सत मारग पर चलन वारो किताब

पेरीत 9

साऊल को मनको बदलनो

(पेरीत 22:6-16; 26:12-18)

साऊल अबा तकन पिरभू का चेला गीन ला मार डाकनो की धामकी देवत होतो, उ महान याजक को 1 जवर जायके, दमिस्क नगर की सभाघर 2गिन को नाव मा अधिकार पतर मांगीस जोन को अनुसार मा यदी कोनी यो मारग वालो भेटेत, चाहे वय मरदमाना होय अना आई-माई होय ला बांधके येरुसलेम नगर मा आनो।

जबा साऊल अना वोको संगी यातरा करत-करत दमिस्क नगर को जवर आइन, ता एकाएक बादर लक एक उजोडो चारीकन लक चमकयो। वा जमीन मा पड़ गयो, अना वोना एक आवाज आयकू आई कोनी वोला कव्ह रव्हयो होत्यो। “साऊल, साऊल तु मोला काय लाई सतावासेस?”

साउल ना कहीस, “पिरभू तुमी कोन आव?”

जवाब मिलयो “मी यीसु सेव मोला तु काय लाई तगावसे। उभो होय अना सहेर मा जाय तोला जेव करनो से उ तोला सांगयो जाहे।” वोको संग यातरा करन वारा अवाक रह गईन काहेकी उनना आवाज ता आईकिन पर उनला कोनी नही चोयो। साऊल जमीन लक उभो भयो अना वोको डोरा उघड़ गयो पर वोला काही नही चोवत होतो, एकोलाई वय वोका हात धरके वोला दमिस्क सहेर ले गईन। उ तीन दिवस तकन अँधरा रहेयो, अना वोना काही जेवन नही करयो।

दमिस्क नगर मा हनन्याह नाव को एक बिस्वासी रव्हत होतो, पिरभू न वोला दरसन देयके कहीस, हनन्याह!

वोना उतर देईस “हव पिरभू”

पिरभू न वोला कहीस, अबा तू सिद्दो नाव को गल्ली मा जाय अना पता लगा, वहान यहूदा को घर मा तरतुस नगर को रव्हन वारा, साऊल नाव को एक मानूस यो बेरा पिराथना करासेत। अना वोना दरसन मा चोविसेत का हनन्याह नाव को मानूस वोकोजवर आयके वोको वरता हात राख रहयो सेत, मंग उ चोवन लगयो।

हनन्याह न जवाब देईस हे पिरभू मी न एना मानूस को बारेमा मा लगत सा बुराई आयकिसेऊ, एना तोरो पवितर लोक गिनला येरुसलेम नगर मा कितरो तगाइसेत। अना योभी का मुखिया याजक लक तोरो नाव मा सबच बिस्वास करन वालो लोक गिनला बंदी बनान को अधिकार लेके आइसेत।

पर पिरभू न वोला कहीस तु जाय, काहेकि यो मानूस ला गैरयहुदी अना राजागीन अखीन इसरायल गीनको पुड़ा मोरो नाव लेवन काजी मीना एला बेची सेऊ। अना मी खुदच वोला सांगू। का मोरो नाव को लाय वोला कितरो दुख उचलनो पड़हेत।

तबा हनन्याह उभो होय के घर मा गयो, जहान साऊल होतो, अना भितर जायके अना साऊल पर अपरो हात रखके कहीस, अरे भाऊ साऊल जोन पिरभू यीसु ना यहान आवत बेरा, तोला रस्ता मा दरसन दियो होतो, वोनच मोला धाडीसेस, का तु दुबारा चोवन लगे, अना तू पवीतर आतमा लक पूरो भर जाय। तबा वोच बेरा साऊल को डोरा लक कचरा जसो काही गिरयो, अना उ मंग देखन लगयो। मंग उचलके ओना बप्तिस्मा लेईस। मंग जेवन करके ओना ताकत पाईस। मंगा उ कई दिवस तकन दमिस्क को बिस्वासी व गीन को संग रहेयो। अना उ तुरन्त सभाघर मा यीसु को परचार करन लगयो, का उ परमेस्वर को टूरा से।

साऊल को दमिस्क सहेर मा परचार

सबच आयकन वारा चकित भयि गइन, अना कव्हन लगीन का यो उ मानूस निहोय जोन बिस्वासी गिनला बंदी बनाकै येरुसलेम सहेर मोठयो याजक को जवर ले जान लाय आयो होतो? अना येरुसलेम मा भी बिस्वासी गिनला लगत तगाइसेस।

पर साऊल परचार मा अखिन ताकतवर होतो गयो। अना यीसु च मसीह से ऐना गोस्टी की सबुत देयके वोना दमिस्क सहेर को यहूदी गिनला उघो मुघो कर देइस।

