Roglai Bible Literal Text
Vruãq 9
Nữn Sau-lơ miẽt đơp pơnuaĩq pơhi pa-huaĩq sì pa-mơtai jơdrãq sì dơgrữq mơnuĩh mơgrũ Yàc, nhũ trôh pãp mơnuĩh pioh kaya duh talơvãt prõng, lakơu ung wãq sơrãq ga dơgrữq sàc pơtõm pãq Đa-mach, pioh mơyah làiq nhũ nao pãp mơnuĩh halơi tui yàc, bôh làiq la mơnuĩh lakơi hẽla mơnuĩh kamơi, nữn nhũ pơlih mãq akãq sì va pơnõq nhũ mai wỡq pãq Je-ru-sa-lem. Tũq nhũ ãn nao jơlàt, tũq jẽq trôh palơi Đa-mach, dơvruh dơvrah hũ gơchràq kaya sơdah mưng dlòc lơngĩq pơsàc wĩt dar nhũ; Nhũ lơvuh trỗt pãq hlùq sì hmỡq sa sãp đơp sì drơi: “Ơ Sau-lơ, Sau-lơ, hayơu anàq mãq pakỡuq kơu?” Sau-lơ tơnĩa: “Ơ Yàc, Pitrai la asơi?” Yàc đơp làiq: “Kơu la Je-su nữn anàq ãn mãq pakỡuq; Nữn iỡuq tơgùq dỡc vẽq, nao tơma dơlãp palơi, sì ròq hũ mơnuĩh pơto ga anàq vruãq iỡuq ngãq.” Dơgrữq mơnuĩh kung nao sigỡuq sì Sau-lơ dòq dỡc pãq đỡn ôh đơp tơviãq pơnuaĩq, kơyua pơnõq nhũ hũ hmỡq sãp đơp nữn ôh bôh mơnuĩh. Sau-lơ tơgùq dỡc mưng hlùq, nữn tũq pơh mơta tơviãq, nhũ ôh bôh hagĩq tơra. Kơyua yơu nữn, dơgrữq mơnuĩh nữn apãt tơngãn nhũ, va nhũ tơma dơlãp palơi Đa-mach. Dơlãp tlơu harơi, ung ôh iãq bôh, kung ôh bõc hẽla mơnhũm.
Tũq nữn, pãq palơi Đa-mach hũ sa aràc mơnuĩh mơgrũ dih angãn la A-na-nia. Yàc đơp sì nhũ dơlãp sa kaya pabôh: “Ơ A-na-nia!” Ung drơ làiq: “Talơvãt Yàc, hũ anàq nĩ.” Vloh đơp Yàc sì nhũ: “Iỡuq tơgùq dỡc nao trôh pãq jơlàt angãn la Tơpãq rĩng, duah dơlãp sàc Ju-đa sa aràc mơnuĩh angãn la Sau-lơ, palơi phuỗt pãq Tat-sơ. Iỡuq mưng, mơnuĩh nĩ ãn dòq iơu lakơu, sì dơlãp sa kaya pabôh, nhũ bôh sa aràc mơnuĩh angãn la A-na-nia nao tơmã chẽq tơngãn pãq dlòc rùp nhũ pioh nhũ hũ sơdah mơta wỡq.” Nữn A-na-nia drơ: “Talơvãt Yàc, anàq song hmỡq lũ mơnuĩh đơp mưng anàq mơnuĩh nĩ, song ngãq kaya iãh mơsãc thơu hadùp ga dơgrữq mơnuĩh gơnuar pơđar Pitrai pãq palơi Je-ru-sa-lem. Sì pãq nĩ, nhũ hũ dơgrữq mơnuĩh gơnuar pioh kaya duh talơvãt prong vrơi gơnuar pioh mãq akãq avih dơgrữq mơnuĩh iơu lakơu trôh angãn Pitrai.” Nữn Yàc đơp sì A-na-nia: “Nao vẽq, kơyua mơnuĩh nữn la sa kaya angui hũ, duỡt ruãh Kơu hũ pioh nao akhàt tơviãq angãn Kơu pãq anãq vual vơla lơniãu, kung yơu dơgrữq pitao sì anàq tơcho Is-ra-el; sì Kơu ròq vrơi ga nhũ thơu rùp phuỗt nhũ iỡuq ãt dleh dlàr lũ kor halơi kơyua mưng angãn Kơu.” Yơu nữn, A-na-nia nao sì tơma dơlãp sàc nữn. Chẽq tơngãn pãq dlòc Sau-lơ, đơp làiq: “Nĩ ơ sơai Sau-lơ, Yàc Je-su, la Pitao song pabôh tơviãq ga sơai tũq nao jơlàt, song pơđar hlãq mai trôh pioh sơai pơlih hũ iãq bôh wỡq sì hũ vãq sơrè Yàc Vơngãq Sơđah.” Tũq nữn mữ, hũ sa kaya hagĩq nữn drưh yơu tleh kơ-khãh lẽq mưng mơta Sau-lơ sì nhũ hũ sơdah mơta yơu halơu. Nhũ tơgùq dỡc sì ãt ngãq Bãp-tem; vloh nhũ bõc sì hũ prãn.
