1 Pier 3

1Pa-thơu dơgrữq adơi sơai kamơi la mơnuĩh ngãq sơdiuq, kung yơu nữn, iỡuq duh huaĩq vơsàc drơi, tồq vloh mơyah làiq sa mơnuĩh vơsàc halơi ôh duh huaĩq pơnuaĩq yàc, nữn gơnang mưng kaya bõc dòq mơnuĩh sơdiuq bôh làiq ôh angui mưng pơnuaĩq đơp, nữn dơgrữq mơnuĩh vơsàc nữn kung ròq pơto padờp, 2hadơi sì tũq iãq bôh kaya ngãq nao bõc dòq sơđah sơchih sigỡuq sì hatai ki ngãm dơgrữq adơi sơai kamơi hũ, 3nữn kaya pơkhrà rùp dơgrữq adơi sơai kamơi hũ ôh iỡuq dòq mưng gah lơniãu yơu pơpãq bồq sì vuh kaya mữh kơsoan, hẽla chồq ao charơpha mơkrờ rùp, 4nữn la mưng tũc hatai anàq mơnuĩh gah dơlãp, mưng kaya siàp mơkrờ dòq gãm dơlãp vơngãq hatai lơnguh siàp sì suà lìt, kaya nữn la kuơ màc di anãq Yàc Pô Lơngĩq. 5Kơyua dơgrữq mơnuĩh kamơi sơđah rài sơđãq, la dơgrữq mơnuĩh gơnang mưng kaya chơkhãq chàc dơlãp Yàc Pô Lơngĩq, kung song pơkhrà ga rùp phàp drơi yơu nữn dơlãp tũq duh huaĩq vơsàc drơi, 6yơu Sa-ra song duh huaĩq A-bra-ham dơlãp tũq iơu ung la Yàc, dơgrữq adơi sơai kamơi tũq nĩ la tơviãq jỡc anàq tơcho Sa-ra tũq ngãq kaya siàp sì ôh kơđa huaĩq avih dơgrữq kaya tơtơh huaĩq halơi.

7Pa-thơu dơgrữq adơi sơai la mơnuĩh vơsàc, kung yơu nữn, mưng kaya pãc thơu, nữn iỡuq dòq hadiuq sigỡuq sì sơdiuq drơi la pơjẽh lơduh lơmuỡn, patui nữn kung pa-mơpha sigỡuq kaya ki ngãm yơu mơnuĩh kung hũ tồq mãq kaya anĩt kaya hadiuq hũ sigỡuq sì drơi, tồq pioh ga kaya iơu lakơu adơi sơai hũ ôh kađòc mãq pakỡuq.

8Luôĩq hadơi, avih tãl aràc iỡuq hũ sa hatai sigỡuq, hũ hatai anĩt duman, khiãng anĩt duman gỡuq yơu adơi sơai, hatai lơmuỡn siàp, sì kaya pơviar rùp, 9juơi mãq kaya mơsãc vơyar ga kaya mơsãc, hẽla pơnuaĩq đơp sơvĩl hẽ wỡq ga mơnuĩh đơp sơvĩl drơi, nữn pa-vlữq wỡq, mĩn vrơi lơngai siàp, kơyua pơnõq adơi sơai song hũ iơu jàq hadiuq yơu nữn, nữn la kaya pioh pơnõq adơi sơai hũ tồq mãq kaya lơngai siàp. 10Kơyua,

“Asơi ưng khiãng duman kaya hadiuq sì bôh harơi vlàt siàp lơgeh drơi iỡuq rơmiãq jàc dơlãh drơi tlah mưng kaya mơsãc, sì mơvah chơbuai drơi ôh đơp pơnuaĩq vlữq lor.

11Mơnuĩh nữn iỡuq tlàq luơi kaya mơsãc drơi sì iỡuq ngãq kaya siàp.

Mơnuĩh nữn iỡuq duah pơnẽq lakơu kaya dadu lơngai sì tui pagui nhũ, 12kơyua

mơta Yàc iãq bôh mơnuĩh tơpãq dãng sì tanĩa Pitrai pa-hmỡq pơnuaĩq iơu lakơu pơnõq nhũ hũ,

nữn bòq mơta Yàc jơdrãq wỡq sì mơnuĩh ngãq mơsãc.”

