Powari Standard Project
सभोपदेसक 8
अक्कलवर जसो कोन से? कोन ला या गोस्टी मालूम से? अक्कल लक अक्कलवर मानूस को टोंड चमक जासे। अना वोको चहेरा को कड़ोपन दूहूर भय जासेत।
राजा को हुकुम
परमेस्वर को सामुर खाई गई कसम, को कारन राजा को हुकुम ला मानो। राजा को सामुर गदने नोको जाव अना बुरी गोस्टी मा मन नोको लगाव, काहेकि राजा वोसोच करहेत जसो वोला साजरो चोवासे। राजा की गोस्टी मा अधिकार रव्हासे, वोला कोन कव्हेत, का तुम्ही का करासेव? जोन मानूस हुकुम ला मानासे, वोको कभ्भू बुरो नही होयेत, काहेकि अक्कलवर ला सही बेरा अना सही तरीका मालूम रव्हासे। काहेकि हरेक बिसय को नेम अना बेरा रव्हासे, मंग एक मानूस पर संकट आय च जासे। अना कोनी मानूस ला योच मालूम नहाय का, काजक होहे, ता कोन वोला सांग सके का, काजक होहे? वारा ला थामन को हक कोन मानूस को जवर से? अना मरन को दिवस कोन को पिरभू कोन से? अना वोला लड़न लक छुट्टी नही होय सकासे, अना जोन बुरो करासेत वोय बुराई लक कसो बच सकासेत? जेतरा काज धरती पर करयो जासेत, हरेक काज चोवन पर, एक मानूस दूसरो मानूस की बुराई लाई वोको अधिकार ला वापरसेत। तबा मीना दुस्ट गिनला गाड़ता चोवयो, मजे उनको ता समाधी बनयो, पर जोन ना साजरो काम करयो होतिन, वोय पवितर जाघा मा लक हीट गयीन, अना उनको नगर मा हेत भी नही रहयो। एकोलाय यो भी बेकार च से। बुरो काज को सजा को हुकुम लवकर लक नही दियो जासेत, एकोलाय मानूस को मन हमेसा बुराई करन मा लगयो रव्हासे। पापी चाहे सम्बर बार बुरो करे अना अपरो उमर ला बढावतो रव्हे, पर पक्को से का जोन परमेस्वर लक पिरेम करासे अना वोको भेव मानासे, अना वोको समोर जावासे उनको भलोच होयेत। पर पापी को संग साजरो नही होयेत, अना ऊ सावली घाई अपरो जिन्दगी ला लम्बो नही कर सकत, काहेकि वोमा परमेस्वर को पिरेम अना भेव नहाय। धरती मा अखिन एक गोस्टी बेकार से, मजे एक असो नेक मानूस से जोनको वसो दसा होवासे जसो पापी मानूस को होवनो पाहिजे। अना असो पापी भी सेत जोनको वा दसा होवासे जोन नेक मानूस को होवनो पाहिजे। मीना सांगयो अता यो भी बेकार च से! तबा मीना खुसी की बड़ाई करयो, दिन को खाल्या मानूस लाई एको लक साजरो काही नहात, का ऊ जेवन करे पिये अना खुस रव्हे, अखीन काही भी साजरो नहात। काहेकी वोको जिन्दगी भर जोन परमेस्वर ना वोको लाय धरती मा ठयरायो वोकी मेहनत वोको संग हमेसा बनो रहेत। जबा मीना अक्कल भेटेत यो काजी सप्पा काम जोन धरती मा करयो जासे वोला चोवन लाय आपरो मन को डोरा उघाड़ो तबा मीना पायो का कसो मानूस राति-दिवस जगासे? तबा मीना परमेस्वर को हरेक काम चोयो, तबा मोला मालूम भयो का दिन को खल्या होवन वालो काम को थाय मानूस नही पाय सकासे। चाहे मानूस वोला ढुढंन कोलाय कितरोच मेहनत करे, मंग वोला नही जान सकेत। अना अक्कलवर कहेत का मी वोला समजू ता भी वोला समजमा नही आहेत।
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.