Skip to content
BibleKenya

Roglai Bible Literal Text

Ga-la-ti 5:22

Verse 22 is marked below, with the whole chapter around it. Read from the start

Yàc Dõc Pơ-tlah song dõc suãq pơnõq drơi pioh pơnõq drơi hũ lanơng lơnai. Yơu nữn, iỡuq dòq dữc gơjãp sì juơi ãt tơruãq yỡu halỗt tơra.

Lakơu iỡuq hmỡq gơnĩt, hlãq, Pol, đơp sì pơnõq adơi sơai thơu làiq mơyah làiq pơnõq adơi sơai iỡuq chàc ãt sìq kalìq, nữn Yàc Dõc Pơ-tlah ròq ôh va wỡq kaya kuơ màc hagĩq ga pơnõq adơi sơai ôh. Hlãq vloh ngãq gơnĩt sa bãc tơra sigỡuq sì dơgrữq tãl aràc mơnuĩh hũ ãt sìq kalìq làiq mơnuĩh nữn hũ pơgùq iỡuq rơmiãq pioh wil tãl avih voh-va. Pơnõq adơi sơai halơi ưng hũ angãn tơpãq dãng kơyua mưng voh-va nữn song kađòc tlàq luơi tlah di Yàc Dõc Pơ-tlah, song lơhiãq kaya anĩt vloh. Pơweh sì pơnõq drơi, gơnang mưng Yàc Vơngãq Sơđah, kơyua mưng voh tui, pơnõq drơi chơkhãq chàc kaya chàc gơnang mưng kaya tơpãq dãng. Kơyua dơlãp Yàc Dõc Pơ-tlah Je-su, kaya kuơ màc ôh iỡuq la sìq kalìq hẽla ôh sìq kalìq, nữn la voh tui ngãq tơviãq pa-thơu mưng kaya khiãng duman. Pơnõq adơi sơai ãn đuaĩq prãn siàp. Asơi song mãq pakỡuq pơnõq adơi sơai pioh ôh vrơi duh huaĩq pơnuaĩq tơpãq? Kaya pachôh pasũl nữn ôh trôh mưng Pitao iơu duỡt pơnõq adơi sơai! Sa asĩt voh tapơi kung ngãq pa-vrùq tơgùq avih sakhũc hlỡq. Dơlãp Yàc, hlãq hũ hatai chàc gơnang gơnĩt mưng pơnõq adơi sơai, làiq pơnõq adơi sơai ròq ôh hũ kaya sơnơng krơi. Vơnah tơmo, mơnuĩh halơi ngãq sawĩ sawỡn dlò sơnơng pơnõq adơi sơai nữn ròq ãt ngãq dlàiq, bôh làiq mơnuĩh nữn la asơi. Nữn, ơ pơnõq adơi sơai, mơyah làiq yơu hlãq miẽt pơto akhàt adãt sìq kalìq nữn kơyua hayơu hlãq dòq kađòc mãq pakỡuq? Mơyah làiq yơu nữn nữn kaya sơnẽq sỗq kơyua mưng kayơu pỡc song jỡc prah luơi vloh. Dòq hlãq tơviãq jỡc chơkhãq khiãng dơgrữq mơnuĩh ngãq salũng sơlãng ga pơnõq adơi sơai ròq nhũ koh prah rùp drơi vẽq.

Ơ pơnõq adơi sơai, kơyua pơnõq adơi sơai ròq hũ duỡt ruãh trôh pãq kaya lanơng lơnai, mĩn la kaya lanơng lơnai ôh iỡuq pioh va luơi wỡq tũq lơwah ga vơnah rơlo rùp, pa-vlữq wỡq, iỡuq duh huaĩq di gỡuq kơyua mưng kaya khiãng duman. Kơyua avih dơgrữq voh-va hũ ngãq wil tãl dơlãp sa pơnuaĩq pơđar-va: “Anàq iỡuq anĩt duman mơnuĩh jẽq phia drơi yơu rùp phuỗt drơi.” Dòq mơyah làiq pơnõq adơi sơai hẽt hàq sì kẽq luỗt gỡuq, nữn iỡuq iãq gơrhia, huaĩq pơnõq adơi sơai pa mơtai dơdlãq gỡuq drơi.

Pa-vlữq wỡq, hlãq akhàt làiq, iỡuq yàp nao tui Yàc Vơngãq Sơđah, nữn pơnõq adơi sơai viãq ròq ôh ngãq wil tãl siàp hatai dơgrữq kaya ham ưng tui vơnah rơlo rùp. Kơyua vơnah rơlo rùp ham ưng nữn ôh iỡuq pơweh sì Yàc Vơngãq Sơđah, dòq Yàc Vơngãq Sơđah nữn jơdrãq sì rơlo rùp. Kơyua dua gah jơdrãq di gỡuq, yơu nữn ôh hũ pơnuaĩq mơyah làiq pơnõq adơi sơai ưng dơgrữq kaya nĩ, nữn drơi ngãq. Nữn mơyah làiq pơnõq adơi sơai hũ Yàc Vơngãq Sơđah dui-va, nữn pơnõq adơi sơai ôh dòq pãq ala gơnuar voh-va. Dơgrữq vruãq ngãq tui vơnah rơlo rùp la nĩq nũn viãq, nhũ la: arĩh athãm, ôh sơđah sơchih, ngãq ling lang, duh talơvãt rùp rãp, jũh proh, sòq drãq, mơvlah kơchah, sàq hatai, nong mơvai, mơvlah gơchah gỡuq, ôh salơnuãq, pa-chơlah tơpuôl, buah mơvai, mơvũq mơvẽl, bõc mơnhũm sigỡuq sì dơgrữq kaya hagĩq drưh yơu dơgrữq vruãq song đơp nữn, nữn mưng dơgrữq vruãq nữn, hlãq đơp gơrhia sì pơnõq adơi sơai, yơu hlãq song đơp gơrhia hlơu thrơi, làiq dơgrữq mơnuĩh halơi ngãq dơgrữq vruãq yơu nữn ròq ôh tồq mãq hũ palơi lơgar Yàc Pô Lơngĩq. Nữn voh chơtai Yàc Vơngãq Sơđah hũ la hatai khiãng duman, kaya uỗt sơh, dadu lơngai, ãt-ỡl, lơnguh siàp, lơmuỡn siàp, tui tơpãq, siàp lơmuỡn, thơu gơrhia rùp phàp; ôh hũ voh-va halơi mãq pakỡuq dơgrữq kaya yơu nữn. Vơnah tơmo, dơgrữq mơnuĩh pơweh pa Yàc Dõc Pơ-tlah Je-su song pỡc đĩn vơnah rơlo rùp sigỡuq sì dơgrữq kaya ham sơh sì hãm khiãng pơnõq nhũ hũ pãq dlòc kayơu pỡc.

Mơyah làiq pơnõq drơi hadiuq gơnang di Yàc Vơngãq Sơđah, nữn pơnõq drơi kung iỡuq yàp nao tui Yàc Vơngãq Sơđah. Juơi duah mãq angãn tiẽng dơnai vlữq lor yeh drơi nữn pơgeh gỡuq, buah mơvai gỡuq.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.