13Asơi la mơnuĩh ròq ngãq iãh pơnõq adơi sơai mơyah làiq pơnõq adơi sơai tơviãq jỡc dơgrữq mơnuĩh tluỡiq gơhuar mưng kaya ngãq siàp? 14Nữn, bôh làiq pơnõq adơi sơai vloh iỡuq ãt dleh dlàr kơyua mưng kaya tơpãq dãng, nữn pơnõq adơi sơai viãq la hũ lơngai. Vơnãh tơmo, juơi kađòc tơtơh huaĩq tui yơu kaya pơhi pơhuaĩq pơnõq nhũ hũ, kung juơi kađòc sawĩ sơwỡn, 15nữn iỡuq sơ-uỗt mơyòp Yàc Dõc Pơ-tlah, la Yàc dơlãp hatai drơi, gãm gãm rơchãc lơĩh pioh drơ pơnuaĩq ga dơgrữq mơnuĩh halơi blah đơp sì pơnõq adơi sơai mưng kaya kanõh gơtha ga kaya chơkhãq chàc dơlãp pơnõq adơi sơai, 16nữn gãm sì hatai lơnguh siàp sì ki ngãm, kơyua hũ tũc hatai siàp, pioh dơlãp kaya halơi nữn pơnõq adơi sơai kađòc yãq dlàiq, nữn dơgrữq mơnuĩh siẽq siẽl rài hadiuq ngãq siàp pơnõq adơi sơai hũ dơlãp Yàc Dõc Pơ-tlah iỡuq mơlơu ơlah. 17Kơyua mơyah làiq hatai Yàc Pô Lơngĩq ưng, nữn pơnõq adơi sơai vloh iỡuq ãt dleh dlàr mưng kaya ngãq siàp, rlao sì mưng kaya ngãq mơsãc. 18Kơyua Yàc Dõc Pơ-tlah kung song ãt kaya dleh dlàr kơyua mưng dlàiq dơnũh — Pitrai la Pitao tơpãq dãng ãt mơtai ala ga mơnuĩh ôh tơpãq — tồq Pitrai pơlih va pơnõq drơi trôh pa Yàc Pô Lơngĩq, dơlãp tũq kađòc mơtai mưng vơnah rơlo rùp nữn hũ ngãq ga hadiuq wỡq vơnah suàt vơngãq, 19dơlãp suàt vơngãq nữn, Pitrai kung song pơto akhàt ga dơgrữq vơngãq yuà dơlãp anĩh krỡq jam, 20la dơgrữq mơnuĩh halơu thrơi ôh duh huaĩq dơlãp tũq kaya ãt ỡl Yàc Pô Lơngĩq hũ miẽt gãm dòq chàc dơlãp rài Nô-e, ãn sì tũq ahòq ia pỡc vloh, nữn dơlãp ahòq ia nữn, hũ mĩn hadùp aràc — nữn la talơpãn vơngãq yuà — song hũ dõc pơ-tlah mưng ia blũc prõng, 21nữn nĩ kung la kaya đơp pa-mơyơu tũq nĩ dõc pơ-tlah pơnõq adơi sơai, nữn la adãt bãp-tem — ôh iỡuq vruãq tapơh havơu hlùq mưng rùp phàp drơi, nữn la kaya ngãq gơnĩt hũ mưng tũc hatai ngãq siàp pioh ga Yàc Pô Lơngĩq — gơnang mưng kaya hadiuq wỡq Yàc Dõc Pơ-tlah Je-su hũ, 22la Pitao, hadơi sì tũq đìq tơgùq pãq dlòc lơngĩq, ãn dòq guh gah hơnuãq Yàc Pô Lơngĩq, nữn dơgrữq mơnuĩh gơnrơh sì dơgrữq pitao hũ gơnuar chơnuãq sigỡuq sì dơgrữq gơnuar prãn kung duh huaĩq Pitrai.