होसे 2

1एकोलाय तुमी लोक आपरो भाऊ लक मोरो लोख1 मन्जे मोरी परजा अना आपरो बहिन गिन लक रुहामा मजे जोन पर दया भयी से आयकावो।

गोमेर अना इजराइल को लोखहुन बेईमान

2“आपरो माय लक झगड़ा करो, काहेकि वा मोरी बायको नहात,अना मी वोको नवरा नही सेऊ। वा आपरो टोंड लक आपरो छिनालपन ला अना आपरो, छाती गिनको बीच लक छिनरा लोख गिनला बेगरो करेत। 3नही तो मि ओको कपरा उतार के वोला जलम को दिवस को जसो बिन कपरा को कर देहू, अना वोला बालू को जघा को जसो अना बिरान जघा जसो बनाहूँ। मी वोला तहान लक मार डाखू। 4वोको लेकरा गिनको पर भी मी काही दया नही करू। काहेका वय खोटो करम को लेकरा सेत। 5वोकी माय ना छिनाला करयो से। ओको पोट मा वय पड़यो, वोना लाज को काम करयो से। वोना कव्हयो, मोरो चहेतो यार जोन मोला भाकरी–पानी, ऊन, सन तेल अना अंगूर को रस देवासेत, मी उनको मंघा चलहुँ।”

6“एकोलाय चोवो मि वोको रस्ता ला कांटा लक घेरूँ, अना असो रुधान उभो करहू कि वा रस्ता नही पाय सकेत। 7वा आपरो यारगीन को मंघा चलनो पर वोला नही भेटेत, अना उनला तपासन लक भी नही पाहेति। तबा उ कव्हेत, मि आपरो पयले नवरा को जवर लवट जाहीन, काहेका मोरो पहेलो दसा यो बेरा को दसा लक साजरो होती।”

8वा यो नही जानत होती, का अनाज अना नवतो अंगूरी रस अना जैतून को तेल मी वोला देवत होतो, अना वोको लाय खूरो मुदरो, जोनला वय बाल देव को काम मा ले आवासेत, मी च बढावत होतो। 9यो कारन मी अनाज को मवसम मा आपरो अनाज, अना नवतो अंगूर को रस होवन को बेरा मा अपरो नवतो अंगूर को रस ला, अना आपरो ऊन अना सन भी जोन लक उ आपरो देह झाकत होती, मी हिसक लेहू। 10अबा मी वोको यारगीन को पुढ़ा ओको तन ला उघाड़ूँ, अना मोरो हात लक कोनी वोला नही सूड़ा सकेत। 11मि ओको तिहार, नवतो चंदा अना बिसराम को दिवस अना सबरी बेरा को तिहार को आखीर कर देहू। 12मी वोको अंगूर को अना अँजीर को झाड़ ला, जिनको बिसय मा वा कव्हत होती, का यो मोरो छिनाला को कमाई से, जोन मोरो यार खसम गिनना मोला दियो सेत। उनला असो बिरान कर देहू का वय जंगल जसो भयी जाहेत, अना जंगली जनावर उनला चर डाखेत। 13वय दिवस जोन मा उ बाल देव गिनको लाय धूप पेटायी, अना नथ अना हार घालयो आपरो खसम यार गिनको मंघा जासेत, अना मोला बिसर गयी होती, वोना दिवस को सजा मी वोला देहू, यो यहोवा को सबद आय।

आपरो लोकगीन को लाय परमेस्वर को माया

14“एकोलाय चोवो मि ओला मोह के जंगल मा ले जाहुँ। अना उता वोको लक सान्ती को गोस्टी सांगू।” 15अबा मी वोला अंगूर को बाड़ी देहुँ, अना आकोर मजे दुख को घाट ला आस को बेसकुड़ कर देहुँ, अना उता वा मोरो लक असो गोस्टी कहेत, जसो आपरी जुवानी को दिवस मा, मजे मिसर देस लक चली आवन को बेरा कव्हत होती। 16यहोवा को यो सबद से,

का वोना बेरा तू मोला ईसी मजे मोरो नवरा कहे अना मंग मोरो मालीक2 नही कहेत। 17काहेका भविस्य मा मी वोला बाल देव को नाव नोको लेन देऊ, अना ना उनको नाव हेत मा रहेत।

18वोना बेरा मी उनको लाई जंगली जनावर, अना बादर को पक्सी, अना धरती मा को रेंगनवारा जन्तुगीन को संग करार बांधू अना धनुस अना तरवार तोड़के लडाई ला उनको देस लक दूहुर कर देहू। अना असो कर देहू का वय लोक बेखटका सोयो रहेत।

19मी हरामेसा को लाय तोला आपरो बायको बनान को वादा करहुँ,

अना यो करार नेकीपन,

नियाव,

करूना अना दया को संग करहु।

20मी तोला भरोसा काबील को संग बिहाव को बचन देहुँ,

अना तु परमेस्वर ला जान लेहेती।

21“यहोवा को यो सबद आय,

वोना बेरा मी बादल को आयक के, ओला जवाब देऊ,

अना उ धरती को आयक के, ओला जवाब देहेत।”

22अना धरती अनाज, नवतो अंगूर को रस,

अना ताजो तेल को आयक के उनला पयदा करे,

अना वय यिजरेल ला जवाब देहेत,

23मि आपरो लाय वोला देस मा बोवाहू,

अना मी वोको पर आपरी दया चोवाहू

“जोनला मीना आपरो पिरेमी

नही”3 कहयो मी ना उन लक उ भी जोन

मोरी परजा नही4 अना वय कहेत, “तुमी मोरो परमेस्वर से।”