पेरीत 8

साऊल को कलीसिया ला सतावनो

1असो परकार स्तिफनुस को मारो जावनो मा साऊल भी सामिल होतो। वोनो दिवस येरुसलेम सहेर को कलीसिया पर मोठो उपदरा होवन लग्यो। पेरीतगिनला सोड़ सबा बिस्वासी गिन यहुदिया अना सामरिया छेतर मा गाँव-गाँव मा तितर-बितर भय गईन। 2काही भक्त गीन ना स्तिफनुस ला मरघट्टी मा राखीन अना वोको लाई गजब रड़िन।

3साऊल कलीसिया ला मिटकाय रव्हो होतो, अना घर-घर धसके मरद माना गीन ला अना आई-माई ला घसीट घसीटकर जेल मा डाकन लगयो।1

सामरिया मा फिलिप्पुस को परचार

4जेव तितर-बितर भयो होतीन वय साजरो बारता आयकावत हिंडत होतीन। 5अना फिलिप्पुस सामरिया नगर मा जायके लोक गीन मा मसीह को साजरो बारता पिरचार लगयो। 6जबा फिलिप्पुस को गोस्टी ला लोकगीन न धियान धरके आयकिन, अना ओको अचरज को काम अना हिदान चोवयो, तबा वय एक चित भई के वोको काम मा धियान देइन। 7लगत सा लोकगिन जोन मा भूत-पलित झोमयो होतो, वय बेमरात-बेमरात बाहेर हिटीन। अना लगत सा लकवा को बिमार अना लगड़ा-लुला भी चंगा होत होतिन। 8अना वोना नगर मा मोठी खुसी छाय गई।

9वोच नगर मा समौन नाव को एक मानूस होतो। उ जादु-टोना करत होतो। अना सामरिया को लोकगिन2 ला चकित करत होत्यो। उ अपरो आप मा एक मोठो मानूस होवन को दावा करत होतो। 10नहानो लक मोठो तकन सबच वोको गोस्टी पर धियान देवत होतिन। अना कव्हत होतीन, यो मानूस मा परमेस्वर को वोच सक्ती सेत। जोन महान कहेलावसे। 11काहेका वोना लगत दिवस लक उनला अपरी चमत्कार को चक्कर मा उलझायो राखयो होतो। एको लाई वय वोको पर धियान देवत होतिन। 12पर उनना फिलिप्पुस पर बिस्वास करीन। काहेकि वोना उनला, परमेस्वर को राज को साजरो बारता अना यीसु मसीह को नाव आयकावत होतो, ता वय मरदमाना अना, आई-माई दुई बप्तिस्मा लेवन लगीन। 13अना खुद समौन न भी भरोसा करीस। अना बप्तिस्मा लेवन को मघा फिलिप्पुस को संग करिब लक रव्हन लग्यो। उ मोठो हिदान अना अचरज भरो काम चोव के उ दंग भई गयो।

14उतानी येरुसलेम सहेर मा जबा पेरीतगिन असो आयकीन का सामरिया को लोकगिन न परमेस्वर को गोस्टी मान लेईन। ता उनना पतरस अना योहन ला वोको जवर धाडीन। 15जब वय समरिया पहुचिन ता उनना नहान को लोक गिन लाय पिराथना करीन का उनला पवीतर आतमा भेटे। 16काहेकी वय अबा तकन उनमा लक कोनी पर नही उतरयो होतो, उनना ता केवल पिरभू यीसु को नाव मा बप्तिस्मा लेईस होतीन। 17तबा उनना उनको पर हात राखीन अना पवीतर आतमा पाइन।

18जबा समौन न देखीस का चेलागीन को हात राखन लक पवीतर आतमा भेटासे, ता उ उनको जवर रुपया आनके कहीस। 19यो सक्ती मोला भी देव, ताकि जेनो कोनी पर हात राखु वोला पवीतर आतमा भेटे।

20पतरस न वोको लक कहीस, तोरा रुपया तोरो संग सत्यानास भई जाय, काहेका तु न यो सोचयो, का तू धन लक परमेस्वर को दान ला खरीद सकसेत। 21यो दान मा न तोरो हिस्सा सेत न कोनी सांझ-मांझ सेत। काहेकी तोरो बिचार परमेस्वर को पुड़ा सरको नाहती। 22एकोलाई तु अपरी ऐना खोटो बिचार लक मन मुरका पिरभू लक पिराथना कर। हो सका सेत तोरो वा बिचार को लाय छिमा करयो जाहे। 23काहेकी मी देखासू का तू पाप को बेड़ी मा जकड़ो हुया सेत। अना तोरो मन पित जसो कडू बीक सेत।

