1 Ti-mô-the 2

1Yơu nữn, hlơu avih, kơu ưng pachôh pasũl dơgrữq pơnuaĩq rãn lakơu, iơu lakơu, iơu lakơu ala, sì padỡc pơnuaĩq ỡn ngai ga dơgrữq mơnuĩh, 2vrơi ga dơgrữq pitao sì avih dơgrữq mơnuĩh halơi ãn dòq dơlãp anĩh gơnuar prãn, pioh pơnõq drơi pơlih hadiuq sa rài dadu lơngai sì kađữc lơngai sigỡuq sì dơgrữq kaya tui gơnĩt sì tơpãq siàp dơgrữq kaya. 3Nữn la sa kaya siàp mơkrờ sì iỡuq viãq di anãq Yàc Pô Lơngĩq, Yàc Dõc pơnõq drơi, 4la Pitao ưng dơgrữq tãl aràc hũ dõc pơ-tlah sì nao trôh pãq anĩh kơnãl thơu pơnuaĩq tơpãq. 5Kơyua mĩn hũ sa Yàc Pô Lơngĩq sì sa Pitao khrãh lơwah dòq di khrãh Yàc Pô Lơngĩq sì pơjẽh anàq mơnuĩh — nữn la Yàc Dõc Pơ-tlah Je-su, sa aràc anàq mơnuĩh, 6Pitao song tlàq rùp phàp drơi ngãq dơvuh ga dơgrữq tãl aràc, yơu pơnuaĩq ngãq chưng akhàt tơviãq iỡuq dơlãp tũq lơwah, 7kơyua mưng pơnuaĩq ngãq chưng nữn sì kơu song hũ padỡc ngãq mơnuĩh pơto akhàt pơnuaĩq siàp sì mơnuĩh gơnuar pơđar — Kơu đơp viãq dơlãp Yàc Dõc Pơ-tlah, kơu ôh đơp lor — nữn la iỡuq ngãq mơnuĩh pô jãc rgơi ga dơgrữq vual vơla lơniãu mưng voh tui sì pơnuaĩq tơpãq.

8Kơyua yơu nữn, kơu ưng dơgrữq tơpuôl ung dòq dơgrữq anĩh iỡuq iơu lakơu, yơr tơngãn sơđah sơchih tơgùq nữn juơi va kaya ơnõc mơvai hẽla mơvlah gơrlah pơnuaĩq, 9Kung yơu nữn, dơgrữq adơi sơai kamơi iỡuq ngãq mơkrờ ga rùp phuỗt drơi dơlãp kaya angui chồq tơpãq siàp, gãm sì kaya pa-ơnẽh rùp duh huaĩq sì thơu gơrhia rùp, ôh iỡuq mưng vruãq pơpãq pơkhrà bồq, sigỡuq sì vuh mữh gơsuan, hẽla chồq ao charơpha kuơ màc, 10nữn mưng dơgrữq kaya iỡuq sì mơta pơkhrà mơnuĩh kamơi akhàt tơviãq hatai duh huaĩq di Yàc mưng vruãq ngãq siàp.

11Mơnuĩh kamơi iỡuq mơgrũ đõm dơlãp sa vĩq suà lìt dơlãp kaya vruãq ngãq nao duh huaĩq wil tãl. 12Pơweh sì mơnuĩh kamơi, kơu ôh vrơi gơnuar pơto pơđar hẽla apãt akõq pãq dlòc mơnuĩh lakơi, nữn iỡuq dòq suà lìt. 13Kơyua A-đam song hũ chrơng pajỡc halơu, vloh nữn trôh E-va, 14sì A-đam ôh kađòc pa-gơla, nữn mơnuĩh kamơi, nữn kađòc pa-gơla, ròq nao trôh anĩh sỗq dlàiq. 15Bôh làiq yơu nữn, mơnuĩh kamơi ròq hũ dõc pơ-tlah mưng vruãq pajỡc anàq, mơyah làiq pơnõq nhũ miẽt dòq dơlãp voh tui, kaya khiãng duman sì kaya ngãq sơđah sơchih, gãm sì dlò sơnơng sơdah.