लगत दिवस बितन को मघा, यहुदीगिन वोला जान लक मारन को पिलान करीन।3 यो गोस्टी को साऊल ला पता चल गयो, का सहेर को बेसकुड़ मा लोकगिन मोला मारन को रात दिवस ताक मा सेत। तबा बिस्वासी गिनना रात मा साऊल ला डलिया मा बसाय के सहेर को दिवाल को वोनागन उतार देइन।

साऊल येरुसलेम सहेर को यातरा

जबा साऊल येरुसलेम पहुचीस, ता वोना चेला गीन को समूह मा मिलन को जानो को कोसिस कियो। पर वय सबच वोको लक डरात होतीन। काहेकी उनला यो भरोसा नही होतो का उ सहीमा बिस्वासी बन गयो सेत। तबा बरनबास वोला चेलागीन को जवर ले गयो। अना सागीस का साऊल न रास्ता मा कसो पिरकार लक पिरभू को दरसन करीस, अना पिरभू न गोस्टी करीस। बरनबास न उनला यो भी सांगीस का कसो पिरकर साऊल ना दमिस्क नगर मा बेधड़क यीसु को पिरचार करीस। ऐको बाद साऊल येरुसलेम मा प्रेरिगीन को संग आवन-जावन लगीस, अना बेधड़क पिरभू यीसु को नाव को बारे मा सागन लग्यो। उ यूनानी भासा बोलनवारा यहूदि गीन लक गोस्टी अना बहस करत होतीन, पर वय लोक उनला मार डाकनो चाहव्त होतिन। जबा बिस्वासी4 5 भाऊ बहिन गीन को ऐको पता चलयो ता वय साऊल कैसरिया जहाज घाट ले गईन। अना वहान लक तरसुस नगर ला भेज देइन।

असो परकार अबा सबरी यहुदिया गलील अना सामरिया छैत्र गीन को कलीसिया को बेरा सान्ती लक डर मा बितन लगयो। अना कलीसिया अखीन बनन लग्यो। अना पवीतर आतमा को बड़ावा मा जिंदगी बीतावन लगीन। अना कलिसिया गिनतीमा बड़न लगयो।

लुद्दा नगर अना याफा मा पतरस

पतरस हर जगह हिंडता हुयो, एक दिवस लुद्दा नगर मा रव्हन वारा बिस्वासी गिनको यहान पहुचयो। वहान वोला एनियास नाव को लकवा को रोगी एक मानूस मिल्यो। जोन 8 साल लक खाट मा पडयो होतो। पतरस न वोला कहेयो “वो एनियास यीसु मसीह तोला साजरो करासे उठ अपरो बिछोना उचल।” तबा उ गदने उभो भयो। तबा लुद्दा अना सारोन को सबच रव्हन वारा वोला चोयके पिरभू कन मुरकिन।

याफा नगर मा तबिता नाव को चेली रव्हत होति। जोनको यूनानी अनुवाद दोरकास मजे हिरनी सेत। वा हरामेसा आपरो बेरा साजरो काम अना दान धरम मा बितावत होती। वोना बेरामा वा बिमार भई अना मर गई। उनना वोला आग खोराके वरता पाटन मा राख देईन। लुद्दा नगर याफा सहेर को जवर सेत। चेलागीन ला पता चलयो का पतरस वहान से। तब वय दुई मानूस ला धाडके वोको लक बिनती करीन, की तु गदने यहान आव। तबा पतरस वोच बेरा उनको संग चले गयो। जबा उ याफा नगर पहुचयो तबा लोकगीन वोला वरता पाटन पर ले गईन। उता सबा बेवागिन रड़त-रड़त आखा-पाखा आयके उभो भईन, अना जोन कुरता अना कपरा दोरकास ना उनको संग बनाई होति, वोला दिखावन लगीन। पतरस ना सबला बाहेर काढ दियो। अखीन टोघरा टेकके पिराथना करन लगयो, अना एको मघा उ ओको लास कन मुरकके कहीस “तबिता उठ” अना वा डोरा उघाड देइस, अना पतरस ला चोवके जाग के बस गई। पतरस ना हात धरके वोला उठायो, अना पवीतर लोक गीन अखीन बेवागिन ला हाकलके ओला जित्तो होवनो पर होस मा पुड़ा कर दियो। याफा नगर मा यो गोस्टी फैल गई। अना गजब लोकगीन पिरभू यीसु को नाव पर भरोसा करीन। पतरस याफा नगर मा एक चमड़ा को काम करनवारा मानूस को घरमा रहयो। वोको नाव समौन होतो।

Source notes (5)

Footnote महायाजक
Footnote यहुदिगिन को पिराथना को जघा
Cross-reference 2 कुरिन्थियो 11:32-33
Footnote यीसु पर भरोसा करन वालो लोक
Footnote ईसाईगिन

सत मारग पर चलन वारो किताब. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.