मत्ती 7

दुजो गीन पर दोस नही डाकना

(लूका 6:37,38,41,42)

1दोस नोको लगावो, जेनको लक तुमरो पर भी दोस लगायो जाहेत। काहेकी, 21जोन रीती लक तुमी दोस लगावासो, ओनोच रीती लक तुम पर भी दोस लगायो जाहेत, अना जोन पायली मा तुमी नापासेव, ओनोच पायली लक तुमला भी नापो जाहेत। 3जबा तु आपरो भाऊ को डोरा को तिनका ला चोवासेस, तोला आपरो डोरा को लठ्ठा तोला नही सुजासे? 4जबा तोरी च डोरा मा लठ्ठा से, ता तु आपरो भाऊ लक कसो कव्ह सकासेस, आन मि तोरो डोरा लक तिनका हेड़ देवासू? 5हे कपटी पुढ़ा आपरो डोरा मा लक, लठ्ठा हेड़ ले, तबा तु आपरो भाऊ की डोरा लक तिनका साजरो रिती लक चोयके हेड़जोस।

6पवीतर चीज कुतरा गीन ला नोको देव, अना आपरो मोती खालमानी को पुढा नोको डाको, असो नोको होय की वय उन ला पाय खाल्या खुँदेत अना पलट के तुमला फाड़ डाकेत।

मांगो ता भेटेत

(लूका 11:9-13)

7माँगो ता तुमला दियो जाहेत ढुँढो ता तुमी पाहो। खटखटाओ ता तुमरो लाई उघाड़ो जाहेत 8काहे का जो कोनी माँगासे, ओला मिलासे, अना जोन ढुँढासे, वोला भेटा सेत, अना जो खटखटावसे, ओको लाई उघाड़ो जासे। 9तुमी मा लक असो कोन मानूस से, का अदी ओको टूरा ओला भाकर माँगासे, ता उ ओला पथरा देसे? 10अना मसरी माँगासे, ता ओला सरप देसे? 11अता जबा तुमी बुरो होयके, आपरा लेकरा ला साजरी चीज देवासो, ता तुमरो सरग को परमेस्वर बाबुजी आपरो माँगन वालो ला साजरी चीज काहे नही देहे? 122

योको लाई जो काही तुमी चाव्हसो की मानूस तुमरो सँग करे, तुमी भी उनको सँग वसोच बरताव करो, काहे का पवीतर गिरंथ अना मोसे को नियम अना भविस्यवक्ता गीन की सिक्सा याच से।

सकड़ो अना चौड़ो रास्ता

(लूका 13:24)

13सकड़ो बेसकुड़ लक जाव, काहेका चकरो से उ बेसकुड़ अना सिधो से उ रस्ता जोन नास कन जावासेत। अना लगत सा लोक सेत, जोन ओना रस्ता लक जावासेत। 14काहेका सकड़ो से उ बेसकुड़ अना कठिन से उ रास्ता जोन, जिंदगी कन पहुचासे। अना जरासा लोक सेत, जोन ओला भेटासेत।

जसो झाड़ वसोच फर

(लूका 6:43,44,46; 13:25-27)

15खोटो भविस्यवक्ता गीन लक होसियार रव्हने, जोन साजरा कपरा घाल के मेढा को हुलीया मा तुमरो जवर आवासेत, पर भीतर लक फाड़न वारा बिघा को जसो सेत। 16उनको फर लक तुमी उन ला चिन्ह लेहो, का लोकगीन झाड़ी लक अंगूर, अना काँटादार झाड़ लक अँजीर तोड़ासेत ? 17यो रीती लक साजरो झाड़ साजरो फर आनासे, अना निकम्मो झाड़ निकम्मो फर आनासे। 18साजरो झाड़ बुरो फर नही आन सका, अना निकम्मो झाड़ साजरो फर नही आन सका। 19जोन-जोन झाड़, साजरो फर नही आनासे, उ कापके स्तो मा डाकयो जाहे।3 20येना रिती लक उनको फर लक, तुमी उन ला चीन्ह लेहो।4 21जोन मोला हे पिरभु, हे पिरभु! कव्हसे, उनमा लक हरेक सरग को राज मा नही जाय सकत। पर जोन मोरो, परमेस्वर बाबूजी को मरजी लक चलासे, उ जाय सकासेत। 22ओनो दिवस मा मोला लगत सा लोक गीन कहेत, हे पिरभु हे पिरभु, का आमी ना तोरो नाव लक आवन वारो गोस्टी नोको सांगो? अना तोरो नाव लक बुरो आतमा भूत-पलित ला नही हेडिया? अना तोरो नाव लक लगत सा ताकत को काम नही करियो? 23तबा मि उन लक सपा-सपा मना कर देहुँ, अना सांगू, अरे, बुरो करम करनवालो, मोरो जवर लक चली जावो मी तुमीला नही जानासू।

घर बनान वारा दुई मानूस

(लूका 6:47-49)

24एकोलाय जो कोनी मोरो गोस्टी ला आयक के मानासे, उ वा अक्कलवर मानूस जसो से, जेना आपरो घर ला गोटा पर बनावासे। 25अना बरसात भई पूरा आई, अना आंधड चली अना उ घर लक टक्कराई मंग नही पड़यो, काहेका ओकी पाया गोटा मा डाकी गई होती।

26पर जो कोनी मोरी गोस्टी ला आयकसे अना उन पर नही चलासे, उ वोना मानूस को जसो से, जोन आपरो घर रेत पर बनावासेत। 27अना पानी बरसयो, अना पूरा आई, अना आँधड़ चली, अना ओना घर लक टक्कराई अना वा घर पड़के सत्यानास भई गई।

यीसु को हक

28जबा यीसु या गोस्टी कह चुकयो, ता असो भयो की भीड़ ओको सिक्सा लक चकित भय गईन।5 29काहेकि उ उनको मोसे को नियम को गुरू जसो, नही पर अधिकारी जसो उनला सिक्सा देवत होतो।