Powari Standard Project
सभोपदेसक 5
परमेस्वर को वादा ला पूरो करनो
जबा तुम्हि परमेस्वर को भवन मा जावने तबा सतरक रव्हने, मूरख की बली चघवनो लक साजरो से जवर जायखे आयकनो, काहेकि वोय नही जानसेत का वोय बुरो करासेत। कोनीच गोस्टी करनो मा लवकर नोको करने, अखिन अपरो मन की कोनी गोस्टी परमेस्वर को सामोर नोको कव्हने, काहेकि परमेस्वर सरग मा से अखिन तु धरती मा सेस एकोलाय तोरा बचन जरासो रव्हे। काहे की बेजाच काम करन को कारन वोच सपना मा चोवासे। वासोच बेजा बोलनवारो भी मूरख होसे। जबा तुम्हि परमेस्वर को लाई मानता मानने, तबा वोला पूरो करन को लाय उसीर नोको करने, काहेकि उ मूरख गिन लक खुस नही होवासे। जोन मन्नत तूम्हिना मानी सेव वोला पूरो करने।1 मानता मानखे पूरो नोको करनो लक मन्नत नोको माननो साजरो से। कोनी बचन सांगके अपरो आप ला पाप मा नोको फसावने, अखिन परमेस्वर को खबरिया को सामोर नोको कव्हने का यो गलती लक भयो, परमेस्वर तोरो आयक के काहे गुस्सा होय, अना तोरो हात को काम गिनला नास करहे। काहेकि सपनागिन को बेजा होवनो लक बेजा बेकार गोस्टी होसे, पर तुम्हि परमेस्वर को भेव मानने।
धन बेकार से
अना तोला कोनी परदेस मा गरीबगिन पर अत्याचार होतो चोवो, अना तुम्ही उता न्याय अना न्यायीपन ला बिगड़तो चोवो, ता अचरज नोको करने, काहेका एक अधिकारी को वरता वोको लक मोठो दुसरो अधिकारी रव्हसे। धरती को उपज सबको लाय से, पर खेत लक राजा को भी काम हेड़ासे। जोन पयसा लक पिरेम राखासे वोको जवर पूरो नही होवासेत, जोन कोनी धन लक पिरेम करासेत, वा कभ्भु आपरो कमाई लक सन्तोस नही होवासेत, यो भी बेकार से। जबा धन बढासे, ता वोका खावन वाला भी बढा सेत, तबा वोको मालिक ला येला सोड़ अखिन काजक फायदा होसे का वोय धन ला अपरो डोरा लक चोवे? बनी करन वारो को लाय जप बरदान से। चाहे वोला अरधो पोट या पोट भर जेवन भेटेत पर वोला भरपूर जप आवासे पर धनी को डोरा लक जप उचट जासेत। मोला धरती मा एक बेजा बुरी बला चोईसे, मजे ऊ धन जेला ऊ मालिक ना अपरोच नुकसान लाई राखी सेस, अना ऊ कोनी बुरो काज मा खरच होय जासे, अना वोको घर मा टूरा पैदा होसे पर वोको हात मा काहि नही रव्हे। जसो ऊ माय को पोट मा लक हिटियो, वोसोच लवट जाहे, बिन कपरा को आयो होतो अना वसोच चले जाहेत, उ आपरो कमाई नही लिजा सकेत। या भी एक दूखदाई बुराई से का जसो उ आयो, वसोच उ जाहे, वोला वा बेकार को मेहनत लक अखिन का फायदा से? अपरो पूरो दिवस इन्धार मा, निरासा मा अना गुस्सा को संग जेवन करासेत। आयक, जोन साजरी गोस्टी मोला चोयी से, पर जोन साजरी से वोला मानूस खावनो-पिवनो अना अपरी मेहनत लक जोन ऊ दिन को खाल्या करासे, अपरो पूरो जीवन भर जेला परमेस्वर ना वोला देईसेस, सुखलक रव्हे, काहेकि वोको हिस्सा योच से। पर सबच मानूस जोनला परमेस्वर ना धन देयी सेस अना वोको लक सुख भोगनो अना वोको मा लक अपरो हिस्सा लेवनो अना मेहनत करतो हुयो खुसी मनावन की ताकत भी देईसेस, यो परमेस्वर को आसीरवाद आय। यो जीवन को दिवस वोला लगत हेत नही रव्हेत। काहेका परमेस्वर वोको आयक के वोको मन ला खुसी मा राखासे।
Source notes (1)
- Cross-reference गिनती 30:2; भजनसंहिता 66:13
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.