भजनसंहिता 30:5

धन्यवाद की पिराथना

(भवन को सम्मान को लाय दाऊद को भजन )

1एकोलाय ओ यहोवा, मी तोरो स्तूती करुँसू; काहेकि तूना मोला बचायो से।

अना मोरो बयरीगिन ला मोरो पर खुसी मनान लक रोकयो से।

2ओ मोरो परमेस्वर यहोवा मीना मदद को लाय तोरी दुहाई दियो

अखिन तू ना मोला सजरो कर दियो।

3ओ यहोवा, तू ना मोरो पिरान ला मरन लोक लक बाहेर हेड़योस।

तू न मोला जिन्दो रखयोस

अखिन कबर मा पड़यो रव्हन लक बचायोस।

4हे यहोवा पर भरोसा करन वालो सेवक लोगहुन, ओको भजन गाओ

अखिन जोन पवीतर नाव को हेत करके,

ओको धन्यवाद करो।

5काहेकि ओको गुस्सा तो जरासो देर भर को रव्हासे ,

अना ओकी दया जिन्दगी भर की होव्हसे।

अना कभ्भु रात मा रोवनो पड़ सकासे ,

मंग सक्कारी खुसी आय जाहे।

6मी न तो आपरो चैन को बेरा कह्यो होतो

“मी हमेसा अटल रव्हु।”

7ओ यहोवा, आपरी किरपा लक तूना

मोला पहाड़ को जसो अटल अना पिक्को करयो होतो;

जब तू ना आपरो टोंड फेर लियोसे तब मी घबराय गयो।

8ओ पिरभू, मीना तोला च हाकलयो,

अखिन यहोवा लक गिड़गिड़ाय के यो बिनती करयो, का

9जब मी कबर मा चलयो जाहु

तब मोरो खून लक काजक फायदा होहे?

काय माटी तोरो धन्यवाद कर सकासे?

काय उ तोरी सच्चाई को पिरचार कर सकासे?

10ओ यहोवा, आयक, मोरो पर दया कर;

ओ यहोवा, तू मोरो सहायक होय।

11तूना मोरो लाय विलाप ला खुसी मा बदल दियोस;

तूना मोरो सोक-चिनान ला उतार के मोला खुसी को कपरा पहनायो,

12जोनलक मोरी आत्मा तोरो भजन गावत रव्हे

अखिन कभ्भु चुप न होय।

हे मोरो परमेस्वर यहोवा ,मी सदा तोरो धन्यवाद करतो रहुँ।