E-phe-sô 1

1Pol, mơnuĩh gơnuar pơto Yàc Dõc Pơ-tlah Je-su hũ kơyua mưng hatai ưng Yàc Pô Lơngĩq hũ, pơyua ga dơgrữq mơnuĩh gơnuar pơto, la dơgrữq anàq tơcho dòq pãq E-phe-sô sì la dơgrữq mơnuĩh tui tơpãq dơlãp Yàc Dõc Pơ-tlah Je-su. 2Lakơu kaya anĩt sì kaya dadu lơngai mưng Yàc Pô Lơngĩq la Ama pơnõq drơi, nữn Yàc, la Yàc Dõc Pơ-tlah Je-su, trôh pãq dlòc pơnõq adơi sơai.

3Đang mang sì sơ-uỗt mơyòp Yàc Pô Lơngĩq, la Ama Yàc Dõc Pơ-tlah Je-su, Yàc pơnõq drơi, la Pitao song vrơi kaya lơngai ga pơnõq drơi sì gãm dơgrữq lơngai gah suàt vơngãq dòq dơgrữq anĩh pãq dlòc lơngĩq dơlãp Yàc Dõc Pơ-tlah, 4kung yơu Pitrai song duỡt ruãh pơnõq drơi dơlãp Yàc Dõc Pơ-tlah mưng tũq halơu chrơng pajỡc dun kơyua, pioh pơnõq drơi hũ sơđah sơchih sì ôh dòq gơrloh pơkhè di anãq Pitrai. Kơyua mưng hatai khiãng duman 5Pitrai song ngãq gơnĩt hlơu pơnõq drơi pioh ga anàq ròc Pitrai hũ gơnang di Yàc Dõc Pơ-tlah Je-su, tui kaya sơh sơr hatai ưng Pitrai hũ, 6voh chơtai la kaya adoh sì sơ-uỗt mơyòp mưng kaya gơhluh kaya anĩt Pitrai hũ, nữn Pitrai song lanơng lơnai alĩn vrơi ga pơnõq drơi dơlãp Anàq Anĩt Anar Pitrai hũ, 7sì dơlãp Anàq nữn, pơnõq drơi hũ kaya dơvuh sơlih gơnang mưng dơrãh Pitrai, kaya tơleh dlàiq tui yơu kaya mơda gơnãp mưng kaya anĩt Pitrai hũ, 8la kaya anĩt nữn Pitrai song vrơi ga pơnõq drơi sa vĩq dơlah dơlài dơlãp dơgrữq kaya jãc rgơi sì kaya thơu pãc, 9ngãq ga pơnõq drơi kơnãl thơu kaya dơlãp dađỡuq hatai ưng Pitrai hũ tui yơu kaya siàp hatai Pitrai hũ, la kaya nữn Pitrai song ngãq gơnĩt mưng hlơu dơlãp Yàc Dõc pơ-tlah Je-su, 10pioh tãl tũq trôh harơi hũ wil tãl lơnãq ròq ngãq gơnĩt, nữn duah pơtõm wỡq avih dơgrữq kaya dơlãp Yàc Dõc Pơ-tlah, gãm sì avih dơgrữq kaya pãq dlòc lơngĩq sì dơgrữq kaya pãq ala voh hlùq, dòq dơlãp Pitrai, 11nữn la dơlãp Pitao nữn pơnõq drơi kung hũ pa-mơpha vơnah apôh hama, kơyua song hũ ngãq gơnĩt hlơu tui sa kanõh Pitao ngãq tơviãq dơgrữq vruãq drưh yơu tui lơnãq hatai ưng Pitrai hũ, 12tồq ga pơnõq drơi, dơgrữq mơnuĩh hlơu avih pioh kaya chơkhãq gơnang dơlãp Yàc Dõc Pơ-tlah, hũ voh chơtai mưng kaya sơ-uỗt mơyòp ga kaya gơhluh Pitrai hũ. 13Vloh nữn kung dơlãp Pitrai, hadơi sì tũq hmỡq pơnuaĩq tơpãq, la Pơnuaĩq siàp mưng kaya dõc pơ-tlah pơnõq adơi sơai, sì tũq pãc-tui dơlãp Pitrai, nữn pơnõq adơi sơai ròq hũ tap-ban-kiq mưng Yàc Vơngãq Sơđah tui pơnuaĩq hẽ grưh, 14sì Pitao nữn la kaya chưng tang ngãq gơnĩt vrơi apôh hama pơnõq drơi hũ tãl trôh tũq tơvuh vlơi wỡq avih apôh hama, pioh hũ voh chơtai mưng kaya sơ-uỗt mơyòp ga kaya gơhluh Pitrai hũ.

15Kơyua yơu nữn, mưng tũq hlãq hmỡq mưng voh tui pơnõq adơi sơai dơlãp Yàc, la Yàc Je-su, sì kaya khiãng duman pioh ga avih dơgrữq mơnuĩh gơnuar pơđar sơđah, 16nữn hlãq ôh padơh pioh mãq pơnuaĩq ỡn ngai kơyua pơnõq adơi sơai, sơdor trôh pơnõq adơi sơai dơlãp pơnuaĩq iơu lakơu drơi hũ, 17tồq ga Yàc Pô Lơngĩq Yàc Dõc Pơ-tlah Je-su hũ, la Yàc pơnõq drơi, la Ama gơhluh, ròq vrơi ga pơnõq adơi sơai vơngãq sơđah kaya jãc rgơi hũ sì pabôh tơviãq dơlãp kaya pãc thơu Pitrai hũ, 18ngãq ga mơta hatai pơnõq adơi sơai hũ pơsàc sơdah, pioh pơnõq adơi sơai thơu kaya chơkhãq chàc mưng kaya duỡt ruãh Pitrai hũ la hagĩq, kaya mơda gơnãp apôh hama kaya gơhluh Pitrai dơlãp dơgrữq mơnuĩh gơnuar pơđar sơđah yơu halơi, 19sì kaya prong prõc rlao avih ôh kaya hagĩq pơgãp jỡc gơnuar chơnuãq Pitrai hũ la yơu halơi pơweh sì pơnõq drơi, la dơgrữq mơnuĩh hũ hatai pãc-tui, tui kaya ngãq vruãq kơyua mưng prãn khãc gơnuar chơnuãq Pitrai hũ, 20sì Pitrai ròq ngãq tơviãq dơlãp Yàc Dõc Pơ-tlah tũq ngãq ga Yàc Dõc Pơ-tlah mưng kaya mơtai hadiuq wỡq sì dòq guh gah hơnuãq Pitrai dòq dơgrữq anĩh dlòc pãq lơngĩq, 21tơpa pãq dlòc rlao avih dơgrữq gơnuar, gơnuar chơnuãq, gơnuar prãn, sì pô gơnuar apãt akõq sigỡuq sì dơgrữq angãn hũ tiẽng dơnai, ôh iỡuq mĩn dơlãp rài nĩ nữn gãm dơgrữq rài hadơi wỡq. 22Pitrai song ngãq avih dơgrữq kaya duh di gah ala tơkai Yàc Dõc Pơ-tlah sì chẽq Yàc Dõc Pơ-tlah ngãq akõq pãq dlòc dơgrữq kaya pơweh sì Sàc Pơjũm Sơđah, 23nữn sàc pơjũm sơđah la rùp phàp Pitrai, la kaya wil tãl Pitao hũ ngãq ga vãq sơrè dơgrữq kaya dơlãp avih dơgrữq pơjẽh.