24समौन, पतरस अना योहन ला जवाब देईस “तुमी मोरो लाई पिरभू लक पिराथना करो का जोन गोस्टी तुमी न कहयो, उनमा लक कोनी गोस्टी मोरो पर ना घटे।”

25मंग पेरीतगिन आपरो गवाही देयके, अना पिरभू को गोस्टी आयकावाय के रस्ता की सामरी गाँवगिन मा साजरो बारता आयकावाता हुया चेताय के येरुसलेम को लवट के गईन।

फिलिप्पुस अना इथोपिया देस को अधिकारी

26पिरभू को एक सरगदूत न फिलिप्पुस3 ला कहीस “तैयार होय अना दक्सिन को रास्ता पर जाय जोन लक येरुसलेम लक गाजा मा जासे।” या एक सुनसान रास्ता से। 27उ तैयार भयो अना चलन लगयो। वहाच एक कुस देस को खोजा4 होतो। उ कुस देस को रानी कन्दाके बाई को खाजाना को खाजांची होतो उ पिराथना करन को लाय यरुसलेम गयो होतो। 28उ अबा लवट रहेयो होतो। उ अपरो रथ मा बसयो, भविस्यवक्ता यसायाह को गीरंथ वाचत होत्यो। 29तबच फिलिप्पुस ला आतमा लक असो लगयो, “वोना जवर जाय अना वहाच ठहर” 30फिलिप्पुस वोना खोजा को जवर परायके पहुचयो अना वोला पुसयो जोन भविस्यवक्ता यसायाह5 को गीरंथ ला वाचसे वोला तु का समझसे?

31अधिकारी न जवाब देईस, मोला जबा तकन कोनी नही समझाय कसो समझ सकासू? वोना फिलिप्पुस लक बिनती करीस का वय रथ पर चघके वोको संग बस जाहे। 32गिरंथ की जोन हिस्सा ला वा बाच रव्हो होतो उ यो होतो।

वोला बली होवन वालो मेंढा को जसो लीजाय रहयो होतिन।

वा तो वोना पाठी को जसो उगो-मुगो होतो, जोन आपरो ऊन कापन वालो को पुड़ा रव्हसे।

ठीक वसोच ही वोना अपरो टोन्ड नही खोलीस।

33वोकी दसा गरीब गोर को जसी होती

वोको नियाव नही करियो गयो वोकी चरचा कोन करेहत?

काहेका धरती लक वोको जिंदगानी हर लियो गयो।

34तबा खोजे न गींरथ वोना हिस्सा ला हेडके फिलिप्पुस लक पुसीस अब अता मोला सांग यो गोस्टी भविस्यवक्ता कोन को बारे मा कव्हसेत, खुद को बारे मा का कोनी दुसरो को बारे मा? 35तबा फिलिप्पुस न कव्हनो चालू करीस अना पवितर गिरंथ की एना कथा को आधार बनायके वोला यीसु को साजरो बारता आयकावाइस। 36वय रास्ता मा जता-जता पानी जवर पहुचीन खोजे न कहीस यो पानी से अबा मोरो बप्तिस्मा मा का रुकावट से? 37फिलिप न उतर देईस अदि तुमी पूरो आतमा लक बिस्वास करसेव ता कोनी रुकावट नही ऐको पर वोना कहीस मी बिस्वास करासेऊ का यीसु मसीह परमेस्वर को टूरा से।

38तबा वोना रथ रोखन को हुकूम देईस तबा फिलिप्पुस अना खोजा दुई पानी मा उतरीन अना फिलिप्पुस न वोला बप्तिस्मा देईस। 39जबा वय पानी लक बाहेर हिटीन त फिलिप्पुस ला पिरभू को आतमा कोनी जगह उचल लेगयो अना वोना खोजे न वोला मंग नही देखीस, अना उतानी खुसी को संग अपरो रास्ता पर चलीगयो। 40इतानी फिलिप्पुस न अपरो आपला सदोद नगर मा पाईस। अना जबा तकन वय कैसरिया पहुचियो तब तकन सबच नगरगीन मा साजरो बारता को पीरचार करत-करत यातरा करत होत्यो।