Vruãq 8

1Sau-lơ hũ sa hatai mưng vruãq pa-mơtai E-tien.

Kơyua nữn, dơlãp harơi nữn, hũ kaya juãq jơlì prong jơdrãq sì sàc pơjũm sơđah pãq Je-ru-sa-lem; avih tãl aràc mơnuĩh tui yàc nữn chơlah chơluỡn vãq dơgrữq phũm Ju-đe sì Sa-ma-ri, dòq mĩn dơgrữq mơnuĩh gơnuar pơđar. 2Dơgrữq mơnuĩh duh huaĩq va dor E-tien sì sia chõq ga ung lũ viãq. 3Nữn, Sau-lơ ngãq chơlah chơluỡn ga sàc Pơjũm Sơđah, ung nao tơmã dơgrữq sàc, mãq avih anàq lakơi gãm sì anàq kamơi, vloh va pơnõq nhũ krỡq tơmã sàc jam.

4Kơyua nữn, dơgrữq mơnuĩh pãc-tui yàc kađòc chơlah chơluỡn nao vãq dơgrữq anĩh akhàt vrơi pa-thơu mưng pơnuaĩq siàp. 5Phi-lip trỗt palơi Sa-ma-ri akhàt vrơi pa-thơu Yàc Dõc Pơ-tlah ga pơnõq nhũ. 6Vual vơla sa hatai hmỡq tơmã gơnĩt dơgrữq kaya hagĩq Phi-lip đơp, tũq hmỡq sì bôh dơgrữq krơi tơmo ung ngãq. 7Kơyua hũ dơgrữq kamlai priãu prõng sãp vloh tơviãq tlah mưng mơnuĩh ãt kamlai ãp. Lũ mơnuĩh kao sì jõh kao hũ pasồq pakhơĩh. 8Yơu nữn hũ kaya uỗt sơh prõng viãq pãq dơlãp palơi nữn.

9Nữn hũ sa aràc mơnuĩh lakơi angãn la Si-môn, hlơu thrơi rơđãp ngãq pajơu jũh proh dơlãp palơi sì ngãq ga vual vơla Sa-ma-ri kơtuãq kơblà, angãn krơi drơi la mơnuĩh mơ-àc mơyàc. 10Dơgrữq mơnuĩh Sa-ma-ri, mưng tìt trôh prõng hũ hmỡq gơnĩt ung nữn. Pơnõq nhũ đơp làiq: “Mơnuĩh nĩ la gơnuar chơnuãq Yàc Pô Lơngĩq hũ, angãn la Pitao Prõng Màc.” 11Pơnõq nhũ hmỡq tui ung kơyua sa lơwah suơi lơwìq ung song ngãq ga pơnõq nhũ mãq ngãq krơi mưng dơgrữq kaya pajơu jũh proh nhũ hũ. 12Nữn tũq pơnõq nhũ pãc Phi-lip akhàt vrơi pa-thơu pơnuaĩq siàp mưng lơgar Yàc Pô Lơngĩq sì angãn Yàc Dõc Pơ-tlah Je-su hũ, nữn avih mơnuĩh lakơi, mơnuĩh kamơi nữn kung ãt ngãq Bãp-tem. 13Vloh rùp phuỗt Si-môn kung pãc-tui, tũq song ãt Bãp-tem, ung miẽt gãm dòq sigỡuq sì Phi-lip. Tũq krung pahanh dơgrữq nỡm krơi tơmo sì dơgrữq vruãq gơnuar chơnuãq prõng tơviãq trôh, ung nữn mãq ngãq krơi viãq.

14Tũq nữn, tũq dơgrữq mơnuĩh gơnuar pơđar dòq pãq Je-ru-sa-lem iỡuq pãc vual vơla phũm Sa-ma-ri song tồq mãq pơnuaĩq Yàc Pô Lơngĩq hũ, pơnõq nhũ pơđar Pier sì Jãng nao trỗt pãq đỡn. 15Trôh anĩh vloh, dua aràc mơnuĩh gơnuar pơđar iơu lakơu ga pơnõq nhũ pioh hũ tồq mãq Yàc Vơngãq Sơđah. 16Kơyua Yàc Vơngãq Sơđah ka-ôh pa-trỗt pãq dlòc sa aràc asơi dơlãp tơpuôl nhũ, kơyua pơnõq nhũ hũ tồq mãq mĩn nữn soh ngãq adãt Bãp-tem dơlãp angãn Yàc Je-su nữn. 17Yơu nữn, Pier sì Jãng chẽq tơngãn pãq dlòc pơnõq nhũ, nữn pơnõq nhũ tồq mãq Yàc Vơngãq Sơđah. 18Tũq Si-môn bôh Vơngãq Sơđah hũ vrơi mưng kaya chẽq tơngãn dơgrữq gơnuar pơđar hũ, nữn ung vrơi jĩn ga pơnõq nhũ. 19Ung đơp: “Lakơu kung vrơi ga hlãq gơnuar chơnuãq nĩ pioh ga mơnuĩh halơi tơngãn hlãq chẽq pãq dlòc nữn kung pơlih hũ tồq mãq Yàc Vơngãq Sơđah.” 20Nữn Pier drơ pơnuaĩq si-môn làiq: “Jĩn priãq ung hũ kung ròq kađòc lơhiãq thĩt sigỡuq sì ung, kơyua ung sơnơng pơlih angui jĩn vlơi hũ kaya anĩt Yàc Pô Lơngĩq hũ. 21Ung ôh hũ sa vơnah hẽla pa-mơpha hagĩq dơlãp vruãq nĩ, kơyua hatai ung ôh tơpãq dãng di anãq Yàc Pô Lơngĩq. 22Yơu nữn, iỡuq mơvai tlàq dlàiq kaya mơsãc nĩ ung hũ sì iơu lakơu akhàt viãq sì Yàc, thơu yơh Pitrai ròq tơleh dlàiq ga kaya sơnơng samỡng ngãq dơlãp hatai ung. 23Kơyua hlãq bôh ung ãn dòq dơlãp ia phìq sì dơlãp talơi prĩq dlàiq dơnũh.” 24Mữ hadơi nữn, Si-môn drơ: “Lakơu ung iơu lakơu sì Yàc ala ga hlãq, pioh ôh sa kaya halơi nữn ung song đơp tơviãq trôh ga hlãq.”