Nhũ dòq wỡq sigỡuq sì dơgrữq mơnuĩh mơgrũ pãq Đa-mach dơlãp hadùp harơi nữn. Tũq nữn mư nhũ akhàt vrơi pa-thơu mưng Yàc Je-su dơlãp dơgrữq sàc pơtõm, làiq Pitrai la anàq Yàc Pô Lơngĩq. Dơgrữq tãl aràc hmỡq nhũ nữn mãq ngãq krơi, đơp: “Ôh iỡuq nĩ la mơnuĩh song pa-lơhiãq dơgrữq mơnuĩh iơu lakơu angãn nĩ pãq Je-ru-sa-lem yơh? Kơyua kanõh gơtha nữn nhũ song mai trôh nĩ, pioh mãq pơnõq nhũ va wỡq ga dơgrữq mơnuĩh pioh kaya duh talơvãt prõng.” Nữn Sau-lơ miẽt pơtãl kaya prãn khãc, sì ngãq sawĩ sơwỡn ga dơgrữq mơnuĩh Ju-đa hadiuq pãq Đa-mach mưng kaya ngãq chưng gơnĩt làiq Je-su la Yàc Dõc Pơ-tlah.
Lũ harơi hadơi, mơnuĩh Ju-đa vơyai gỡuq duah pơnẽq pa-mơtai nhũ. Bôh làiq yơu nữn Sau-lơ song thơu kaya vơyai pơnẽq pơnõq nhũ hũ. Pơnõq nhũ iãq jàc sơvòq bãc palơi harơi sì mơlãp la pioh pa-mơtai Sau-lơ. Vloh tũq khrãh mơlãp, dơgrữq mơnuĩh mơgrũ padũng nhũ trỗt mưng gah jơnãng palơi, dơlãp sa voh jàq.
Tũq nao trôh Je-ru-sa-lem, Sau-lơ duah kaya ưng salơnuãq sigỡuq dơgrữq mơnuĩh mơgrũ, nữn avih dơgrữq tãl aràc pơnõq nhũ huaĩq ung, ôh pãc tui làiq nhũ la mơnuĩh mơgrũ. Yơu nữn la, Ba-na-ba va Sau-lơ nao trôh pãp dơgrữq mơnuĩh gơnuar pơđar, vloh akhàt tơviãq ga pơnõq nhũ thơu Sau-lơ song pãp Yàc pãq jơlàt yơu halơi, làiq Yàc song đơp sì nhũ, sì nhũ song chãc khĩn mãq angãn Yàc Je-su pơh sãp đơp pãq palơi Đa-mach yơu halơi. Mưng nữn, nhũ hũ nao sigỡuq sì pơnõq nhũ tũq pơnõq nhũ nao mai pãq Je-ru-sa-lem. Nhũ chãc khĩn akhàt pa-tơviãq angãn Yàc. Nhũ kung đơp dlài sì prơjai sì mơnuĩh Ju-đa đơp pơnuaĩq Gơ-rec; nữn pơnõq nữn miẽt duah pơnẽq pa-mơtai nhũ. Tũq dơgrữq adơi sơai thơu yơu nữn, pơnõq nhũ va ung trỗt pãq Se-sa-re sì va nhũ nao pãq Tat-sơ.
