1 Ti-mô-the 4:12

1Vơngãq Sơđah akhàt nĩq nũn làiq dơlãp tũq rài hadơi nĩ, lũ mơnuĩh ròq tlàq luơi voh tui, hmỡq tui dơgrữq vơngãq vlữq lor sì pơnuaĩq pơto akhàt kamlai hũ, 2kơyua mưng kaya tui pơnuaĩq vlữq tơpuôl vlữq lor hũ, tũc hatai tơpuôl nữn ròq kađòc gơvãl dĩl, 3tũq nữn mãq pakỡuq vruãq hẽ pa-khiãng sì ưng kamơi lakơi, ãt pơkal dơgrữq kaya bõc nữn Yàc Pô Lơngĩq pajỡc tơviãq pioh mơnuĩh chàc gơnang sì thơu pãc pơnuaĩq tơpãq tồq mãq mưng hatai thơu ỡn ngai. 4Kơyua dơgrữq kaya mưng Yàc Pô Lơngĩq pajỡc tơviãq la kaya siàp lơgeh, sì ôh hũ kaya hagĩq đang sì prah luơi tũq hũ tồq mãq mưng hatai thơu ỡn ngai, 5kơyua kaya bõc hũ ngãq sơchih gơnang mưng pơnuaĩq Yàc Pô Lơngĩq sì pơnuaĩq iơu lakơu.

6Tũq chẽq pioh dơgrữq kaya nữn di anãq pơnõq adơi sơai, nữn anàq ròq la mơnuĩh halỗt mơnãq tơpãq siàp Yàc Dõc Pơ-tlah Je-su hũ, hũ ròc chiẽp mưng pơnuaĩq voh tui hũ sì kơyua mưng kaya pơto pơđar tơpãq siàp nữn anàq song ngãq tui. 7Nữn iỡuq kơmlah luơi dơgrữq vruãq dun kơyua nữn dơgrữq tơpuôl mòq tơhã hũ. Nữn prah luơi vẽq. Iỡuq sơrãm mơgrũ rơmiãq rùp phuỗt drơi dơlãp kaya duh huaĩq, 8kơyua “kaya mơgrũ rơmiãq rùp phàp drơi nữn hũ kuơ dơlãp sa asĩt tũq, nữn sơrãm mơgrũ rơmriãq hatai duh huaĩq nữn hũ kuơ ga dơgrữq vruãq, kơyua hũ pơnuaĩq grưh ga rài nĩ sì rài hadơi.” 9Pơnuaĩq nữn la đang mang sì pãc-tui sì đang mang tồq mãq wil tãl, 10mưng pơnõq drơi dleh dlàr sì mơsôh mơvlah kơyua ga vruãq nĩ, kơyua pơnõq drơi chẽq pioh kaya chơkhãq chàc dơlãp Yàc Pô Lơngĩq gãm dòq hadiuq, Pitrai la Yàc Dõc ga dơgrữq mơnuĩh hũ, hlơu viãq la anàq tơcho mơnuĩh pãc-tui Yàc.

11Iỡuq pơto akhàt sì pơto pơđar dơgrữq pơnuaĩq nữn. 12Juơi luơi ga mơnuĩh halơi nữn iãq ôh srãp kơyua anàq lơđeh thũt, nữn iỡuq ngãq krơh ga dơgrữq mơnuĩh pãc-tui, dơlãp pơnuaĩq đơp, dơlãp kaya ngãq nao, dơlãp kaya khiãng duman, dơlãp voh tui, sì dơlãp kaya sơđah sơchih. 13Iỡuq tơriãc ahmãc vẽq pơpoh sơrãq, pơto pa-sơdor, sì pơto pơđar tãl trôh tũq kơu trôh. 14Juơi wơr-vĩq kaya anĩt dòq dơlãp anàq, la kaya anĩt song hũ vrơi ga anàq mưng pơnuaĩq gơnuar hwơr, sigỡuq sì kaya chẽq tơngãn dơgrữq mơnuĩh pô tơhã hũ.

15Iỡuq sơrãm mơgrũ thơu dơgrữq kaya nữn, iỡuq iãq mững gơnĩt dơlãp nhũ, pioh kaya anũh tơgùq anàq hũ tơviãq jỡc nĩq nũn pơweh sì dơgrữq mơnuĩh. 16Iỡuq gơrhia iãq trôh rùp phuỗt anàq sigỡuq sì vruãq pơto pơđar. Iỡuq gơjãp kađữc dơlãp dơgrữq vruãq nữn, kơyua ngãq yơu nữn anàq ròq dõc suãq rùp phuỗt drơi gãm sì dơgrữq mơnuĩh hmỡq anàq.