25Tũq song ngãq chưng sì pơto akhàt pơnuaĩq Yàc hũ vloh, pơnõq nhũ gơlàiq mai pãq Je-ru-sa-lem, akhàt vrơi pa-thơu Pơnuaĩq Siàp ga lũ palơi tìt mơnuĩh Sa-ma-ri hũ.

26Tũq nữn, hũ sa aràc mơnuĩh gơnrơh Yàc hũ đơp sì Phi-lip làiq: “Iỡuq tơgùq dỡc nao mưng gah prìq trôh pãq jơlàt mưng Je-ru-sa-lem trỗt nao trôh Ga-sa.” (Jơlàt nĩ dòq dơlãp blàc choah.) 27Yơu nữn, ung tơgùq dỡc sì nao. Dih, hũ sa aràc mơnuĩh mưng E-thi-ô-bi, sa aràc pô pơluai hũ gơnuar prãn duh vruãq Kan-đac, pitao kamơi E-thi-ô-bi. Ung la mơnuĩh apãt akõq avih dơgrữq adũq pioh mòq hũ. Ung song nao trôh Je-ru-sa-lem pioh duh talơvãt. 28Ung ãn nao jơlàt mai wỡq, dòq guh pãq dlòc rơdeh ơseh drơi hũ sì pơ-poh sơrãq gơnuar hwơr E-sai. 29Yàc vơngãq Sơđah đơp sì Phi-lip: “Iỡuq nao trôh jẽq sì nao tui jẽq rơdeh nữn.” 30Yơu nữn, Phi-lip đuaĩq trôh, hmỡq ung ãn pơ-poh sơrãq gơnuar hwơr E-sai nữn tơnĩa: “Viãq Pitrai hũ pãc jỡc mĩn pơnuaĩq nữn drơi ãn pơ-poh nữn lơĩh?” 31Ung nữn drơ: “Ngãq hayơu nữn hlãq pãc jỡc, Mơyah làiq ôh hũ asơi nữn pơto ga hlãq?” Yơu nữn, ung iơu jàq Phi-lip đìq rơdeh dòq guh sigỡuq sì drơi. 32Katih Sơrãq Sơđah nữn mơnuĩh E-thi-ô-bi ãn pơ-poh la yơu nĩ:

“Mơnuĩh kađòc va nao yơu avo kađòc va trôh pãq anĩh agòq ngãq rơlo,

sì yơu avo anàq dòq kađữc rĩc pãq anãq mơnuĩh kuah vlơu,

Mơnuĩh ôh pơh mơvah drơi.

33Nhũ ãt kaya siẽq siẽl, pơnuaĩq tơpãq kađòc tlẽq sơwah mưng Nhũ.

Dơlãp dơgrữq mơnuĩh dòq sì Nhũ, asơi ròq iãq pơwih jỡc làiq,

kơyua hayơu kaya hadiuq Nhũ song kađòc mãq tlah mưng voh hlùq.”

34Yơu nữn, pô pơluai tơnĩa Phi-lip: “Lakơu ung vrơi ga hlãq thơu mơnuĩh gơnuar hwơr nĩ ãn đơp mưng asơi? Mưng rùp phàp drơi hẽla mưng sa aràc tơmo?” 35Yơu nữn la, Phi-lip pơh mơvah, pơdòq mưng vơnah Sơrãq Sơđah nĩ, ung akhàt vrơi pa-thơu Pơnuaĩq Siàp mưng Yàc Je-su ga mơnuĩh pô pơluai nữn. 36Ãn tũq nao pãq jơlàt, pơnõq nhũ pãp anĩh hũ ia, yơu nữn pô pơluai tơnĩa: “Nĩ, pãq đì hũ ia. Hũ kaya hagĩq pakỡuq hlãq ãt bãp-tem yơh?” 37Phi-lip drơ pơnuaĩq: “Mơyah làiq ung avih hatai pãc-tui nữn ung hũ adãt.” Mơnuĩh E-thi-ô-bi drơ: “Hlãq pãc-tui làiq Yàc Dõc Pơ-tlah Je-su la Anàq Yàc Pô Lơngĩq.” 38Yơu nữn, mơnuĩh E-thi-ô-bi vrơi gơnuar padơh wỡq rơdeh ơseh. Pơnõq nhũ trỗt pãq ala ia, gãm Phi-lip sì pô pơluai, vloh Phi-lip ngãq bãp-tem ga ung. 39Tũq pơnõq nhũ tơgùq mưng ia vloh, Vơngãq Sơđah Yàc hũ va Phi-lip nao, pô pơluai ôh dòq iãq bôh ung tơra, nữn miẽt uỗt sơh nữn miẽt nao jơlàt drơi. 40Dòq Phi-lip nữn bôh pãq A-sô-tôt. Ung nao vãq dơgrữq phũm nữn, pơto akhàt Pơnuaĩq Siàp vrơi ga avih dơgrữq palơi tãl trôh tũq ung nao trôh Se-sa-re.