Roglai Bible Literal Text
1 Ti-mô-the 3
Pơnuaĩq nĩ la đang mang chàc gơnang: “Mơyah làiq mơnuĩh hlơi nữn chơkhãq khiãng ngãq mơnuĩh dlãc tơpuôl, nữn mơnuĩh nữn chơkhãq khiãng sa vruãq prõng màc viãq.” Yơu nữn, mơnuĩh dlãc tơpuôl iỡuq la mơnuĩh ôh hũ kaya gơrloh pơkhè jỡc, vơsàc sa aràc sơdiuq hũ, iẽt amiẽt, thơu gơrhia rùp, ngãq khuẽn, thơu tồq ròq thuãi, hũ kaya jãc krơi pơto pơđar, ôh mơvũq alãc, ôh brưh mơsãc, nữn iỡuq lơnguh siàp, ngãq salơvãq, ôh ham jĩn priãq, iỡuq thơu apãt akõq siàp sàc anĩh drơi, hũ anàq tơcho pãc sãp duh huaĩq sigỡuq sì avih tũc hatai ki ngãm (kơyua mơyah làiq sa aràc mơnuĩh ôh thơu pơnẽq apãt akõq sàc anĩh drơi, mơnuĩh nữn ngãq hayơu ròq iãq chơ Sàc Pơjũm Sơđah Yàc Pô Lơngĩq hũ?), ôh tũq halơi la mơnuĩh vơhrơu tui yàc, huaĩq kơyua nhũ pa-dlòc rùp yeh drơi nữn mơnuĩh nữn ròq kađòc tơma dơlãp kaya ngãq dlàiq yơu kamlai satan. Pa-vlữq wỡq, mơnuĩh dlãc tơpuôl kung iỡuq hũ pơnuaĩq ngãq chưng siàp mưng mơnuĩh lơniãu Sàc Pơjũm Sơđah, pioh mơnuĩh nữn ôh lẽq tơma dơlãp kaya siẽq siẽl sì kaya vơnrẽq kamlai hũ.
Kung yơu nữn, dơgrữq mơnuĩh dõc gar iỡuq gơjãp gơnĩt, ôh đơp dua pơnuaĩq, ôh mơvũq alãc, ôh ham guãm, rơmiãq jàc kaya dơlãp dađỡuq voh tui hũ mưng tũc hatai sơđah sơchih. Vơnãh tơmo, pơnõq nhũ kung iỡuq hũ kaya lòc iãq halơu, vloh hadơi nữn iỡuq pioh luơi ga nhũ duh vruãq dơlãp tũq ôh ngãq kaya halơi sỗq suẽl.
Dơgrữq mơnuĩh sơdiuq kung yơu nữn, iỡuq gơjãp gơnĩt, ôh đơp iãh, iẽt amiẽt, tui tơpãq dơlãp dơgrữq kaya.
Dơgrữq mơnuĩh dõc gar iỡuq la sa aràc vơsàc hũ mĩn sa aràc sơdiuq, thơu apãt akõq siàp anàq tơcho sì avih sàc anĩh drơi. Kơyua dơgrữq mơnuĩh duh vruãq tơpãq siàp nữn va ga drơi dòq pãq anĩh dloòng mơkrờ mơ-àc siàp, sì lũ kaya prãn khàc dơlãp voh tui dơlãp Yàc Dõc Pơ-tlah Je-su.
Kơu wãq dơgrữq pơnuaĩq nĩ ga anàq, chơkhãq khiãng ưng sơmar nao trôh tồq rơwãc anàq, nữn mơyah làiq kơu suơi trôh, nữn anàq pơlih thơu iỡuq ngãq pơwih yơu halơi dơlãp sàc Yàc Pô Lơngĩq hũ, nữn la Sàc Pơjũm Sơđah Yàc Pô Lơngĩq hũ gãm hadiuq, la jơmững sì gữc la gơnãq pơnuaĩq tơpãq hũ. Kaya dơlãp dơđỡuq mưng kaya tui tơpãq viãq la dloòng dlòc rlao avih ôh tũq hlơi vơyai đơp trôh, la:
“Pitao hũ pabôh tơviãq dơlãp rơlo rùp,
hũ angãn tơpãq dãng dơlãp Vơngãq Sơđah,
hũ iãq bôh kơyua mưng mơnuĩh gơnrơh,
hũ akhàt vrơi thơu di khrãh dơgrữq vual vơla,
hũ chàc gơnang pãq dlòc dun kơyua,
hũ va tơgùq dơlãp kaya gơhluh.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.