Powari Standard Project
दानिय्येल 8
दानियल ना एक मेढा अखीन एक बकरा का दरसन
बेलसस्सर राजा को राज को तीसरो साल मा मी दानिय्येल, पहेलो दरसन को बाद मा एक अखीन दरसन चोयो। जब मी एलाम परदेस को सूसा नाव को एक सहेर मा रव्हत होतीन। तबा मी ना दरसन मा चोयो का मी ऊलै नद्दी को किनार मा सेऊ। मंग मी ना डोरा उचल के चोयो, का वोना नद्दी को मोहरा दोन सींग वालो एक मेंढा उभो से। ओको दुय सींग मोड़यो सेत, पर उनमा लक एक लगत मोठो से अखीन जोन मोठो से वा दूसरो को बाद हिटयो। मी ना वा मेंढा ला चोयो का उ दिन बुड़ती, उत्तर दक्सिन कन सींग मारासेत। अखीन कोनी पिरानी वोको समोर उभो नही रव्ह सकासेत। ना कोनी वोको हात लक बच सकयो, उ आपरो मनसा को अनुसार काम करके बढतो जावत होतो। मी बिचार करत रह्यो, मंग काजक चोयो का एक बकरा दिन बुड़ती कन लक हीट के सप्पा धरती को पर असो हिन्डयो का हिन्डत बेरा वोको पाय अथपर मा होतो धरती मा नही टिकत होतो। अखीन वोना बोकरा को डोरा को बीचमा एक चोवन लायक सींग होतो। मंग उ तगड़ो बकरा दोन सीग वालो मेन्ढी मजे परमेस्वर को पाठी को जवर आयो। यो वोच मेंढा होतो जोनला मी ऊले नद्दी को किनार मा ऊभो चोयो होतो। वा बोकरा हिजड़ गयो होतो , अना वा मेन्ढा को कन झपटयो।1 अखीन मेंढा को जवर आयके वोला पटक दियो। अखीन वोको दूई सींग ला तोड़ दियो अखीन अपरो पाय लक खुन्द-खुन्द के कुचल दियो अना वोना तगड़ो बकरा लक बचावन वालो कोनी नही भेटयो। तबा बकरा लगत डींग मारन लगयो अखीन जब उ लगत ताकत लक भर गयो। तबा वोको एक सींग टूट गयो। अखीन वोको जघा मा खोबसूरत चार सींग हिटयो अखीन चारी कना बड़न लगयो। मंग उनमा लक लहान सींग अखीन हिटयो, जोन दक्सिन अखीन दिन उगती अखीन वादा को देस कन लक लगत बढ़त गयो। वोको ताकत एतरो बढ़ गयो का वा सरग को सेना तकन पर हमला करयो, अखीन वोको मा लक अखीन बादल को तारागिन लक कितरो ला धरती मा पाड़ के रवन्द-खवन्द कर दियो। यहाँन तकन कि सरग को परधान अधिकारी सरगदूत ला भी चुनोती दियो अखीन वोको रोज को होमबली बन्द कर दियो गयो, अखीन वोको पवीतर जघा ला पाड़ दियो गयो। बिरोध को कारन परमेस्वर को लोग अना रोज को होमबलि ला वोको हात मा कर दियो गयो। वोना सत ला माती मा मिलाय दियो अखीन लहान सींग जोन काही भी करत होतो उ सबा सुफल भयी गयो। तबा मी ना एक पवीतर मानूस ला दूसरो लक कव्हतो आयकयो वा दरसन जोनमा हरामेसा को होमबली जोन बिरान होवन को काम बनासेत, पवीतर जघा को समरपन , अखीन परमेस्वर को लोग गीनला पाय खाल्या रवन्दो जावनो चोवायो गयो से। यो सबा बिरोध कबा खतम होहेत? अखीन दूसरो ना सांगयो दुय हजार तीन सव दिवस तकन सन्जा सक्कारी होहेत तब तकन असो होवत रव्हे, तब लक दुबारा जुनो पवीतर बिधी सुरु कियो जाहेत।
सरगदूत गेबरियल ना दरसन को बखान करयो
यो दरसन को गोस्टि चोय के मी दानिय्येल, एला समजन को कोसीस करन लगयो, इतरो मा मानूस को रूप धरयो कियो चोवयो। तबा मोला ऊलै नद्दी को बीचमा एक मानूस ला हाकलतो आयको। जिबरायील यो मानूस ला एको दरसन को गोस्टि ला समजा देव। तबा जिता मी उभो होतो उता उ मोरो जवर आयो। अखीन जसो उ आयो वसोच मी घबरा के तोन्ड को बल पड़ गयो। तबा वोना मोरो लक कह्यो, ओ मानूस को टूरा उन चोयो गयो गोस्टि ला समज ले, काहेका यो चोयो हुयो दरसन को बारेमा समज ले काहेका यो आखीर बेरा को दरसन को बारे मा से। जब उ मोरो लक गोस्टि करत होतो, तबा मि बेहोस होयके जमीन मा पड गयो, पर उ मोला धर लियो अखीन मोला मोरो पाय मा ऊभो कर दियो। तबा वोना कह्यो, गुस्सा भड़कन को आखरी बेरा मा जोन काही होहेत वोच मी तोला कव्हासू। काहेका आखरी को ठयरायो गयो बेरा मा सप्पा पूरो भयी जाहेत। जोन दोन सींगवालो मेंढा तूना चोयो से वोको मजे मादी अखीन फारस को राजा2 से। अखीन वा बाल वारो बकरा यूनान को राज से, अखीन वोको डोरा को बीच जोन मोठो सींग हिटयो से उ पहेलो राजा से। अखीन उ सींग जोन टूट गयो अखीन वोको जघा मा जोन चार सींग हिटयो, वोको मतलब यो से का वोना देस लक चार सासक हीटेत। पर वय एक को जसो तगड़ो नही होहेत। जब उन राज को आखरी जवर होहेत अना वय इतरो बिदरोही दुस्ट भयी जाहेत का उनला सजा देवनो पाहिजे तबा उता एक, जिद्दि, दुस्ट, अना धोका बाज राजा होहेत। वोको ताकत लगत बड़ जाहेत। पर वोको पहेलो राजा जसो नही होतो। अखीन उ अदभूत रीत लक लोख हुनको नास करहेत अखीन सुफल होय के काम करतो जाहेत। अखीन ताकत लक पवीतर लोख हुनको दल को नास करहेत। वोको चलाकी को कारन वोको कपट सुफल भयी जाहेत अखीन उ हिरदय मा घंमड कर बेधड़क लगत लोक गिनको नास करहेत। उ सप्पा राजा गिनको बिरोध मा उभो होयेत। पर आखीर मा उ कोनि को हात लक बिना मार खाय टूट जाहेत। सन्जा अखीन सक्कारी बेरा को बारेमा जोन काही समझो से अखीन चोयो से वा सच्चाई से। पर जोन काही तूना दरसन चोयो से वोला गुप्त राख काहेका उ काही दिवस को बाद पूरो होहेत। तबा मी दानिय्येल को ताकत जान लगयो, अखीन मी काही दिवस बीमार रह्यो, मंग मी जाग के राजा को काम चोवन लगयो, पर जोन काही मीना चोयो होतो वोको लक मी ने चकित रह्यो, काहेका वोला समजान वालो कोनी नही होतो।
Source notes (2)
- Footnote मालिक होनो दरसावा सेत
- Footnote मूल मा राजा
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.