Powari Standard Project
सभोपदेसक 3
सब काही को लाय एक बेरा
सबच गोस्टी को एक मौका से, जोन बादल को खाल्या हरेक काम को एक बेरा से। जलम अना मरन कि बेरा, पेरन अना कापन की बेरा होवासे। मारन को बेरा अना साजरो करन को बेरा, अखिन पाड़न की बेरा अना बनावन की बेरा से। हासन अना रड़न की बेरा, छाती पीटन अना नाचन की भी बेरा रव्हसे। गोटा फेकन अना वोला उचलन को बेरा, अखी गरो लगावन अना दूहूर राखन की भी बेरा रव्हासे। ढुढ़न को बेरा अना बिसरन की बेरा, ठेवन की अना फेकन की भी बेरा रव्हासे। फाड़न अना सीवन की बेरा , बोमलन की अना चुप रव्हन की भी बेरा रव्हासे। पिरेम अना झगड़ा करन की भी बेरा, लड़न की अना मेल करन की भी बेरा रव्हासे। काम करन वारा गिनला जादा मेहनत लक का फायदा होसे? मीना वोय दुख भरया काम गिनला चोयोसेव जोन ला परमेस्वर ना मानूस लई राखी सेस , का वोय वोला करत रहेत। वोना हरेक चीजला आपरो बेरा को खोप सूरत बनायो से। वोना मानूस को हिरदय मा सनातन अमर बेरा भी स्थापित कियो से मंग कोनी नही समज सकेत का परमेस्वर ना सूरू लक आखीर तकन काजक कियो से? मीना परख लेईसेव का मानूस लई खुस करन अना उमर भर भलाई करन को सिवाय अखि काही साजरो नहाय। अना यो भी परमेस्वर को कन लक दान से का, हरेक मानूस खाय-पीये अना अपरी सबच मेहनत मा सुखी रव्हे । मी जानासू का जोन काही परमेस्वर करासे उ हमेसा पक्को रव्होसे अना न ओको लक काही कम अना जादा नही भयो सकासे परमेस्वर असो से एकोलाय वोको भेव मानो। जोन काही भी भयो वा पहले भी भयो से, अना जोन होवनवारो से वा भी भयी गयो से। अना परमेस्वर बीती गोस्टी अखि पूसासे।
मंग मीना दिन को खाल्या चोवयो का न्याय को जघा मा अन्याय अना नेकी को जाघा मा बदी होवासे। मीना मन मा कह्यो “परमेस्वर नेक अना दुस्ट दूई को न्याय करहेत” काहेकि वोको यहान एक-एक बिसय अना एक-एक काम की बेरा से। मीना मन मा कह्यो का यो असो लाय होसे का परमेस्वर मानूस ला परख सकेत की वोय जनावर घाई सेत। काहेकि जसी मानूस की दसा वसोच जनावर गिन को दसा रव्हसे। जसो एक मरासे वोसोच दुसरो भी मरासे, सबच की सांस वोसीच रव्हासे, अना मानूस जनावर लक बढके नहाय, एकोलाय सबच बेकार से। सबच एक जाघा मा जासेत, सब माटी का बनया आत, अना सब माटी मा मिल जासेत। का मानूस को जान वरता चघा से, अना जनावर को खालया जायके माटी मा मिला से? असो कउन जानासे ? मीना यो चोवयो एको लक साजरो गोस्टी कोनी नहाय का मानूस अपरो काम मा मगन रव्हे काहेकि ओको भाग मा असोच से, काहेका उनला कवन चोवाय सका सेत का उनको मघा काजक होहेत?
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.