Powari Standard Project
इब्रानियो 6
एकोलाय आव अमी मसीह को बुनियाद को सिक्सा ला सोड़के पक्को बनन को सिक्सा कन बड़बीन। अमीला उन सूरुवाती गोस्टी कन नहि बड़नो सेत। ज सो मरनो कन ले जावन वालो काम, को लाय मन मुरकानो, परमेस्वर पर बिस्वास परमेस्वर में बिस्वास, बपतिस्मा को सिक्सा, अखीन हात धरनो, अना मरो हुवो लक जित्तो उठनो, अना न्याव जोनलक आमरो अमर जीवन पक्को होहेत। अना अदी परमेस्वर चव्हसेत तो आमी असोच करबीन। जोनला एक बार उजाड़ भेटयो सेत, जोन सरग को बरदान चीख लियो सेत। जोन पवितर आतमा को हिस्सादार बन गयोसेत।
जोन परमेस्वर को बचन को साजरोपन अना आवन वालो जुग को ताकत को अनुभव भय गयो सेत। यदि वय भटक जाहिन तो उनला मन मुरकाके लवटानो मुस्किल सेत। उनना जसो आपरो ढंग लक नवा सिरा लक परमेस्वर को टूरा ला मंग कूरूस मा चघायो अना वोको सबको सामोर बेइज्जती करयो।
जोन जघा मा बार-बार पानी पड़ासेत। धरती बरसात को पानी पिवासेत। तबा जोतन बोवन वारा लाय फायदा होवासेत। मंग धरती झाड़ उपजाय के परमेस्वर को आसिरवाद पावासेत। पर अदी उ काँटादार झाड़ उपजान वारा ज़मीन सेत। तो बेकाम अना सापित होवन को कारन, आखीर मा स्तो पेटानो पड़येत।
मोरो चहेतो भाऊहुन! मंग आमी असोच सांगिसेजन। मंग अमीला पक्को भरोसा सेत। का तुमरो दसा एको लक कही साजरा सेत। अना तुमी मुकती को मारग पर चलासेव। परमेस्वर बैईमान नाहती। उ तुमारो काम अना तुमरो पिरेम ला, नही बिसरा सकत। जो तुमी ना वोको नाव को महिमा को लाय करयो सेव। अना पवीतर सन्तगिन को सेवा करासो, अना अबा भी करासो। अमी चाव्हसेजन, का तुमरो मा लक हरेक जिंदगी भर असोच कड़ो मेहनत करतो रव्हे। अदि तुम्ही असो करासेव, ता तुम्ही पक्को च जोनको आस राखासेव वोला पाय जाहो। तुमी लोक अलाली नोको करो। पर उन लोकगीन को नकल करो। जोन आपरो भरोसा अना धिरज को कारन लक उन चीज गिनला पा रहयो सेत जोनको परमेस्वर वायदा कियो होतो।
जब अबराहम लक परमेस्वर ना परन कियो होतो। तबा परमेस्वर ना चोवयो, मोरो लक मोठो कोनी नाहती, जेनको मी करिया खाऊ ता वोना आपरो च किरिया खायो। अना कव्हयो “मी सच्ची-मुच्ची मा तुम्हिला लगत आसीरवाद देहिन। अना तोरो खानदान को लोकगीन ला बेगिनती कर देहिन।” अबराहम ना लगत बेरा तकन धिरज धरन को मघा वायदा को फर पाइस। लोक आपरो लक मोठो को नाव को, किरिया खावासेत। अना उनको झगड़ा रार करार को संग, खतम भई जासे। एकोलाय जब परमेस्वर ना करार को वारसाना गिन पर। अवर सफा-सफा आपरो करार ला बिना बदले पूरो करनो चव्हत होतो। एकोलाय वोना किरिया खा के करार करीस। उ ऐना दुई नही बदलन वारा गोस्टी, मन्जे करिया अना करार, खोटो नही होय सकत। एकोलक अमी जोन परमेस्वर को सरनमा सेत। अमीला असो लगासेत का आमरो आस बिलकुल सही सेत। यो आस आमरो आतमा को लाय एक मजबूत लंगर को जसो सेत। जोन पड़दा को वोनागन भीतर सरग को मंदिर मा पहुचावा सेत। जहान यीसु आमरो सब लक पहेलो दूत को रूप मा धस चुकयो सेत। काहेका उ मलिकिसिदक को जसो सदा को काजी महायाजक बन गयो सेत।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.