữn pơnõq drơi pơlih duh talơvãt tui savĩq siàp hatai Yàc Pô Lơngĩq, mưng hatai sơ-uỗt mơyòp sì duh huaĩq, Kơyua Yàc Pô Lơngĩq pơnõq drơi la gơnãm apôi chôh rãp.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.