Skip to content
BibleKenya

Roglai Bible Literal Text

1 Pier 2:9

Verse 9 is marked below, with the whole chapter around it. Read from the start

Yơu nữn, iỡuq tlàq vẽq dơgrữq kaya iãh mơsãc, dơgrữq kaya vlữq lor sì kaya pơnuaĩq đơp vruãq ngãq lor, kaya lơmùq mơvai sigỡuq sì dơgrữq kaya đơp vlơi gỡuq, nữn ngãq yơu anàq lơđeh tìt, mơhao ia tasơu gah suàt vơngãq sơđah sơchih, pioh gơnang mưng nữn pơnõq adơi sơai pơlih hũ prãn tơgùq dơlãp kaya dõc pơ-tlah, mơyah làiq pơnõq adơi sơai song tơwơr thơu làiq Yàc la lơmuỡn siàp, iỡuq trôh jẽq sì Pitrai la voh patơu hadiuq, song kađòc aràc pa-trơh luơi, nữn vloh la kaya duỡt ruãh kuơ màc pãq anãq Yàc Pô Lơngĩq, kơyua rùp phuỗt pơnõq adơi sơai, drưh yơu dơgrữq voh patơu hadiuq, ãn padỡc tơgùq jỡc voh sàc gah suàt vơngãq, pioh ga vruãq mơnuĩh gơnuar pioh kaya duh talơvãt sơđah tồq padỡc kaya duh talơvãt ga suàt vơngãq siàp hatai Yàc Pô Lơngĩq mưng Yàc Dõc Pơ-tlah Je-su. Yơu nữn, pơnuaĩq nĩ kung wãq dơlãp Sơrãq Sơđah yơu nĩ:

“Dĩh, Kơu chẽq pãq Si-ôn sa voh patơu akiãc,

hũ duỡt ruãh, sì kuơ màc viãq.

Sì mơnuĩh halơi pãc-tui dơlãp Pitrai ròq ôh kađòc mơlơu ơlah.”

Yơu nữn, kaya mơ-àc mơyàc nữn la pioh ga dơgrữq pơnõq adơi sơai la dơgrữq mơnuĩh song pãc-tui. Dòq pơweh sì dơgrữq mơnuĩh ôh pãc-tui:

“Voh patơu nữn dơgrữq mơnuĩh vỡq padỡc pa-trơh luơi,

voh patơu nữn song tơviãq jỡc patơu akiãc sàc”

sì la

“Voh patơu ngãq sơnẽq tơkai, sì patơu ngãq ga lơvuh lẽq.”

Pơnõq nhũ sơnẽq lơvuh kơyua ôh ngãq tui pơnuaĩq Yàc, nữn la kung mưng vruãq nĩ pơnõq nhũ hũ ngãq gơnĩt lơĩh ga pơnõq nhũ. Nữn pơnõq adơi sơai la vual vơla hũ duỡt ruãh, la tơpuôl padỡc kaya duh talơvãt pitao hũ, la vual vơla sơđah, sa vual vơla pơweh sì Yàc Pô Lơngĩq angui, pioh pơnõq adơi sơai ràc akhàt dơgrữq vruãq chrih krơi Pitao hũ song iơu pơnõq adơi sơai tơviãq tlah mưng kaya sồp kơnãm tơma dơlãp kaya sơdah krơi tơmo Pitrai hũ, nữn hlơu dih pơnõq adơi sơai “ôh iỡuq la sa tơpuôl vual vơla”, nữn tũq nĩ pơnõq adơi sơai la “vual vơla Yàc Pô Lơngĩq hũ”; hlơu dih pơnõq adơi sơai ôh hũ tồq mãq kaya anĩt duman, nữn tũq nĩ pơnõq adơi sơai “song hũ anĩt duman”.

Ơ pơnõq adơi sơai anĩt duman, hlãq lakơu iơu jàq pơnõq adơi sơai, yơu dơgrữq vual vơla lơniãu sì mơnuĩh thuãi nao jơlàt, iỡuq pleh atah dơgrữq kaya ham khiãng gah rơlo rùp, la dơgrữq kaya mơvlah mơsôh jơdrãq sì vơngãq yuà pơnõq adơi sơai, dơlãp tũq rơmiãq jàc kaya bõc dòq pơnõq adơi sơai hũ pioh ga tơpãq siàp di khrãh dơgrữq mơnuĩh gah lơniãu, tồq vloh, dơlãp kaya halơi pơnõq nhũ đơp sàq mưng pơnõq adơi sơai yơu dơgrữq mơnuĩh ngãq mơsãc, nữn kơyua mưng pơnõq nhũ iãq bôh dơgrữq vruãq siàp pơnõq adơi sơai, pơnõq nhũ pơlih sơ-uỗt mơyòp Yàc Pô Lơngĩq dơlãp harơi Pitrai trôh.

