Roglai Bible Literal Text
1 Kô-rin-tô 13:4
Verse 4 is marked below, with the whole chapter around it. Read from the start
Bôh làiq hlãq pơlih đơp dơgrữq sãp đơp pơjẽh anàq mơnuĩh gãm sì mơnuĩh gơnrơh hũ, nữn hlãq ôh hũ kaya khiãng duman, nữn hlãq song tơviãq jỡc sa voh sar ngãq ga tĩq tanĩa hẽla chìc ngãq tơsrãh tanĩa. Bôh làiq hlãq hũ kaya anĩt đơp hwơr sì pơlih thơu pãc avih dơgrữq kaya dơlãp dơđỡuq sì dơgrữq pơnuaĩq jãc rgơi, sì bôh làiq hlãq hũ tãl voh-tui rgơi pồq pađuỡt jỡc chỡq chơr, nữn hlãq ôh hũ kaya khiãng duman, nữn hlãq kung ôh la kaya hagĩq ôh. Bôh làiq hlãq vrơi soh dơgrữq kaya mơnã drơi hũ, sì bôh làiq hlãq tlàq rùp phàp tồq ga hlãq pơlih yeh drơi, nữn mơyah làiq hlãq ôh hũ kaya khiãng duman, nữn hlãq kung ôh hũ kaya hagĩq. Kaya khiãng duman hũ hatai ãt ỡn sì ràc tơviãq kaya lơmuỡn siàp, kaya khiãng duman ôh lơmùq mơvai, kaya khiãng duman ôh pa-chrìq rùp, kung ôh yeh drơi, ôh đơp kaya ngãq iãh, ôh duah lakơu dơgrữq kaya halơi hũ kuơ krơi ga drơi, ôh sơmar nõng mơvai, kung ôh chròq rơmiãq kaya iãh mơsãc, ôh uỗt sơh mưng kaya ôh tơpãq dãng, nữn sơh sơr dơlãp pơnuaĩq tơpãq; Kaya khiãng duman ãt wàq tơleh dơgrữq kaya, pãc-tui avih dơgrữq kaya, chàc gơnang dơgrữq kaya, ãt ỡl avih dơgrữq kaya. Kaya khiãng duman ôh tũq halơi avih. Vơnah tơmo, bôh làiq la hũ kaya anĩt đơp hwơr, nữn nhũ kung ròq nao gãt; bôh làiq la hũ kaya anĩt đơp dơgrữq sãp đơp, nữn nhũ kung ròq padưh avih; bôh làiq la hũ kaya thơu pãc jãc rgơi, nữn nhũ kung ròq kađòc tlàq luơi. Kơyua pơnõq drơi mơgrũ thơu mĩn du nữn, sì pơnõq drơi đơp hwơr kung du nữn mĩn. Nữn dơlãp tũq kaya wil tãl trôh, kaya ka-ôh wil tãl vơnah nữn hũ ròq kađòc tlàq luơi. Tũq hlãq dòq la lơđeh tìt, hlãq đơp yơu lơđeh tìt, hlãq sơnơng yơu lơđeh tìt, pơnuaĩq gơtha hlãq yơu lơđeh tìt. Tũq hlãq prong vloh, hlãq tlàq luơi avih dơgrữq vruãq mơnuĩh lơđeh hũ. Kơyua tũq nĩ, pơnõq drơi iãq bôh dơlãp krơh savĩq mơvràc soh, sì trôh tũq nữn mơta ròq sơmu mơta. Tũq nĩ, hlãq mĩn thơu sa vơnah soh, sì trôh tũq nữn, hlãq ròq kơnãl thơu savĩq wil tãl, kung drưh yơu hlãq song hũ kơnãl thơu savĩq wil tãl. Nữn tũq nĩ dòq wỡq tlơu kaya nĩ: voh-tui, kaya chàc gơnang, sì kaya khiãng duman. Nữn kaya prong màc rlao avih dơlãp tlơu kaya nữn la kaya khiãng duman.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.