जकरयाह 14

येरूसलेम नगर अखीन रास्ट

1आयको, यहोवा को एक असो दिवस आवन वालो से, जोनमा तोरो तिजौरी मा को धन लूट के तोरो बीच मा बाट लियो जाहेत। 2काहेका मि सब रास्ट गीनला, येरूसलेम नगर लक लड़ाई करन को लाई जमा करहु, अना उ नगर ले लियो जाहेत, अना घर लूट जाहेत अना बायका भिरस्ट कियो जाहेत। नगर को अरधो लोक बँधुआई मा जाहेत, पर परजा को बचयो लोखगीन नगर मा रव्हन पाहेत। 3तबा यहोवा हिटके उन राज गीन लक असो लड़ेत जसो उ लड़ाई को दिवस मा लडाई करयो होतो। 4वोना दिवस उ जयतून को पहाड़ पर पाय राखेत, जोन दिन उगती कन येरूसलेम नगर को पुढा से, तबा जयतून को पहाड़ दिन उगती लक दिनबुड़ती तकन बीच मा लक फटके लगत मोठो खोदरा भयी जाहेत, तबा आरधो परबत उत्तर को कन अना आरधो दक्सिन कन हट जाहेत। 5तबा तुमी मोरो बनयो हुया वोना खोदरा लक पराय जाहो, काहेकि उ खोदरा आसेल पोहोचेत, अना तुमी असो परायने जसो वोना भुईडोल को भेव लक पारय होतीन जोन यहूदा को राजा उज्जिय्याह को दिवस मा भयो होतो। तबा मोरो परमेस्वर यहोवा आहेत, अना सब पवीतर लोकगीन वोको संग होहेत। 6वोना दिवस ना थंड़ पड़हेत, ना च गरमी ना च खर्रा पड़हेत। 7अना दिवस च रहे, जेनला परमेस्वर जानासे, न ता दिवस होयेत, अना रात होहेत, पर सन्जा को बेरा मा जसो उजाड़ो रहे। 8वोना दिवस येरूसलेम नगर लक जिन्दगी को बोहोतो हुयो पानी फूट हिटेत ओकी एक हिस्सा दिनबुड़ती मा भूमध्य सागर को कन अना दुसरो हिस्सा दिन उगती को मरत सागर को कन बहेत, अना जाड़ो को बेरा मा अना दव को बेरा मा बराबर बहतो रहेत। 9तबा परमेस्वर यहोवा सप्पा धरती को राजा होहे, अना वोना दिवस एकच परमेस्वर यहोवा अना वोको नाव भी एकच परमेस्वर यहोवा मानो जाहेत। 10गेबा नगर लक येरूसलेम नगर को दक्सिन कन को रिम्मोन तकन सब जमीन सप्पाट को जसो होय जाहेत, पर यरूसलेम ओरता होयके बिन्यामीन को बेसकुड़ लक पयले बेसकुड़ को जघा तकन, अना कोन्टावालो बेसकुड़ तकन, अना हननेल को मीनार लक राजा को अंगूररस को कुन्ड तकन आपरो जघा मा बसेत। 11लोकगीन ओको मा बसेत काहेका तबा सिराप को नास नही होहे, अना येरूसलेम बेधड़क बसी रहेत। 12जोन देस ना येरूसलेम लक लड़ाई करयो से, उन सबरी ला यहोवा असो मार लक मारहेत, का उभो-उभो उनको मांस सड़ जाहेत, अना उनको डोरा आपरो पुतरी मा सड़ जाहेत, अना उनको जुबान टोन्ड मा सड़ जाहेत। 13वोना बेरा यहोवा परमेस्वर को कन लक उनमा मोठी आंतक होहेत, अना वय एक दुसरो को हात ला धराय देहेत, अना एकमेक पर आपरो-आपरो हात उठाहेत। 14यहूदा को लोख येरूसलेम नगर को रक्सा मा लड़ेत, अना सोन्नो खुरो, कपरा अना चारो कन को सब देस को धन सम्पती वोको मा बटोरी जाहे। 15अना घोड़ा खच्चर, ऊंट अना गधा को करप अना जितरो जनावर उनको छावनी मा सेत, वय भी वसोच मरही लक मारो जाहेत। 16तबा जेतरा लोख येरूसलेम नगर मा हमला करन सबच देसगीन मा लक बचया रहेत, वय हर साल राजा ला मजे सेनागिन को यहोवा परमेस्वर को स्तूती करन अना झोपड़ी को तिहार मानन को लाई येरूसलेम नगर ला जाहे। 17अना धरती को कुल मा लक जोन येरूसलेम मा राजा, मजे सेनागिन को यहोवा परमेस्वर को अराधना करन को लाय नही, आहेत, उनको यहान बरसात नही होहेत। 18अदी मिसर देस घरानो को कुल नही आयो, तो का उन पर उ मरी नही पड़हेत जोनलक परमेस्वर यहोवा उन लोकगीन ला मारहेत, जोन झोपड़ी को तिहार को मानन लाय नही जाहेत ? 19यो मिसर देस को अना उन सब देस को दंड रहेत, जोन झोपड़ी को तिहार को मानन लाय नही जाहेत। 20वोना दिवस घोड़ा को घंटिगीन पर यो लिख्यो रहेत, “यहोवा परमेस्वर को लाय पवीतर।” अना यहोवा परमेस्वर को भवन को हान्डिगीन उन कटोरा को जसो पवीतर होहेत, जोन होमनकुन्ड को पुढा रव्ह सेत। 21पर येरूसलेम नगर मा यहूदा देस मा सबरी हान्डिगीन सेनागिन को यहोवा परमेस्वर को लाय पवीतर हिटेत अना सब मेलबली करनवारा आयके उन हन्डिया लक मांस पकाया करयेत। तबा सेनागिन को यहोवा को भुवन मा कोनी धन्धाकरनवारा नही पायो जाहेत।