Yơu nữn, Sàc Pơjũm Sơđah vãq avih anĩh phũm Ju-đe, phũm Ga-li-le sì phũm Sa-ma-ri hũ kaya dadu lơngai sì vỡq padỡc; sì, gơnang mưng kaya yàp nao dơlãp jơlàt duh huaĩq Yàc sì dơlãp kaya paluơ padờp Yàc Vơngãq Sơđah hũ, sàc pơjũm sơđah hũ bluãq pơtãl lũ mơnuĩh. Dơlãp tũq nữn, Pier ãn nao vãq avih dơgrữq phũm, ung kung nao trôh rơwãc dơgrữq mơnuĩh sơchih dòq pãq palơi Li-đa. Pãq đỡn, ung pãp sa aràc mơnuĩh angãn la E-ne, đĩh piãm pãq dlòc chơnang dơlãp talơpãn thũt kơyua kađòc ruãq kao. Yơu nữn, Pier đơp sì nhũ: “Ơ E-ne, Yàc Dõc Pơ-tlah Je-su pasồq pakhơĩh ga sơai. Iỡuq tơgùq dỡc sì rơmiãq chơnang drơi vẽq.” Mư tũq nữn, nhũ tơgùq dỡc. Yơu nữn, dơgrữq asơi dòq hadiuq pãq Li-đa sì Sa-rôn song bôh sơai, nữn song gơlàiq mai wỡq pãq Yàc.
Pãq Jôp-be hũ sa aràc mơnuĩh mơgrũ angãn la Ta-bi-tha, pơnuaĩq gơtha la Đô-ka Mơnuĩh kamơi nĩ ngãq lũ dơgrữq vruãq siàp sì vruãq lơmuỡn siàp pioh dõc mơnuĩh rơbah. Dơlãp dơgrữq harơi nữn, nai lơvuh ruãq sì tlàq rài. Pa-manơi ia ga nai vloh, aràc chẽq nai dơlãp adũq pãq dlòc. Kơyua Li-đa dòq jẽq Jôp-be, yơu nữn tũq dơgrữq mơnuĩh mơgrũ hmỡq Pier ãn dòq pãq đỡn, pơnõq nhũ pơđar dua aràc nao trôh pãp ung aneh pơđar, lakơu: “Iỡuq mai trôh pãq anĩh pơnõq hlãq, juơi ngãq suơi.” Yơu nữn, Pier tơgùq dỡc nao sigỡuq sì pơnõq nhũ. Tũq trôh pãq anĩh, pơnõq nhũ va Pier đìq pãq adũq dlòc, avih dơgrữq mơnuĩh kamơi vlơu dòq dỡc jẽq ung sì sia, pơto ga ung iãq dơgrữq vlah ao lơniãu sigỡuq sì dơgrữq kaya ao charơpha tơmo nữn Đô-ka song pơsìq sigỡuq sì pơnõq nữn tũq nhũ dòq hadiuq. Pier pơđar avih tãl aràc tơviãq pãq lơniãu, vloh ung aguãl ta-ồq sì iơu lakơu. Hadơi nữn, weh pãq gah atơu mơtai, ung đơp: “Ơ Ta-bi-tha, iỡuq tơgùq vẽq.” Nai pơh mơta, sì tũq iãq bôh Pier, nai tơgùq dỡc. Pier mãq tơngãn wơh nai tơgùq dỡc; ung iơu avih mơnuĩh sơchih sì mơnuĩh kamơi vlơu tơma, vrơi ga pơnõq nhũ bôh nai ãn dòq hadiuq. Vãq avih palơi Jôp-be; nữn hũ thơu vruãq nĩ sì hũ lũ mơnuĩh pãc tui Yàc. Hadơi dơgrữq vruãq nữn, Pier dòq wỡq pãq Jôp-be lũ harơi sigỡuq sì sa aràc mơnuĩh rgơi ngãq kalìq angãn la Si-môn.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.