Kơyua mưng Yàc, nữn duh huaĩq dơgrữq gơnuar chơnuãq anàq mơnuĩh, pơlih nữn la pitao yơu mơnuĩh apãt akõq prõng, sì gãm dơgrữq mơnuĩh pô apãt akõq, yơu dơgrữq mơnuĩh nữn pitao pơđar vơsai pioh va kaya ngãq dlàiq mơnuĩh ngãq mơsãc sì alĩn vrơi ga mơnuĩh ngãq siàp. Kơyua nĩ la hatai ưng Yàc Pô Lơngĩq hũ: ngãq vruãq siàp pioh ga dơgrữq mơnuĩh đơp dlài gơla pơtòq siẽuq kaya pãc thơu nữn kađòc mơvah, dơlãp kaya ngãq nao yơu dơgrữq mơnuĩh lơnang lơnai, sì ôh angui kaya lơnang lơnai drơi hũ nữn ngãq pơcha dơr-niẽng vơvãc kaya iãh mơsãc drơi, nữn iỡuq ngãq mơnuĩh halỗt mơnãq Yàc Pô Lơngĩq hũ. Iỡuq ki ngãm dơgrữq mơnuĩh. Iỡuq khiãng duman pơnõq adơi sơai drơi. Iỡuq duh huaĩq Yàc Pô Lơngĩq. Iỡuq ki ngãm Pitao.

Ơ dơgrữq mơnuĩh halỗt mơnãq, iỡuq duh huaĩq mơnuĩh pô drơi gãm sì avih hatai ki ngãm, ôh iỡuq mĩn duh huaĩq mơnuĩh pô siàp sì lơnguh siàp, nữn dòq duh huaĩq gãm mơnuĩh pô sơnãc mơsãc wỡq. Kơyua mơnuĩh halơi ãt ỡl kaya pơđìq pơđua dơlãp tũq pãp dơgrữq kaya ôh tơpãq kơyua mưng tũc hatai kơnãl thơu Yàc Pô Lơngĩq, nữn la sa kaya lơngai. Hũ tiẽng dơnai gĩq mơyah làiq pơnõq adơi sơai sỗq dlàiq vloh iỡuq ãt ỡl kađòc poh atòc? Nữn mơyah làiq pơnõq adơi sơai ngãq siàp nữn vloh ãt dleh dlàr dơlãp tũq kađòc ngãq dlàiq, nữn la sa kaya lơngai pãq anãq Yàc Pô Lơngĩq. Kơyua pơnõq adơi sơai song hũ iơu jàq trôh ga kaya nữn, kơyua Yàc Dõc Pơ-tlah kung song ãt dleh dlàr ala ga pơnõq adơi sơai, pioh wỡq krơh ga pơnõq adơi sơai tồq ga pơnõq adơi sơai pơlih yàp tui Pitrai,

“Pitrai ôh sỗq dlàiq,

kung ôh hũ pơnuaĩq vlữq lor halơi đơp tơviãq mưng mơvah Pitrai”;

la Pitao dơlãp tũq kađòc sơtãp rơmãh, nữn Pitrai ôh sơtãp rơmãh wỡq; tũq ãt kaya dleh dlàr, Pitrai ôh pơhi pơhuaĩq, nữn Pitrai tlàq rùp drơi ga Pitao chahrơna tơpãq rĩng; rùp phuỗt Pitrai song gui ơnòng dlàiq dơnũh pơnõq drơi dơlãp rùp phàp Pitrai pãq dlòc kayơu pỡc, pioh hadơi sì tũq song mơtai mưng dlàiq dơnũh, pơnõq drơi pơlih hadiuq ga kaya tơpãq rĩng, gơnang mưng kaya halôh dơgrẽh Pitrai hũ nữn pơnõq adơi sơai song hũ pasồq pakhơĩh. Kơyua pơnõq adơi sơai yơu anàq avo nao sỗq, nữn tũq nĩ pơnõq adơi song jỡc mai wỡq sì Pitao dlãc-va drơi sì Pitao iãq jàc suàt vơngãq drơi.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.