Ga-la-ti 6:9

1Ơ pơnõq adơi sơai, mơyah làiq hũ sa aràc mơnuĩh pơlih pãp dơlãp kaya sỗq suẽl halơi, nữn pơnõq adơi sơai la mơnuĩh pơweh sì gah suàt vơngãq iỡuq ngãq pơsiàp wỡq mơnuĩh nữn mưng hatai siàp lơmuỡn, tũq iãq gơrhia krơi rùp phuỗt drơi, huaĩq drơi kung kađòc ơniãi. 2Iỡuq mãq gui mãq ơnong tơrãq di gỡuq, sì yơu nữn pơnõq adơi sơai ròq ngãq wil tãl voh-va Yàc Dõc Pơ-tlah hũ. 3Kơyua mơyah làiq hũ asơi sơnơng drơi la sa aràc hũ kuơ màc halơi nữn, dơlãp tũq drơi ôh la kuơ màc kaya hagĩq ôh, nữn mơnuĩh nữn pơgàt pa-gơla krơi rùp drơi. 4Nữn dơgrữq tãl aràc iỡuq iãq pơwih vruãq ngãq drơi, vloh tũq nữn mơnuĩh nữn ròq hũ pơnẽq pioh akhàt yeh tơviãq krơi mưng rùp phuỗt drơi, nữn ôh iỡuq pa-mơyơu sì sa aràc mơnuĩh halơi tơmo. 5Kơyua avih tãl aràc ròq gui ơnong tơrãq rùp phuỗt drơi hũ.

6Vơnah tơmo, mơnuĩh hũ pơto mơgrũ mưng pơnuaĩq yàc iỡuq vrơi pa-mơpha dơlãp dơgrữq kaya siàp avih ga mơnuĩh pơto pơđar drơi. 7Juơi luơi kađòc pa-gơla. Yàc Pô Lơngĩq ôh ưng tlao vlơi siẽq siẽl ôh, kơyua mơyah làiq mơnuĩh halơi dràq gar pơjẽh halơi nữn ròq yuãq wỡq gar pơjẽh nữn. 8Mơnuĩh dràq ga rơlo rùp drơi ròq mưng rơlo rùp yuãq pioh kaya pa-lơhiãq. Dòq mơnuĩh dràq ga Yàc Vơngãq Sơđah ròq mưng Yàc Vơngãq Sơđah yuãq hũ kaya hadiuq gãm gãm. 9Pơnõq drơi juơi ơlah atàq dơlãp tũq ngãq vruãq siàp, kơyua trôh iỡuq tũq lơwah, pơnõq drơi ròq yuãq mãq voh chơtai mơyah làiq ôh dơvlữq hatai. 10Yơu nữn, dơlãp tũq pơnõq drơi hũ tũq lơwah, nữn pơnõq drơi iỡuq ngãq vruãq siàp ga avih dơgrữq mơnuĩh, nữn hlơu avih la ga dơgrữq mơnuĩh dòq dơlãp sàc anĩh drơi hũ voh tui.

11Iỡuq iãq mững dơgrữq akhar prong ngãq hayơu nữn hlãq song wãq ga pơnõq adơi sơai mưng tơngãn drơi. 12Hũ lũ mơnuĩh ưng ngãq kaya siàp dơlãp rơlo rùp, pơnõq nhũ pơgùq duah pơnẽq ưng pơnõq adơi sơai ãt sìq kalìq, mĩn pioh ga pơnõq nhũ tlah ôh kađòc mãq pakỡuq mưng kayơu pỡc Yàc Dõc Pơ-tlah Je-su hũ. 13Kơyua vloh mĩn rùp phuỗt dơgrữq mơnuĩh ãt sìq kalìq nữn kung ôh rơmiãq jàc voh-va, nữn pơnõq nhũ ưng pơnõq adơi sơai ãt sìq kalìq pioh pơnõq nhũ pơlih đơp yeh dơlãp rơlo rùp pơnõq adơi sơai hũ. 14Dòq pơweh sì hlãq, lakơu ôh kaya halơi tơviãq jỡc kanõh tồq đơp yeh lơniãu mưng kayơu pỡc Yàc Dõc Pơ-tlah Je-su hũ, Yàc pơnõq drơi, kơyua mưng kayơu pỡc nữn, dun kơyua pơweh sì hlãq song ãt pỡc đĩn, nữn hlãq pơweh sì dun kơyua kung yơu nữn. 15Kơyua ôh iỡuq vruãq sìq kalìq la kaya hagĩq, kung ôh iỡuq vruãq ôh sìq kalìq, nữn sa kaya la chrơng pajỡc vơhrơu. 16Sì mơyah làiq avih dơgrữq aràc halơi ròq yàp nao tui adãt adia nĩ, nữn lakơu kaya dadu lơngai sì anĩt duman dòq pãq dlòc avih dơgrữq pơnõq nhũ, sì pãq dlòc vual vơla Is-ra-el la vual vơla Yàc Pô Lơngĩq hũ.

17Mưng nĩ wỡq sì hadơi, lakơu juơi asơi ngãq pa-sơwanh ga hlãq, kơyua hlãq ãn gui va dơlãp rùp phuỗt drơi dơgrữq khrung nỡm Yàc Je-su hũ.

18Ơ pơnõq adơi sơai, lakơu kaya anĩt Yàc pơnõq drơi hũ, Yàc Dõc Pơ-tlah Je-su dòq sigỡuq sì vơngãq hatai pơnõq adơi sơai. A-men.